Prezident İlham Əliyevin həyata keçirdiyi uğurlu idman siyasəti ölkəmizi dünya idmanının və Olimpiya hərəkatının ən fəal üzvlərindən birinə çevirib

Ülvi Quliyev: Bu gün dünyada qısa müddətdə güclü idman infrastrukturu yaratmağın, Olimpiya hərəkatının öncül ölkələrindən birinə çevrilməyin Azərbaycan modeli var

Müsahibimiz Milli Məclisin üzvü, Azərbaycan Respublikası Karate-Do Federasiyaları Assosasiyasının Prezidenti Ülvi Quliyevdir:

- Ülvi müəllim, Azərbaycan idmançılarının XXX London Yay Olimpiadasında əldə etdiyi qalibiyyət hər bir azərbaycanlı üçün qürur hissi verdi. Ümumiyyətlə, idmançılarımızın çıxışını ötən Olimpiya oyunları ilə müqayisədə necə qiymətləndirirsiniz?

- İlk olaraq vurğulamaq lazımdır ki, Olimpiya oyunları idman yarışları arasında ən yüksək zirvədir. Digər tərəfdən, bu oyunların şüarında da səsləndiyi kimi əsas olan yarışlarda iştirak etməkdir. Bəziləri bu fikri bir az sadə qarşılayır, amma nəzərə almaq lazımdır ki, Olimpiya oyunlarında iştirak etmək üçün hər bir idmançı bir neçə yüksək səviyyəli yarışlarda yüksək nəticələrə nail olmalıdır. Bu lisenziyanı əldə etmək demək olar ki, bütün gücünü, bu sahədəki istedadını ortaya qoymalısan. Bu gün Azərbaycanın Olimpiya komandasının sayının artması məhz idmançılarımızın dünya, Avropa və digər beynəlxalq miqyaslı yarışlarda əldə etdiyi nailiyyətlərin nəticələridir. O baxımdan, bir idmançımızın Olimpiya oyunlarında iştirakı bir neçə mərhələdəki qalibiyyətimizin bəhrəsi sayılmalıdır. İkinci bir tərəfdən, ötən Olimpiya oyunlarındakı nəticələrlə son nəticələrə müqayisəli şəkildə yanaşsaq, bunu bir neçə istiqamətdən dəyərləndirə bilərik. Birincisi, iştirakçıların sayının artması ölkəmizdə idman siyasətinin uğurlarından, idmançılarımızın dünya arenasındakı qalibiyyətindən xəbər verir. Medal sayının artımı, rekord saya çatması isə idmana qayğının ortaya qoyduğu nəticəyə əsaslanır. Yəni, istər kəmiyyət, say, istərsə də keyfiyyət baxımından Azərbaycan Olimpiya yığmasının çıxışı olduqca yüksək səviyyəlidir. Sıralamaya baxanda bizdən geridə qalan bir sıra inkişaf etmiş, əhalisinin sayı dəfələrlə bizdən çox olan ölkələrin adına rast gəlirik. 204 dövlət arasında 30-cu sırada qərarlaşmaq olduqca yüksək nəticədir. Nəzərə almaq lazımdır ki, ölkəmizdə Olimpiya hərəkatının yaşı digər ölkələrə nisbətən cavandır. Bu uğurlar isə, ölkəmizdə Prezident İlham Əliyevin rəhbərliyi altında həyata keçirilən idman siyasətinin uğurlarıdır. Bu gün idmana dövlət səviyyəsində göstərilən qayğı, yaradılan şərait ölkəmizdə idmanın kütləviliyini təmin edib. Azərbaycanda güclü idmançıların yetişməsində bu kütləvilikdən irəli gələn rəqabət də öz sözünü deyir. Bu gün bütün idman növləri üzrə Azərbaycanda gənc, güclü idmançılar yetişir ki, bu da gələcək yarışlarda, mötəbər turnirlərdə ölkəmizin bayrağının daha çox dalğalanmasına, himnimizin daha çox səslənməsinə yol açacağına ümid yaradır. Artıq Paralimpiya oyunlarına da start verilib və inanıram ki, komandamız burada da uğurlu nəticələr əldə edəcək.

- Qeyd etdiyiniz kimi, ölkəmizdə idmana qayğı yüksək səviyyədədir və idmançılara yaradılan şərait hər zaman yüksək dəyərləndirilir. Bu, Azərbaycanın dünyada idman ölkəsi kimi tanınmasında hansı rolu oynayır?

- Azərbaycanda idmanın maddi-texniki bazası sürətlə genişlənir. Hazırda, respublikamızın bütün bölgələrində dünya standartlarına cavab verən Olimpiya idman kompleksləri tikilib istifadəyə verilib. Sevindirici haldır ki, London Olimpiyadasında qalibiyyət əldə edən idmançılarımızın bir çoxu məhz bölgələrimizi təmsil edən idmançılardır. Hətta çempionumuzun biri-Tural Gəncə idman məktəbinin yetirməsidir. Vaxtilə, idman qurğularının tikintisində zona prinsipi əsas götürülürdüsə, bu gün hər bir rayonumuzda yüksək səviyyəli idman kompleksləri tikilib istifadəyə verilib. Bununla yanaşı, kiçik tutumlu məşq zalları, paytaxt və ona yaxın ərazilərdə böyük idman arenaları inşa olunub. Yaradılan şəraitlə paralel ölkəmizdə idmanın kütləviliyinə göstərilən diqqət olduqca böyükdür. Bu gün Olimpiya idman komplekslərimizin işi yüksək səviyyədə qurulub, uşaqlar, yeniyetmələr idman bölmələrində yeni standartlarla məşq edirlər. Bu baxımdan, bütün məsuliyyətimizlə Azərbaycanda idmanın yüksək sürətlə inkişaf etdiyini deyə bilərik. Yuxarıda da qeyd etdiyim kimi, bu inkişaf özünü qazanılan uğurlarda aşkar göstərir. Azərbaycanın dünyada idman ölkəsi kimi tanınmasında ölkəmizin Olimpiya Hərəkatında əhəmiyyətli uğurlara imza atmasının çəkisi çox böyükdür. Hətta deyə bilərik ki, bu gün dünyada qısa müddətdə güclü idman infrastrukturu yaratmağın, Olimpiya Hərəkatının öncül ölkələrindən birinə çevrilməyin Azərbaycan modeli var. Ölkə Prezidenti, möhtərəm İlham Əliyevin həyata keçirdiyi uğurlu idman siyasəti ölkəmizi dünya idmanının və Olimpiya hərəkatının ən fəal üzvlərindən birinə çevirib. Azərbaycan qısa müddətdə bir sıra beynəlxalq yarışlara ev sahibliyi edib. Bu səviyyəyə çatmaq üçün Azərbaycanda səbrlə, planlı şəkildə genişmiqyaslı işlər həyata keçirilib.

- Yaradılan infrastruktur, şəraitlə yanaşı, ölkəmizdə idmanın kütləviliyinin təminatında bu sahənin inkişafı ilə bağlı qəbul olunan dövlət proqramlarının, qanunvericiliklərin rolu hansı səviyyədədir?

- Ümumiyyətlə, bir faktı mütləq şəkildə qeyd etmək lazımdır ki, Azərbaycan dünyada tək-tək ölkələrdəndir ki, bütün sahələrdə əldə olunan nailiyyətlər konsepsiyaya əsaslanır. O cümlədən də, idman sahəsindəki qələbələr, nəticələr də məhz konsepsiyaların, uzun dövr üçün hazırlanan proqramların nəticəsində əldə olunub. Prezidentimizin də qeyd etdiyi kimi, idmanın inkişafı dövlət siyasətidir və bu inkişafı müəyyən edən bütün amillər Azərbaycanda var. 2004-2008-ci illərdə həyata keçirilən idmanın inkişafına dair Dövlət Proqramı bu sahədə sıçrayışlı inkişafın təməli sayıla bilər. Məhz, həmin dövrlərdə və ondan sonrakı illərdə Azərbaycanda bölgələrdə idmanın inkişafı geniş vüsət aldı. Prezident İlham Əliyevin şəxsi səyi sayəsində bölgələrdə gənclərin sağlam şəkildə yetişdirilməsi, ölkəmizin genefondunun-gənclərimizin sağlam ruhda böyüməsi üçün əsaslı addımlar atıldı. Dövlət Proqramı başa çatsa da, bu sahə üzrə görülən işlər davam etdirilir. Digər tərəfdən, hər bir istiqamət kimi idmanın inkişafı da ölkə qanunları çərçivəsində tənzimlənir. Bu gün ölkəmizdə idman təkcə yeniyetmə və gənclər arasında deyil, həm də yaşlılar, əlillər, məktəbəqədər, ibtidai məktəb səviyyəsində də inkişaf etdirilir. “Bədən Tərbiyəsi və İdman haqqında” Qanun ölkəmizdə idmanın həm yüksək səviyyədə inkişafını, həm də bu inkişafın sistematikliyini təmin edir. Qanunda da göstərilir ki, bu istiqamətdə dövlət siyasətinin məqsədi bədən tərbiyəsi və idmanın hüquqi bazasını, bədən tərbiyəsi və idmanın inkişafının təmin etdirilməsini, yüksək dərəcəli idmançıların hazırlanması üçün bədən tərbiyəsi-idman təşkilatlarını, uşaq idman müəssisələri sistemini yaratmaqdan ibarətdir. Yəni, bu sahədə nailiyyət əldə olunması üçün bütün imkanlar yaradılır. O cümlədən, bu gün bütün idman təşkilatları üçün bərabər imkanlar yaradılıb və bütün idman sahələri inkişaf etdirilir. Bu özü-özlüyündə həm də sistematikliyi, davamlılığı təmin edir. Təbii ki, nəzərə alsaq ki, idmanla peşəkar səviyyədə məşğul olan insanların əksəriyyəti gənclərdir, idmana qayğı, idmanın kütləviliyi həm də gənclərin inkişaf etdirilməsi sahəsində görülən işdir. Bu baxımdan, ölkəmizdə gənclərin inkişafına həsr olunan dövlət proqramlarında, konsepsiyalarda idmanın inkişafı məsələsi də prioritet olaraq müəyyənləşdirilir. Gənclər arasında maarirfləndirici təbliğatın aparılması, idmana cəlb olunması bu məsələdə əsas xətt sayılır. Əsas məqsəd gənclərin sağlamlığının qorunması və buna xidmət edən təşviqedici və maarifləndirmə tədbirlərinin keçirilməsidir. Unutmayaq ki, sağlam gənclik həm də sağlam gələcək deməkdir. Ölkə rəhbərliyinin qayğısı ilə həyata keçirilən bu tədbirlər bir daha onu deməyə əsas verir ki, ölkəmizdə idmanın inkişafı gələcək illərdə də yüksək səviyyədə təmin olunacaq.

- 2012-ci il həm də Prezident İlham Əliyev tərəfindən “İdman ili” elan olunub. Artıq “İdman ili”nin yarısı arxada qalıb. İstərdik ki, ötən dövrdə ölkəmizdə idmanla bağlı görülən işləri dəyərləndirəsiniz?

- Birmənalı şəkildə “İdman ili”nin ən əsas nailiyyəti Olimpiya oyunlarında iştirakımız və əldə olunan 10 medaldır. Bununla yanaşı, bu ilin 6 ayı ərzində ölkəmiz bir sıra mühüm beynəlxalq turnirlərə ev sahibliyi edib. Xüsusi vurğulamaq gərəkir ki, dövlət başçımızın bu sahəni xüsusi olaraq diqqətdə saxlaması nəticəsində, bu gün dünyanın idman mərkəzlərindən biri kimi nüfuzlu idman tədbirlərinə ev sahibliyi edən ölkəmizdə ötən il 36 beynəlxalq yarış təşkil edilib. Cari ilin altı ayı ərzində isə artıq 28 beynəlxalq yarışa ev sahibliyi etmişik. Bu ilin ötən ayları ərzində idmanla bağlı 126 respublika tədbiri keçirilib, komandalarımız 217 beynəlxalq tədbirdə, 79 təlim-məşq toplanışında iştirak ediblər. Bu rəqəmlər Azərbaycanın idman həyatının nə qədər geniş olduğunu əks etdirir. Əldə olunan nəticələr, görülən işlər, səslənən bu faktlar ölkəmizin gələcək illərdə Olimpiya oyunlarına ev sahibliyi iddiası yolunda bir mayakdır. Bildiyimiz kimi, ölkəmiz 2016-cı və 2020-ci il Yay Olimpiya Oyunlarına ev sahibliyi etmək hüququ uğrunda mübarizəyə qoşulub və idmanın yüksək inkişafı yaxın zaman kəsiyində buna nail olmağımıza imkan verir. Heç kimə sirr deyil ki, hər dövlət bu və ya digər şəhəri üçün Olimpiya oyunlarını keçirməyə iddiaçı şəhər statusunu ala bilmir. Çünki bu zaman həm dövlətin, həm də şəhərin imkanları, ölkənin və şəhərin bütün sferalarda inkişaf templəri, xüsusiyyətləri nəzərə alınır. Olimpiya Oyunlarını keçirmək iddiamız dünyanın idman ailəsində xüsusi bir yerə malik olmağımızdan xəbər verir. Mən inanıram ki, ölkədə Olimpiya hərəkatı və idman sahəsində görülən işlər, beynəlxalq miqyasda qazanılan nüfuz və etimad bu arzumuzu da gerçəkləşdirəcək. Möhtərəm Prezidentimizin dediyi kimi, “bizim bu işə sədaqətimiz və bağlılığımız gec-tez məqsədə nail olmağa aparıb çıxaracaqdır”. Biz mütləq şəkildə Prezidentimizin bütün sahələrdə fəaliyyətini dəstələkləməliyik ki, qələbələrimizin də sayı çox olsun.

Pərviz SADAYOĞLU

Yeni Azərbaycan.- 2012.- 28 avqust.- S.6.