“İşıq adamın nağılı” kitabının təqdimatı olub

Görkəmli Azərbaycan alimi, geologiya-mineralogiya elmləri doktoru, Dövlət mükafatı laureatı, akademik Şəfaət Mehdiyevin xatirəsinə həsr edilmiş kitab nəşr olunub

Dünən Azərbaycan Milli Elmlər Akademiyasının (AMEA) Rəyasət Heyətinin binasında görkəmli Azərbaycan alimi, geologiya-mineralogiya elmləri doktoru, Dövlət mükafatı laureatı, akademik Şəfaət Mehdiyevin xatirəsinə həsr edilmiş “İşıq adamın nağılı” kitabının təqdimatı olub. “Azərbaycan neft sənayesini yaradanlar” layihəsi çərçivəsində Türkiyədə 6 dildə (Azərbaycan, türk, alman, rus, ingilis və fransız dillərində) nəşr edilmiş kitabın müəllifləri İlham Mirzəyev və Şərəf Cəlillidir.

Tədbirdə Azərbaycanda akkreditə edilmiş diplomatik korpusun nümayəndələri, tanınmış alimlər və ziyalılar iştirak ediblər.

Mərasimdə AMEA-nın vitse-prezidenti, akademik Akif Əlizadə bildirib ki, Azərbaycan Prezidenti İlham Əliyev 2010-cu ildə görkəmli alim, akademik Şəfaət Mehdiyevin anadan olmasının 100 illiyi ilə əlaqədar müvafiq Sərəncam imzalayıb. Bu sərəncamın icrası çərçivəsində respublikanın müxtəlif ali təhsil müəssisələrində, ayrı-ayrı təşkilatlarda tədbirlər keçirilib. Bu gün biz bu silsilədən olan növbəti tədbirə toplaşmışıq.

A.Əlizadə qeyd edib ki, Azərbaycanda geologiya elminin formalaşması və inkişafında misilsiz xidmətləri olmuş Şəfaət Mehdiyev geniş elmi biliyə, yüksək təşkilatçılıq bacarığına malik alim olmaqla yanaşı, neft və qazın genezisinin tədqiqi üzrə daha fərqli proqressiv ideyalar daşıyan alimlərdən olub.

400-dək elmi əsərin, 20-dən artıq monoqrafiyanın müəllifi olmuş görkəmli alim dünya elm tarixində ilk dəfə neft mənşəyinin “Dərinlik-biogen” nəzəriyyəsini irəli sürmüşdür. Neftin dərinlik-biogen mənşəyi nəzəriyyəsi bu gün də tədqiqatçıların diqqət mərkəzindədir və həmin konsepsiyanın alimlər arasında tərəfdarları çoxdur.

Eyni zamanda, Ş.Mehdiyev “Neftin dərinlikdə əmələ gəlməsi geneziyası” mövzusunda dəyərli tədqiqatlar aparıb, Abşeron yarımadasının geoloji xəritəsini tərtib etmiş, “Azərbaycan SSR-nin neft-qaz yataqları və perspektiv strukturları xəritəsi”nin hazırlanmasına rəhbərlik edib.

O, ensiklopedik biliyə və geniş erudisiyaya malik alim, görkəmli neftçi-geoloq olmaqla yanaşı, eyni zamanda, peşəkar jurnalist, yazıçı və ictimai-siyasi xadim idi.

Xeyirxahlığı, insanpərvərliyi, sadəliyi, vətənpərvərliyi ilə qəlblərdə böyük hörmət-izzət sahibi olmuş alim, haqq dünyasına qovuşduqdan sonra da çoxlarının xatirəsində dəyərli ziyalı, əsl insan kimi qalıb. Məhz buna görə Ş.Mehdiyev bu gün də qədirbilən Azərbaycan xalqının qəlbində daim yaşayır.

Kitabın müəllifləri İlham Mirzəyev və Şərəf Cəlilli layihənin həyata keçirilməsində göstərdiyi dəstəyə görə Türkiyə səfirliyinə minnətdarlıqlarını bildirib, 5 ölkədə təqdimatı keçiriləcək kitabın bu layihənin ilk nümunəsi olduğundan fəxr etdiklərini diqqətə çatdırıblar.

Alimin ailəsi adından çıxış edən Azərbaycan Respublikasının Prezidenti yanında Ali Attestasiya Komissiyasının sədri, akademik Arif Mehdiyev atasının xatirəsinə göstərilən hörmət və ehtirama görə Prezident İlham Əliyevə, tədbirin təşkilatçılarına və iştirakçılara minnətdarlığını bildirib.

Ramil VƏLİBƏYOV

Yeni Azərbaycan.-2012.- 26 iyul.- S. 5.