YAP Azərbaycanın ağrılı-acılı, kədərli günlərindən, ölkənin dağılması, parçalanması dövründən bugünkü inkişafına qədər çox şərəfli və çətin bir yol keçib

Yeni Azərbaycan Partiyası İcra katibinin müavini, millət vəkili Siyavuş Novruzov www.yap.org.az saytına müsahibə verib:

- Siyavuş müəllim, ötən ilin sonlarında Yeni Azərbaycan Partiyası şəhər və rayon təşkilatlarında hesabat-seçki konfranslarına start verdi. Bu günə qədər əksər təşkilatlarda artıq bu tədbirlər reallaşıb. Ümumiyyətlə, siz bu konfransların nəticələrini necə qiymətləndirirsiniz?

- Ümumilikdə, Yeni Azərbaycan Partiyasının (YAP) 84 rayon - şəhər təşkilatı var. Partiyanın Nizamnaməsinə müvafiq olaraq rayon-şəhər təşkilatları 2 ildən bir bu konfransları keçirməlidir. Lakin bəzən bu konfranslar seçkilər ilinə təsadüf etdiyi üçün həmin vaxt bu konfransları növbəti vaxtlara keçiririk. 2011-ci ildə və 2012-ci ilin birinci yarısında seçki ilə əlaqədar heç bir məsələ olmadığına görə, biz bu dövrdə konfranslarımızı keçirdik. 2012-ci ilin yarısından sonra isə növbəti il üçün seçki hazırlıq işləri aparılacaq. O müddətədək rayon-şəhər təşkilatlarında hesabat konfranslarımızı başa çatdırmaq üzrəyik. Yalnız 8 təşkilatda hələ ki, bu konfranslar baş tutmayıb və yaxın günlərdə hazırlıq işləri başa çatdıqdan sonra həmin rayon - şəhər təşkilatlarında proses davam etdiriləcək.

Burada bir neçə məsələyə diqqət yönəltmək istəyirəm. Partiya sıralarının genişlənməsi ilk partiya təşkilatlarının sayının artırılması zərurətini ortaya çıxarıb. İlk partiya təşkilatları əsasən məntəqələr ətrafında yaradılır. Azərbaycanda 5 minə yaxın məntəqə var. Bu gün YAP ilk təşkilatlarının sayı 8 minə yaxındır. Elə məntəqələr var ki, onların ətrafında bir neçə ilk təşkilat fəaliyyət göstərir. Bu da seçkilər ərəfəsində elektoratın öyrənilməsi, seçicilərlə işin aparılması, problemlərin aradan qaldırılmasına köməklik göstərir.

İlk təşkilatlarla yanaşı, partiyaya üzv olanların sayı da artır. Bu gün YAP-ın 20 mindən artıq üzvü olan rayon təşkilatları var. Belə ki, YAP-ın bir rayon təşkilatının üzvlərinin sayı bütövlükdə ölkə üzrə fəaliyyət göstərən müxalifət partiyalarının ümumi üzvlərinin sayından artıqdır. Məsələn, partiyanın Gəncə, Yasamal, Səbail kimi böyük rayon təşkilatlarının 20 min nəfərdən artıq üzvü var. Hazırda 10-a yaxın təşkilatımızın üzvlərinin sayı 20 minə qədərdir. Çox gözəl haldır ki, ötən il partiyaya qəbul olan 30 mindən yuxarı üzvlərin 45 faizi gənclərdir. Biz şahidi oluruq ki, Azərbaycan gəncliyi qanunvericiliklə onların siyasi partiyaya üzv olma hüququndan istifadə edərək daha çox YAP-a etimad göstərir. Çoxlu sayda tələbələr YAP-a üzv olmaq üçün müraciət edirlər. Bu baxımdan da, rayon - şəhər təşkilatlarının say tərkibi kəmiyyət və keyfiyyətcə genişlənib. Bunun nəticəsində müvafiq olaraq bütün təşkilatların seçkili orqanlarda, istər rayon şurası, istər nəzarət təftiş qrupu, istərsə də idarə heyətində 30 faizədək dəyişikliklər aparılıb. Yəni, gələn yeni qüvvələr partiyanın idarəçiliyində bilavasitə təmsil olunurlar. Bu baxımdan həm yaşlı, həm orta nəslin potensialı ilə gənc nəslin qüvvəsi birləşdirilir. YAP-ın gələcək inkişaf perspektivləri ilə bağlı bütün istiqamətlər üzrə işlər görülür. Qeyd edim ki, bəzi yerlərdə müasir ictimai proseslərə cavab verməyən, bu və ya digər şəkildə partiyanın apardığı siyasi işin önündə gedə bilməyən rayon - şəhər təşkilatları sədrlərinin dəyişdirilməsi ilə bağlı tədbirlər görülür. Bu da partiyanın növbəti seçki prosesləri üçün atdığı mühüm bir addım hesab edilə bilər.

- Siyavuş müəllim, sizin də qeyd etdiyiniz kimi, fəal, vətənpərvər gənclərin partiya sıralarına cəlb olunması, onların gənc lider kimi yetişdirilməsi Yeni Azərbaycan Partiyasının fəaliyyətində prioritet istiqamətlərdən biridir. Yeni Azərbaycan Partiyası gənclərə özlərini təsdiq üçün, bacarıqlarını, potensiallarını reallaşdırmaq üçün geniş imkanlar yaradır. Bəs gənclərin partiyanın həyatında, ölkəmizdə cərəyan edən ictimai - siyasi proseslərdə yerini və rolunu necə qiymətləndirirsiniz?

- YAP gənclərin potensialından maksimum dərəcədə istifadə edir. Onlar üçün geniş meydan açır ki, bütün sahələrdə potensiallarını üzə çıxara bilsinlər. Bu sahələrdə çoxşaxəli tədbirlər həyata keçirilir. Ümumiyyətlə, YAP ayrı-ayrı sahələr, ictimai-siyasi, beynəlxalq əməkdaşlıq və s. məsələlərlə əlaqədar layihələr və tədbirlər reallaşdırır. Bu cür tədbirlərin bir qismi də gənclərlə bağlıdır. Biz gənclərin qış məktəbini təşkil etdik, burada bir çox mövzular müzakirə olundu. Belə desək, gənclər həm istirahət etdi, həm də Azərbaycanın ictimai, siyasi xadimləri, Milli Məclisin deputatları ilə görüşərək onların mühazirələrini dinlədilər, diskussiyalar aparıldı, həm də gənclərin özlərinin təqdimatları maraqla izlənildi.

Bununla yanaşı, sosial şəbəkələrdə gənclərin işinin təkmilləşdirilməsi ilə əlaqədar rayon - şəhər təşkilatlarının gənclər birliklərinin sədrlərinin konfransı keçirildi. İndi artıq biz regionlarda bu tip tədbirlərin keçirilməsini nəzərdə tuturuq. Region gəncləri ilə görüş və onları maraqlandıran, bu gün gündəlikdə olan məsələlər ilə bağlı fikir mübadiləsi aparmaq qarşıya məqsəd qoyulub. Biz çalışırıq ki, region gəncləri mərkəzdən olan gənclərlə birlikdə bu müzakirələri aparsınlar. Bir neçə bölgələrdə artıq bu layihələrimiz hazırdır və gələn həftədən bu tədbirlərə start verəcəyik. Bu tədbirlərdə bütün mövzular, o cümlədən, narkomaniyaya qarşı mübarizə, erkən yaşlarda nigaha girmə, təhsil sistemi, təlim-tərbiyə və s. məsələlər müzakirə olunacaq. Həmçinin, Azərbaycanın beynəlxalq siyasətdə yeri və rolu mövzusunda gənclərlə diskussiyaların aparılması nəzərdə tutulub. Eyni zamanda, müxtəlif idman oyunlarının təşkili nəzərdə tutulub. Az öncə qeyd etdiyim kimi, yenə də region gəncləri ilə mərkəz gənclərinin, eləcə də, müxtəlif sahələri təmsil edən gənclərin bir araya gətirilməsinə xüsusi önəm veririk. Bu, həm də onların dünyagörüşünün, siyasi mədəniyyətinin genişlənməsi baxımından əhəmiyyətlidir.

Bununla yanaşı, gənclərin beynəlxalq əlaqələrinin genişlənməsinə xüsusi önəm verilir. Ayrı-ayrı gənclər təşkilatları ilə əlaqələr qurulur, qarşılıqlı səfərlər həyata keçirilir. Keçən il həm bizim gənclərimiz müxtəlif ölkələrdə, tədbirlərdə olublar, həm də başqa ölkələrin fəal gəncləri bizim ölkəmizə səfər ediblər. Qısacası, partiyanın gənclər siyasəti müxtəlif istiqamətlərdə uğurla həyata keçirilir və bu proses davam etdiriləcək.

- Beynəlxalq əməkdaşlıqdan söz düşmüşkən, YAP-ın beynəlxalq əlaqələri barədə nə deyə bilərsiniz? Bildiyimiz kimi, hakim partiya müxtəlif ölkələrin siyasi partiyaları ilə və bəzi beynəlxalq təşkilatlarla çox geniş əlaqələr qura bilib...

- Biz bu sahədə fəaliyyətimizi əsasən iki istiqamətdə qurmuşuq. Birincisi, biz Asiya Siyasi Partiyalarının Beynəlxalq Konqresinin İdarə Heyətinin üzvüyük. Burada 56 dövlət təmsil olunur. Elə ölkələr var ki, burada bir neçə siyasi partiya ilə təmsil olunur. Lakin idarə heyətinin sadəcə 20 üzvü var, onlardan biri də Azərbaycandır. Həmçinin, Avropa Xalqları Partiyasında müşahidəçi qismində təmsil olunuruq. Onlarla da müxtəlif sahələrdə əməkdaşlıq edirik. Həmçinin, orada təmsil olunan bütün partiyalarla sıx əlaqələr qura bilmişik. Bu əməkdaşlıq davam etdirilir.

YAP dünyanın bir çox ölkəsinin siyasi partiyaları ilə ikitərəfli əməkdaşlığa dair müqavilələr imzalayıb. Bu yaxınlarda biz Ukraynada Regionlar Partiyasının qurultayında iştirak etdik. Bu, Ukrayna prezidenti Viktor Yanukoviçin rəhbərlik etdiyi partiyanın seçkilər öncəsi sonuncu qurultayı idi və bir çox təşkilati məsələlər qurultayda öz həllini tapdı. Bundan öncə isə Avropa Xalqları Partiyasının İtaliyada keçirilən tədbirində iştirak etdik. Bu səfərlərin hər ikisində rəsmi səviyyəli müxtəlif görüşlərimiz oldu və bu görüşlərdə həm də partiyalarımız arasında əməkdaşlığın inkişaf etdirilməsinə dair geniş müzakirələr aparıldı. Bu gün bir sıra başqa dövlətlərin də siyasi partiyalarından münasibətlər qurulması ilə bağlı bizə müraciətlər daxil olur.

Biz əlaqələrimizdən yararlanaraq Azərbaycanın dövlət siyasəti, ölkəmizin problemləri, ərazilərimizin işğal olunması və s. məsələlərlə bağlı beynəlxalq ictimaiyyətə daha dolğun, ətraflı məlumatlar veririk. YAP Xocalı soyqırımının 20 illiyi ilə bağlı dünyanın bütün ölkələrinin parlamentlərinə, müxtəlif təşkilatlara Xocalı faciəsinə dair qısa, lokanik məlumatlandırıcı müraciətlər göndərib.

Eyni zamanda, qondarma “erməni soyqırımı” ilə bağlı Fransa parlamentinin qəbul etdiyi məlum qərarla əlaqədar olaraq YAP və onun gəncləri intensiv şəkildə iş aparıb. Demək olar ki, parlamentin bütün üzvlərinə məktublar göndərilib, onların bir qismindən cavab da gəlib. Fransa parlamentinin vitse-spikerindən bizə məktub daxil oldu ki, o, istənilən halda həmin məsələnin əleyhinədir. Yəni, biz bu cür çoxşaxəli əlaqələr quraraq dövlətimizin maraqlarının beynəlxalq aləmdə müdafiə olunmasına öz töhfələrimizi veririk.

- Azərbaycan dövlətinin inkişafında, müstəqilliyimizin möhkəmlənməsində, dövlətimizin və xalqımızın bugünkü nailiyyətlərinin əldə olunmasında Yeni Azərbaycan Partiyasının rolu və xidmətləri müqayisəolunmazdır. Ona görə də, Yeni Azərbaycan Partiyasının yaranmasının 20-ci ildönümü təkcə, partiya üzvləri üçün deyil, bütövlükdə xalqımızın həyatında əlamətdar bir tarixi hadisədir. YAP bu tarixi hadisəyə hazırlıqla bağlı hansı tədbirləri planlaşdırır?

- YAP fəaliyyət göstərdiyi 20 ilin 19 ilini iqtidarda olub. Təməli Ümummilli liderimiz tərəfindən qoyulan YAP Azərbaycanın ağrılı-acılı, kədərli günlərindən ölkənin dağılması, parçalanması dövründən bugünkü inkişafına qədər çox şərəfli və çətin bir yol keçib. YAP-ın üzvləri dövlətçiliyimizin qorunub saxlanması və möhkəmləndirilməsi, ölkəmizin iqtisadi inkişafı və bugünkü tərəqqinin əldə olunmasında müstəsna rol oynayıb. Buna görə də, biz fəxr edirik ki, məhz YAP-ın üzvləriyik. Bu gün Azərbaycana verilən qiymət, ölkəmizin BMT Təhlükəsizlik Şurasının qeyri-daimi üzvü seçilməsinə bu qədər dəstək göstərilməsi, Azərbaycanda “Eurovision 2012” mahnı müsabiqəsinin keçirilməsi, 2020-ci ildə Olimpiya oyunlarının keçirilməsinə dair ölkəmizin namizədliyinin irəli sürülməsi və əsas iddialılardan biri kimi qəbul olunmasında təbii ki, hazırkı iqtidarın və YAP-ın böyük rolu var. Buna görə də, hesab edirik ki, YAP qarşısında duran vəzifələrdən bir hissəsini yerinə yetirib. Digər hissəsi - qarşıda duran perspektivlərlə bağlı işlər də aparılır. Partiyanın 20 illiyi ilə bağlı qeyd edim ki, xüsusi proqramımız var. Partiyanın 20 illik həyatı xalqdan və dövlətdən kənarda olmayıb. Bunlar bir - biri ilə əlaqəli, iç-içə olan proseslərdir. Bu baxımdan da geniş şəkildə proqram hazırlamışıq. May ayından sonra həmin proqram əsasında müvafiq tədbirlərin həyata keçirilməsi ilə bağlı işlər görüləcək.

- Azərbaycan bu gün dünyamiqyaslı tədbirlərə, idman yarışlarına, siyasi konfranslara, mədəni tədbirlərə yüksək səviyyədə evsahibliyi edir. May ayında keçiriləcək “Eurovision” musiqi yarışması da bunlardan biridir. Ötən il musiqi yarışmasında qazanılan böyük qələbədən sonra Azərbaycan dövləti dərhal bu musiqi yarışmasının təşkilinə hazırlıq işlərinə başlayıb və hazırda hazırlıqlar yüksək səviyyədə davam etməkdədir. Buna baxmayaraq, bəzi dairələrin də haqsız iradlarını və bu musiqi yarışmasına qarşı qərəzli kampaniyalarını müşahidə edirik. Siz, bu tendensiyanı, bu qeyri - ədalətli kampaniyanı nə ilə əlaqələndirərdiniz?

- Birincisi, “Eurovision” siyasi kampaniya deyil, bu musiqi festivalıdır. Bu musiqi bayramı tamamilə siyasətdən kənarda dayanmalıdır. Ümumiyyətlə, bu istiqamətdə cəhdlər olunması belə “Eurovision”un prinsip və nizamnaməsinə ziddir. Məlum olduğu kimi, Azərbaycan “Eurovision” tarixində çox fərqli bir yarışma keçirəcək. İstər onun hazırlıq işlərinin başlanması, dövlət komissiyasının yaradılması, ona ayrılan vəsaitlər, quruculuq abadlıq işləri, proqramları, görülən digər bütün işlər bu qənaətə gəlməyə imkan verir ki, Azərbaycanda keçiriləcək “Eurovision” bu yarışmanın tarixinə bir ilk, yenilik və ən möhtəşəm yarışma kimi düşəcək. Yaxşı yadımdadır ki, ötən yarışmada, yəni, Azərbaycanın qalib olduğu yarışmada nəticələri şərh edən rusiyalı aparıcılar qeyd etmişdilər ki, indi Azərbaycanın qonaqları necə qarşılayacağına baxarsınız. Biz Azərbaycana inanırıq və Azərbaycanın potensialı yarışmanı yüksək səviyyədə keçirməyə imkan verir. Bu da ona əsaslanır ki, Azərbaycanda keçirilən bütün yarışmalar, forumlar, beynəlxalq tədbirlərin hər biri istər təhlükəsizlik, istər təşkilati, istər texniki, insanların sərbəst hərəkət etməsi baxımından çox yüksək səviyyədə təşkil olunur.

Lakin bəzi qüvvələr bu prosesə kölgə salmaqdan ötrü Azərbaycana marağı olub tələbi ödənməyən dövlətlər tərəfindən qızışdırılıb ortaya atılıblar. Hansı ölkədə görünüb ki, “Eurovision” keçirilən ölkədə amnistiya tələb olunsun. Cinayətkar cinayət törədibsə, cəzasını çəkməlidir. Qanun qarşısında cavab verməlidir. Bu halın qanunlar çərçivəsində həlli mümkündür. Kimsə aşağı instansiyaların qərarından narazıdırsa, onun daha böyük instansiyalara müraciət etməsi məqsədəuyğundur. Əgər ədalətsizlik varsa, bu, məhkəmə yolu ilə həll olunmalıdır. Bunun yolu “Eurovision”dan keçmir. “Eurovision” insanları onların törətdiyi cinayətdən azad etmir. Bu festival insanlara musiqi bəxş edir, onların musiqi zövqünün formalaşmasına, musiqi potensialının ortaya çıxmasına, ifaçılıq qabiliyyətinin müəyyənləşdirilməsinə xidmət edir. Ondan təzyiq metodu kimi istifadə olunması isə tamamilə yanlışdır. Bu, artıq anti-Azərbaycan, antidövlət çıxışıdır, iqtidara deyil, xalqa və dövlətə qarşı çıxmaqdır və bunu anlamaq lazımdır. Bu cür addımlar yalnız düşmən mövqeyində dayananların işidir. Dünya ölkələri də yaxşı bilir ki, bu metod deyil və bu üsulla hələ heç kim, heç nəyə nail olmayıb və nail olmayacaq da. Digər tərəfdən, Azərbaycanın belə tədbirləri həyata keçirməsi təbii ki, bizi əhatə edən bəzi dövlətləri də qane etmir. Azərbaycan artıq nəinki regionda, həm də postsovet ölkələrindən çıxaraq Şərqi Avropa ölkələrində də liderliyi yavaş-yavaş ələ almaqdadır. Azərbaycanın Şərqi Avropadakı müəyyən layihələri maliyyələşdirməsi, aparıcı iqtisadi forumlarda I yerlərdə dayanması, Azərbaycana istinadlar təbii ki, bəzi ölkələri də qıcıqlandırır. Onlar öz əlaltılarını ortaya salaraq, bu və ya digər şəkildə məsələyə təsir göstərməyə çalışırlar. Lakin Azərbaycan güclü, hüquqi bir dövlətdir, qanunun aliliyi hər şeydən üstündür. Bu baxımdan da istənilən məsələ qanun çərçivəsində həll olunacaqdır.

Mən bir məsələni də qeyd etmək istəyirəm. 200 mindən artıq azərbaycanlı Ermənistandan çıxarılıb, 1 milyondan artıq qaçqınımız Ermənistanın işğalçı siyasəti nəticəsində öz yurdlarından didərgin düşüb, ev-eşikləri dağıdılıb, qəbiristanlıqlar, mədəni abidələr dağıdılıb, muzeylər talan olunub. Amma bir dənə də olsun, hüquq-müdafiə təşkilatları bunların heç biri haqqında Avropa məhkəməsinə və ya insan haqları məhkəməsinə müraciət etməyib. Lakin Bayıl yolunda bir ev söküləndə dərhal buna reaksiya verilir. Və yaxud da qış bulvarında hər hansı bir hüquq müdafiəçisinin evi plana düşərək söküləndə, getmədikləri məhkəmə qalmır. Baxmayaraq ki, bu evlər sökülərkən qanunun bütün tələbləri gözlənilir. Nəyə görə, sadaladığımız 200 mindən artıq Ermənistandan zorla köçürülmüş, deportasiya olunmuş məcburi köçkün və ya 1 milyondan artıq qaçqının əmlakı, talan olunan mədəniyyət abidələri ilə bağlı heç bir beynəlxalq təşkilata müraciət olunmur, amma hər hansı bir hüquq müdafiəçisinin evi qanun çərçivəsində söküləndə hay-küy salınır? Çünki onlar üçün şəxsi maraqlar milli maraqdan daha üstündür. Təbii ki, burada ikili standart və qərəzli mövqe açıq şəkildə görünür.

- Siyavuş müəllim, biz müəyyən əlamətdar hadisələr ərəfəsində siyasi kampaniyalar zamanı radikal müxalifət partiyalarının fəallaşdığını, mitinq, aksiya keçirməklə bağlı çağırışların artdığını müşahidə edirik. Son dövrlərdə bu proseslər təkrarlanmaqdadır. Bunu nə ilə izah edirsiniz?

- Onların fəallaşması hava ilə əlaqədardır və mövsumi xarakter daşıyır. Onların Azərbaycanda heç bir bazası, sosial dayaqları yoxdur. 20 ildən artıqdır ki, bunlar eyni funksiyanı yerinə yetirirlər. Əvvəl Sovet DTK-sının təsir dairəsində idilər. Vaxtı ilə bunları keçmiş Dzerjinski adına kluba yığaraq onlara milli azadlıq hərəkatında necə hərəkət etməli, nələri danışmalı olduqları barədə məlumat verərdilər. Yəni, bunlar keçmiş Sovet DTK agenturasında olan insanlardı və tədricən zaman keçdikcə ağalarını və istiqamətlərini dəyişdilər. Birinin “komandası” cənubdan, digərininki şimaldan, birininki Avropadan, o birininki okeanın o tayından gəlir. Yəni, bu adamların Azərbaycan xalqı ilə, milli dövlətçilik maraqlarımız ilə heç bir əlaqəsi yoxdur. Onların hamısı şəxsi maraqlardan irəli gələn addımlar atırlar. Əgər mitinq keçirirsənsə, gəl düş qabağa ardınca adamları apar. Yoxsa uşaqları öyrədirsən, beynini pozursan, müəyyən adamları ortaya salırsan, əldə olunan vəsaitin böyük miqdarını isə özünün təminatına, istirahətinə istifadə edirsən. Bunlar çalışırlar ki, 1-2 mitinq keçirsinlər, ağalarından pul qopartsınlar ki, özlərinin birillik maddi gəlirlərini təmin etsinlər. Siyasətdə qalmaq üçün hər hansı bir vəsait sərf etməlisən. Bu vəsaitlər hardan gəlir, bunları hamımız bilirik. Təsəvvür edin, bunlar, hətta öz yoldaşlarına da kələk gəlirlər. Dəfələrlə bu barədə müzakirələr olub. Ayrı-ayrı siyasi partiyalarda rəhbər strukturlardan istefa verənlər səbəbsiz yerə bu addımı atmayıblar. Onlar tələb edirdilər ki, belə bir məsələ var, gəlin çıxarın ortaya. Düzdür çox geniş müzakirə də aça bilmirdirlər. Çünki özləri də çox pis vəziyyətdə qalırdılar. Amma ortada bu faktlar var. Onlar müəyyən qədər vəsait alırlar ki, ortaya filan qədər adam çıxaracam. Sosial baza yoxdur, vəsaiti də sərf etmək istəmirlər ki, adam tutsunlar. Çünki pulla tutulan adamlar pulunu alır, gəlir iştirak edir və çıxır gedir. Ona görə də, onlar kütləvi aksiyaları şəhərin gur yerində keçirmək istəyirlər. Hansı ki, o ərazilər 10 min, 15 min insanın hərəkət etdiyi yerlərdir. Və ya özləri bilərəkdən elə yer deyirlər ki, hökumət onlara icazə verməsin. Çünki orada təhlükəsizliyi təmin etmək mümkün deyil. Sərbəst toplaşmaq azadlığı haqqında qanunda göstərilib ki, kütləvi aksiyaların keçirilməsi üçün elə yerlər müəyyənləşdirilir ki, orada insanların təhlükəsizliyini təmin etmək mümkün olsun. Bu səbəbdən də müvafiq yer ayrılır.

Mən həmişə onlara sual edirəm ki, qərarın harada qəbul olunmasının nə fərqi var? Qəbul etdiyin qərar və ya qətnamənin yerə heç bir aidiyyəti yoxdur. Səbəb odur ki, təklif olunan yerə getdikləri zaman onların tərəfdarları görəcəklər ki, sayları 300-ü, 500-ü keçmir. Bəzən şəhərin mərkəzində aksiyaya aidiyyəti olmayan, istirahət edənlər, hətta öz ailəsi ilə istirahət edən səfirlərin şəkillərini çəkib deyirlər ki, bunlar kütləvi aksiyaya çıxan insanlardır. Hətta orada dövlət məmurları da olur ki, ailəsi ilə istirahət edir və fotoşəkildə nümayiş etdirməyə çalışırlar ki, onlar da kütləvi aksiyada iştirak edirlər. Bu cür qüvvələrin Azərbaycanda heç bir sosial bazası yoxdur. Onlar artıq Azərbaycan tarixinin qara arxivində olan adamlardır. Bəzi ölkələrdə məğlubiyyətə uğrayan müxalifətin siyasi iradəsi çatır, çıxır gedir öz işi ilə məşğul olur. Bunlarda o iradə də yoxdur. Çünki siyasəti özlərinə iş yeri seçiblər. Burada da ancaq qazanc güdürlər.

- Yeni Azərbaycan Partiyası həmişə ümummilli məsələlərdə dialoq keçirilməsi təşəbbüsünü dəstəkləyib və hətta partiyanın bu istiqamətdə keçirdiyi tədbirlərdə müxtəlif siyasi partiyaların rəhbərləri iştirak ediblər. Radikal müxalifət partiyalarının liderləri isə YAP-ın bu təşəbbüsünə qoşulmaqdan imtina edib. Buna baxmayaraq, bu gün həmin şəxslər Yeni Azərbaycan Partiyasını dialoqa getməməkdə ittiham edir. Həqiqətlə daban-dabana zidd olan bu fikirlərə münasibətiniz necədir?

- Birincisi, dialoq aparmaq üçün onların potensialı olmalıdır ki, bu potensial da yoxdur. Bunlar 90-cı illərin əvvəllərində hansı şüur, hansı təfəkkür tərzində idilərsə, elə onda da qalıblar. Yəni, dəyişməyiblər. Məsələn, bu yaxınlarda cənab Prezident Sərəncam verib ki, əmanətlər qaytarılsın, dünya təcrübəsi öyrənilsin, hesablansın və ən təkmil formada birdəfəyə ödənilsin. Prezidentin məlum Sərəncamından sonra arxasınca 3 adamı apara bilməyən Pənah Hüseyn deyir ki, biz tələb edirik ki, əmanətlərin hamısı qaytarılsın. Onun belə bir haqqı yoxdur. Bu addım onsuz da Azərbaycan Prezidenti tərəfindən artıq ən real, ən mükəmməl formada atılıb və həyata keçirilir. Belə olan təqdirdə bu tərz düşüncəli olan siyasi partiyanın rəhbəri hansı dialoqu apara bilər. Və yaxud da başqa ümummilli məsələlərlə bağlı, məsələn, Azərbaycanın beynəlxalq siyasəti, Xocalı soyqırımı, Dağlıq Qarabağ problemi ilə bağlı müzakirələrin aparılması və ortaq mövqeyə gəlmək üçün potensialları yoxdur. Bunların həmişə 3-4 tələbi olur. 20 ildir eyni şeyləri təkrarlayırlar. Halbuki, artıq Azərbaycan Prezidenti həmin məsələlərin böyük hissəsini həll edib, planlı və ardıcıl şəkildə işlər davam etdirilməkdədir. Amma bunların xəbərləri yoxdur.

Müxalifət odur ki, iqtidara alternativ layihələr təqdim etsin, cəmiyyətlə dövlət arasında əgər hər hansı bir gərginlik varsa onun aradan qaldırılması prosesində vasitəçi rolunu oynasın və yaxud da cəmiyyətin müəyyən fikrini iqtidara çatdırsın və s. Bunların isə nə cəmiyyətlə, nə insanlarla əlaqəsi var, nə ictimai ab-havanı bilirlər, nə Azərbaycanın regionlarında gedən proseslərdən xəbərləri var, nə ölkənin iqtisadi inkişafı barədə məlumatlı deyillər, nə gündəlik məsələlərdən agahdırlar. Sadəcə olaraq, xaricdən bir mesaj gəlir başlayırlar 1-2 bəyanat verməyə, daxildə də bunlar başlayır bəyanatla çıxış etməyə ki, onlarla bunlar dialoqa gəlmirlər.

Parlamentdə təmsil olunan partiyalarla çoxlu sayda birgə müzakirələrimiz olub. Məsələn, bu yaxınlarda Xocalı soyqırımının tanıdılması ilə əlaqədar təbliğatın hansı istiqamətdə aparılmasının məqsədəuyğunluğu, hüquqi əsasları, indiyədək bu sahədə görülən işlər və irəlidə görülməsi vacib olan məsələlər, diaspora təşkilatlarının funksiyalarına dair müzakirələrdə parlamentdə təmsil olunan bütün partiyalar (bitərəf, ictimaiyyət nümayəndələri) iştirak etdi. Biz hamısını dəvət etmişdik. Gəlmədilər. Çünki bunlar üçün maraqlı deyil. İkinci bir tərəfdən, axı gəlsə nəsə deməlidi. Sual olunacaq ki, bəs sən nə etmisən bu istiqamətdə. Nə cavab verəcək? Deyəcək ki, iqtidara gündə bir namə göndərirəm?!

Və yaxud da, bunların bəzilərinin yazıları öyrədilmiş şəkildə xarici mətbuatda çıxır. Bir kəlmə orada Dağlıq Qarabağ, Ermənistanın Azərbaycan torpaqlarını işğal etməsi barədə fakt göstərilmir, bir kəlmə Xocalı soyqırımı haqqında fakt ortaya qoyulmur. Ancaq Azərbaycan iqtidarının müzakirəsi gedir. Əgər sən beynəlxalq mətbuata çıxırsansa bir kəlmə də Azərbaycanın qlobal problemlərindən danış. Amma etmirlər, çünki o mətbuat Azərbaycana təzyiqlər göstərməkdə maraqlı mətbuatdır və dövlətə təzyiq göstərmək istəyir. Səndən də sui-istifadə edir. Ona necə sərf edir o istiqamətdə. Sənin də nə vətəndaşlığın, nə dövlətə və xalqa bağlılığın, nə milli təəssübkeşliyin var ki, bu haqda bir məsələ ortaya qoya biləsən. Bu baxımdan YAP dəfərlərlə bəyan edib ki, biz hər hansı bir diskussiyaya hazırıq. Bizim buna potensialımız var. Bizim əlimizdə faktlar, gördüyümüz işlər var. Onlar ortaya nə qoyacaq, mən onu başa düşmürəm.

- Siyavuş müəllim, son dövrlər beynəlxalq aləmdə baş verən olaylar və dünya ictimaiyyətinin diqqətinin Dağlıq Qarabağ münaqişəsinə yönəlməsi münaqişənin həllini daha da aktuallaşdırıb. Siz bu münaqişənin həlli perspektivini necə qiymətləndirirsiniz və yaxın gələcəkdə atılacaq addımlarla bağlı hansı proqnozları vermək olar?

- Dağlıq Qarabağ münaqişəsinin həlli istiqamətində aparılan danışıqlar gündən-günə ölkəmizin xeyrinə irəliləyir. Bu yaxınlarda Milli Məclisin üzvləri “Avronest”in təşkil etdiyi tədbirdə iştirak etmək məqsədilə Ermənistanda səfərdə oldu. Onlar da qayıtdıqdan sonra Ermənistandakı vəziyyətin həddən artıq ağır olduğunu, iqtisadi böhranın bu ölkəni acınacaqlı vəziyyətə saldığını, əhalinin kütləvi şəkildə ölkəni tərk etdiyini bildirdilər. Digər mənbələrdən də əldə etdiyimiz məlumatlar bu faktı təsdiqləyir. 6-7 ildən sonra Ermənistanda adam qalmayacaq. Ermənistandakı vəziyyət bu gün 1987-1988-ci illərdəki səviyyədədir. Bu da çox ciddi problemlər yaradır. Əhali artıq başa düşür ki, əgər bu münaqişə olmasaydı və Ermənistanla Azərbaycan arasında hər hansı iqtisadi əlaqələr olsaydı, müəyyən layihələrdə iştirak etsəydi, Ermənistan xeyli dərəcədə bugünkündən yaxşı vəziyyətdə olardı. İkincisi, Ermənistanın hərbi sistemi də çökmüş vəziyyətdədir. Ermənistan ordusu keçmiş Sovet texnikaları ilə təmin olunub ki, bunların da əksəriyyəti istifadə müddətini başa vurub. Dövlətin də elə imkanı yoxdur ki, texnikanı müasirləşdirsin. Həmçinin, orduda baş alıb gedən rüşvətxorluq, korrupsiya, dedovşina, yerlibazlıq və s. bu kimi hallar ordunu acınacaqlı hala salıb. Ermənistanın bir tək ümidi Rusiyadır. Ermənistan Rusiyanın himayəsi altına girərək özünü qorumağa çalışır. Mən tam qətiyyətlə deyirəm ki, bu gün Rusiya olmasaydı, Azərbaycana bir həftə vaxt lazım idi ki, qoşunlarımız Yerevanda dayansın. Çünki Azərbaycan ordusu ən müasir texnika ilə təchiz olunub, bu sahəyə ayrılan vəsaitlər ildən-ilə artırılır, Azərbaycan artıq texnika alan deyil, istehsal edən ölkəyə çevrilib.

Eyni zamanda, beynəlxalq ictimaiyyətin də diqqətini bu münaqişəyə cəlb edə bilmişik. Bu gün artıq münaqişənin həlli istiqamətində ortaya qoyulan iradə daha böyükdür. Bilirsiniz ki, Avropa İttifaqı, Avropa Parlamenti kimi qurumlar da prosesə qoşulmaq niyyətini ifadə ediblər. Beynəlxalq ictimaiyyət, o cümlədən, Rusiya da düşünür ki, İranla bağlı böhranın aradan qaldırılmasından öncə bu münaqişə həll edilməlidir. Düzdür, burada daha çox Ermənistanı yaranacaq böhranlardan xilas etmək niyyəti hiss olunur, amma yenə də bizim üçün münaqişənin həlli məqbuldur. Azərbaycanın danışıqlarda müdafiə etdiyi prinsiplər bütün dünyaya bəllidir. Azərbaycan Prezidenti İlham Əliyev martın 19-da Novruz bayramı münasibətilə keçirilən tədbirlərdə nitqi zamanı bir daha bəyan etdi ki, Azərbaycanın ərazi bütövlüyü mütləq bərpa olunmalıdır və münaqişənin həlli yalnız bu şəkildə mümkün olacaq. Hesab edirəm ki, Azərbaycanın ortaya qoyduğu iradə, beynəlxalq hüquq normalarına sadiqliyi, düzgün siyasəti nəticə etibarilə bu münaqişənin ədalətli həllinə səbəb olacaq.

Yeni Azərbaycan.- 2012.- 30 mart.- S.4.