Erməni terroru tarixdə və bu
gün...
Bu gün terroru dövlət siyasəti
səviyyəsində həyata keçirən
işğalçı Ermənistan təkcə Azərbaycan
üçün deyil, ümumilikdə Cənubi Qafqaz və
dünya üçün təhlükə mənbəyidir
Üçüncü yazı
Erməni terrorunun tarixi və ermənilərin zaman-zaman
həyata keçirdikləri qanlı aksiyalar barədə
faktlara əsaslanan yazımızı davam etdiririk. Kimsəyə
sirr deyil ki, hazırda dünyada sülhü və təhlükəsizliyi
əsas götürən bütün ölkələrin
gündəmindəki ana maddələrdən birini məhz
terrorçuluğa və beynəlxalq terrorizmə
qarşı mübarizə təşkil edir. Eyni zamanda, uzun illərdir ki, erməni terroruna məruz
qalan ölkəmiz də bu mübarizədə ön
sıralarda yer alır. Beynəlxalq
terrorizmə qarşı mübarizədə sərgilədiyi
əməkdaşlıqla yanaşı, Azərbaycan həm də
yerləşdiyi bölgədə sülhün bərqərar
olmasında mühüm rola malikdir. Lakin Ermənistanın
işğalçı və terrorçu siyasəti
hazırda Cənubi Qafqaz bölgəsinin inkişafına,
dövlətlərarası münasibətlərin daha yüksək
səviyyədə qurulmasına, o cümlədən,
dünyaya inteqrasiyanın daha yüksək sürətlə
baş tutmasına və sülhün təminatına ən
böyük maneədir. Onu da qeyd edək ki, bu
gün Ermənistanda terror dövlət səviyyəsində
dəstəklənir. Eyni zamanda, uzun illər
dünyanın müxtəlif nöqtələrində
qanlı aksiyalar törədən ASALA terror təşkilatının
hazırda Ermənistan hakimiyyəti, mövcud Sarkisyan rejimi ilə
bağlılığı da kimsədə şübhə
doğurmur.
ASALA Sarkisyan rejiminin güvənc
yeridir
Hər halda, sentyabrın 3-də Azərbaycanın
Macarıstandakı səfirliyinə ASALA Fighters terror təşkilatından
daxil olmuş məktub belə deməyə əsas verir. Məlumat üçün
qeyd edək ki, həmin məktubda Azərbaycan diplomatları,
xaricdə təhsil alan azərbaycanlı tələbələr,
iş adamları, diaspor təşkilatlarının fəalları
hədəf kimi göstərilib və onların qətlə
yetiriləcəyi bildirilib. Sözügedən məktubda,
eyni zamanda, ermənilər Xocalıda kütləvi
soyqırımı törətdiklərini, Türkiyəyə
qarşı qanlı aksiyalar həyata keçirən PKK terror
təşkilatı ilə birlikdə fəaliyyət göstərdiklərini
bir daha təsdiq ediblər.
Bu məktubun Azərbaycan Ordusunun zabiti Ramil Səfərovun
azad olunmasından sonra Sarkisyan rejiminin səsləndirdiyi
isterik bəyanatlarla eyni vaxta təsadüf etməsi və hətta
müəyyən qədər məzmun
oxşarlığı isə hər şeyi gün kimi ortaya
qoyur. Yəni, anlaşılan odur ki, hazırda ASALA terror təşkilatı,
ümumiyyətlə terrorçuluq Sarkisyan rejiminin güvənc
yeridir.
Erməni terrorunun “ana”sı-ASALA
Bu məqamda qeyd etmək yerinə düşər ki,
“Böyük Ermənistan” dövlətinin
yaradılmasını qarşısına məqsəd
qoymuş radikal erməni təşkilatlarının
yaranması 1885-ci ildən başlayıb. Həmin vaxtdan fəaliyyətə
başlayan əvvəl “Armenakan”, sonra isə “Hnçak” və
“Daşnaksütyun” partiyaları bu planı həyata
keçirmək üçün siyasi terror aksiyalarından
geniş istifadə edilməsini proqram sənədlərində
başlıca vasitə kimi nəzərdə tutublar. Lakin bu sırada ASALA terror təşkilatı
xüsusilə seçilir. Məlumat
üçün bildirək ki, “Ermənistanın
azadlığı uğrunda gizli erməni ordusu” adlanan bu təşkilatın
adının abreviaturası ingiliscə “Armenian Secret Army for
the Liberation of Armenia” (yəni ASALA) kimidir. Təşkilat
ilkin olaraq “Böyük Ermənistan” dövlətinin
qurulması və 1915-ci ildə baş verdiyi iddia edilən
qondarma “erməni soyqırımı”nın
dünya ölkələri tərəfindən
tanınması üçün çalışıb.
Bəzi məlumatlara görə, ASALA 1975-ci ildə,
Livanda vətəndaş müharibəsinin getdiyi bir dövrdə
Beyrut şəhərində yaradılıb. Təşkilatın
qurucuları Akop Akopyan və Akop Tarakçıyandır.
Təşkilatın qərargahı Beyrutda, təlim-məşq
bazaları isə Suriyada yerləşib. Yuxarıda
da qeyd etdiyimiz kimi, ASALA-nın əsas məqsədi Şərqi
Türkiyə, Şimali İran və Azərbaycanın
Naxçıvan və Dağlıq Qarabağ bölgələrinin
də daxil olduğu bir ərazidə “Böyük Ermənistan”
dövləti qurmaqdır. ASALA əsasən
Türkiyə və Azərbaycan vətəndaşlarına
qarşı terror aktları həyata keçirir. Təşkilatın “Əbu Nidal”, “Qara sentyabr” kimi
terror qrupları ilə əlaqələrinin
yaradılmasında onun lideri Akop Akopyanın böyük rolu
olub. Afinada 1980-ci ildə qətlə yetirilmiş
türk səfirinin ölümünə görə məsuliyyəti
öz üzərinə götürmüş A.Akopyan 1 avqust
1980-ci il tarixində “Nyu-York Tayms” qəzetinə
verdiyi müsahibədə bildirib: “Bizim düşmənimiz
türk rejimi, NATO və bizlə əməkdaşlıq etməyən
ermənilərdir”.
Qeyd edək ki, A.Akopyan 1988-ci ildə Afina şəhərində
öldürülüb.
Terror təşkilatının digər qurucusu Gevorq
Acemyandır.
O, 1932-ci ildə Suriyada anadan olub, Beyrutda
çalışıb, kitab dükanı işlədib. Acemyanın erməni və ingilis dillərində
yazdığı əsərləri bir sıra ölkələrdə
dərc olunub. ASALA-nın
yaradılmasında və idarə edilməsində xüsusi
rol oynayıb. O, 1978-89-cu illərdə Livanda dərc
olunan “Spürk” jurnalının redaktoru kimi terroru,
terrorçu erməniləri müdafiə etməsi, həmçinin,
Naxçıvan və Qarabağ ermənilərinin silaha
sarılmasını “əsaslandırması” ilə məşhurdur.
Digər terrorçu lider Simon Simonyandır. 1914-cü ildə
anadan olan Simonyan, yazıçı kimi tanınıb və
müəllimliklə məşğul olub. ASALA terror təşkilatının ən məşhur
ideoloqlarından sayılır. 1958-ci ildə
“Spürk” jurnalını yaradıb və erməni terrorizminin
təbliğinə başlayıb. ASALA-nın törəmə
terror təşkilatları isə “Geqaron”, “Erməni
Azadlıq Hərəkatı” və “Erməni Azadlıq Cəbhəsi”dir.
1979-cu ildə ASALA-ya qoşulanlar arasında ən
tanınmış terrorçular Alex Yenikomşiyan və Monte
Melkonyan olub.
ASALA-nın “fəaliyyət”
arealı
1981-ci ildə bir çox terror aktları törədən
ASALA, bir tərəfdən İsveçrəni, digər tərəfdən
isə Fransanı hədələməyə başlayıb. Fransadakı
bir çox qruplar, Kanadadakı “Azad Hay”, İngiltərədəki
“Kaytzer” qrupları ASALA-ya qoşulduqlarını elan ediblər.
Bu illərdə ASALA-nın mərkəzində
artıq parçalanmalar başlayıb. Daha doğrusu,
İsrailin Beyrutu işğal etməsiylə ASALA bu şəhəri
tərk edib və 1983-cü ildə Akop Akopyan İsrail
işğalından sonra ASALA-nın Livandakı 3 təlim
düşərgəsini itirdiyini, fələstinli idarəçilərin
ASALA-nı arxadan vurmağa
çalışdıqlarını Beyrut radiosu ilə bəyan
edib.
Beləliklə, terror təşkilatı ikiyə
parçalanıb. Bunlardan biri Akop Akopyanın qrupudur ki, həmin
qrup ən dəhşətli terror hadisəsini Fransanın Orli
hava limanında həyata keçirib. Yeri gəlmişkən,
Orli terroru barədə növbəti yazılarımızda
geniş məlumat verəcəyik.
Təşkilatın qərbi Avropadakı qrupu isə
“Asala İnqilab Hərəkatıdır”. Bu qrup terror
aktlarını Türkiyə və Azərbaycanda həyata
keçirib. Qrupun lideri isə Monte
Melkonyandır. 1983-cü ildən etibarən
ASALA Monte Melkonyanın siyasətinə tabe olub, Türkiyə
və 1988-ci ildən başlayaraq Azərbaycanda terror
aksiyaları törədib. Onun
ölümündən sonra yerinə Ara Torayan keçib.
Onu da deyək ki, ASALA fəaliyyətini Fransada daha
çox göstərməkdədir. Buna səbəb isə
bu ölkədə erməni terrorçularının sərbəst
hərəkətinə icazə verilməsidir. Bundan başqa, təşkilat ABŞ, Yunanıstan, Cənubi
Kipr, Suriya, İran, İsveçrə və Kanada da fəaliyyətlərini
davam etdirib.
Ermənilərin kürd adı
altında fəaliyyətlərinin tarixi və ya ASALA-PKK
işbirliyi davam edir
Bundan öncəki yazılarımızda da qeyd etdiyimiz
kimi, ASALA-nın Türk dünyasına qarşı qanlı
terror aksiyalarında yardımçı kimi istifadə etdiyi təşkilatlardan
biri də PKK-dır. Yəni, PKK-nın sözdə kürd
xalqının azadlığı uğrunda mübarizə
apardığı iddia edilsə də, əslində, bu terror
təşkilatının məqsədi erməni siyasətinin
reallaşmasına xidmət etməkdir. Daha dəqiq desək,
PKK-nın kürdlərin deyil, ermənilərin
yaratdığı terror təşkilatı olduğu, bu təşkilatın
gerçək məqsədinin heç də küdrlərin
hansısa azadlıqlara qovuşmasına yardımçı
olmaq deyil, türklərə və elə kürdlərin
özlərinə qarşı qanlı aksiyalar həyata
keçirmək olduğu, bir sözlə, PKK-nın erməni
siyasətinə xidmət etdiyi və tərkibinin böyük
bir hissəsinin ermənilərdən ibarət olduğu hər
kəsə bəllidir. Elə, “Türk Tarix
Qurumu” Elmi Tədqiqat İnstitutunun sabiq rəhbəri Prof.Dr.Yusuf
Halaçoğlunun vaxtı ilə Türkiyənin “A haber”
televiziya proqramında verdiyi bir açıqlama da deyilənləri
təsdiqləyir. Bir daha xatırladaq ki, həmin
açıqlamasında Yusuf Halaçoğlu hazırda
Türkiyə ərazisində 20 erməni aşirətinin (qəbiləsi)
kürd adı ilə yaşadığını və
separatçı fəaliyyətdə birbaşa iştirak
etdiyini demişdi. Arxiv sənədlərinə əsaslanan
Yusuf Halaçoğlu “ermənilərin soyqırımı”
iddialarının şişirdilmə olduğunu bildirərək,
əslində, ermənilərin dinlərini və
soyadlarını dəyişdirməklə Türkiyədə
yaşamaqda davam etdiklərini dilə gətirmişdi. Alimin fikrincə, erməni terror təşkilatı
ASALA-nın Türkiyədə fəaliyyətini gözlənilmədən
dayandırmasından sonra PKK terror təşkilatının
yaranması bəzi mətləblərdən xəbər
verir. Daha doğrusu, PKK rəhbərliyində
təmsil olunanların yarıya qədərinin erməni əsilli
olmaları onların Türkiyəyə qarşı
düşmən kəsildiklərinin göstəricisidir.
Arxiv sənədləri, hətta PKK rəhbəri
Abdullah Öcalanın da erməni əsilli olduğunu
sübuta yetirir. Bu isə, əslində,
PKK ilə ASALA-nın bir medalın iki üzü olduğuna
işarə edir.
Eyni
zamanda, PKK-nın yarandığı 35 il ərzində bu
terror təşkilatı tərəfindən türklərlə
bərabər minlərlə kürdün öldürülməsi,
həmçinin, zaman-zaman Türkiyə Silahlı Qüvvələrinin
keçirdikləri hərbi əməliyyatlar nəticəsində
öldürülən PKK-çılar arasında ermənilərin
də olması onu deməyə əsas verir ki, bu gün
Türkiyədə yaşayan ermənilər kürd adı
altında gizlənərək terrorla məşğul olurlar. Digər tərəfdən, PKK-nın əsas hədəfi
heç də kürd xalqının azadlığı deyil, əksinə,
əsrlərlə bir yerdə yaşayan eyni dini, eyni adət-ənənəni
bölüşən türklərə və kürdlərə
zərbə vurmaqdır. Bu məqamda onu da
vurğulayaq ki, “Daşnaksütyun” erməni federativ inqilab
partiyasının 1892-ci ildəki qurultayından sonra bu terror təşkilatı
“türkü, kürdü hər yerdə, hər bir şəraitdə
öldür...” əmrini verib.
Onu da qeyd etmək yerinə düşər ki, əslində,
ermənilərin kürd adı altında Türk
dünyasına qarşı fəaliyyətləri heç də
PKK ilə məhdudlaşmır. Daha doğrusu, ermənilərin
və onların xarici havadarlarının kürd kartından
istifadə etmək üçün hərəkətə
keçmələri təxminən I Dünya müharibəsi
dövrünə təsadüf edir. Yeri gəlmişkən,
türk tədqiqatçısı M.Sədi
Koçaşın “Tarixdə ermənilər və
türk-erməni münasibətləri” adlı kitabında da
bu məsələyə geniş yer verilib. Beləliklə, ermənilərdən Osmanlı
Türkiyəsinə qarşı istifadə edən Qərb
dövlətləri bu dəfə də kürdləri
dövriyyəyə soxmağa qərar verirlər. Və kürdlərin hazırlanan xəyanətdə
iştirak etməyəcəyini anlayan həmin qüvvələr
çıxış yolunu kürd adı altında erməniləri
qabağa verməkdə görürlər. Ən
maraqlısı isə odur ki, Türk dünyasına
qarşı Qərb-erməni işbirliyinin yeni formata
davamı olacaq təşkilatın əsl niyyətini gizli
tutmaq və bu qurumun guya kürdlərin azadlığı
naminə çalışdığını nümayiş
etdirmək üçün kürd dilində “müstəqillik”
sözü olmadığından, ona “mənlik” mənasını
verən “hoybun” adı verilir. Bu sözün “erməni
yurdu-hay bun” sözlərinə bənzəməsi və onun qədimdən
daşnaklar tərəfindən də istifadə olunması isə
hər iki tərəfi qane edirdi.
Qərbin ikili standartı və ya
ASALA dünyanın aparıcı dövlətləri tərəfindən
terror təşkilatı kimi tanınmayıb
Həmin dövrdə cərəyan edən hadisələr
haqqında növbəti yazılarımızda geniş
söhbət açacağıq. Hələlik isə
bir daha Ramil Səfərovun azad olunması və Qərbin bu məsələyə
reaksiyasına toxunmağı vacib sayırıq. Məsələ burasındadır ki, Qərb ölkələri
Ramil Səfərovun azad olunmasını sanki dəhşətli
bir hadisə kimi qələmə verməyə
çalışır, daha doğrusu, növbəti dəfə
erməni sevgilərini büruzə verirlər. “Erməni
sevgisi” ona görə deyirik ki, beynəlxalq terrorizmin tərkib
hissəsi olan ASALA, “Hnçak” və digər erməni təşkilatları
bu günə kimi dünyanın aparıcı dövlətləri
tərəfindən terror təşkilatları kimi
tanınmayıb. Digər tərəfdən, öz dövlətinin
və bayrağının şərəfini qoruyan Ramil Səfərovdan
fərqli olaraq dinc insanlara qarşı qanlı terror
aksiyaları həyata keçirməklə “məşhurlaşan”
erməni terrorçuları ayrı-ayrı Qərb ölkələri
tərəfindən əfv edilib. Məsələn, 1921-ci ildə
Berlində Osmanlı İmperiyasının keçmiş
daxili işlər naziri Tələt paşanı
öldürmüş erməni terrorçu S.Teyleryan Almaniyada
əfv olunub, 1921-ci ildə ADR-in daxili işlər naziri Behbud
xan Cavanşirin qatili M.Torlakyanı Britaniya hərbi
tribunalı cinayət məsuliyyətindən azad edib,
1984-cü ildə Türkiyənin baş konsulu M.Baydarı və
konsul B.Dəmiri öldürdüyünə görə
ömürlük azadlıqdan məhrum edilən erməni
Qurgen Yanikyan Amerikada əfv edilib, 1989-cu ildə Parisdə
Türkiyə konsulunun yaralanması və təhlükəsizlik
xidməti nümayəndəsinin ölümündə təqsirkar
olan terrorçu M.Melkonyan Fransada əfv edilib, nəhayət,
2001-ci ildə Orli aeroportunda partlayışın təşkilatçısı
ömürlük həbs edilən Vurujan Karapetyan Fransada əfv
olunub. Budurmu Qərbin proseslərə tərəfsiz
yanaşması? Budurmu Qərb ədaləti?
Axı ASALA təkcə Azərbaycan və
Türkiyədə deyil, bir sıra Avropa ölkələrində
də qanlı aksiyalar həyata keçirib. Hazırda beynəlxalq terrorizmə qarşı
mübarizə apardığını bəyan edən
aparıcı ölkələr səmimi olduqlarını
sübut etmək üçün heç olmasa
Macarıstandakı Azərbaycan səfirliyinə
ünvanlanmış məlum 3 sentyabr tarixli məktubdan sonra
erməni terrorunu lənətləməlidirlər.
Erməni terror təşkilatlarının
qanlı aksiyaları...
Ümumiyyətlə,
1972-1991-ci illərdə erməni terrorçuları
dünyanın əksər ölkələrində Türkiyənin
görkəmli siyasi xadimlərinə, məşhur
diplomatlarına və tanınmış iş adamlarına
qarşı 300-dən çox terror aktları həyata
keçiriblər. Bu terror aktlarının 100-dən çoxu
isə ASALA terror təşkilatının “Orli”, “9 İyun” və
“3 Oktyabr” qruplaşmaları tərəfindən 24 ölkənin
38 şəhərində həyata keçirilib. Həmin aksiyalardan bir neçəsi haqqında
aşağıda məlumat təqdim edirik. Eyni zamanda,
növbəti yazılarımızda bu silsilə qanlı
aksiyalar barədə məlumatların təqdim
olunmasını davam etdirəcəyik:
27 yanvar
1973-cü il tarixində Türkiyənin
Los-Ancelesdəki Baş konsulu Mehmet Baydar və konsul Bahadur Dəmir
78 yaşlı Amerika vətəndaşı erməni Qurgen
(Qaragin) Yanikyan tərəfindən şəhid ediliblər. Onları uydurma bir bəhanə ilə
Santa-Barbaradakı bir hotelə dəvət edərək
tapança ilə öldürən Yanikyan cinayətdən
sonra tutularaq ömürlük həbs cəzasına məhkum
edilib. 31 yanvar 1984-cü ildə xəstəlik
və qocalığına görə həbsdən azad
edilmiş Yanikyan 27 fevral 1984-cü ildə ölüb.
Bu məqamda xüsusi olaraq vurğulamaq yerinə
düşər ki, türk diplomatlarına qarşı ilk
terror kimi qiymətləndirilən həmin iki nəfərin
öldürülməsi bu istiqamətdəki qanlı aksiyalara
start veilməsi ilə yanaşı, mütəşəkkil
erməni terroruna nümunə kimi xatırlanır. Bəlkə də
bu planlaşdırılmış terrorun
başlanğıcı üçün bir işarə idi.
4 aprel
1973-cü il tarixində Fransanın
paytaxtı Parisdə Türkiyə Baş konsulluğunda və
THY (Türk Hava Yolları) bürosunda törədilən və
maddi zərərə səbəb olan partlayışlara
görə məsuliyyəti heç bir təşkilat öz
üzərinə götürməyib. Lakin bu
basqının ermənilər tərəfindən törədildiyi
şübhəsizdir.
26 oktyabr
1973-cü il tarixində ABŞ-ın
Nyu-York şəhərindəki Türk İnformasiya
Bürosuna terror hücumu polis tərəfindən zərərsizləşdirilib.
Təcavüz Yanikyanın terrorçuları tərəfindən
hazırlanıb.
20 yanvar
1975-ci il tarixində Livanın paytaxtı Beyrutda Ümumdünya kilsə
şurasının mənzil qərargahı partladılıb.
7 fevral
1975-ci il tarixində Livanın paytaxtı Beyrutda Türk İnformasiya və
Turizm Bürosuna qoyulmuş bombanı zərərsizləşdirərkən
partlayış baş verib və livanlı bir polis nəfəri
yaralanıb. ASALA-nın Yanikyan qrupu bu terror
aktına görə məsuliyyəti öz üzərinə
götürüb.
20 fevral
1975-ci il tarixində Livanın paytaxtı
Beyrutda THY (Türk Hava Yolları) bürosunda 1 kq-lıq
bombanın partlaması xeyli maddi ziyana səbəb olub. Bu
terror aktını da ASALA-nın Yanikyan
qrupu təşkil edib.
22 oktyabr
1975-ci il tarixində Avstriyanın
paytaxtı Vyanada Türkiyə səfirliyinə daxil olan
üç nəfər erməni terrorçusu səfir
Danış Tunalıgili odlu silahla qətlə yetiriblər. Terror aksiyasını ASALA terrorçuları törədib
və onlar hadisə yerindən qaçıblar.
24 oktyabr
1975-ci il tarixində Fransanın paytaxtı
Parisdə Türkiyənin Parisdəki səlahiyyətli səfiri
İsmayıl Erezin avtomobili atəşə tutulub. Nəticədə səfir Erez və
sürücü Talıb Yenər həlak olublar. Bu qanlı aksiyanı törədən ASALA və
erməni Soyqırımı Ədalət Komandasının
terrorçuları hadisə yerindən qaçıblar.
Hazırladı: Nadir AZƏRİ
Yeni Azərbaycan.- 2012.- 11 sentyabr.- S.6.