Regionlarda yeni sosial infrastruktur layihələrinin icrası uğurla davam etdirilir

Dövlət proqramlarında nəzərdə tutulan layihələrin ardıcıllıqla icra edilməsi vətəndaşların sosial rifahının yüksəlməsinə xidmət göstərir

Azərbaycanda Prezident İlham Əliyevin rəhbərliyi ilə həyata keçirilən davamlı inkişaf strategiyası, ilk növbədə, sosial məzmunu ilə fərqlənir. Düşünülmüş səmərəli siyasət sayəsində ölkənin iqtisadi potensialının artması, maliyyə imkanlarının genişlənməsi sosialyönümlü layihələrin və proqramların həyata keçirilməsinə, eləcə də infrastrukturların yenilənməsinə geniş imkanlar açıb. Ölkəmizin ümumi sosial-iqtisadi inkişafını şərtləndirən əsas amillər sırasında mütləq şəkildə regionların inkişafını nəzərdə tutan konkret bu proqram və layihələrin rolu əvəzsizdir. Hazırda Azərbaycanın bütün rayonlarında böyük infrastruktur layihələri həyata keçirilir. İqtisadiyyatın yeni sektorlarına fəal qaydada sərmayə yatırılır. Regionların sosial-iqtisadi inkişafını özündə ehtiva edən birinci və ikinci Dövlət proqramlarında nəzərdə tutulan tədbirlərin həyata keçirilməsi, xüsusilə də rayonlardakı mövcud sosial infrastrukturun və kommunal xidmət sektorlarının tam yenidən qurulması artıq qarşıdakı illər üçün başqa hədəflər üzrə tədbirlərə yol açıb, sürətlə inkişaf edən Azərbaycanın qarşısında yeni proqressiv meyillərə uyğun sosial-iqtisadi vəzifələr yaradıb. Yəni regionlarda elektrik enerjisi, qaz, su, kanalizasiya, yol və digər sosial infrastrukturların yaradılması başa çatdırıldıqdan sonra əsas məqsədlər birbaşa rayonların iqtisadi potensialının səfərbər edilərək tam hərəkətə gətirilməsinə yönəldilib. Yaxın gələcəkdə orta gəlirli dövlətlər statusuna malik ölkə kimi Azərbaycanda inkişaf meyillərinin tələblərinə uyğun layihələrin icrası da zərurətə çevrilib. 2014-2018-ci illərə dair növbəti regional inkişaf proqramının uğurla icra olunması bu reallığı təsdiqləyir.

Beləliklə, məhz sadalananların fonunda bu gün bölgələrimizdə yeni infrastruktur və sosial təyinatlı obyektlərin inşası layihələrinin həyata keçirilməsi prosesi davam etdirilir. Məsələn, cəbhə bölgəsində yerləşən Ağdam rayonunun Quzanlı qəsəbəsində inşa edilən Heydər Əliyev Mərkəzində son tamamlama işləri aparılır. Mərkəzdə akt və iclas zalları, kompüter, xarici dil kursları, elektron kitabxana, rəsm, heykəltəraşlıq və xalçaçılıq qalereyası, inzibati otaqlar, Ulu öndər Heydər Əliyevin həyat və fəaliyyətini əks etdirən eksponatlardan ibarət muzey fəaliyyət göstərəcək. Bundan başqa, mərkəzdə gənclərin asudə vaxtlarının səmərəli təşkili üçün 3D formatında kinoteatrın quraşdırılması da nəzərdə tutulub.

Şəkinin ən ucqar yaşayış məntəqəsi olan, rayon mərkəzindən 90 kilometr aralıda yerləşən Qaratorpaq kəndində isə Təhsil Nazirliyi tərəfindən tam orta məktəb üçün inşa edilən yeni məktəb binası istifadəyə verilib. Vurğulamaq lazımdır ki, son illər Şəkidə 26 yeni məktəb binası tikilib və ya əsaslı təmir olunub. O cümlədən, cari ildə rayonda 4 yeni məktəb binası qapılarını şagirdlərin üzünə açıb. Qaratorpaq kəndində istifadəyə verilən məktəb 132 şagird üçün nəzərdə tutulub. İkimərtəbəli məktəb binasında 11 sinif otağı, həmçinin 2 laboratoriya, kompüter otağı, kitabxana, bufet, akt və idman zalı fəaliyyət göstərir. Məktəb binası maye yanacaqla işləyən müasir istilik sistemi ilə təchiz olunub. 97 şagirdin təhsil aldığı məktəbdə 22 müəllim çalışır.

Xaçmaz rayonunda isə Respublika Baş Dövlət Yol Polisi İdarəsinin “Siqnal” İxtisaslaşdırılmış Layihə İstehsalat İdarəsi tərəfindən müasir işıqforların quraşdırılmasına başlanılıb. Dörd metr hündürlüyündə olan 20 ədəd müasir işıqfor şəhərin Heydər Əliyev prospektində, Hacı Zeynalabdin Tağıyev, Məhəmməd Əmin Rəsulzadə və Nəriman Nərimanov küçələrində, eləcə də Xudat şəhərində quraşdırılıb.

Yüngül konstruksiyalı bu qurğular hündürlüyü və ölçülərinə görə mövcud işıqforlardan daha böyük olduğundan sürücülərin diqqətini tez cəlb edir. Önündə iritutumlu nəqliyyat vasitəsi dursa belə, digər avtomobillərin sürücülərinin işıqforu görməsi məhdudlaşmır. İşıqforların quraşdırılması ilə yanaşı, yeni salınan küçə və prospektlərdə yol nişanları da qoyulur. Həmçinin yararsız nişanlar yeniləri ilə əvəzlənir.

Qeyd edək ki, Xaçmaz rayonunda işlər başa çatdıqdan sonra Şabran rayonunda yeni işıqfor və yol nişanlarının quraşdırılmasına başlanılacaq.

Bölgələrdə təmir, abadlıq işləri də geniş vüsət alıb. Belə ki, Ağstafa şəhərində çoxmənzilli yaşayış binalarının dam örtüklərinin dəyişdirilməsi, blok girişlərinin və pilləkənlərin təmiri, qapı və pəncərələrin dəyişdirilməsi işləri davam etdirilir.

Hazırda Ağstafa şəhəri R.Alıcanov küçəsi 1 və 2 ünvanında yerləşən 16 mənzilli iki binanın dam örtükləri tamamilə yenidən qurulur. Binaların dam örtüyü təzələnib, müasir örtüklər vurulub, yağış sularının axıdılması üçün boru xətləri quraşdırılıb.

Ağstafa şəhərinin Eyvaz Qələmçəli və Nüsrət Kəsəmənli küçələrində aparılan yenidənqurma işləri də sürətlə davam etdirilir.

Sumqayıtda da abadlıq işləri sürətlə və yeni məzmunda davam etdirilir. Şəhərin 9-cu mikrorayonu ərazisində uzun illərdən bəri yarımçıq qalan tikilinin sökülməsi, ərazinin abadlaşdırılaraq yerində bağça və musiqi məktəbinin inşa olunması nəzərdə tutulur.

Şəhərin 1-ci, 3-cü, 6-cı, 9-cu, 17-ci və 18-ci mikrorayonlarında, 47-ci, 48-ci məhəllələrində daxili yolların, bağlar massivinə gedən yolun asfaltlanması təmin olunub. Heydər Əliyev, Azərbaycan prospektləri və 20 Yanvar küçəsi boyunca yaşayış binalarının fasadları aqlay daşla üzlənib. Şəhərin əsas girişində - Sülh küçəsinin başlanğıcında yolun genişləndirilməsinə, Çerkassı küçəsinin təmirinə və dənizkənarı ərazidə yenidənqurma işlərinə, Heydər Əliyev Mərkəzinin yeni binasının inşasına başlanılıb.

Həmçinin şəhərdə 48 uşaq bağçasının dam örtüyünün və istilik sisteminin əsaslı təmir olunması, 17-ci və 18-ci mikrorayonlarda yaşayış binalarının dam örtüyünün dəyişdirilməsi, zirzəmilərdə əsaslı təmir işləri aparılır.

Məlum olduğu kimi, qlobal maliyyə böhranının davam etməsi bir sıra ölkələri ağır iqtisadi çətinliklərə salıb. Azərbaycan isə Ümummilli lider Heydər Əliyevin müəyyənləşdirdiyi strategiyanın Prezident İlham Əliyev tərəfindən uğurla həyata keçirilməsi və iqtisadiyyatın məqsədyönlü şaxələndirilməsi sayəsində nəinki bu çətinliklərdən yan keçməyə müvəffəq olub, eyni zamanda, neft gəlirlərindən məharətlə bəhrələnərək iqtisadiyyatın digər sahələrini inkişaf etdirib. Hazırda ölkə üzrə ümumi daxili məhsulun daha çox hissəsi - 70 faizi məhz qeyri-neft sektorunda yaranır. Proqnozlara əsasən, gələcəkdə bu göstərici daha da artacaq.

Qeyri-neft sektorunun maliyyə təminatının gücləndirilməsi bu sahənin inkişafına güclü təkan verir. Qeyd edək ki, son 12 ildə Azərbaycan iqtisadiyyatına 180 milyard dollardan artıq investisiyalar yönəldilib. Ölkəmizin sərmayə qoyuluşu baxımından cəlbedici məkana çevrilməsi Prezident İlham Əliyevin rəhbərliyi ilə həyata keçirilən düşünülmüş siyasətlə bağlıdır. Belə ki, ölkədəki möhkəm daxili sabitlik, ardıcıl surətdə həyata keçirilən iqtisadi islahatlar, zəngin qanunvericilik bazası, investisiyaların qorunmasına və təşviq edilməsinə dövlətin nümayiş etdirdiyi güclü siyasi iradə, yaradılan əlverişli biznes mühiti Azərbaycanı investisiya qoyuluşu baxımından cəlbedici ölkəyə çevirib. Həyata keçirilən bütün bu və digər tədbirlər nəticəsində respublikada iqtisadi fəallıq artıb, ölkəmizdə yerli və xarici kapital əsasında qurulan çoxlu sayda yeni müəssisələr yaradılıb. Respublikamızda sərmayə qoyuluşunda prioritet istiqamətlər kimi neft sektorundan kənar sahələr - ağır sənaye, alternativ enerji, informasiya-kommunikasiya texnologiyaları, kənd təsərrüfatı, qida-emal sənayesi, logistika və daşıma, turizm kimi sahələr əsas götürülür.

Təsadüfi deyil ki, Qlobal Rəqabət Qabiliyyəti hesabatında Azərbaycan iqtisadiyyatı rəqabət qabiliyyəti səviyyəsinə görə 140 ölkə arasında 40-cı yerdə qərarlaşaraq MDB məkanında 7 ildir lider mövqeyini qoruyur, “G20”yə üzv olan 8 ölkəni qabaqlayıb, “Makroiqtisadi vəziyyət” göstəricisi üzrə 10-cu yeri tutub, biznesin təkmilləşdirilməsi, əmtəə bazarının səmərəliliyi, daxili bazarın həcmi, infrastruktur göstəriciləri üzrə əhəmiyyətli irəliləyişlərə nail olub. Avqust ayında “Fitch” beynəlxalq reytinq agentliyi ölkəmizin reytinqini investisiya səviyyəsində bir daha təsdiq edərək, proqnozu “sabit” saxlayıb. Həmçinin Beynəlxalq Valyuta Fondu Azərbaycanın 2015-ci il üçün iqtisadi artım proqnozunu 4 faizədək yüksəldib.

Bir sözlə, qeyri-neft sektorunun inkişafının dəstəklənməsi, iqtisadiyyatın prioritet sahələrinə maliyyə dəstəyinin daha da gücləndirilməsi siyasəti regionların sosial-iqtisadi inkişafına dair 2014-2018-ci illəri əhatə edən sayca üçüncü Dövlət Proqramının icrasının birinci ilində də davam etdirilib. Prezident İlham Əliyev 2014-cü ildə bölgələrə 23 səfəri çərçivəsində 120-yə qədər müxtəlif təyinatlı infrastruktur obyektinin, çoxlu sayda yeni müəssisələrin açılış və təməlqoyma mərasimlərində iştirak edib və dəyərli tövsiyələrini verib. Ümumiyyətlə, ötən il regionların inkişafına bütün mənbələr hesabına 4,5 milyard manat vəsait yönəldilib. 2014-cü ildə “Sənaye ili” çərçivəsində tədbirlər planının icrası regionlarda da sənayenin inkişafına təkan verib. Belə ki, təkcə ötən il regionlarda 105 sənaye müəssisəsi açılıb. Bütövlükdə “Sənaye ili”ndə görülən tədbirlər nəticəsində qeyri-neft sənayesi 9 faiz artıb.

Təbii ki, həyata keçirilən Dövlət proqramlarının uğurlu nəticələrini bu gün ölkəmizin hər bir şəhər və rayonunda aydın şəkildə müşahidə etmək mümkündür. Geniş infrastruktur layihələrinin icrası, vətəndaşların həyat səviyyəsinin yüksəlməsi Azərbaycan regionlarının inkarolunmaz gerçəkliyidir.

Onu da vurğulamaq lazımdır ki, iqtisadi sahədə keçid dövrünü başa vuran Azərbaycan bu gün özünəməxsus milli inkişaf modeli ilə tanınır. Bu modelin üstün cəhətləri ilə bağlı beynəlxalq maliyyə qurumlarında geniş müzakirələr, təhlillər aparılır. Respublikamızın son illərdə bütün investisiya layihələrini daxili resursları hesabına reallaşdırmaqla yanaşı, regionda sərmayədar dövlət kimi çıxış etməsi reallığa çevrilib. Əminliklə deyə bilərik ki, ölkədəki sürətli inkişaf və mütərəqqi islahatlar fonunda bu məqsəd ictimai şüurda getdikcə möhkəmlənir: Bəli, bu gün hər bir azərbaycanlı doğma Vətənini abad, müasir, inkişaf etmiş görmək istəyir və bunu milli ideyanın əsas prioritetləri kimi qəbul edir.

Pərviz SADAYOĞLU

Yeni Azərbaycan.- 2015.- 3 dekabr.- S.8