“Biz fəxr edirik ki, müstəqil Azərbaycan dövlətinin vətəndaşları və regionun ən güclü siyasi təşkilatı - Yeni Azərbaycan Partiyasının üzvləriyik”

Məşhur “91-lər”dən biri, professor Fikrət İsmayılovun 80 yaşı tamam olub

Fikrət İsmayıl oğlu İsmayılov. 1935-ci il yanvarın 3-də Naxçıvan Muxtar Respublikasının Naxçıvan şəhərində müəllim ailəsində anadan olub. 1954-cü ildə Üzeyir Hacıbəyov adına Naxçıvan şəhər 1 saylı oğlan orta məktəbini bitirib. 1960-cı ildə o zamankı Pedaqoji İnstitutun, indiki Azərbaycan Dövlət Pedaqoji Universitetinin fizika-riyaziyyat fakültəsini bitirərək, təyinatla Azərbaycan Elmlər Akademiyasının Fizika İnstitutuna göndərilib. 1960-cı ilin noyabr ayından Fizika İnstitutunda laborant, baş laborant, kiçik elmi işçi, baş elmi işçi vəzifələrində çalışıb və hazırda laboratoriya müdiridir. 1973-cü ildə Ulu öndər Heydər Əliyevin təşəbbüsü və qayğısı sayəsində SSRİ Hərbi Sənaye Nazirliyinin Moskva “Elmi-Tədqiqat Tətbiqi Fizika İnstitutu”nun Bakı filialı yaradılıb və Elmlər Akademiyasının Rəyasət Heyətinin qərarı ilə Fizika İnstitutundan bir neçə nəfər, o cümlədən, Fikrət İsmayılov da həmin instituta keçib. SSRİ Hərbi Sənaye Nazirliyinin göndərişi ilə 1979-80-ci illərdə M.V.Lomonosov adına Moskva “İncə Kimya Texnologiya İnstitutunun” xüsusi fakültəsini - “Kosmik materialşünaslıq və texnologiya” ixtisası üzrə bitirib.

1982-ci ildə Azərbaycan Respublikasında yeni elmi və sənaye sahəsinin yaradılması və inkişafına görə elmi-texnika sahəsində Azərbaycan Respublikası Dövlət mükafatı laureatı adına, 2009-cu il 29 dekabr tarixində “Şöhrət” ordeninə layiq görülüb.

15-dən artıq namizədlik dissertasiyasının elmi rəhbəri və elmi məsləhətçisi olub, beynəlxalq və respublika elmi jurnallarda çap olunmuş 200-dən artıq elmi, elmi-publisistik əsərin, o cümlədən, 20 elmi ixtiranın, 10-dan artıq səmərələşdirici təklifin müəllifidir.

1988-ci ildə ölkədə baş verən ictimai-siyasi proseslərlə əlaqədar olaraq siyasi hərəkata qoşulub, Yeni Azərbaycan Partiyasının (YAP) yaradılmasının təşəbbüskarlarından və təşkilatçılarından - “91-lər”dən biri olmaqla 21 noyabr 1992-ci ildə Yeni Azərbaycan Partiyası yarandığı gündən bu partiyanın üzvüdür.

20 fevral 1993-cü ildən YAP Yasamal rayon təşkilatının sədridir. Yeni Azərbaycan Partiyasının I, II, III, IV, V qurultaylarının nümayəndəsi və YAP Siyasi Şurasının üzvü seçilib.

I çağırış 12 noyabr 1995-ci il tarixdə Azərbaycan Respublikası Milli Məclisinə keçirilən seçkilərdə Milli Məclisə deputat seçilib, parlament fəaliyyəti dövründə Təbii ehtiyatlar, energetika və ekologiya məsələləri üzrə komissiyanın sədr müavini vəzifəsində fəaliyyət göstərib.

Hazırda AMEA-nın Fizika İnstitutunda laboratoriya rəhbəri vəzifəsində və Yeni Azərbaycan Partiyası Yasamal rayon təşkilatının sədri kimi elmi, ictimai-siyasi sahədə fəaliyyət göstərir.

Bu günlərdə, daha doğrusu, yanvarın 3-də xeyirxah insan, tanınmış elm adamı, məşhur “91-lər”dən biri, professor Fikrət İsmayılovun 80 yaşı tamam olub. Bu münasibətlə təbrik və mükafatları qəbul edən yubilyar üçün ən böyük mükafatı isə yubiley ərəfəsində Prezident İlham Əliyev verib. Belə ki, Prezident İlham Əliyevin ötən il dekabrın 16-da imzaladığı Sərəncama əsasən Azərbaycan Respublikasının ictimai-siyasi həyatında fəal iştirakına görə Fikrət İsmayıl oğlu İsmayılova Azərbaycan Respublikası Prezidentinin fərdi təqaüdü veriləcək. Dövlət başçısının göstərdiyi diqqət və qayğıdan qürur hissi keçirən F.İsmayılov buna görə qəzetimiz vasitəsilə Prezident İlham Əliyevə bir daha minnətdarlıq edib: “Ölkəmizin ictimai-siyasi həyatında fəal iştirakıma görə məni Azərbaycan Respublikası Prezidentinin fərdi təqaüdünə layiq gördüyü üçün cənab Prezident İlham Əliyevə səmimi qəlbdən dərin təşəkkürümü bildirir, dövlət başçımıza möhkəm cansağlığı, uzun ömür arzulayıram! Eyni zamanda, cənab Prezidentin səmərəli ictimai fəaliyyətimi yüksək qiymətləndirərək düz beş il bundan əvvəl məni “Şöhrət” ordeni ilə təltif etdiyinə görə də daim böyük minnətdarlıq duyğusu keçirdiyimi bir daha vurğulamağı özümə borc sayıram”.

Fikrət İsmayılov, həmçinin, “Tale mənə Ulu öndər Heydər Əliyevlə eyni dövrdə yaşamaq, Onun rəhbərliyi ilə xalqımızın azadlığı, müstəqilliyimizin dönməzliyi uğrunda Qurtuluş hərəkatının, bu hərəkatın qələbəsindən sonra isə milli dövlət quruculuğunun və mühüm ictimai-siyasi proseslərin fəal iştirakçısı olmaq xoşbəxtliyi nəsib etmişdir. Unudulmaz rəhbərimizin ölməz ideyalarının, arzu və tövsiyələrinin bu gün ardıcıllıqla və uğurla gerçəkləşməsi, cənab Prezidentin novator və qətiyyətli fəaliyyəti nəticəsində müstəqil dövlətimizin güclənməsi və qüdrətlənməsi həm ömrünü elmə həsr etmiş alim-ziyalı, həm də yarandığı ilk gündən sıralarında olduğum Yeni Azərbaycan Partiyasının üzvü kimi qəbimdə böyük sevinc və qürur hissi doğurur”, - deyə əlavə edib.

“Ulu öndər Heydər Əliyevin adı ilə bağlı olan YAP xalqımızın və respublikamızın müstəqilliyi uğrunda böyük mübarizə yolu keçib”

Bəli təqdimatda da qeyd edildiyi kimi, Fikrət İsmayılov, YAP-ın yaradılmasında xidmətlər göstərmiş məşhur “91-lər”dən biridir. Bizimlə söhbətində bu məqama xüsusi olaraq toxunan yubilyar “Ulu öndər Heydər Əliyevin adı ilə bağlı olan YAP xalqımızın və respublikamızın müstəqilliyi uğrunda böyük mübarizə yolu keçib. YAP qısa müddətdə təşkilatlanaraq ölkənin ən mütəşəkkil siyasi qüvvəsinə çevrilib” deyib.

Partiyanın yaradılması prosesində iştirakını şərəfli bir mərhələ hesab edən yubilyar bildirib ki, 1992-ci ildə respublikada baş verən proseslər bir ziyalı kimi onları narahat edib. Onun sözlərinə görə, həmin vaxt Azərbaycanda idarəolunmaz bir proses cərəyan edirdi: “Məhz bu cür gərgin ictimai-siyasi vəziyyətdən çıxmaq, blokada şəraitində məhv olmaq ərəfəsində olan Naxçıvana maddi-mənəvi dayaq olmaq üçün Bakıda ziyalılar rəhmətlik Fərəməz Maqsudovun rəhbərliyi ilə “Əlincə” Xeyriyyə Cəmiyyəti yaratdılar. “Əlincə” Xeyriyyə Cəmiyyətinin iclasında belə bir məsələ qoyuldu ki, bu, ictimai cəmiyyət olduğu üçün siyasi mübarizəyə qoşulmağa hüququ yoxdur. Siyasi mübarizəyə qoşulmaq üçün yeni bir partiya yaratmaq lazımdır. Beləliklə, iclasda belə bir partiyanın yaradılması qərara alındı. Partiyanın yaradılması barədə qərarın qəbulu, eyni zamanda, ortaya “Bu partiyaya kim rəhbərlik edəcək?”, “Partiya necə adlanacaq?” kimi ciddi suallar çıxardı. Və cəmiyyətin növbəti iclasında bu suallara cavab tapıldı. 14 oktyabr 1992-ci il tarixində Elmlər Akademiyasının kiçik zalında keçirilən iclasda Murtuz Ələsgərov yeni yaratmaq istədiyimiz partiyanın Nizamnaməsini oxudu və bu partiyaya rəhbərlik etməsi xahişi ilə Ulu öndər Heydər Əliyevə müraciət qəbul olundu. Həmin müraciət 16 oktyabr 1992-ci il tarixində “Səs” qəzetində çap olundu”.

Söhbətini davam etdirən yubilyar deyib ki, oktyabrın 20-də (1992-ci il) Ulu öndər Heydər Əliyev məlum müraciətə cavab verib: “Ümummilli lider Heydər Əliyev cavabında hansı şərtlərlə belə bir partiyanın yaradılması və həmin partiyaya rəhbərlik etməsinə razılıq verə biləcəyini qeyd etdi. Beləliklə, noyabrın 19-dan başlayaraq, Azərbaycanın bütün regionlarından, ümumilikdə 550 nəfər Naxçıvana üz tutdu. Bu səfərin necə çətinliklə baş tutduğunu gedənlərin özləri yaxşı bilirlər. Çünki bəzən Naxçıvana təyyarə bileti belə satmırdılar ki, həmin tədbir baş tutmasın. Lakin xalq Ulu öndər Heydər Əliyevin ətrafında toplandı və 21 noyabr 1992-ci ildə Yeni Azərbaycan Partiyasının təsis konfransı keçirildi. Həmin konfransda Heydər Əliyev yekdilliklə partiyaya Sədr seçildi və məhz Onun təşəbbüsü ilə partiyanın adı Yeni Azərbaycan Partiyası oldu”.

Yubilyarın sözlərinə görə, YAP-ın ötən müddət ərzində qazandığı uğurların kökündə məhz Ümummilli lider Heydər Əliyevin müəyyənləşdirdiyi fəaliyyət proqramı dayanır: “Partiyamızın Ulu öndər tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi dövlət qurulmasından, əmin-amanlıq, ictimai-siyasi sabitlik, milli həmrəylik, güclü və sosialyönümlü iqtisadiyyat yaratmaqdan ibarət olub və ötən 22 ildə öz proqram məqsədlərinə, yəni müstəqillik, dövlətçilik prinsipi, qanunçuluq prinsipi, azərbaycançılıq, vətənçilik prinsipi, varislik, yaradıcı təkamül prinsipi, konstruktiv əməkdaşlıq, vətəndaş həmrəyliyi prinsipi, sosial ədalət prinsipinə və s. sadiq fəaliyyət göstərib. Ona görə də, bu gün Azərbaycanın müstəqil dövlət olaraq inkişaf mərhələlərini təhlil edərkən tam məsuliyyətlə qeyd edirik ki, YAP-ın həyata keçirdiyi tədbirlər, qəbul etdiyi tarixi qərarlar ölkəmizin gələcək inkişaf perspektivlərinin müəyyənləşdirilməsi və Azərbaycan Respublikasının bugünkü inkişaf səviyyəsinə çatması baxımından mühüm rol oynayıb. Yəni, ölkəmizin əldə etdiyi uğurlarda YAP-ın da özünəməxsus rolu və payı var. Hazırda isə Azərbaycan Respublikasının Prezidenti cənab İlham Əliyevin rəhbərliyi ilə YAP uğurla fəaliyyət göstərir və regionun ən güclü siyasi qüvvəsinə çevrilib”.

“Öz fəaliyyətimizdə kəmiyyətə yox, keyfiyyətə üstünlük veririk”

Qeyd etmək yerinə düşər ki, partiyanın yaranması ilə bağlı Naxçıvanda keçirilən tarixi konfransdan sonra Azərbaycanın bütün rayonlarında YAP-ın özəkləri yaranmağa başlayıb. Eyni zamanda, 1993-cü il fevralın 20-də 26 ilk partiya təşkilatında təmsil olunan 550 nəfərin iştirakı ilə YAP Yasamal rayon təşkilatının təsis konfransı keçirilib. Bu gün isə 155 ilk təşkilatda 27 mindən çox partiya üzvü birləşib. Belə bir göstərici rayon təşkilatının böyük inkişaf yolu keçdiyini göstərir. Daha dəqiq desək, YAP Yasamal rayon təşkilatı Yeni Azərbaycan Partiyasının böyük yerli strukturlarından biridir. Ötən illər ərzində həyata keçirilən işlərə xronoloji nəzər salan Fikrət İsmayılov, eyni zamanda, fəaliyyətlərində kəmiyyətə yox, keyfiyyətə üstünlük verdiklərini deyib: “Partiyamızın sıralarına üzv qəbul olunmaq üçün müraciət edənlərin sayı çoxdur. Amma biz kəmiyyətə deyil, keyfiyyətə üstünlük veririk. Çünki partiyamızın qurucusu Heydər Əliyevin tövsiyəsi belə olub. Biz çalışırıq ki, əqidəli insanlar YAP sıralarına qoşulsunlar. Partiyamıza üzv olmaq istəyən hər bir kəsin məsələsi rayon təşkilatının İdarə Heyətində müzakirə olunur”.

Fikrət İsmayılov YAP Yasamal rayon təşkilatında gənclərə də xüsusi diqqət və qayğı ilə yanaşıldığını bildirib. Onun sözlərinə görə, gənclərlə keçirilən görüşlərdə onları maraqlandıran məsələlər, qarşılaşdıqları problemlər öyrənilir, irəli sürdükləri təkliflərə dair müzakirələr aparılır: “Bizim gənclərimiz YAP Gənclər Birliyinin təşkil etdiyi yay və qış məktəblərində fəal iştirak edirlər”.

“Gənclərə tövsiyəm budur ki, vətənpərvərliyi və milləti sevməyi Ulu öndər Heydər Əliyevdən öyrənsinlər”

“Bir azərbaycanlı kimi Ümummilli lider Heydər Əliyevin tövsiyələrinə əməl etməyi özüm üçün şərəf bilmişəm. Eyni zamanda, biz həmişə Ulu öndərdən nəyisə öyrənmişik”, - deyən yubilyar gəncləri də daim bu tövsiyələrə əməl etməyə, Ulu öndərin müəyyən etdiyi yolla getməyə çağırıb: “Məlum olduğu kimi, yeni inkişaf mərhələsini yaşayan Azərbaycan gəncliyi Ümummilli liderimiz Heydər Əliyev tərəfindən əsası qoyulmuş və hazırda Prezident İlham Əliyevin davam etdirdiyi dövlət gənclər siyasətindən bəhrələnərək inkişaf edir, müasirləşir və böyük uğurlara imza atır. Mənim gənclərə tövsiyəm budur ki, danışmağı, ünsiyyətdə olmağı, dostluğu, mədəniyyəti, geyinməyi, ən əsası isə vətənpərvərliyi və milləti sevməyi Ulu öndər Heydər Əliyevdən öyrənsinlər. Heydər Əliyevin bizə çox böyük tövsiyələri var. Onlara əməl etməliyik. Bunların içərisində iki məqamı mən xüsusi olaraq vurğulamaq istərdim. Məsələn, Ümummilli lider milli-mənəvi dəyərlərimizin qorunub saxlanmasını tövsiyə edirdi. Bu milli-mənəvi dəyərlər isə bizim dilimiz, adətimiz, dinimiz və mədəniyyətimizdir. Yeri gəlmişkən, hələ sovetlərin dünyaya meydan oxuduğu bir vaxtda Heydər Əliyev BDU-nun yubileyində və yazıçıların qurultayında Azərbaycan dilində çıxış etdi. Bu, böyük sensasiyaya səbəb olmuşdu. Çünki o vaxt qəbul olunmuşdu ki, birinci katiblər gərək rus dilində çıxış etsinlər. Bu ənənəni isə Heydər Əliyev pozdu. Ən əsası Konstitusiyamıza Azərbaycan dilinin dövlət dili olması haqqında maddə daxil edildi. Bax, milli-mənəvi dəyərlər budur. Bu gün Onun siyasətini davam etdirən Prezident İlham Əliyevin bütün addımları, muğam sənətinin inkişaf etdirilməsi, eyni zamanda, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın bu sahədəki fəaliyyəti də milli-mənəvi dəyərlərin qorunmasına xidmət edir. Regionların sosial-iqtisadi inkişafı, artıq təkcə paytaxt Bakıda deyil, eyni zamanda, regionlarda da beynəlxalq əhəmiyyətli tədbirlərin, məsələn, Qəbələdə beynəlxalq musiqi festivalının keçirilməsi Heydər Əliyev siyasətinin nə qədər düzgün olması və Prezident İlham Əliyevin bu siyasəti necə uğurla və təkamül yolu ilə inkişaf etdirməsi deməkdir. İkinci bir məqam isə Ulu öndərin “Mən həmişə fəxr etmişəm, bu gün də fəxr edirəm ki, mən azərbaycanlıyam” kəlamıdır. Mən deyərdim ki, bu təkcə azərbaycanlılara deyil, bütövlükdə Türk dünyasına böyük bir mesajdır, çağırışdır. Həm də daima irəliyə aparan düzgün yoldur. Bu kəlamın çox dərin fəlsəfi mənası var. Mən bugünkü gəncliyə bu amala, bu çağırışa, bu müdrik kəlama riayət etməyi, öz fəaliyyətlərində bunu rəhbər tutmağı arzulayıram. Bu yolla gedənlər, bu amala sadiq olanlar hər zaman uğur qazanacaq, ölkəmizin inkişafına öz töhfələrini verəcəklər”.

Və sonda “mən fəxr edirəm ki, müstəqil Azərbaycanın vətəndaşıyam” deyən yubilyar buna görə də, məhz Ulu öndər Heydər Əliyevə minnətdar olduğunu bildirib: “Çünki Ümummilli lider Heydər Əliyev hələ sovetlər zamanı indiki müstəqil Azərbaycanın özülünün qurulması istiqamətində bir sıra mühüm addımlar atdı. Eyni zamanda, 1993-cü ilin iyununda xalqın təkidli tələbi ilə yenidən hakimiyyətə gələn Ulu öndər Azərbaycanı bir dövlət kimi məhv olmaq təhlükəsindən xilas etdi. Ən nəhayət, Ümummilli lider Heydər Əliyev min bir zəhmət bahasına qurduğu müasir müstəqil Azərbaycanın var olması və daha da inkişaf etməsi üçün cənab İlham Əliyev kimi bir şəxsiyyəti yetişdirdi və Özündən sonra Azərbaycanın idarəçilik sükanının etibarlı əllərdə olmasını təmin etdi. Bu gün Ulu öndər Heydər Əliyevin əsasını qoyduğu inkişaf siyasətinin Prezident İlham Əliyev tərəfindən uğurla davam etdirilməsi nəticəsində regionun lider dövləti olan Azərbaycan, eyni zamanda, Qərbin enerji təhlükəsizliyinin təmin olunmasında başlıca rola malikdir. Ölkəmiz tolerantlıq diyarı və nüfuzlu beynəlxalq tədbirlərin keçirildiyi məkan kimi dünyanın diqqət mərkəzindədir. Bütün bunlar isə hər bir azərbaycanlıda qürur hissi oyadır. Biz fəxr edirik ki, müstəqil Azərbaycan dövlətinin vətəndaşları və regionun ən güclü siyasi təşkilatı - Yeni Azərbaycan Partiyasının üzvləriyik. Eyni zamanda, Prezident İlham Əliyevin rəhbərliyi ilə dövlətimizin daha da inkişaf etməsi üçün hər birimiz üzərimizə düşən vəzifənin öhdəsindən layiqincə gəlməliyik”.

Sonda “Yeni Azərbaycan”çılar olaraq yubilyarı təbrik edir, ona şəxsi həyatında və siyasi fəaliyyətində uğurlar arzulayırıq.

Nadir AZƏRİ

Yeni Azərbaycan.-2015.- 6 yanvar.- S.5.