Azərbaycanın regionlarının turizm potensialından səmərəli istifadə olunur

Hazırda respublikanın müxtəlif bölgələrində yeni turistyerləşdirmə obyektləri yaradılır ki, bunların da sayəsində gələcəkdə ölkəmizin turizm imkanları daha da artacaq

Azərbaycanın uğurlu regional inkişaf strategiyasında bölgələrin iqtisadi potensialından, o cümlədən də turizm imkanlarından səmərəli istifadə olunması diqqəti xüsusilə cəlb edir. Azərbaycanın dövlət başçısı İlham Əliyev bütün ölkə boyu turizmin inkişafını qeyri-neft sektorunun əsas istiqamətlərindən biri elan edib. Prezident İlham Əliyev Şabran rayonunun ərazisində yerləşən “Qalaaltı Hotel & SPA” müasir müalicə-istirahət kompleksinin açılışındakı çıxışında hər bir ölkə, o cümlədən də gözəl təbiətə malik Azərbaycan üçün turizm sektorunun inkişafının mühüm əhəmiyyət daşıdığına diqqət çəkərək deyib: “Hər bir ölkə, xüsusilə Azərbaycan kimi belə gözəl yerlərə, təbii sərvətlərə malik olan bir ölkə mütləq turizmi inkişaf etdirməlidir. Çünki bu, daimi gəlir mənbəyidir. Təbii sərvətlər, neft, qaz - bunlar tükənən sərvətlərdir. Ancaq ölkəmizin dayanıqlı inkişafı üçün daim gəlir gətirən sahələr mütləq inkişaf etməlidir. Onların içərisində turizm xüsusi yer tutur”.

Azərbaycan geniş turizm potensialına malik ölkədir

Respublikamızda turizmin inkişafına dövlət səviyyəsində yüksək siyasi iradə nümayiş etdirilməsi ölkənin reallıqları ilə bağlıdır. Dünyanın ayrı-ayrı ölkələrinin iqtisadiyyatında mühüm yer tutan turizmin Azərbaycanda da geniş inkişaf perspektivləri var. Son illər ölkəmizin uğurlu sosial-iqtisadi inkişafı, möhkəm daxili sabitlik respublikamıza turist axınını şərtləndirən əsas amillərdəndir. Azərbaycanın coğrafi baxımdan əlverişli məkanda yerləşməsi, flora və fauna növlərinin müxtəlifliyi, Xəzər dənizi, infrastruktur təminatının yaxşılaşdırılması ölkəmizin turizm imkanlarını daha da artırır. Prezident İlham Əliyevin müvafiq Sərəncamı ilə 2011-ci ilin Azərbaycanda “Turizm ili” elan edilməsi bu sahənin daha da inkişaf etdirilməsinə güclü təkan verib. Əlamətdar haldır ki, ölkəmizin regionlarında turizmin müxtəlif növlərini, o cümlədən biznes, istirahət, sağlamlıq, idman turizmlərini inkişaf etdirmək üçün hər cür imkan vardır. Elə respublikamızda turizmin perspektiv inkişaf strategiyasında da ölkənin bütün regionlarının bu sahədəki potensialından səmərəli şəkildə istifadə etmək nəzərdə tutulub.

Eyni zamanda, qısa müstəqillik tarixində Azərbaycan dövləti ölkəmizdə turizmin inkişafına nail olmaq üçün bir sıra təşkilati tədbirlər həyata keçirib, həmçinin respublikamızda turizmin inkişafını stimullaşdıran qanunvericilik bazası yaradılıb. Belə ki, Milli Məclis 1999-cu ildə “Turizm haqqında” ayrıca qanun qəbul edib. Ölkə Prezidentinin 2002-ci il 27 avqust tarixli müvafiq Sərəncamı ilə respublikamızda 2002-2005-ci illərdə turizmin inkişafına dair ayrıca Dövlət Proqramı təsdiq olunub. “2009-2018-ci illərdə Azərbaycan Respublikasında kurortların inkişafı üzrə Dövlət Proqramı” respublikamızda istifadəsiz qalan turizm-kurort obyektlərinin bərpasına və yenilərinin yaradılmasına təkan verib. Azərbaycanda turizmin inkişafı ilə bağlı 2010-2014-cü illəri əhatə edən Dövlət Proqramının uğurla icra olunması nəticəsində respublikamızda turizm sənayesi yeni mərhələyə qədəm qoyub. Prezident İlham Əliyevin “Azərbaycan Respublikasına gələn əcnəbilərə və vətəndaşlığı olmayan şəxslərə viza rəsmiləşdirilməsi sahəsində təxirəsalınmaz tədbirlər haqqında” 2012-ci il 30 noyabr, həmçinin “Vizaların verilməsi işinin təkmilləşdirilməsi sahəsində əlavə tədbirlər haqqında 20 noyabr 2014-cü il tarixli müvafiq sərəncamları respublikamızın turist cəlbediciliyini əhəmiyyətli dərəcədə artırıb. Prezident İlham Əliyev ölkəmizin turist cəlbediciliyinin artırılmasına göstərilən yüksək siyasi iradənin davamı olaraq 2016-cı il iyunun 1-də “Elektron vizaların verilməsi prosedurunun sadələşdirilməsi və “ASAN Viza” sisteminin yaradılması haqqında” müvafiq Fərman imzalayıb. Qeyd olunan sənədlər ölkəmizə gəlib-getməni, o cümlədən də vizaların alınmasını əhəmiyyətli dərəcədə asanlaşdırıb ki, bu da respublikamıza təşrif gətirən turistlərin sayının artmasında ifadə olunur.

Ölkənin turist cəlbediciliyinin artırılması məqsədilə müasir infrastruktur yaradılmasına böyük diqqət göstərilir

Son illərdə Azərbaycanda müxtəlif turist marşrutları üzərində beynəlxalq səviyyəli turizm mərkəzlərinin yaradılması ölkəmizin turizm reytinqinin yüksəlməsində mühüm rol oynayıb. “Şahdağ” qış-yay turizm kompleksi məhz belə yüksək səviyyəli turizm obyektlərindən biridir. “Şahdağ” qış-yay turizm kompleksi dünyadakı bu tipli komplekslərdən nadirliyi və universallığı ilə fərqlənir. Dəniz səviyyəsindən 1300-2300 metr yüksəklikdə yerləşən turizm kompleksinin ərazisi 2058 hektardır. Azərbaycanda və ümumiyyətlə, dünyada ən mükəmməl layihələrdən olan “Şahdağ” qış-yay turizm kompleksi oxşar istirahət mərkəzlərindən bənzərsizliyi ilə fərqlənir və ilboyu fəaliyyət göstərmək iqtidarındadır.

Başqa bir beynəlxalq səviyyəli turizm mərkəzi - “Tufan” Dağ-Xizək Yay-Qış İstirahət Kompleksi son 3 ildə Azərbaycanın dilbər guşələrindən olan Qəbələ rayonunda yaradılır. Bu iri kompleksin inşası bir daha təsdiq edir ki, Azərbaycanda turizmin inkişafına və bu sahədə infrastrukturun yaradılmasına xüsusi diqqət göstərilir. Layihə çərçivəsində indiyədək “Tufan” Dağ-Xizək Yay-Qış İstirahət Kompleksində nəhəng infrastruktur yaradılıb, avtomobil yolunun çəkilməsi, torpaq sürüşmələrinin qarşısının alınması üçün mühafizə tədbirləri görülüb. Ərazidə insanların rahat istirahəti üçün hər cür şəraitə malik infrastrukturun, o cümlədən mehmanxana, ofislər, uşaqlar üçün istirahət guşəsi və digər müvafiq obyektlərin yaradılması istiqamətində işlər davam etdirilir. Kompleksin birinci mərhələsinin açılışı 2014-cü ilin yanvarında dövlət başçısının iştirakı ilə reallaşdırılıb.

Ölkəmizdə müxtəlif turist marşrutları üzrə geniş infrastruktur qurulmasından söhbət açarkən dünya miqyasında məşhur brend hotellərin tikintisini də ayrıca vurğulamaq gərəkdir. Ölkəmizdə mehmanxana və mehmanxana tipli obyektlərin sayı isə 2003-cü illə müqayisədə 5,4 dəfə artaraq 550-yə çatıb ki, onların da böyük əksəriyyəti regionlarda yerləşir.

Azərbaycan beynəlxalq səviyyədə yüksək turizm reytinqinə malik ölkəyə çevrilib

Hazırda Azərbaycan dünya miqyasında turizm sektorunun inkişafına görə 140 ölkə arasında 36-cı yerdə qərar tutur. Ölkəmizdə həyata keçirilən uğurlu turizm siyasətinin nəticəsidir ki, dünya miqyasında Azərbaycanın turizm reytinqi əhəmiyyətli dərəcədə yüksəlib və respublikamız BMT-nin Dünya Turizm Təşkilatının (UNWTO) 2013-cü il 24-29 avqust tarixində keçirilən XX Baş Assambleyasında qurumun İcraiyyə Şurasına üzv qəbul olunub. Hazırda Azərbaycan turizm sahəsində geniş beynəlxalq əlaqələr qurub. Belə ki, respublikamızla turizm sahəsində inkişaf etmiş 21 ölkə arasında “Turizm sahəsində əməkdaşlıq haqqında” hökumətlərarası saziş imzalanıb, 29 ölkə ilə isə saziş layihəsi hazırlanıb. Artıq ölkəmizin çoxlu sayda turizm müəssisəsi Dünya Turizm Təşkilatının assosiativ üzvləri sırasına daxil olub.

Yüksək dövlət qayğısı sayəsində Azərbaycanda turizmin qeyri-neft sektorunun mühüm istiqamətlərindən biri kimi sürətlə inkişaf etməsini 2002-ci ildən bəri respublikamızda təşkil olunan Azərbaycan Beynəlxalq “Turizm və Səyahətlər” sərgisinə marağın ildən-ilə artması da təsdiqləyir. Cari ilin aprelində 15-ci yubiley Azərbaycan Beynəlxalq “Turizm və Səyahətlər” (AITF-2016) sərgisi böyük uğurla keçib. Azərbaycan Respublikası Mədəniyyət və Turizm Nazirliyinin fəal dəstəyi ilə keçirilən “AITF” sərgisi həmçinin bu tədbirdə daim iştirak edən Azərbaycan Turizm Assosiasiyası (“AZTA”) tərəfindən dəstəklənir.

Cari turizm mövsümündə ölkəmizə gələn turistlərin sayında böyük artım müşahidə edilir

Ölkəmizdə turizmin inkişafına göstərilən diqqət artıq öz bəhrəsini verir. Belə ki, əvvəlki illərlə müqayisədə cari turizm mövsümündə ölkəmizə gələn turistlərin sayında böyük artım müşahidə edilir. Ən önəmli cəhətlərdən biri isə odur ki, ölkəmizə üz tutan turistlər yalnız paytaxt Bakını görməklə kifayətlənməyərək regionlara da üz tuturlar. Hazırda bölgələrdəki turistyerləşdirmə obyektlərində böyük sıxlıq yaşanması da deyilənlərin təsdiqidir.

Respublikamızın dilbər guşələrindən olan Qəbələ rayonu gözəl təbiətinə, sıx meşələrinə, soyuq bulaqlarına, mənzərəli çay və göllərinə, paytaxta yaxın olmasına, müasir turizm infrastrukturuna görə yerli və xarici turistlər üçün daha cəlbedicidir. Hər il Qəbələdə yeni beşulduzlu hotellərin, müasir istirahət və əyləncə mərkəzlərinin inşası rayona gələn turistlərin sayının sürətlə artmasına səbəb olur. Turistlərin istirahətinin mənalı təşkili üçün “Qafqaz Resorte”, “Qafqaz Riverside”, “Qafqaz Karvansaray”, “Qafqaz Yengicə Termal Hotel və SPA” və “Qafqaz Sport”, “Qəbələ City” və “Yeddi Gözəl” hotellərində, “Qəbələnd” istirahət və əyləncə mərkəzində yüksək şərait yaradılıb. Bu hotellərdə təkcə son bir ayda 16 mindən çox yerli və xarici turist dincəlib.

Qusar rayonunda yerləşən “Şahdağ” qış-yay turizm kompleksi cari mövsümdə rekord sayda turist qəbul edib. Əyləncə-istirahət kompleksləri arasında özünəməxsus xidmətləri ilə seçilən “Şahdağ”a iyun ayından bəri 25 mindən çox turist gəlib. İsti yay günlərində sərin havası və füsunkar təbiəti ilə seçilən “Şahdağ” qış-yay turizm kompleksini, adətən, MDB ölkələri və Avropadan olan əcnəbi turistlər daha çox ziyarət edirlər. Cari mövsümdə isə ərəb ölkələrindən olan əcnəbi turistlərin də sayı artıb.

Şabran rayonunun ərazisində yerləşən “Qalaaltı Hotel & SPA” müasir müalicə-istirahət kompleksinin xidmətlərindən indiyədək 23 min turist yararlanıb. Dəniz səviyyəsindən 700 metr yüksəklikdə yerləşən istirahət kompleksində dincələnlərin 5 min 900 nəfəri (təxminən 26 faizi) əcnəbilər olub. Prezident İlham Əliyevin iştirakı ilə ötən il avqustun 8-də açılan müasir müalicə-istirahət kompleksini daha çox MDB ölkələrinin, xüsusilə Rusiya və Qazaxıstan vətəndaşları ziyarət edirlər.

Yay aylarında Qax rayonunun qonaq-qarası nəzərəçarpacaq dərəcədə çoxalır. Hazırda rayonda 12 turizm obyekti fəaliyyət göstərir. Bu obyektlərdə yerlərin sayı 800-ə çatdırılıb. Rayon mədəniyyət və turizm şöbəsinin müdir əvəzi Dilarə Əzizovanın AZƏRTAC-a bildirdiyinə görə, cari ilin ötən dövründə rayona 18 mindən çox turist gəlib. Bu, ötən ilin müvafiq dövrü ilə müqayisədə 3 min nəfər çoxdur. Əvvəlki illərdən fərqli olaraq, bu yay rayona gələn xarici turistlərin sayı da nəzərəçarpacaq dərəcədə artıb.

Azərbaycanın qədim yaşayış bölgələrindən olan Şamaxı rayonu da son illər turistlərin diqqətini daha çox cəlb edir. Təsadüfi deyil ki, bölgəyə gələn istər yerli, istərsə də xarici turistlərin sayı ildən-ilə artır. Rayon İcra Hakimiyyətindən bildirilib ki, cari ilin ötən dövründə Şamaxıya 58 min 780 turist gəlib. Bu da ötən ilin müvafiq dövründəkindən 6 min 628 nəfər çoxdur. Bu il Şamaxıya gələn xarici turistlərin sayı 2015-ci ilə nisbətən 2 min nəfər artaraq 10 mini ötüb. Onlar əsasən ərəb ölkələrindən, Çexiya, Yaponiya, Meksika, İran, Türkiyə və Rusiyadan, habelə Orta Asiyadandır. Turistlərə “Şamaxı Palace”, “Sakit göl” istirahət mərkəzlərində, “Göy qurşağı”, “Şirvan göl” hotellərində yüksək səviyyəli xidmət göstərilir. Zəngin flora və faunaya malik Şamaxıda antik və orta əsr tarixi abidələri nəinki yerli, habelə xarici turistlərin marağına səbəb olur. Qeyd edək ki, bölgədə 60-a yaxın bu cür abidə var.

Lənkəranda turizm infrastrukturunun müasir səviyyədə olması, turistlərə göstərilən xidmətin səviyyəsi bu səfalı məkana üz tutan turistlərin də sayının artmasına səbəb olub. Bu artım yerli turistlərlə yanaşı, xarici turistlərin sayında da müşahidə olunur. Ötən illə müqayisədə bu il Lənkərana gələn turistlərin sayında 20 faiz artım qeydə alınıb. Lənkəran Turizm İnformasiya Mərkəzinin direktoru İlqar Əzimov bildirib ki, xarici turistlərin arasında Rusiya və İrandan olan turistlər üstünlük təşkil edir.

Müxtəlif səpkili tədbirlər turistlərin istirahətini daha yaddaqalan edir

Turistyerləşdirmə obyektlərində təşkil olunan müxtəlif səpkili tədbirlər turistərin istirahətini daha yaddaqalan edir. Bu baxımdan turizm məkanlarında həyata keçirilən səyyar kitabxana və açıq kitabxana layihələrini xüsusi qeyd etmək gərəkdir.

Qusar rayon Mərkəzi Kitabxanası tərəfindən “Şəfa” və “Qaya bulaq” istirahət mərkəzlərində səyyar kitabxana xidməti təşkil olunub. Təqdim olunan sərgilərdə müxtəlif mövzulu ədəbiyyat, rayonun turizm istirahət mərkəzləri haqqında nəşrlər, folklor nümunələri, milli mətbəx və s. barədə məlumatlardan ibarət bukletlər nümayiş etdirilib. Gənc kitabsevərlər arasında şeir, tapmaca və digər müsabiqələr keçirilib, qaliblərə xatirə hədiyyələri, uşaq jurnalları, Qusar rayonu haqqında bukletlər, yerli sənət ustalarının əl işləri və disklər hədiyyə edilib.

İyul-avqust aylarında Qəbələ rayonundakı “Qəbələnd Luna Park” əyləncə və istirahət mərkəzində təbiətin qoynunda yerli və xarici turistlərə səyyar kitabxana xidməti göstərilib. Xidmət zamanı tariximiz, ədəbiyyatımız, mədəniyyətimizlə bağlı 700-dən çox kitab nümayiş olunub. Turistlərə Qəbələ rayonu haqqında nəşrlər, müxtəlif çap məhsulları da təqdim olunub.

Lənkəran Mərkəzləşdirilmiş Kitabxana Sistemi tərəfindən turizm məkanlarında “Açıq kitabxana” layihəsi davam etdirilir. Layihə çərçivəsində növbəti səyyar kitabxana xidməti “Palmalife” hotelində təşkil olunub. Turistlər göstərilən xidmətdən razılıqlarını bildiriblər.

Masallı rayon Mədəniyyət və Turizm Şöbəsinin təşkilatçılığı ilə turizm obyektlərində və istirahət mərkəzlərində mədəni-kütləvi tədbirlər keçirilir. Rayon Mədəniyyət Mərkəzinin “Təravət” instrumental ansamblının, Mahmudavar kəndinin “Halay” xalq folklor kollektivinin, Heydər Əliyev Mərkəzinin uşaq rəqs kollektivinin iştirakı ilə hazırlanmış musiqi nömrələri turistlər tərəfindən alqışlarla qarşılanıb. Turizm obyektlərində təşkil olunan kitab sərgisi də böyük maraq doğurub.

Regionlara turist axınının artmasında festivalların daböyük rolu var

Son vaxtlar Azərbaycanın bölgələrində müxtəlif festivalların keçirilməsi də ənənə halını alıb ki, bu da regionlara turist axınının artmasında mühüm rol oynayır. Avqustun son günlərində Qəbələ şəhərində keçirilən IV Beynəlxalq Mürəbbə Festivalı da həm yerli sakinlər, həm də turistlər üçün yaddaqalan olub. Qəbələ rayon İcra Hakimiyyətinin təşəbbüsü və təşkilatçılığı, Mədəniyyət və Turizm Nazirliyinin, Azərbaycan Milli Kulinariya Mərkəzinin, Azərbaycan Milli Kulinariya Assosiasiyasının dəstəyi ilə “Qafqaz Karvansaray” hotelinin qarşısındakı parkda keçirilən beynəlxalq tədbirdə Türkiyə, İran, Qana, Gürcüstan, Rusiya, Şimali Kipr, Ukrayna, Özbəkistan, Çin şirniyyatçıları, eləcə də Azərbaycanın 30 şəhər və rayonunu təmsil edən mürəbbə ustaları öz məhsullarını nümayiş etdiriblər. Dünya Kulinariya Təşkilatları Birliyinin və Dünya Xalq Yaradıcılığı Təşkilatının himayəsi altında keçirilən festivalı izləyənlər arasında Mədəniyyət və Turizm Nazirliyinin, Qəbələ rayon İcra Hakimiyyətinin, Azərbaycan Milli Kulinariya Mərkəzinin rəhbər şəxsləri, bir neçə ölkənin Azərbaycandakı səfirləri, üç mindən çox yerli və xarici turist olub.

Festivalın açılış mərasimində mədəniyyət və turizm naziri Əbülfəs Qarayev, Qəbələ rayon İcra Hakimiyyətinin başçısı Səbuhi Abdullayev, Milli Məclisin deputatı, Respublika Ağsaqqallar Şurasının sədri Fəttah Heydərov, Azərbaycan Milli Kulinariya Mərkəzinin direktoru Tahir Əmiraslanov və festivalın münsiflər heyətinin sədri, Özbəkistan Aşpazlar Assosiasiyasının prezidenti Əkbər Umarov çıxış ediblər.

Bildirilib ki, artıq 4 ildir Qəbələ möhtəşəm mürəbbə festivalına ev sahibliyi edir. 2013-cü ildə bu festivalda 11, 2014-cü ildə 20, ötən il və bu il isə 30 şəhər və rayondan, eləcə də ötən il 6 və bu il isə 10 xarici ölkədən şirniyyatçıların iştirak etməsi tədbirin beynəlxalq nüfuzunun ildən-ilə daha da artmasından xəbər verir. Qeyd edilib ki, belə festivalların keçirilməsində əsas məqsəd xalqımızın qeyri-maddi mədəni irsinin qorunub saxlanmasına nail olmaqdır. Mürəbbə festivalı Qəbələdə turizmin inkişafına da çox böyük təkan verən amillərdən biridir. Prezident İlham Əliyevin bir qədər bundan əvvəl bu rayona səfəri zamanı dediyi kimi, Qəbələ indi Bakıdan sonra Azərbaycanda ikinci turizm mərkəzidir. Həqiqətən də, rayona hər gün yüzlərlə yerli və xarici turist gəlir. Qəbələ artıq festivallar mərkəzinə də çevrilib. Burada Heydər Əliyev Fondunun təşkilatçılığı ilə hər il Beynəlxalq Musiqi Festivalının keçirilməsi Qəbələnin şöhrətini dünyaya yayır.

Respublikamızın mədəniyyətini və milli kulinariyasını təbliğ etmək məqsədi ilə keçirilən Qəbələ mürəbbə festivalında rayonların hər birindən 8 çeşiddə mürəbbə hazırlayan 8 nəfərdən ibarət komanda, eləcə də həmin şəhər və rayonların bədii kollektivləri, xalq tətbiqi sənəti ustaları iştirak ediblər. Festival əvvəlcə yarış şəklində təşkil olunub. Bunun üçün xüsusi komissiya da yaradılıb. Müsabiqəyə gilas, böyürtkən, çiyələk, heyva, qoz, ərik, gül, gavalı və digər mürəbbələr təqdim edilib. Həmçinin bənövşə, nanə, itburnu, qarğıdalı, cır alça, xiyar, pomidor, yerkökü, sarı moruq, badımcan və yemiş mürəbbələri iştirakçıların marağına səbəb olub. Komissiya tərəfindən 28 nəfərdən ibarət münsiflər heyəti seçilib. Münsiflər heyətinin tərkibinə müvafiq sahə üzrə ixtisaslaşmış mütəxəssislər və digər ekspertlər daxil edilib.

Mürəbbələrin ən yaxşı təqdimatına görə xarici ölkələr arasında Ukrayna birinci, Şimali Kipr ikinci yeri, ən yaxşı mürəbbə müsabiqəsində İran birinci, Çin ikinci yeri, mürəbbələrin növ müxtəlifliyinə görə isə Özbəkistan birinci, Türkiyə ikinci yeri tutub. Azərbaycanın bölgələri arasında Zərdab (gilas), İsmayıllı (böyürtkən), Gəncə (çiyələk), Şəki (heyva), Qazax (qoz), Zaqatala (ərik), Gədəbəy (gül), Qəbələ (gavalı) birinci yerə layiq görülüb. Ən qeyri-adi mürəbbənin hazırlanmasına görə Balakən rayonu (cökə mürəbbəsi), ən çox mürəbbə təqdimatına görə Bakı komandası, ən yaxşı təqdimata görə Xaçmaz iştirakçıları qalib olublar. Mürəbbə hazırlayan müəssisələr arasında isə “Gilan Holdinq” şirkəti birinci yerə çıxıb.

“Qəbələ Qolf Villaları” yaxın gələcəkdə turistlərə xoş və maraqlı istirahət imkanı təqdim edəcək

Hazırda ölkəmizin müxtəlif bölgələrində yeni turistyerləşdirmə obyektləri yaradılır ki, bunların da sayəsində regionların turizm imkanları daha da artacaq. Məsələn, Qəbələ rayonunda yeni turizm və idman infrastrukturu layihələri uğurla icra olunur. Hazırda Dəmiraparan çayının sahilində, meşələrlə əhatə olunan dağların bənzərsiz gözəlliyinə açılan mənzərəli ərazidə Qolf İdman Kompleksi inşa edilir. Burada 72 hektar ərazidə qolf sahəsi salınır. Kompleksdə qolf məşq sahəsi və qolf klubu da azarkeşlərin istifadəsinə veriləcək. Həmçinin hazırda ərazidə inşası sürətlə davam etdirilən “Qəbələ Qolf Villaları” da gələcəkdə qonaqlara xoş və maraqlı istirahət imkanı təqdim edəcək.

Tikinti işlərini həyata keçirən “Gilan İnşaat” MMC-nin iş icraçısı və memarı Amin Seyfullayev AZƏRTAC-a müsahibəsində bildirib ki, “Qəbələ Qolf Villaları” ərazisində 66 villanın inşası nəzərdə tutulub. Villaların 27-sinin ərazisi 600 kvadratmetr, 30-u 800 kvadratmetr və 9-u 1000 kvadratmetr olacaq. İki ildir ki, 350 min kvadratmetr ərazidə tikinti işləri görülür və bu günədək 41 villa inşa edilib. Onların hamısında hörgü işləri başa çatdırılıb. Hazırda dam örtüyü, qapı-pəncərələr quraşdırılır, elektrik və suvaq işləri görülür.

Bundan əlavə, 25 villanın təməli qoyulub və hazırda hörgü işləri aparılır. Həmçinin ərazidə 2 ədəd üçmərtəbəli, 24 mənzilli yaşayış binası, “Spa və Əyləncə Mərkəzi” və “Uşaq bağçası” da mövcud olacaq. Villalarda və yaşayış binalarında müasir standartlara uyğun liftlər quraşdırılacaq. Bütün tikililərin qarşısında hovuz inşa edilir və hər birinin ayrıca həyətyanı sahəsi var. Villaların daxilində qonaq otağı, yemək salonu, mətbəx, fitnes salonu, cakuzi, türk hamamı, xidmətçi otağı, sanitar qovşaqlar və yataq otaqları mövcud olacaq.

Mübariz ABDULLAYEV

Yeni Azərbaycan.- 2016.- 3 sentyabr.- S.6