Görkəmli bəstəkar Fikrət Əmirovun könül nəğmələri səsləndirilib

Aprelin 12-də M.Maqomayev adına Azərbaycan Dövlət Filarmoniyasında görkəmli bəstəkar, SSRİ Xalq artisti, Dövlət mükafatı laureatı Fikrət Əmirovun əsərlərindən ibarət konsert keçirilib. “Mədəniyyət” kanalı və Müslüm Maqomayev adına Azərbaycan Dövlət Filarmoniyasının birgə layihəsi çərçivəsində baş tutan konsertdə Xalq artisti Ağaverdi Paşayevin bədii rəhbərliyi ilə Azərbaycan Dövlət Xalq Çalğı Alətləri Orkestri çıxış edib.

Konsertdə unudulmaz bəstəkarın musiqimizin inkişafında yeni mərhələ açan və dünya musiqisinə əvəzsiz töhfələr verən “Gözün aydın” musiqili komediyasından rəqs, “Azərbaycan elləri”, “Mən səni araram”, “Sevdiyim yardır”, “Azərbaycan” süitası, “Şeyx Sənan” dramından “Kor ərəbin mahnısı”, “Kürd ovşarı” simfonik muğamından fraqment, “Sevil” operasından Sevilin və Balaşın ariyaları, “Böyük dayaq” filmindən Pərişanın mahnısı və “Min bir gecə” baletindən Şəhrizadın şənliyi əsərləri səsləndirilib.

Xalq artisti Samir Cəfərov, Əməkdar artistlər İnarə Babayeva, Lalə Məmmədova, Anar Şuşalı, Ehtiram Hüseynov, Elnur Əhmədov, Gülnaz İsmayılova, Almaz Orucova və başqalarının ifasında səsləndirilən nəğmələr gecəyə xüsusi rəng qatıb.

Müşfiqə BAYRAMLI

Yeni Azərbaycan.- 2017.- 14 aprel.- S.6