Bölgələrdə yol infrastrukturunun yenilənməsi ilə bağlı tədbirlər mütəmadi xarakter daşıyır

Azərbaycanın regionlarında avtomobil yollarının tikintisi və yenidən qurulması işlərinin həcmi davamlı olaraq artır

Qlobal miqyasda mürəkkəb siyasi proseslərin və iqtisadi tənəzzül meyillərinin hökm sürdüyü indiki mərhələdə Azərbaycan uğurlu tərəqqi strategiyası və rasional islahatlar sayəsində dayanıqlı inkişafı təmin edə bilib. Müxtəlif sahələrin tərəqqisini təmin edən islahatların məqsədyönlü və sistemli şəkildə həyata keçirilməsi, müasir çağırışlara uyğun inkişaf paradiqmalarının müəyyən edilməsi yeni mərhələdə uğurlu nəticələrin əldə olunmasına zəmin yaradıb. Azərbaycanın yeni mərhələdə iqtisadi inkişaf strategiyasının uğurlu olmasını şərtləndirən başlıca faktorlardan biri indiyə qədər həyata keçirilən strateji kursun effektivliyidir. Yəni iqtisadi bazis əsaslı olduğuna - fundamental xarakter daşıdığına görə islahatların səmərəliliyini təmin etmək və qarşıdakı mərhələdə daha uğurlu inkişaf dinamikası əldə etmək mümkün olub. Yeni iqtisadi şərait çərçivəsində müstəqil Azərbaycanın strateji inkişaf paradiqmaları özündə kompleks məsələləri ehtiva edir, uzunmüddətli və dayanıqlı inkişafın fundamental əsasını təşkil edir. Ümumiyyətlə, iqtisadiyyatın diversifikasiyasına nail olmaq üçün həyata keçirilən tədbirlər və əldə edilən nailiyyətlər yeni inkişaf perspektivlərinin meydana çıxmasını şərtləndirib.

Təbii ki, davamlı inkişaf göstəriciləri bütün sahələri əhatə edir və institusional islahatların mütəmadi xarakter daşıması nəzərdə tutulub. Buna paralel olaraq həyata keçirilən sosial-iqtisadi siyasətin mühüm istiqamətlərindən biri kimi müxtəlif sahələri əhatə edən proqramlar və layihələrin müvəffəqiyyətlə icra olunması mühüm vəzifə kimi müəyyənləşdirilib. İndi qarşıda duran bütün proqramlar uğurla icra olunur, əldə edilən nəticələr gələcəyə nikbin baxmağa əsas yaradır. Azərbaycanın iqtisadi potensialı qarşıda duran bütün proqramların yerinə yetirilməsinə və pozitiv göstəricilərin əldə edilməsinə imkan verir. Ayrı-ayrı sahələrin inkişafını təmin edən belə proqramlar çərçivəsində həyata keçirilən tədbirlər davamlı xarakter daşıyır.

Ayrıca, müxtəlif sahələrlə bağlı layihələrin icra olunması ilə mükəmməl infrastruktur təminatının yaradılmasına xidmət edən işlərə xüsusi diqqət yetirmək lazımdır. Yol infrastrukturunun yenilənməsi yönündə davam etdirilən işlər də bu baxımdan böyük əhəmiyyətə malikdir. Ümumiyyətlə, respublika rayonlarını əhatə edən avtomobil yollarının tikintisi və yenidən qurulması ilə bağlı görülən tədbirlər ardıcıl xarakterə malikdir.

Yol infrastrukturunun yenilənməsi sahəsində görülən işlər paytaxt Bakı ilə yanaşı, Azərbaycanın bölgələrini də əhatə edir. Regionların sosial-iqtisadi inkişafı ilə bağlı qəbul edilən Dövlət proqramları çərçivəsində respublikanın bütün bölgələrində yeni yollar çəkilib və yenidən qurulub, çoxlu sayda körpülər, yol qovşaqları tikilib, bir sözlə, infrastruktur daha da yaxşılaşdırılıb. Hazırda da bölgələrdə yol infrastrukturunun yenilənməsi istiqamətində işlər ardıcıl və intensiv şəkildə davam etdirilir. Ayrıca, qarşıdakı dövrdə bütün kənd yollarının təmirinə nail olmaqla bağlı ciddi vəzifə müəyyən olunub. Sözügedən sahəni daim diqqətdə saxlayan Prezident İlham Əliyev respublika rayonlarını əhatə edən avtomobil yollarının tikintisi, yenidən qurulması ilə bağlı mütəmadi olaraq sərəncamlar imzalayır.

Qeyd etmək lazımdır ki, regionların sosial-iqtisadi inkişafına dair Dövlət Proqramı çərçivəsində avtomobil yollarında yenidənqurma işləri cari ilin ötən müddəti ərzində ardıcıl olaraq həyata keçirilib və hazırda da davam edir. Yeri gəlmişkən, Bərdə-İstisu avtomobil yolunun Tərtər-Şıxarx hissəsində və “Marağa-150” abidəsi ətrafında geniş abadlıq işləri aparılıb. 4150 metr məsafədə yolun hər iki tərəfi genişləndirilib, əraziyə münbit torpaq verilərək hamarlanıb. Avtomobil yoluna yeni asfalt örtük salınıb, yol kənarlarına iki kilometr bardür düzülüb. Yolboyu 10 minə yaxın Eldar şamı, 5 mindən çox meyvə ağacı, 700 min ədəd dekorativ kol əkilib. Yeni əkilən ağaclar suvarılıb və onlara aqrotexniki qaydada qulluq göstərilib.

Gələn il isə 3 min 300 nəfər əhalinin yaşadığı 14 yaşayış məntəqəsini birləşdirən, Daşkəsən-Əmirvar-Qabaqtəpə yolunun tikintisinə başlanılacaq. Ümumilikdə 25 kilometr uzunluğunda olacaq yolun çəkilişi ilə Daşkəsənin Gurbulaq, Əmirvar, Əmirvar-Əhmədli, Qazaxlı, Qabaqtəpə, Pirverdilər, Rəsullu, Güneykənd, Tapar, Gəlinqaya, Təzəkənd, Astaf, Dəvrallı kəndlərində və Alunitdağ qəsəbəsində yaşayan sakinlərin rayon mərkəzi ilə əlaqəsi asanlaşacaq. Həmçinin Daşkəsən-Əmirvar-Qabaqtəpə yolunun istismara verilməsi rayonun bu kəndlərində turizmin inkişafına əhəmiyyətli təsir göstərəcək. Qeyd edək ki, Daşkəsən-Əmirvar-Qabaqtəpə yolunun əhatə etdiyi 14 yaşayış məntəqəsinin hər biri özünün əlverişli təbii-coğrafi şəraiti, yaylaqları, sıx meşəlikləri, irili-xırdalı dağ çayları, gölləri, şəlalələri, səfalı havası və digər təbii amilləri ilə turizmin inkişafı üçün təkrarsız məkanlar hesab olunur.

Digər tərəfdən, dövlətimizin başçısı regionlara səfərləri çərçivəsində yeni salınan avtomobil yollarının, körpülərin istifadəyə verilməsi mərasimində şəxsən iştirak edir. Yeri gəlmişkən, noyabrın 28-də Azərbaycan Respublikasının Prezidenti İlham Əliyev Sabirabad rayonunda əsaslı şəkildə bərpa olunaraq yenidən qurulmuş Qalağayın-Osmanlı-Çöl Beşdəli-Zalqarağac-Çöl Ağaməmmədli-Azadkənd-Muğan-Gəncəli avtomobil yolunun açılışında iştirak edib. Azərbaycan Prezidentinin 2017-ci il 7 iyul tarixli Sərəncamı ilə əsaslı təmir olunan 60 kilometrlik yolun 19,6 kilometrlik hissəsi istismara hazırdır. 15 yaşayış məntəqəsini birləşdirən bu yolda 41 min sakinin rahat və təhlükəsiz gediş-gəlişi təmin olunacaq. Dövlətimizin başçısına məlumat verilib ki, hər birinin eni 3 metr olan ikizolaqlı bu avtomobil yolu 4-cü texniki dərəcəlidir. Yolun bütün infrastrukturu müasir tələblər səviyyəsində qurulub. Lazımi yerlərdə təhlükəsizlik dirəkləri basdırılıb, yol nişanları, göstərici lövhələr quraşdırılıb, yol-cizgi xətləri çəkilib, suötürücü borular salınıb. Sabirabadda yenidən qurulan bu yol dövlətin öz vətəndaşlarının firavanlığına və rahatlığına göstərdiyi diqqət və qayğının daha bir təzahürüdür.

Bundan başqa, noyabrın 28-də Azərbaycan Respublikasının Prezidenti İlham Əliyev Sabirabada səfəri çərçivəsində tamamilə bərpa edilərək yenidən qurulmuş Suqovuşan-Qaralar-Qəfərli-Əhmədabad-Nərimankənd-Həşimxanlı avtomobil yolunun açılışında iştirak edib. “Azəravtoyol” Açıq Səhmdar Cəmiyyətinin sədri Saleh Məmmədov məlumat verib ki, yeni yol 20 min nəfər əhalinin yaşadığı 10 yaşayış məntəqəsini birləşdirir. Ümumi uzunluğu 43 kilometr olan 4-cü texniki dərəcəli yolun hərəkət hissəsinin eni 6 metr, 2 hərəkət zolağının hər birinin eni isə 3 metrdir. Yenidənqurma zamanı burada genişmiqyaslı torpaq işləri görülüb, qum-çınqıl və iki laydan ibarət 12 santimetr qalınlığında asfalt-beton döşənib. 144 metr uzunluğunda müxtəlif diametrli suötürücü borular tikilib, kifayət qədər yol təhlükəsizlik dirəkləri, yol nişanları və göstərici lövhələr quraşdırılıb, cizgi xətləri çəkilib.

Noyabrın 28-də həmçinin Tərtər-Seydimli-Qaradağlı-Sarov avtomobil yolunun açılışı olub. Azərbaycan Respublikasının Prezidenti İlham Əliyev açılışda iştirak edib. “Azəravtoyol” ASC-nin sədri Saleh Məmmədov dövlətimizin başçısına məlumat verib ki, uzunluğu 29,5 kilometr olan Tərtər-Seydimli-Qaradağlı-Sarov avtomobil yolu üçüncü texniki dərəcəlidir. İki hərəkət zolaqlı, hərəkət hissəsinin eni 8 metr olan yol inşa edilərkən 39,7 min kubmetr torpaq işləri görülüb, müxtəlif diametrli suötürücü borular tikilib, 14 avtobus dayanacağı yaradılıb. Bundan əlavə, yol üzərində işıq dirəkləri quraşdırılıb, yol nişanları və göstərici lövhələr yerləşdirilib. Yolun 17-ci kilometrliyində İncəçay çayı üzərində uzunluğu 34,8 metr, eni 10,5 metr olan körpü inşa edilib. Prezident İlham Əliyevin bu ilin iyulunda imzaladığı Sərəncama əsasən tikilən Tərtər-Seydimli-Qaradağlı-Sarov avtomobil yolu 24 min nəfər əhalinin yaşadığı 20 yaşayış məntəqəsini birləşdirir.

Göründüyü kimi, regionların sosial-iqtisadi inkişafı Dövlət proqramlarına uyğun olaraq yol infrastrukturunun yenilənməsi istiqamətində həyata keçirilən məqsədyönlü tədbirlər çərçivəsində avtomobil yollarının tikintisi və yenidən qurulması işlərinin həcmi mütəmadi olaraq artır. Bu istiqamətdə həyata keçirilən irimiqyaslı layihələrin davamlı xarakterə malik olması ayrıca qeyd edilməlidir. Xüsusilə də, regionlarda kənd və qəsəbələri birləşdirən yolların, həmçinin yaşayış məntəqələrinin daxili yollarının təmirinə və yenidən qurulmasına diqqətin artırılması bu istiqamətdə əhəmiyyətli nəticələrin əldə olunmasını şərtləndirir. Bu layihələr, eyni zamanda, vətəndaşların həyat şəraitinin yaxılaşmasına xidmət edir, Azərbaycan dövlətinin quruculuq işlərini davam etdirmək əzmində olduğunu göstərir. Yol-nəqliyyat sisteminin təkmilləşdirilməsi, yeni körpülərin və yolayrıcılarının tikilməsi, magistral yolların salınması sosialyönümlü tədbirlər kimi həm də Azərbaycanın iqtisadi gücünün, potensialının göstəricisidir və belə layihələr regionlarda yol-nəqliyyat infrastrukturunun daha da müasirləşdirilməsinə xidmət edir. Belə layihələr sırasında, yuxarıda qeyd etdiyimiz kimi, Tərtər-Seydimli-Qaradağlı-Sarov marşrutu üzrə yaşayış məntəqələrini əhatə edən respublika əhəmiyyətli Goranboy-Tərtər avtomobil yolunun tikintisi layihəsi xüsusi əhəmiyyət daşıyır.

Nurlan QƏLƏNDƏRLİ

Yeni Azərbaycan.- 2017.- 1 dekabr.- S.7.