Azərbaycan Xalça Muzeyində “Muzey və könüllülər” adlı tədbir keçirilib

Dekabrın 5-də Azərbaycan Xalça Muzeyində Beynəlxalq Könüllülər Günü münasibətilə “Muzey və könüllülər” adlı tədbir keçirilib. Tədbirdə muzeyin direktoru, sənətşünaslıq üzrə fəlsəfə doktoru Şirin Məlikova və digər çıxış edənlər ölkəmizdə gənclərin könüllülük hərəkatında fəal iştirak etməsini yüksək qiymətləndiriblər.

Qeyd edilib ki, Azərbaycanın mədəni irsinin qorunub saxlanılması, nümayiş etdirilməsi, təbliğ olunması və bütün dünyaya çatdırılması missiyası muzeyin əsas məqsəd və vəzifələrindən biridir. Muzey könüllülərinin əsas fəaliyyəti insanların muzeylərə marağının artırılması, muzey işində təcrübə, bacarıq və qabiliyyətlərinin inkişafına yönəldilib.

Tədbirdə çıxış edən “ASAN Könüllüləri” təşkilatının sədri Bəxtiyar İslamov bildirib ki, Azərbaycan Dövlət Mədəniyyət və İncəsənət Universiteti, Dövlət Rəssamlıq Akademiyası, Azərbaycan Dillər Universiteti, Azərbaycan Dövlət İqtisad Universiteti və Bakı Humanitar Kollecinin 40-a yaxın tələbəsi muzeyin könüllüləri sırasına qoşulub. Könüllülük dövründə muzeyin işi ilə yaxından tanış olaraq milli irsimizin qorunub saxlanılması və geniş ictimaiyyətə çatdırılmasında zəngin təcrübə toplayıblar. Onlardan xüsusi aktivliyi və bacarığı ilə seçilən 6 nəfər muzeydə işlə təmin olunub.

Sonda Xalça Muzeyi tərəfindən könüllü gənclərə sertifikatlar təqdim olunub.

Müşfiqə

Yeni Azərbaycan.- 2017.- 6 dekabr.- S.6.