Cahangir Novruzov Türkiyədə ən yaxşı teatr rejissoru adına layiq görülüb

Azərbaycanın görkəmli teatr və kino aktyoru, rejissor, Əməkdar incəsənət xadimi Cahangir Novruzov Türkiyədə “XVII Direklerarası Seyirci Ödülleri” teatr mükafatına layiq görülüb.

C.Novruzova bu mükafat Adana Böyükşəhər Bələdiyyə Teatrında səhnələşdirdiyi A.P.Çexovun kiçik dram əsərlərindən ibarət “Ah, bu evlilik...” tamaşasındakı rejissor işinə görə verilib. Mükafat Adanada keçirilən mərasimdə həmyerlimizə təqdim olunub.

Məlumat üçün bildirək ki, mükafatın “Halk Jürisi”nin üzvləri 2016-2017-ci il teatr mövsümünün ən yaxşılarını müəyyənləşdiriblər. Münsiflər heyətinin üzvləri Türkiyənin bir sıra şəhərlərinin teatrlarında səhnəyə qoyulan tamaşaları izləyərək qalibləri seçiblər.

Bu münasibətlə “Yeni Azərbaycan” qəzeti olaraq qardaş ölkədə yaşayıb-yaradan sənətkarla əlaqə saxladıq. O, qazandığı hər bir uğur və mükafatın Azərbaycanın adına məxsus olduğunu deyib: “Dünyanın müxtəlif ölkələrində yaşayan soydaşlarımız və həmvətənlərimizin borcudur ki, birlik və həmrəylik nümayiş etdirib Azərbaycana layiqli xidmət etsin, adımızı daim zirvələrə qaldırsın. Mən də bacardığım qədər Azərbaycan mədəniyyətinin daha da inkişafı üçün əlimdən gələni edirəm və bundan sonra da var qüvvəmlə çalışacağam”.

Məlumat üçün bildirək ki, 1995-ci ildən Türkiyədə yaşayan Cahangir Novruzov hazırda Adana şəhərində Çukurova Universitetinin Dövlət Konservatoriyasının teatr bölməsində çalışır. Cahangir Novruzov ötən teatr mövsümündə “Tiyatro için Emek Ödülü” mükafatına layiq görülmüşdü. O, eyni zamanda, Adana Azərbaycan Mədəniyyət və Həmrəylik Dərnəyinin sədr müavinidir.

Müşfiqə BAYRAMLI

Yeni Azərbaycan.- 2017.- 23 dekabr.- S.11.