Azərbaycanda böyük sosial layihələr həyata keçirilir

Bu layihələrin reallaşdırılması nəticəsində cənub bölgəsinin ayrı-ayrı rayonlarında da tikinti-quruculuq işləri geniş vüsət alıb

Hazırda dünyanın əksər ölkələrində böhran yaşandığı halda, Azərbaycanda aparılan tikinti-quruculuq, abadlıq işləri davamlı xarakter daşıyır. Məhz bu işlər nəticəsində ölkəmiz hərtərəfli şəkildə inkişaf edib. Prezident İlham Əliyevin diqqət və qayğısı nəticəsində əldə edilən bu inkişafdan ölkəmizin cənub bölgəsinə, o cümlədən Astara rayonuna da pay düşüb. Dövlət başçısının diqqətindən söz düşmüşkən, məlumat üçün bildirək ki, son 5 ildə Prezident İlham Əliyev tərəfindən Astara rayonunun sosial-iqtisadi inkişafı ilə bağlı 8 Sərəncam imzalanıb. Bu sərəncamlarla ayrılan vəsait hesabına rayonun şəhər, qəsəbə və kəndlərində tikinti-quruculuq, abadlıq işləri geniş vüsət alıb, minlərlə yeni iş yeri açılıb.

Bir sözlə, son illər Astara rayonunun mənzərəsi tamamilə yenilənib, əhalinin yaşayış səviyyəsi yüksəlib. Astara şəhərindəki Heydər Əliyev Parkı, prospekt və küçələr yenidən qurularaq müasir işıqlandırma sistemi ilə təmin edilib, çoxmərtəbəli ictimai yaşayış binalarının dam örtükləri dəyişdirilib, mərkəzi xəstəxana əsaslı təmir edilərək ən müasir inventar və avadanlıqlarla təchiz olunub. İnsanların asudə vaxtının səmərəli keçməsi, mənalı istirahəti üçün Xəzər dənizi sahilində park-bulvar kompleksi salınıb. Hazırda bu ərazi genişləndirilir, şəhərə içməli su xətti çəkilir.

Həmçinin Ərçivan qəsəbəsində Boks Mərkəzi inşa edilib. Ərçivan-Şuvi-Alaşa-Qapıçıməhəllə və Siyaku-Rinə, Deqədi-Pəlikəş yolu asfaltlaşdırılıb, Taxtanakəran-Miki, Taxtanakəran-Toradi yolunun yenidən qurulması davam etdirilir. Rayon ərazisində, ümumilikdə, 100 kilometrdən çox avtomobil yolu asfaltlaşdırılıb, Şiyəkəran, Şəmətük, Siyaku və Pəlikəş kəndlərində 8 avtomobil körpüsü salınıb.

Son illər rayonda 40-dan çox məktəb binası tikilib və ya əsaslı şəkildə yenidən qurulub, Kijəbə qəsəbə və Pensər kənd sahə xəstəxanaları təmir edilib, Pəlikəş sahə xəstəxanası üçün yeni bina inşa olunub. Rayonun 37 yaşayış məntəqəsi tam qazlaşdırılıb.

Pəlikəş kəndində sahə xəstəxanası üçün inşa edilmiş yeni binadan söz düşmüşkən, bildirək ki, Azərbaycan Hökuməti və Dünya Bankı tərəfindən maliyyələşdirilən, Kənd Təsərrüfatı Nazirliyi yanında Kənd Təsərrüfatı Kreditləri üzrə Dövlət Agentliyi tərəfindən həyata keçirilən Azərbaycan Kənd İnvestisiya Layihəsi (“AzKİL-2”) çərçivəsində tikilmiş birmərtəbəli, 15 çarpayılıq kənd sahə xəstəxanasında xəstələrin müayinəsi və müalicəsi üçün hər cür şərait yaradılıb.

1972-ci ildə inşa edilmiş uyğunlaşdırılmış binada yerləşən kənd sahə xəstəxanasının yerində inşa edilmiş yeni səhiyyə müəssisəsinin xidmətindən ərazidə yaşayan 7000 nəfər əhali yararlanacaq.

Kənd sahə xəstəxanasının yeni binasının istifadəyə verilməsi münasibətilə keçirilən mərasimdə Astara rayon İcra Hakimiyyətinin başçısı Qəzənfər Ağayev, Dünya Bankının Azərbaycan üzrə direktoru Navid Hasan Naqvin, “AzKİL-2” üzrə TASK meneceri Satoşi İşihava, “AzKİL-2”nin direktoru Sübhan Əsgərov və başqaları iştirak ediblər.

Astara rayon İcra Hakimiyyətinin başçısı Qəzənfər Ağayev çıxışında qeyd edib ki, görülən işlər dövlət başçısının diqqət və qayğısının nəticəsidir. Onun sözlərinə görə, yüksək dağlıq ərazidə yerləşən Pəlikəş kəndinin yolları bərbad olduğu üçün əhali böyük əziyyət çəkirdi. İndiyədək normal yolu olmayan bu kəndə Prezident İlham Əliyevin Sərəncamı ilə ayrılmış vəsait hesabına yüksək səviyyəli avtomobil yolu salınıb. On iki min nəfər əhaliyə xidmət edən 21 kilometr uzunluğunda olan Deqədi-Pəlikəş avtomobil yolunun asfaltlaşdırılması və yolun açılışında dövlətimizin başçısının iştirak etməsi əhali tərəfindən böyük razılıqla qarşılanıb.

Ərazidə yeni məktəb binalarının tikilib istifadəyə verildiyini, körpülərin salındığını, elektrik təsərrüfatının yeniləndiyini vurğulayan Q.Ağayev görülən işlərin əhalinin güzəranının yaxşılaşdırılmasına, firavan yaşamasına xidmət etdiyini diqqətə çatdırıb.

Bildirilib ki, Azərbaycan Prezidentinin iyunun 8-də “Astara şəhərində dənizkənarı park-bulvar kompleksi ərazisinin genişləndirilməsi ilə bağlı əlavə tədbirlər haqqında” imzaladığı Sərəncam da dövlətimizin başçısının Astaraya və astaralılara göstərdiyi diqqət və qayğısının təzahürüdür.

O da qeyd olunub ki, xeyli əvvəllər inşa edilmiş köhnə binada əhaliyə lazımi tibbi xidmət göstərmək mümkün olmadığından Pəlikəş və ətraf kəndlərin əhalisi rayon mərkəzinə gəlməli olurdu. “Burada əhaliylə keçirilən səyyar qəbulda sakinlərin müraciətini nəzərə alaraq Azərbaycan Kənd İnvestisiya Layihəsinin icraçılarını yeni xəstəxana binasının tikintisinə cəlb etdik və nəticəsi göz qabağındadır”, - deyə Q.Ağayev vurğulayıb.

Bu məqamda vurğulamaq yerinə düşər ki, yerlərdəki problemlərin operativ həlli üçün rayonda əhali ilə səyyar qəbullar mütəmadi olaraq keçirilir. Belə qəbullardan biri isə bir müddət öncə rayonun ucqar kəndlərindən olan Toradi, Hamoşam, Asxanakəranda olub.

Rayon İcra Hakimiyyətindən verilən məlumata görə, qədim tarixə malik bu kəndlərdə əhalinin əsas məşğuliyyəti arıçılıq, bağçılıq, quşçuluq, heyvandarlıq və əkinçilikdir. Qəbul zamanı çıxış edən kənd sakinləri görülən işlərə görə minnətdarlıq etməklə yanaşı, Taxtanakəran-Toradi yolunun Baba Rəsul ziyarətgahına qədər uzadılması, Hamoşam kəndində yeni mədəniyyət evinin tikilməsi, internet istifadəçilərinin sayının artırılması üçün ATS-ə əlavə avadanlıqların quraşdırılması, Hamoşam həkim evinin xəstəxanaya çevrilməsi, elektrik dirəklərinin dəyişdirilməsi və s. barədə təkliflər veriblər.

Səyyar qəbul və görüşlərdə çıxış edən rayon İcra Hakimiyyətinin başçısı Qəzənfər Ağayev rayonun ən ucqar dağlıq ərazilərini əhatə edən Toradi, Hamoşam, Asxanakəran, Motlayataq, Əzərüd və Amboba kəndlərində tikilmiş müasir tipli məktəb binalarının, tibb məntəqəsi, poçt binaları və digər tikililərin Ulu öndər Heydər Əliyevin siyasətini uğurla davam etdirən Prezident İlham Əliyevin uğurlu siyasətinin nəticəsi olduğunu diqqətə çatdırıb. Bundan sonra da əhalinin sosial rifah halının yaxşılaşdırılması istiqamətində tədbirlərin davam etdiriləcəyini əminliklə söyləyən natiq qeyd edib ki, rayonun səfalı guşələri kimi bu kəndlərdə turizmin hərtərəfli inkişafı üçün əlverişli şərait var.

Heç şübhəsiz, həyata keçirilən abadlıq-quruculuq işləri rayona turist axınını da gücləndirir. Bununla bağlı konkret faktlara keçməzdən öncə bildirək ki, Azərbaycanda turizm sahəsinin inkişafına xüsusi önəm verilir, dövlətimiz tərəfindən bu sahədə kompleks tədbirlər həyata keçirilir. Ölkəmizdə hər il beynəlxalq səviyyəli tədbirlərin keçirilməsi respublikamızın turizm potensialını bütün dünyaya tanıdır.

Öz növbəsində ölkəmizin turizm məkanlarından biri olan cənub bölgəsində də bu sahədə mühüm işlər görülüb. Bölgənin turizm və istirahət mərkəzləri yay turizm mövsümünə tam hazırdır. Verilən məlumatlara əsasən, əvvəlki illərdən fərqli olaraq cənub bölgəsində yay turizm mövsümü bu il mart ayından başlayıb. Mart ayından başlayaraq ölkəmizə, eləcə də cənub bölgəsinə böyük turist axını olub. Məsələn, 2007-ci ildə Lənkərana gələn turistlərin sayı 4700 nəfər olmuşdusa, 2016-cı ildə bu rəqəm 15 mini ötüb. Bu ilin 5 ayında isə rayona gələn turistlərin sayı 6 mindən çox olub. Onlardan 15 faizi xarici turistlərdir.

Masallıya gəldikdə isə, ötən il bu rayona 24730 turist səfər edib ki, onlardan da 1600-ü xarici olub. Bu ilin birinci rübündə isə rayona 4200 turist gəlib. Onlardan 500-dən çoxu əcnəbilərdir. Lənkəran Turizm İnformasiya Mərkəzi cənub bölgəsinin turizm potensialının təbliği sahəsində müxtəlif səpkili tədbirlər həyata keçirib. Mərkəzdən bildirilib ki, ingilis və Azərbaycan dillərində Lənkəranın turizm potensialını əks etdirən nəfis şəkildə hazırlanmış buklet, flayer və digər çap materialları hazırlanaraq sərgilərdə nümayiş olunub, turistlərə təqdim olunmaq üçün rayonda yerləşən mehmanxana və mehmanxana tipli obyektlərə, muzeylərə və Heydər Əliyev Mərkəzinə paylanılıb.

Eyni zamanda, rayonun turizm potensialını təbliğ edən orijinal flayer və təqvim, Lənkəranın turist marşrut xəritəsi hazırlanaraq gələn qonaqlara verilib. Hazırda isə cənub bölgəsinin turist xəritəsi üzərində iş gedir.

Aprelin 6-9-da Bakı şəhərində təşkil olunmuş turizm və səyahətlər sərgisində cənub bölgəsində yerli sənətkarlar tərəfindən hazırlanmış milli suvenirlər təqdim olunub. Sərgidən sonra yerli suvenirlərə maraq çoxalıb. Mayın 6-7-də Lənkəranda keçirilən “Avropa günləri” çərçivəsində rayonun turizm potensialını əks etdirən sərgi də Avropadan olan qonaqların böyük marağına səbəb olub. Heç də təsadüfi deyildir ki, bu tədbirdən sonra bir sıra Avropa ölkəsinin səfirləri Lənkərana səfər ediblər.

Yeni turizm mövsümünün başlaması ilə bağlı Azərbaycan Respublikası Mədəniyyət və Turizm Nazirliyi və Lənkəran Turizm-İnformasiya Mərkəzinin əməkdaşlarından ibarət işçi qrupu cənub bölgəsində yerləşən turizm və istirahət mərkəzlərində, çimərliklərdə monitorinqlər aparıb. Bir sözlə, bölgənin turizm və istirahət mərkəzləri, çimərlikləri yeni mövsümə tam hazırdır. Hazırda cənub bölgəsində 100-ə yaxın mehmanxana və mehmanxana tipli obyekt fəaliyyət göstərir və onların siyahısı ildən-ilə artmaqdadır. Bu obyektlərdə göstərilən xidmətin səviyyəsi də beynəlxalq standartlara uyğun təşkil olunub.

Qonşu İran İslam Respublikasından turistlərin bölgəyə cəlb olunması ilə bağlı bir sıra maarifləndirici tədbirlər həyata keçirilib. Məsələn, Lerik rayonunun “Relax” turizm istirahət mərkəzində İran İslam Respublikasının 35 vilayətinin turizm təmsilçilərinin iştirakı ilə konfrans və infotur təşkil olunub. Tədbir çərçivəsində iranlı qonaqlara cənub bölgəsinin turizm obyektlərinin buklet, flayer, vizitka və digər çap materialları paylanılıb.

Turizm İnformasiya Mərkəzi və Regional Miqrasiya Xidmətinin birgə təşkilatçılığı ilə cənub bölgəsində fəaliyyət göstərən mehmanxana və mehmanxana tipli obyektlərin nümayəndələri üçün əcnəbi vətəndaşların Azərbaycan Respublikasına gələrkən qeydiyyat qaydaları ilə bağlı tədbir təşkil olunub. Tədbir çərçivəsində Miqrasiya Xidmətinin məsul əməkdaşları tərəfindən əcnəbi vətəndaşlara hotellərə daxil olarkən hotellər tərəfindən onların qeydə alınma qaydaları izah olunub.

Turizm İnformasiya Mərkəzi tərəfindən internet resursları, “facebook” və digər sosial şəbəkələr vasitəsilə də cənub bölgəsinin turizm potensialı haqqında geniş məlumatlar verilib. “Qrinviç tour”, “Royal travel” və digər turizm şirkətləri ilə əməkdaşlıq çərçivəsində yerli və əcnəbi turistlər üçün turlar təşkil olunub. Hazırda Lənkəran, Lerik və Astara rayonlarını əhatə edən turizm marşrutları tam hazırdır.

Cənub bölgəsinə daxil olan Astarada da turizmin inkişafı diqqət mərkəzindədir. Elə Astara rayonunun Şahağac kəndi ərazisində, Xəzər dənizinin sahilində inşa edilmiş “Ceyhun” turizm və istirahət mərkəzinin açılışı da turizm sahəsinə verilən diqqətin nümunəsidir. Bir hektar ərazidə salınmış mərkəzdəki ikimərtəbəli hoteldə, kotteclərdə turistlərin mənalı istirahət etmələri üçün hər cür şərait yaradılıb. Mərkəzin ərazisində həmçinin uşaqlar üçün əyləncə mərkəzi, konsert səhnəsi inşa edilib. Burada 20 nəfər daimi işlə təmin olunub. Çimərlik turizminin inkişafı ilə bağlı Azərbaycan Prezidentinin Sərəncamına müvafiq olaraq Astara rayonunda Xəzər dənizi sahili boyunca üç ərazidə - şəhərdə, Şahağac və Qamoşovka kəndlərində yeni çimərlik zonaları yaradılıb. Yeni salınmış çimərlik zonalarından biri məhz “Ceyhun” turizm və istirahət mərkəzinin ərazisində yerləşir. İstirahət mərkəzinin açılış mərasimində çıxış edənlər ölkəmizdə turizmin inkişafına və əhalinin mənalı istirahətinin təşkilinə göstərilən diqqət və qayğıya görə dövlətimizin başçısına minnətdarlıqlarını bildiriblər. Qeyd olunub ki, Astarada turizmin inkişafı məqsədilə həyata keçirilən infrastruktur layihələri rayona turist axınına səbəb olub. Ötən il rayona gələn turistlərin sayı 5000 nəfərdən çox olub. Bu, 2012-ci illə müqayisədə 10 dəfə çoxdur.

İyunun 8-də Azərbaycan Prezidentinin Astara şəhərində park-bulvar kompleksinin genişləndirilməsi ilə bağlı imzaladığı Sərəncam da cənub bölgəsində turizmin inkişafına göstərilən diqqət və qayğının bariz nümunəsidir. Sərəncama əsasən Astara şəhərində dənizkənarı park-bulvar kompleksi ərazisinin genişləndirilməsi üçün Azərbaycan Respublikasının 2017-ci il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Astara rayon İcra Hakimiyyətinə 3 milyon manat ayrılıb.

Astara rayon İcra Hakimiyyətindən verilən məlumata görə, artıq sözügedən Sərəncama müvafiq olaraq ərazidə tikinti işlərinə başlanılıb. 2014-cü ildə Astara şəhərində Xəzər dənizi sahili boyunca 6 hektar ərazidə salınmış park-bulvar kompleksinin ərazisi 9 hektar artırılaraq 15 hektara çatdırılacaq. İran İslam Respublikası ilə dövlət sərhədinə qədər sahil boyunca inşa edilən park-bulvar kompleksinin yeni ərazisində tikiləcək Bayraq Meydanı, mehmanxana və hotellər, idman və müxtəlif əyləncə mərkəzləri, xidmət obyektləri Astara şəhərinə xüsusi gözəllik verəcək.

Ərazidə həmçinin uşaqların mənalı istirahətini təmin etmək məqsədilə uşaq əyləncə mərkəzlərinin, açıq fitnes meydançasının, fəvvarənin, amfiteatrın tikilməsi, müxtəlif attraksionların quraşdırılması nəzərdə tutulub.

Parkın əvvəlki hissəsindən fərqli olaraq yeni ərazidə dəniz sahilinə çıxışlar olacaq. Astara şəhərində ərazisi genişləndirilən park-bulvar kompleksinin ikinci hissəsi bu il əhalinin istifadəsinə veriləcək.

Məlumatda o da bildirilir ki, Astarada turizmin inkişafına gətirib çıxaracaq yeni yollar salınır. Astara rayonunda “Azəravtoyol” ASC tərəfindən Taxtanəkəran-Miki və Taxtanəkəran-Toradi avtomobil yollarının tikintisi işləri aparılır. Çətin dağlıq relyefə məxsus kəndlərarası avtomobil yolu “Hirkan” milli parkının ərazisindən keçir. Uzunluğu 26 kilometr olan avtomobil yolu IV texniki dərəcəyə uyğun salınır. Burada layihəyə uyğun olaraq yol 2 hərəkət zolaqlı olmaqla ümumi eni 10 metr təşkil edir. Bura həmçinin 6 metr hərəkət hissə və hər bir istiqamət üzrə 2 metr çiyinlər daxildir.

Hazırda yolboyu torpaq işləri görülür, yol yatağının inşası aparılır. Torpaq işləri yekunlaşdıqdan sonra yol əsasının tikintisi işlərinə başlanılacaq. Daha sonra 2 qat olmaqla yeni asfalt-beton örtüyünün döşənməsi işləri planlaşdırılır.

Bundan başqa, layihədə bir aşırımlı dəmir-beton konstruksiyalı 1 ədəd avtomobil körpüsünün tikilməsi də nəzərdə tutulub. Körpü yolun 12,4-cü kilometrində yerləşəcək. Körpünün uzunluğu 28 metr, eni isə 6 metr olacaq. Görülən işlərə uyğun olaraq yolboyu atmosfer və dağ sularının ötürülməsi üçün müxtəlif diametrli suötürücü borular quraşdırılıb. Tikinti işləri tamamlandıqdan sonra sözügedən yola 134 ədəd yol nişanı və məlumatverici lövhə quraşdırılacaq, yol-cizgi və yol göstərici xətlərinin çəkilişi işləri aparılacaq.

Qeyd olunub ki, 12 min nəfər əhalinin yaşadığı 38 yaşayış məntəqəsini birləşdirən Taxtanəkəran-Miki, Taxtanəkəran-Toradi avtomobil yollarının yenidən qurulması vətəndaşların gediş-gəlişinin, yük və sərnişin daşımasının yaxşılaşmasına gətirib çıxaracaq, həmçinin sözügedən ərazilərdə yeni turizm marşrutlarının yaranmasına, bununla da turizmin inkişafına səbəb olacaq.

Astarada abadlıq-quruculuq işləri ilə yanaşı, aqrar sahənin inkişafı da diqqət mərkəzindədir. Hazırda Astara rayonunda ənənəvi kənd təsərrüfatı sahələri olan çayçılıq, çəltikçilik, sitrusçuluq və tərəvəzçiliyin inkişaf etdirilməsi istiqamətində mühüm addımlar atılır. Rayonda kənd təsərrüfatının inkişaf etdirilməsi sahəsində yüksək nailiyyətlər qazanmış, bu sahədə zəngin təcrübəsi olan yaşlı nəslin nümayəndələri ilə tez-tez görüşlər, məsləhətləşmələr keçirilir.

Ümumiyyətlə, aqrar sahənin inkişaf etdirilməsi ilə əlaqədar rayonda həyata keçirilən tədbirlər artıq bəhrəsini verməkdədir. Bu il rayonda 2200 hektar sahədə əkin aparılıb. Kənd təsərrüfatının ən rentabelli sahələrindən olan çəltik əkini 450 hektara çatdırılıb. Ümumiyyətlə, Astara hələ qədimdən ənənəvi kənd təsərrüfatı sahələrindən biri olan çəltikçiliyi ilə məşhurdur. Ətirli Astara düyüsü yüzilliklər ərzində yerli əhalinin ən qiymətli ərzaq məhsulu olub. “Sədri”, “Ənbərbu” , “Haşimi” və digər çəltik növlərindən hasil olan düyü məhsulları öz ətri, dadı və bərəkəti ilə seçilib.

Ölkəmizdə aqrar bölmədə çalışan məhsul istehsalçılarına göstərilən dövlət dəstəyi uzun müddət tənəzzül dövrünü yaşayan Astarada çəltikçiliyin inkişafı üçün geniş imkanlar yaradıb.

2015-ci ildə Astarada 65 hektar sahədə çəltik əkildiyi halda, ötən il bu rəqəm iki dəfə artırılaraq 133 hektara çatdırılıb. Cari ildə rayonda 450 hektarda, gələcəkdə isə 1000 hektarda çəltik əkini nəzərdə tutulub. Rayonda çəltikçilik əsasən Astara şəhəri, Suparibağ, Ərçivan, Səncərədi, Pensər, Kakalos, Şiyəkəran və digər kəndlərdə inkişaf etdirilir.

Çəltikçiliyin inkişafı ilə bağlı Kənd Təsərrüfatı Nazirliyinin köməkliyi ilə rayona müvafiq texnika və digər avadanlıqlar gətirilir. Xüsusən çəltik toxumunun səpmə üsulu ilə əkilməsi üçün yerlərin hazırlanmasına diqqət artırılıb. Astarada çəltikçiliyin inkişafı üçün geniş perspektivlər var. Ərazidən Astara və Pensər çayının keçməsi, Lovayın su anbarının yenidən qurulması sahələrin suvarılmasında mühüm rol oynayır.

Çəltikçilik çox gəlirli sahədir. Hər hektardan 50-60 sentner məhsul götürməklə düyü maya dəyərindən 10-15 dəfə bahasına satılır. Bazarlarda yerli düyünün 1 kiloqramının qiyməti 5-7 manat arasındadır. Ekoloji cəhətdən təmiz və keyfiyyətli olduğu üçün bazarda yerli düyüyə tələbat böyükdür. Ölkə bazarlarında Astara düyüsünə tələbat yüksək olduğundan məhsul istehsalçıları çəltik əkininə daha çox üstünlük verirlər. Sevindirici haldır ki, artıq xarici ölkələrdə fəaliyyət göstərən şirkətlərdən də Astara düyüsünün sifarişçiləri var. Onlar sərfəli şərtlərlə iş adamlarına indidən müqavilələr təklif edirlər.

Bundan başqa, rayonda yeni sitrus bağları və çay plantasiyaları salınıb, Çayoba kəndində yeni çay emalı fabriki tikilib. Vurğulamaq yerinə düşər ki, ötən il rayonda çayçılıq təsərrüfatlarının ərazisi genişləndirilərək 345 hektara çatdırılıb. Bunun 192 hektarını məhsuldar çay sahələri təşkil edir. 2016-cı ildə çay plantasiyalarından 646 ton yaşıl çay yarpağı yığılaraq çay emalı müəssisələrinə təhvil verilib. Bu, əvvəlki ildəkindən 224 ton çoxdur. Gələcəkdə 1000 hektar sahədə çay plantasiyalarının salınması nəzərdə tutulub.

Həmçinin 2016-cı ildə sitrus meyvələrinin istehsalında müsbət dinamika müşahidə edilib, bağlardan əvvəlki illə müqayisədə 7 min ton çox, 43 min 215 ton məhsul yığılıb. 72 hektar yeni sitrus bağı salınıb, əkin sahəsi ümumilikdə 2285 hektara çatdırılıb.

Eyni zamanda, bu il Astara rayonunun arıçılıq təsərrüfatlarında məhsuldarlıq üç dəfə artıb. Ötən il hər yeşikdən maksimum 8 kiloqram bal götürən arıçılar builki mövsümü bal ili adlandırırlar. Arıçılar Assosiasiyasının Arı Xəstəlikləri Komissiyasının üzvü Firuz Teymurov KİV-ə açıqlamasında bildirib ki, arı pətəkləri təbii üsullarla müalicə edilib, arıçılar treninqlərə cəlb olunub, maarifləndirmə işi aparılıb. Onlar da yaxşı işlədilər. Həm arıların sayı çoxalıb, həm də məhsuldarlıq 3 dəfə artıb. Hazırda bazarda Astara balının 1 kiloqramı 20-25 manata satılır.

Rayonda arıçılıqda əsas çətinlik tədarük məntəqəsinin olmaması və hazır məhsulun qablaşdırılması ilə bağlıdır. Bununla belə, yerli bala tələbat xeyli artdığından satış asanlaşıb. Qeyd edək ki, builki bal mövsümündə Astara rayonundakı 25 min arı ailəsindən 300 ton məhsul gözlənilir. Ötən il bu rəqəm 80 tondan aşağı olub.

Nadir AZƏRİ

Yeni Azərbaycan.- 2017.- 8 iyul.- S.7