Regionlarda tikinti-quruculuq işləri geniş vüsət alıb

Müvafiq Dövlət proqramları çərçivəsində həyata keçirilən layihələr sayəsində bölgələrin siması əhəmiyyətli dərəcədə dəyişib, infrastruktur təminatı güclənib

Sirr deyil ki, Azərbaycanda həyata keçirilən uğurlu inkişaf siyasəti müəyyən olunmuş strateji prioritetlər çərçivəsində mühüm nailiyyətlərin əldə edilməsini təmin edib. Bu kontekstdə regionların sosial-iqtisadi inkişafı istiqamətində görülən işlərin əhəmiyyətini və əldə edilən nəticələri ayrıca qeyd etmək lazımdır. Azərbaycan dövlətinin dinamik inkişafını və müasir mənzərəsini əks etdirən məqamlardan biri də regionlarda uğurla reallaşdırılan geniş infrastruktur layihələri, abadlıq, quruculuq işləridir. Müvafiq Dövlət proqramları çərçivəsində həyata keçirilən layihələr sayəsində bölgələrin siması əhəmiyyətli dərəcədə dəyişib, infrastruktur təminatı güclənib. Son 13 ildə respublikanın inkişafından, paytaxtda və bölgələrdə aparılan quruculuq-abadlıq işlərindən söhbət açarkən məktəblərin, səhiyyə ocaqlarının, gənclər mərkəzlərinin və bu qəbildən olan digər sosial təyinatlı obyektlərin inşasını və yaxud yenidən qurulmasını xüsusi vurğulamaq gərəkdir. Dövlət sosial sferada bu və ya digər layihələrin həyata keçirilməsinə böyük həcmli sərmayələr yönəldir. Bölgələrdə əsasən milli memarlıq üslubunda yaradılan və hər cür rahatlıqlara malik sosial infrastruktur obyektləri bir növ müstəqil Azərbaycanın hərtərəfli inkişafının rəmzinə çevrilib.

Müasir standartlara cavab verən yolların çəkilməsi əsas məqsədlərdəndir

Yol-nəqliyyat infrastrukturunun yenilənməsi, müasir standartlara cavab verən yolların istifadəyə verilməsi Azərbaycan hökumətinin sosial sahədə həyata keçirdiyi siyasətin mühüm istiqamətlərindən birini təşkil edir. Müvafiq Dövlət proqramlarına uyğun olaraq Azərbaycanda avtomobil yollarının tikintisi və yenidən qurulması işlərinin həcmi ildən-ilə artmaqdadır. Hazırda respublikanın nəqliyyat-yol infrastrukturunun yenidən qurulması və təkmilləşdirilməsi ilə bağlı istər beynəlxalq maliyyə qurumlarının əsaslı vəsait qoyuluşları, istərsə də dövlət büdcəsi vəsaiti hesabına irimiqyaslı layihələr uğurla icra olunur. Məhz bunun nəticəsində ölkəmizdə şəhər və rayonlarda yol infrastrukturu əsaslı şəkildə yenidən qurulub. Bu məqamda vurğulamaq yerinə düşər ki, Prezident İlham Əliyevin Sərəncam və göstərişlərinə əsasən hazırda əsas diqqət regionlarda kənd və qəsəbələri birləşdirən yolların, həmçinin yaşayış məntəqələrinin daxili yollarının təmirinə və yenidən qurulmasına yönəldilib. Bu tədbirlər, ilk növbədə, Azərbaycan iqtisadiyyatının gücünü göstərməklə yanaşı, vətəndaşların həyatının yaxşılaşdırılmasına yönələn layihələrin davamlı olmasını nümayiş etdirir. Bu günə qədər demək olar ki, ölkənin bütün mərkəzi magistral yolları yenidən qurulub, hazırda kəndlərarası yolların, rayon mərkəzləri ilə ucqar kəndləri birləşdirən yol xətlərinin təmiri və yenidən qurulması istiqamətində geniş tədbirlər həyata keçirilir.

Son illər Ağstafa rayonunda da yol infrastrukturunun əsaslı yenidən qurulması tədbirləri uğurla icra olunmaqdadır. Belə ki, hazırda əsaslı şəkildə yenidən qurulan Vurğun, Həsənsu, Qırılı, Eynallı və Köçəsgər kəndlərini Ağstafa şəhəri ilə əlaqələndirən, uzunluğu 15,5 kilometr olan Ağstafa - Köçəsgər avtomobil yolunda əsaslı yenidənqurma işləri sürətlə davam edir. Rayon İcra Hakimiyyətindən bildiriblər ki, 3-cü texniki dərəcəyə uyğun tikilən avtomobil yoluna asfalt-beton örtüyünün ilk qatı salınıb və hazırda ikinci qat asfalt örtüyünün vurulması işləri davam etdirilir. Ümumilikdə yola döşənən asfalt-beton örtüyünün qalınlığı 12 santimetr təşkil edir. İki hərəkət zolaqlı və hərəkət hissəsinin eni 7 metr olan yolun yatağının eni 12 metrdir. Görülən işlər tam olaraq yekunlaşdıqdan sonra yola 62 ədəd yol nişanı və məlumatverici lövhələr, müxtəlif diametrli 18 suötürücü boru quraşdırılacaq.

Bu istiqamətdə Şəmkir rayonunda da işlər geniş vüsət alıb. Bu günlərdə Şəmkirin Yeni Göyçə, Çaykənd, Dağ Cəyir kəndlərini rayon mərkəzi ilə birləşdirən yolda təmir işlərinə başlanılıb. Sözügedən yolda təmir-tikinti işlərinin qısa müddət ərzində yekunlaşdırılması planlaşdırılır. Bunun üçün əraziyə lazımi sayda qüvvə cəlb olunub. Hazırda təmir-bərpa işlərinin aparıldığı ərazi boyu təqribən 10 minə yaxın əhalinin yaşadığı yaşayış məntəqələri mövcuddur.

Məlumdur ki, Azərbaycan Prezidenti İlham Əliyev iyunun 6-da “Zaqatala rayonunun yol-nəqliyyat infrastrukturunun yaxşılaşdırılması ilə bağlı əlavə tədbirlər haqqında” Sərəncam imzalayıb. Sərəncama əsasən, Zaqatala rayonunda yol-nəqliyyat infrastrukturunun yaxşılaşdırılması məqsədi ilə Prezidentin ehtiyat fondundan “Azəravtoyol” Açıq Səhmdar Cəmiyyətinə 4,4 milyon manat, o cümlədən Yevlax-Zaqatala-Gürcüstanla dövlət sərhədi avtomobil yolunun Yuxarı Tala kəndi ərazisindən keçən hissəsinin yenidən qurulması üçün 1,8 milyon manat, şəhər ərazisindəki yeraltı piyada keçidinin tikintisinin başa çatdırılması üçün 2,6 milyon manat ayrılıb.

Aparılan abadlıq işləri regionların simasını əsaslı şəkildə dəyişdirib

Bu gün Azərbaycanın regionlarında aparılan quruculuq-abadlıq işləri də yüksək nailiyyətlərlə müşayiət olunur. Görülən işlər rayon və şəhərlərimizin sosial-iqtisadi inkişafını təmin etməklə yanaşı, vətəndaşların da həyat səviyyəsinin yüksəlməsinə əsaslı töfhələr verir. Qazax rayonunda da tikinti-quruculuq işləri geniş vüsət alıb. Hazırda şəhərin küçə və meydanları, xiyabanları əsaslı şəkildə yenidən qurulur. Şəhərdə yerləşən bütün çoxmənzilli binalarda Prezidentin Sərəncamına uyğun olaraq təmir-tikinti işləri aparılır. Yaşayış binaları öz görkəmini köklü şəkildə dəyişir. Artıq çoxmənzilli binaların bir çoxunda tikinti işləri başa çatdırılıb, digərlərində işlər davam etdirilir.

Bu günlərdə isə şəhərin girişində əsaslı şəkildə yenidənqurma işlərinə başlanılıb. Giriş hissədə olan hasarlar müasir ornamentlə bəzədilib. Səkilərin kənarlarına qazon otu və həmişəyaşıl gül kolları əkilib. Aparılan bu yenidənqurma işləri şəhərin giriş hissəsinin görkəmini baxımlı və gözəl edib.

Şəhərin girişində görülən əsas işlərdən biri isə 7 metr hündürlükdə olan postament üzərində qoyulan at heykəlidir. Bu gün Dilboz atın rəmzi olan at heykəli həmin postament üzərinə qoyulub. Artıq bir neçə aydır ki, çoxmənzilli binaların da təmirinə başlanılıb. Prezident İlham Əliyevin 20 oktyabr 2016-cı il tarixli Sərəncamına uyğun olaraq Qazax şəhərindəki bütün çoxmənzilli binalarda təmir işləri həyata keçirilir. Hal-hazırda şəhərdəki 77 çoxmənzilli binada təmir işləri gedir. Onların böyük əksəriyyətində təmir-bərpa işləri başa çatdırılıb. Bir hissəsində isə bu işlər davam etdirilir.

Onu da qeyd edək ki, binaların dam örtüyündə, fasad hissəsində, dəhliz və bloklarda təmir işləri aparılır. Eyni zamanda binaların giriş hissəsinə yeni dəmir qapılar qoyulur. Artıq binaların əksəriyyətində təmir-bərpa işləri nəzərdə tutulan vaxtdan tez başa çatıb və binalar yeni bir görkəm alıb. Təmir aparılan digər binalarda isə bu işlər sürətlə davam etdirilir.

Lənkəran şəhərində də çoxmənzilli binaların əsaslı təmiri ilə bağlı geniş işlər həyata keçirilməkdədir. Prezident İlham Əliyev iyunun 7-də “Lənkəran şəhərində çoxmənzilli binaların əsaslı təmiri və bərpası ilə bağlı əlavə tədbirlər haqqında” Sərəncam imzalayıb. Sərəncama əsasən Lənkəran şəhərində qəzalı vəziyyətdə olan 13 çoxmənzilli binada əsaslı təmir və bərpa işlərinin həyata keçirilməsi üçün Prezidentin ehtiyat fondundan Lənkəran Şəhər İcra Hakimiyyətinə 7,5 milyon manat ayrılıb.

Rayonlarda yeni subartezian quyuları qazılır, arx və kanallar çəkilir

Regionlarda infrastrukturun yenilənməsi istiqamətində həyata keçirilən tədbirlər sırasında su təsərrüfatı sisteminin yenilənməsi də prioritet təşkil edir. Bununla bağlı rayonlarda işlər geniş vüsət alıb. O cümlədən Ağdam rayonunda son 5 ildə 122 yeni subartezian quyusu qazılaraq istifadəyə verilib. Dövlət başçısının “Ağdam rayonunun sosial-iqtisadi inkişafının sürətləndirilməsinə dair əlavə tədbirlər haqqında” 2016-cı il 7 dekabr tarixli Sərəncamına əsasən, rayonun 15 yaşayış məntəqəsində 30 subartezian quyusunun qazılmasına başlanılıb. Həmçinin pambıqçılığın inkişafı üçün bu il əlavə olaraq 4 subartezian quyusunun qazılması da nəzərdə tutulub. Ağdam mexaniki suvarma idarəsi rayonda 35 min 400 hektar əkin sahəsini suvarma suyu ilə təmin edir. Rayon ərazisində əkin sahələrinin suvarılması 836 subartezian quyusu, 4 nasos stansiyası, 192 hidrotexniki qurğu, 11 kəhriz, 4 suyığıcı göl, 365 kilometr suvarma kanalları vasitəsilə həyata keçirilir.

Cəbhə bölgəsində yerləşən Tərtər rayonunda əkin sahələrinin suvarma suyu ilə təminatının yaxşılaşdırılması istiqamətində tədbirlər davam etdirilir. Hər il yeni subartezian quyuları qazılır, arx və kanallar çəkilir. Tərtər rayonunda əhalinin içməli suya olan tələbatının ödənilməsi üçün də lazım olan tədbirlər görülür. Suya ehtiyac olan yaşayış məntəqələrində yeni subartezian quyuları qazılaraq sakinlərin istifadəsinə verilir. Tərtər şəhərinin içməli su ilə təchizatı və kanalizasiya sistemlərinin yenidən qurulması layihəsi ötən il başa çatıb. Layihə 2035-ci ilədək perspektiv inkişaf nəzərə alınmaqla, Tərtər şəhərində 26 min nəfərin içməli su təchizatı və kanalizasiya xidmətlərindən istifadəsinin yaxşılaşdırılmasına hesablanıb. Yaxın gələcəkdə rayonun 21 min sakininin yaşadığı 11 kəndin də içməli su təchizatı yaxşılaşdırılacaq. Ümumilikdə, bu layihədən 47 min sakin faydalanacaq.

Beləliklə, sadalananlar bir daha ölkəmizin regionlarında quruculuq-abadlıq işlərinin davamlı xarakter daşıdığını deməyə əsas verir.

Aqşin ŞAHİNOĞLU

Yeni Azərbaycan.- 2017.- 9 iyun.- S.7.