Azərbaycanın regionlarında içməli su layihələri uğurla həyata keçirilir

“Azərsu”dan verilən məlumata əsasən, yeni layihələrin icrası nəticəsində ölkə üzrə fasiləsiz içməli su alan əhalinin xüsusi çəkisi 66 faizə yüksəlib

Azərbaycanın böyük uğurla həyata keçirdiyi sosial-iqtisadi inkişaf strategiyasında bütün ölkə boyu kommunal xidmətlərlə təchizatın yüksək səviyyəyə qaldırılması davamlı olaraq diqqət mərkəzində saxlanılır. Son 14 ildə Prezident İlham Əliyevin müvafiq fərmanları ilə təsdiqlənən regionların sosial-iqtisadi inkişafına dair Dövlət proqramları çərçivəsində respublikanın bütün bölgələrində kommunal xidmət üzrə çoxlu sayda yeni layihələr reallaşdırılıb. Nəticədə, paytaxt Bakıda olduğu kimi, regionlarda da əhalinin kommunal xidmətlərlə təchizatı əhəmiyyətli dərəcədə yaxşılaşıb.

Əlamətdar haldır ki, ölkəmizdə dövlət tərəfindən yüksək səviyyəli kommunal infrastruktur quruculuğuna yeni şəraitdə də güclü siyasi iradə nümayiş etdirilir. Prezident İlham Əliyevin 6 dekabr 2016-cı il tarixli Fərmanı ilə “Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi”nin təsdiqlənməsi dövlətin bütün ölkə boyu insanların gündəlik həyatı ilə bağlı olan kommunal xidmətlərin səviyyəsinin yüksəldilməsini, bəhs olunan sahədə infrastruktur təminatının daha da yaxşılaşdırılmasını bundan sonra da diqqət mərkəzində saxlamaq əzmi nümayiş etdirdiyini təsdiqləyir. “Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi”nə əsasən ayrı-ayrı sahələr üzrə genişmiqyaslı hədəflər müəyyənləşdirilib. Şübhə yoxdur ki, nəzərdə tutulan tədbirlərin mərhələlər üzrə reallaşdırılması sayəsində paytaxt Bakıda və bölgələrdə əhaliyə kommunal xidmətlər sektorunda əsaslı keyfiyyət dəyişiklikləri baş verəcək. Sənədin qəbul edilməsində əsas məqsəd də elə bundan ibarətdir.

Ölkə üzrə su və kanalizasiya layihələrinin icra olunduğu şəhər və rayon mərkəzlərinin sayı 47-yə çatıb

Kommunal xidmət sektorunda mühüm pozisiyalardan biri əhalinin içməli su təminatı ilə bağlıdır. Prezident İlham Əliyev qarşıya ölkə əhalisinin Ümumdünya Səhiyyə Təşkilatının standartlarına uyğun keyfiyyətli su ilə təmin edilməsi ilə bağlı mühüm vəzifə qoyub. Dövlət başçısının qarşıya qoyduğu vəzifəyə uyğun olaraq respublikanın bütün bölgələrinin içməli su təchizatı və kanalizasiya infrastrukturu yenidən qurulur. “Azərsu” ASC-nin sədri Qorxmaz Hüseynovun KİV-ə verdiyi məlumata əsasən, artıq ölkə üzrə su və kanalizasiya layihələrinin icra olunduğu şəhər və rayon mərkəzlərinin sayı 47-yə çatıb. Bu şəhərlərin 33-də işlər “Azərsu”nun sifarişi ilə həyata keçirilir. İndiyədək 47 şəhərin 23-də su və kanalizasiya şəbəkələrinin, 9-da isə su şəbəkəsinin inşası yekunlaşıb. 2017-ci ildə Prezident İlham Əliyevin iştirakı ilə Saatlı, Gədəbəy, Cəlilabad, Şamaxı və Qobustan şəhərlərində yeni infrastrukturun istismara verilməsi ilə bağlı açılış mərasimləri keçirilib. Cari ildə daha bir şəhərdə - Xırdalanda içməli su və kanalizasiya sistemlərinin yenidən qurulması, həmçinin Almaniyanın KFV bankı ilə birgə maliyyələşdirilən layihə çərçivəsində Gəncə və Şəki şəhərlərində layihənin növbəti mərhələləri üzrə işlərə başlanılıb. 2017-ci ilin sonuna qədər daha bir neçə su və kanalizasiya şəbəkəsinin inşası yekunlaşacaq, bəzi şəhərlərdə tullantı sutəmizləyici qurğularının inşasına start veriləcək.

“Azərsu” ASC-nin sədri bildirib ki, son illər regionlarda yaradılmış yeni su mənbələri hesabına əhalinin içməli su təminatı əhəmiyyətli dərəcədə yaxşılaşıb. Bölgə əhalisinin keyfiyyətli və dayanıqlı içməli su ilə təmin edilməsi məqsədilə Şirvan-Muğan, Saatlı-Sabirabad qrup su kəmərləri, Külüllü su qurğuları kompleksi, Quba, Mingəçevir, Xanbulançay sutəmizləyici qurğuları yaradılıb. Bu mənbələrdən rayon mərkəzlərinə və bir sıra kəndlərə suyun verilməsi təmin edilib. Yüksək səviyyədə inşa olunan Şirvan-Muğan qrup su kəmərindən Biləsuvar, Salyan, Şirvan və Hacıqabul şəhərləri, Sabirabad-Saatlı qrup su kəmərindən isə Sabirabad və Saatlı şəhərləri su ilə təmin olunur. Gələcəkdə bu kəmərlərdən marşrut boyu ərazilərdə yerləşən 165 kəndin sakinləri də faydalanacaqdır. Girdmançayın yatağında tikilmiş və məhsuldarlığı saniyədə 450 litr olan Külüllü su qurğuları kompleksi və buradan Ağsu, Kürdəmir, Ucar və Zərdab şəhərlərinə çəkilən 182 kilometr uzunluğunda magistral kəmərlər bəhs olunan yaşayış məntəqələrinin su təminatını əsaslı şəkildə yaxşılaşdırıb.

Q.Hüseynovun bildirdiyinə görə, ötən müddətdə şəhər və rayon mərkəzləri ilə yanaşı, kənd və qəsəbələrin də su təminatı xüsusi diqqətdə saxlanılıb. Ümumilikdə 360 min nəfərin yaşadığı 350 kənddə içməli su layihələri icra olunub. Bu layihələr arasında cəbhə xəttində yerləşən və sudan əziyyət çəkən yaşayış massivlərinin su təchizatının yaxşılaşdırılması mühüm əhəmiyyət kəsb edir. Bütün bu layihələrin icrası nəticəsində ölkə üzrə fasiləsiz içməli su alan əhalinin xüsusi çəkisi 66 faizə yüksəlib.

Regionlarda daha 170 yaşayış məntəqəsinin su təchizatının yaxşılaşdırılması istiqamətində iş aparılır

Cari ildə ölkəmizdə su və kanalizasiya layihələrinin icra olunduğu yaşayış məntəqələrinin sayı daha da artıb. 2017-ci ilin 9 ayında respublika üzrə yeddi yüz kilometrdən çox içməli su xətti çəkilib.

Məlum olduğu kimi, Prezident İlham Əliyev cari ilin mart ayında “Əhalinin içməli su ilə təminatının yaxşılaşdırılmasına dair əlavə tədbirlər haqqında” müvafiq Sərəncam imzalayıb. Sərəncama əsasən, 28 rayonun 170 yaşayış məntəqəsinin su təchizatının yaxşılaşdırılması nəzərdə tutulub. Bu layihələr çərçivəsində 271 min kənd sakini keyfiyyətli içməli su ilə təmin olunacaq.

Layihələrə əsasən bəhs olunan kəndlərdə ümumi uzunluğu 531 kilometr olan su xətlərinin tikintisi, 1400-ə yaxın bulağın quraşdırılması nəzərdə tutulub. Q.Hüseynovun məlumatına əsasən, indiyədək 450 kilometrdən çox su xətti çəkilib, 1000-dən artıq bulaq quraşdırılıb. O cümlədən 170 kəndin təqribən yarısında işlər yekunlaşıb. Layihəyə əsasən ilin sonuna qədər bütün kəndlərdə işlər başa çatdırılacaq.

Prezident İlham Əliyevin cari ilin avqust-sentyabr aylarında imzaladığı müvafiq sərəncamların icrası da yüksək səviyyədə təmin edilir. Artıq bəhs olunan sərəncamlara uyğun olaraq Qax, Mingəçevir, Salyan, Biləsuvar şəhərlərində yeni su və kanalizasiya layihələrinin icrasına başlanılıb.

Yeni layihələr hesabına Bakıətrafı qəsəbələrdə 300 mindən artıq insanın su təchizatı yaxşılaşıb

Müstəqillik illərində ölkənin digər bölgələri kimi, Abşeron yarımadasında yerləşən yaşayış məntəqələrinin də içməli su təchizatının yaxşılaşdırılması istiqamətində bir sıra layihələr həyata keçirilib. Bu baxımdan Ulu öndər Heydər Əliyevin ideya müəllifi olduğu Oğuz-Qəbələ-Bakı su kəmərinin Prezident İlham Əliyevin bilavasitə rəhbərliyi ilə 2007-2010-cu illərdə inşasının önəmini xüsusi qeyd etmək lazımdır. Kəmər istismara veriləndən bir il sonra daha bir mənbədən Abşeron yarımadasına suyun verilməsi üçün böyük infrastruktur layihəsinin icrasına başlanıldı. 2015-ci ildə dövlət başçısının iştirakı ilə dünyada öz oxşarları arasında ən böyük olan Ceyranbatan ultrasüzgəcli sutəmizləyici qurğular kompleksi istismara verildi. Buradan götürülən suyun Abşeron yarımadasının yaşayış məntəqələrinə çatdırılması üçün 84 kilometr uzunluğunda Ceyranbatan-Zirə magistral kəməri və magistral xəttin marşrutu boyu ümumi tutumu 90 min kubmetr olan Abşeron, Saray, Balaxanı, Ramana, Qala, Zirə anbarları tikilib.

Ceyranbatan-Zirə xəttinin istismara verilməsi nəticəsində Bakıətrafı qəsəbə və kəndlərdə 300 mindən artıq insanın su təchizatı yaxşılaşıb. Yeri gəlmişkən, Türkan, Zirə, Pirallahı qəsəbələri məhz bu layihənin gerçəkləşməsi nəticəsində ilk dəfə mərkəzləşmiş qaydada içməli su ilə təmin edilibdir.

Bakı şəhəri və Abşeron yarımadasının şəhər, qəsəbə və kəndlərində su təchizatı, kanalizasiya sistemləri və yağış sularının idarə olunmasını nəzərdə tutan Master Plana uyğun olaraq müvafiq işlərə başlanılıb və ötən müddətdə ümumi uzunluğu 1000 kilometrdən çox olan su şəbəkəsi yaradılıb. Bu sahədə işlər davam etdirilir. Prezident İlham Əliyevin imzaladığı müvafiq sərəncamlara uyğun olaraq Novxanı, Mehdiabad, Binəqədi, 28 May, Pirəküşkül, Qobustan, Binə, Şağan, Şüvəlan, Mərdəkan qəsəbələrində yeni şəbəkələr yaradılacaq.

Bakıətrafı qəsəbələrdə subasma təhlükəsinin aradan qaldırılması da qarşıda duran mühüm vəzifələrdəndir. Nazirlər Kabinetinin müvafiq sərəncam layihəsinə əsasən Abşeron yarımadasının subasma təhlükəsi olan müxtəlif ərazilərində 13 layihənin həyata keçirilməsi nəzərdə tutulub. 2017-ci ilin may ayında bu istiqamətdə tikinti-quraşdırma işlərinə başlanılıb və qısa müddətdə 8 ərazidə - Böyükşor, Taşağıl və Məhəmmədi gölləri, Ramana Südçülük Sovxozu, Əhməd Cəmil, Əliyar Əliyev, Yusif Səfərov, Kazımağa Kərimov küçələrində layihələrin icrası yekunlaşdırılıb. Bu layihələr çərçivəsində 17 kilometrdən çox kollektor və nasos stansiyaları inşa edilib.

Bakıətrafı qəsəbələrdə 10 ünvanda yeni su və kanalizasiya şəbəkələri yaradılır

“Azərsu” ASC-dən verilən məlumatda bildirilir ki, Bakı şəhəri və Abşeron rayonunun kənd və qəsəbələrində su təchizatı və kanalizasiya sistemlərinin yenidən qurulması layihələrinin davam etdirilməsi ilə bağlı əlavə tədbirlər haqqında Azərbaycan Respublikası Prezidentinin sərəncamlarına uyğun olaraq Bakıətrafı yaşayış məntəqələrində layihələrin icrası uğurla təmin edilir. Bu layihələr hesabına Bakı şəhərinin ayrı-ayrı qəsəbələrində və Abşeron rayonunun bir sıra yaşayış məntəqələrində əhalinin mərkəzləşdirilmiş qaydada keyfiyyətli içməli su ilə təminatına imkan yaranacaq, onların kanalizasiya xidmətlərindən istifadəsi yaxşılaşacaq.

Sərəncamlara əsasən, 10 yaşayış məntəqəsində - Bakı şəhəri Binəqədi rayonunun Binəqədi və 28 May, Xəzər rayonunun Mərdəkan, Şağan, Şüvəlan və Binə qəsəbələrində, eləcə də Abşeron rayonunun Mehdiabad, Novxanı qəsəbələrində, Pirəkəşkül və Qobustan kəndlərində yeni içməli su və kanalizasiya şəbəkələri yaradılacaq. Hazırda 7 kənd və qəsəbədə tikinti-quraşdırma işləri davam etdirilir, digər 3 qəsəbədə isə inşaat işlərinə yaxın vaxtlarda başlanılacaq.

Ümumilikdə, 10 yaşayış məntəqəsində 70 kilometr içməli su, 11 kilometr kanalizasiya xətlərinin tikintisi nəzərdə tutulub. Qısa müddət ərzində kənd və qəsəbələrdə 26 kilometr içməli su, 2 kilometr kanalizasiya xətləri inşa edilib. Tikinti-quraşdırma işlərinin 2017-ci ilin sonuna qədər başa çatdırılması nəzərdə tutulub.

“Azərsu”dan bildirilib ki, kənd və qəsəbələrdə yeni su və kanalizasiya şəbəkələrinin yaradılması nəticəsində 37 min nəfərin içməli su təchizatı, 9 min nəfərin kanalizasiya xidmətlərindən istifadəsi əsaslı şəkildə yaxşılaşacaq. 3 kilometr uzunluğunda Mərdəkan-Şağan-Şüvəlan magistral su xəttinin istismara verilməsi sayəsində perspektivdə Mərdəkan, Şağan və Şüvəlan qəsəbələrində 54 min nəfərin içməli su təminatına imkan yaranacaq. Ümumilikdə, bu layihələrdən 100 min nəfər sakin yararlanacaq.

Qeyd edək ki, Prezident İlham Əliyevin imzaladığı müvafiq sərəncamlara əsasən, Bakı şəhəri Binəqədi rayonunun Binəqədi və 28 May, Xəzər rayonunun Mərdəkan, Şağan, Şüvəlan və Binə qəsəbələrində, eləcə də Abşeron rayonunun Mehdiabad, Novxanı qəsəbələri, Pirəküşkül və Qobustan kəndlərində görüləcək işlərin maliyyələşdirilməsi üçün dövlət büdcəsindən “Azərsu” Açıq Səhmdar Cəmiyyətinə ümumilikdə 13,32 milyon manat vəsait ayrılıb.

Abşeron yarımadasında magistral su kəmərləri və qurğularının inşası davam etdiriləcək

Bakıətrafı qəsəbələrin, bütövlükdə Abşeron yarımadasında yeləşən yaşayış məntəqələrinin içməli su təchizatının yaxşılaşdırılması ilə bağlı işlər gələcəkdə daha intensiv şəkildə davam etdiriləcək. Məlum olduğu kimi, Prezident İlham Əliyev 2017-ci il 16 noyabr tarixində “Abşeron yarımadasında magistral su kəmərləri və qurğularının inşası ilə bağlı əlavə tədbirlər haqqında” müvafiq Sərəncam imzalayıb. Sərəncamda qeyd olunur ki, ölkədə regionların tarazlı və dayanıqlı inkişafını təmin etmək, əhalinin sosial rifahını yüksəltmək, eləcə də cəmiyyətin bütün istiqamətlərdə tərəqqisini sürətləndirməklə inkişafın keyfiyyətcə yeni modelini formalaşdırmaq Azərbaycan dövlətinin fəaliyyətində mühüm istiqamətdir. Bu məqsədlə qəbul olunmuş Dövlət proqramlarının uğurla icrası nəticəsində regionlarda, paytaxtda və qəsəbələrdə, eləcə də Abşeron rayonunun qəsəbə və kəndlərində kommunal infrastrukturun yenidən qurulması, əhalinin içməli su ilə təminatının yaxşılaşdırılması, mövcud su təchizatı sistemlərinin sabit işləməsi yönündə əhəmiyyətli tədbirlər görülüb.

Həmin tədbirlərin davamı olaraq, Ceyranbatan su kəmərindən Bakı şəhərinə saniyədə 1,8 kubmetr suyun nəqlinə imkan verəcək 9,5 kilometr magistral su kəmərinin 4,25 kilometrlik birinci hissəsinin inşası, tikintisi tamamlanmış “+105 Saray supaylayıcı kamerası”nın mövcud su təchizatı sistemi ilə əlaqələndirilməsi üçün 3,05 kilometr magistral su kəmərlərinin, 1,45 kilometr boşaltma xəttinin inşası və yarımadanın su təchizatı üçün müstəsna əhəmiyyətə malik Ceyranbatan və Kür sutəmizləyici qurğularında istismar müddətini keçmiş yüksək məhsuldarlıqlı nasos avadanlıqlarının dəyişdirilməsi zərurəti yaranıb. Sərəncama əsasən, Abşeron yarımadasında magistral su kəmərləri və qurğularının inşası işlərini davam etdirmək məqsədilə dövlət büdcəsindən “Azərsu” Açıq Səhmdar Cəmiyyətinə 10,1 milyon manat ayrılıb.

2019-cu ildə Gəncə şəhərində içməli su problemi tamamilə aradan qaldırılacaq

2019-cu ildə Gəncə şəhərində içməli su problemi həllini tapacaq. Bunu Gəncəyə səfəri çərçivəsində şəhər ictimaiyyətinin nümayəndələri ilə görüşdə Prezident İlham Əliyev bildirib: “Əminəm ki, 2019-cu ildə Gəncədə içməli su problemi də tamamilə aradan qaldırılacaq və sakinlər 24 saat təmiz içməli su ilə təmin olunacaqlar”.

“Azərsu” ASC-dən bildirilib ki, Gəncə şəhərinin içməli su təchizatı və kanalizasiya sistemlərinin yenidən qurulması Azərbaycan hökuməti və Almaniya İnkişaf Bankının (KFW bankı) birgə maliyyələşdirdiyi “II Açıq Kommunal İnfrastruktur Proqramı” çərçivəsində həyata keçirilir. Layihə Gəncə şəhəri ilə yanaşı, Göygöl rayonunun Murovdağ qəsəbəsi, Hacıməlik və Mollacəlilli kəndlərini əhatə edir və 2035-ci ilədək perspektiv inkişaf nəzərə alınmaqla 450 min nəfərin su təchizatı və kanalizasiya xidmətlərindən istifadəsinin yaxşılaşdırılmasına hesablanıb.

Layihənin icrasına 2011-ci ilin sentyabr ayında başlanılıb. Ötən müddətdə Göygöl su mənbəyində məhsuldarlığı saniyədə 200 litr olan yeni drenaj sistemi yaradılıb, Gəncə şəhərində həcmi 4000 kubmetr olan su anbarı tikilib və mənbədən anbara qədər 24,3 kilometr uzunluğunda magistral su kəməri çəkilib. Eyni zamanda, Qızılqaya su mənbəyində bərpa-yenidənqurma işləri aparılıb, 4 kilometr magistral su kəməri, ümumi tutumu 12000 kubmetr olan 3 ədəd su anbarı və 6,9 kilometr anbarlararası su xətti inşa edilib.

Gəncə şəhərinin içməli su tələbatının böyük hissəsi Şəmkirçay su anbarı hesabına təmin olunacaq. Hazırda su anbarının yaxınlığında məhsuldarlığı sutkada 140 min kubmetr olan sutəmizləyici qurğu inşa edilir. Sutəmizləyici qurğudan şəhərə suyun verilməsi üçün 27,5 kilometr uzunluğunda Şəmkirçay-Gəncə magistral su kəməri çəkilib.

Gəncə şəhərində 855 kilometr içməli su və 813 kilometr kanalizasiya şəbəkəsinin tikintisi nəzərdə tutulur. Hazırda layihənin 4-cü mərhələsi çərçivəsində şəbəkələrin yenidən qurulması işləri davam etdirilir. Gəncə şəhərində yaranacaq tullantı suları gələcəkdə Samux rayonu ərazisində inşa ediləcək və məhsuldarlığı sutkada 120 min kubmetr layihələndirilən təmizləyici qurğuda zərərsizləşdiriləcək.

İstehlakçılara verilən içməli suyun keyfiyyətinə ciddi nəzarət olunur

İstehlakçılara verilən içməli suyun keyfiyyətinin, həmçinin kənarlaşdırılan tullantı sularının tərkibinin ekoloji standartlar çərçivəsində nəzarətdə saxlanılması da çox vacib məsələlərdəndir. “Azərsu”dan bildirilib ki, qurumun Mərkəzi Laboratoriyası Bakı şəhərində və regionlarda içməli suyun keyfiyyətini və tullantı sularının standartlara uyğunluğunu daim nəzarətdə saxlayır. İçməli su nümunələri Səhiyyə Nazirliyi Respublika Gigiyena və Epidemiologiya Mərkəzi, tullantı su nümunələri isə Ekologiya və Təbii Sərvətlər Nazirliyi ilə razılaşdırılmış qrafik əsasında təyin olunmuş yerlərdən götürülür.

2017-ci ilin 9 ayı ərzində Mərkəzi Laboratoriya tərəfindən su anbarları, nasos stansiyaları və su şəbəkələri, eləcə də təhsil və səhiyyə müəssisələri, mühüm dövlət obyektləri, mehmanxana, idman kompleksləri və digər obyektlərdən 11682 su nümunəsi götürülüb. Həmin nümunələr əsasında laboratoriyanın fiziki-kimyəvi və mikrobioloji analizlər şöbələri tərəfindən içməli suyun 81278 parametri təyin edilib və keyfiyyət göstəricilərində ciddi kənarlaşmalar müşahidə edilməyib.

Mərkəzi Laboratoriyanın tullantı sularının fiziki-kimyəvi və mikrobioloji analizlər şöbələrində 772 nümunə üzrə 6805 göstərici təyin edilib. Qeyd edək ki, tullantı su nümunələri təmizləyici qurğular, sənaye müəssisələri, şəhər kollektorları və sair məntəqələrdən götürülüb.

2016-cı ilin eyni dövrü ilə müqayisədə laboratoriyada təyin olunan içməli su və tullantı su göstəricilərinin sayı 48 faiz artıb. 9 ay ərzində Mərkəzi Laboratoriya tərəfindən 17 hüquqi və 49 fiziki şəxsə 18427 manat dəyərində ödənişli xidmət göstərilib.

“ASAN xidmət” və “ASAN Kommunal” mərkəzlərindəki “Azərsu” ASC-nin xidmət bölmələrinə 37720 müraciət edilib

“Azərsu” Açıq Səhmdar Cəmiyyətinin Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “ASAN xidmət” və “ASAN Kommunal” mərkəzlərində təmsil olunması istehlakçılara göstərilən müştəri xidmətlərini asanlaşdırır və bu sahədə şəffaflığın artırılmasını təmin edir. 2017-ci ilin əvvəlindən bəri bu mərkəzlərdə “Azərsu” ASC-nin təqdim etdiyi xidmətlərdən istifadə genişlənib. Belə ki, 2017-ci ilin 9 ayında “ASAN xidmət” və “ASAN Kommunal” mərkəzlərində fəaliyyət göstərən “Azərsu” ASC-nin xidmət bölmələrinə abunəçilər tərəfindən müxtəlif məsələlərlə bağlı ümumilikdə 37720 müraciət edilib. Müraciətlərin 20359-u “ASAN xidmət”, 17361-i isə “ASAN Kommunal” mərkəzlərində qeydə alınıb. “Azərsu”dan bildirilib ki, ötən müddətdə edilən müraciətlər arasında smart kartlara yükləmələr haqqında məlumatın verilməsi, texniki şərtin verilməsi, itirilmiş və zədələnmiş smart kartların bərpası, abonent məlumatlarına dəyişikliklərin edilməsi, borclar haqqında məlumatların verilməsi ilə bağlı müraciətlər üstünlük təşkil edib. Ən çox müraciət Sabunçu, Yasamal rayonlarındakı, eləcə də Sumqayıt və Gəncə şəhərlərindəki “ASAN xidmət” mərkəzlərində, həmçinin 2 saylı “ASAN Kommunal” mərkəzində qeydə alınıb.

Qeyd edək ki, “ASAN xidmət” mərkəzlərində “Azərsu” ASC-nin müştəri xidmətlərinin göstərilməsinə 2014-cü ilin may ayından başlanılıb. 2017-ci ildən “Azərsu” ASC “ASAN Kommunal” mərkəzlərində də təmsil olunur. Ümumilikdə 2014-cü ildən indiyədək bütün xidmət mərkəzlərinə vətəndaşlar tərəfindən müxtəlif məsələlərlə bağlı 91406 müraciət daxil olub.

Mübariz ABDULLAYEV

Yeni azərbaycan.- 2017.- 29 noyabr.- S.7.