Regionlarda genişmiqyaslı meliorativ tədbirlər həyata keçirilir

Reallaşdırılan yeni layihələr sayəsində ölkə üzrə 347 min hektar sahədə suvarılan torpaqların su təminatı yaxşılaşdırılıb, 55 min hektar yeni suvarılan sahələr kənd təsərrüfatı dövriyyəsinə cəlb edilib

Azərbaycanda aqrar sektorda məhsuldarlığın artırılması baxımından regionlarda meliorativ tədbirlərin həyata keçirilməsi, bütövlükdə su ehtiyatlarından səmərəli şəkildə istifadə olunması böyük aktuallıq daşıyır. Bu da ilk növbədə onunla bağlıdır ki, respublikamızda həm su ehtiyatları, həm də əkinəyararlı torpaq fondu məhduddur. Belə ki, ölkə ərazisinin yalnız 54,9 faizi kənd təsərrüfatına yararlıdır. Bu ərazilərin də əksəriyyəti - 2915,4 min hektarı daimi bitkilər (bağlar, üzümlüklər, tingliklər, çay plantasiyaları), otlaqlar və biçənəklər altında olan torpaqlardır. Respublikanın regionlarında cəmi 1,8 milyon hektar sahə şum əkinçiliyi üçün istifadə olunur. Suvarılan torpaqlar ölkənin kənd təsərrüfatına yararlı torpaq sahələrinin üçdəbirini (1432,7 min hektar) təşkil edir. Bununla belə, respublikada istehsal olunan kənd təsərrüfatı məhsullarının 90-95 faizi məhz bu torpaqların payına düşür. Suvarılan torpaqların təxminən üçdəbirindən çoxu (565 min hektarı) mexaniki üsulla, o cümlədən 349,4 min hektarı elektrikləşdirilmiş, 68,2 min hektarı dizel nasos stansiyaları ilə, 147,7 min hektarı isə subartezian quyuları vasitəsi ilə suvarılır.

Ölkə ərazisində yeni suvarılan torpaqlar dövriyyəyə cəlb edilir

Azərbaycanda suvarma əkinçiliyinin inkişafına əsasən XX əsrin birinci yarısından başlanıb. Əgər 1925-ci ildə cəmi 510 min hektar ərazi suvarma şəbəkəsi ilə əhatə olunmuşdusa, sonrakı illərdə həyata keçirilmiş meliorativ tikinti işləri hesabına suvarılan sahələrin həcmi 2000-ci ildə 1426 min hektara çatdırılıb. Lakin bu, son hədd deyil. Torpaq-iqlim şəraiti Azərbaycanda suvarılan torpaq sahələrini 3,0-3,5 mln. hektara qədər artırmağa imkan verir.

Son 13 ildə Prezident İlham Əliyevin siyasi iradəsi əsasında ölkənin regionlarında meliorativ tədbirlərin həyata keçirilməsinə əsaslı kapital qoyuluşu dəfələrlə artıb, sahənin maddi-texniki bazası xeyli yaxşılaşdırılıb, minlərlə kilometr suvarma kanallarının və kollektor-drenaj şəbəkələrinin bərpası, yenidən qurulması və tikintisi həyata keçirilib. Regionlarda reallaşdırılan layihələr sayəsində 347 min hektar sahədə suvarılan torpaqların su təminatı, 239 min hektar sahədə meliorativ vəziyyət yaxşılaşdırılıb, 55 min hektar yeni suvarılan sahələr kənd təsərrüfatı dövriyyəsinə cəlb edilib, sel və daşqınlara qarşı Kür, Araz və dağ çaylarında 1000 kilometrdən artıq sahilbərkitmə və bəndlərin möhkəmləndirilməsi işləri həyata keçirilib.

Respublikanın içməli və suvarma su təminatının yaxşılaşdırılması baxımından Taxtakörpü, Şəmkirçay, Tovuzçay su anbarlarının inşası tarixi nailiyyətdir. Bəhs olunan anbarların istifadəyə verilməsi regionlarda minlərlə hektar suvarılan torpaqların su təminatının yaxşılaşmasına, eyni zamanda, dövriyyəyə yeni torpaqların cəlb edilməsinə münbit zəmin yaradıb. 2013-cü ildə Prezident İlham Əliyevin iştirakı ilə istifadəyə verilən Taxtakörpü su anbarı, Taxtakörpü Su Elektrik Stansiyası, Vəlvələçay-Taxtakörpü və Taxtakörpü-Ceyranbatan kanallarının inşası layihələrinin texniki parametrləri kifayət qədər genişdir. Cəmi bir neçə il ərzində Vəlvələçaydan Ceyranbatan gölünə qədər uzanan və mürəkkəb relyefi ilə seçilən ərazidə böyük həcmdə işlər reallaşdırılıb. Bu layihələrin unikallığı həm də ondadır ki, Samur çayından götürülən su öz axarı ilə Vəlvələçay-Taxtakörpü kanalı ilə Taxtakörpü su anbarına ötürülür. Kanal üzərində 57 mükəmməl hidrotexniki qurğu quraşdırılıb. Taxtakörpü su anbarının sahəsi 8,71 kvadratkilometrdir. Qurğunun ümumi su tutumu 270 milyon kubmetr, faydalı su həcmi isə 238,4 milyon kubmetrdir.

2014-cü ilin noyabrında istifadəyə verilən Şəmkirçay su anbarı layihəsinin yerinə yetirilməsinə 700 milyon manatdan çox dövlət vəsaiti yönəldilib. Şəmkirçay su anbarının ümumi su tutumu 164,5 milyon kubmetr, faydalı həcmi isə 156,3 milyon kubmetrdir. Anbarın bəndinin nüvə hissəsindən hündürlüyü 196 metrdir. Layihəyə əsasən, orta illik su ehtiyatı 265,2 milyon kubmetr olan Şəmkirçay çayının sularını bu anbarda nizamlamaqla ildə 207,9 milyon kubmetr sudan istifadə olunacaq. Layihəyə uyğun olaraq su anbarında nəqledici, qəza sutullayıcı və təzyiqli enerji tunelləri tikilib. Layihə çərçivəsində Şəmkirçay su anbarında yığılan suyu əkin sahələrinə nəql edəcək əsas magistral kanal, sağ və sol sahil magistral kanalları, həmçinin maşın kanalı üçün qidalandırıcı kanal inşa olunub.

Son illərdə Azərbaycanda su təminatının yaxşılaşdırılması məqsədilə həyata keçirilən infrastruktur layihələrindən biri də 2016-cı ilin fevralında Prezident İlham Əliyevin iştirakı ilə istifadəyə verilən Tovuzçay su anbarıdır. Ümumi su tutumu 20 milyon kubmetr, faydalı həcmi 18 milyon kubmetr olan Tovuzçay su anbarının gil nüvəli torpaq bəndinin hündürlüyü 45 metr, üstdən eni 10 metr, uzunluğu isə 1340 metrdir. Anbarın su hövzəsinin sahəsi 160 hektar, uzunluğu 2,6 kilometrdir. Layihəyə uyğun olaraq, anbarda suburaxma qabiliyyəti saniyədə 250 kubmetr və uzunluğu 731 metr olan qəza sutullayıcısı, maksimum suburaxma qabiliyyəti saniyədə 125 kubmetr olan dəmir-beton borulu qülləli suburaxıcı, saniyədə 6 kubmetr suvarma suyunun verilməsi üçün uzunluğu 468,8 metr olan nov-kanal inşa olunub. Layihənin icrası zamanı Tovuzçay çayı üzərində 8 aşırımlı avtomobil körpüsü tikilib, bəndə və ətraf kəndlərə gedən, ümumi uzunluğu 6800 metr olan avtomobil yolu yenidən qurulub. Uzunluğu 86 metrdən çox olan Axıncaçay çayı üzərində körpünün tikintisi də başa çatdırılıb. Görülən mühüm işlərdən biri də Tovuz və Şəmkir rayonlarının mövcud əkin sahələrinin su təminatının yaxşılaşdırılması məqsədilə bu sahələri suvarma suyu ilə təmin edən Ağstafaçay sağ sahil kanalına əlavə su verilməsi üçün sərfi saniyədə 1,5 kubmetr, uzunluğu 7004 metr olan polad boru kəmərinin tikintisidir.

Yeni nəhəng anbarların sayəsində bölgələrin su təminatında dönüş yaranıb

Taxtakörpü və Şəmkirçay su anbarları kimi XXI əsrin nəhəng layihələrinin reallaşdırılması nəticəsində 200 min hektar əkin sahələrinin su təminatının yaxşılaşdırılması, 50 min hektara yaxın yeni suvarılan sahələrin dövriyyəyə cəlb olunması imkanları yaranıb, Bakının, Sumqayıtın, Gəncənin, ətraf rayonların içməli su ilə təmin edilməsi kimi strateji əhəmiyyətli sosial problemin həlli mümkün olub.

Cari ilin birinci yarısında Taxtakörpü su anbarının tam layihə həcmində - 270 milyon kubmetr su ilə doldurulması və qurğunun tam gücü ilə işləməyə başlaması əlamətar hadisədir. İstifadəyə verildiyi vaxtdan indiyədək su anbarına 1 milyard 241 milyon kubmetr su yığılıb ki, onun da 1 milyard 127 milyon kubmetri su istifadəçilərinə verilib.

Öz növbəsində Tovuzçay su anbarı da qərb bölgəsində aqrar sektorun inkişafına yeni təkan verəcək. Qeyd edək ki, “Tovuzçay su anbarının tikintisinin davam etdirilməsi” layihəsində nəzərdə tutulan tədbirlərin tam başa çatdırılması nəticəsində Tovuzda 16886 hektar, Şəmkirdə isə 2939 hektar olmaqla ümumilikdə 19825 hektar mövcud torpaq sahələrinin su təminatı yaxşılaşdırılacaq. Eyni zamanda, Tovuz rayonunda 300 hektar yeni suvarılan torpaqlar suvarma suyu ilə təmin olunacaq.

Şəmkir, Samux, Göygöl və Goranboy rayonlarında 94 min hektar sahə suvarma suyu ilə təmin ediləcək

Ölkəmizdə yeni suvarma layihələrinin, meliorativ tədbirlərin həyata keçirilməsi davamlı xarakter alıb. Cari ilin birinci yarısında Prezident İlham Əliyevin iştirakı ilə Şəmkir-Samux-Goranboy magistral suvarma kanalının 8,55 kilometrlik hissəsi istifadəyə verilib. Açılış mərasimində bildirilib ki, Şəmkirçay su anbarının, ondan su götürən 60,5 kilometr uzunluğunda magistral kanalların istifadəyə verilməsi ilə Şəmkir, Samux, Göygöl və Goranboy rayonlarında 54 min hektar əkin sahəsinin su təminatı yaxşılaşdırılıb, 17 min hektar yeni suvarılan torpaqlar istifadəyə verilib, həmçinin “Şəmkir Aqropark”ın 543 hektar yeni suvarılan sahələri suvarma suyu ilə təmin edilib.

Bəhs olunan layihə barədə məlumat verən “Meliorasiya və Su Təsərrüfatı” Açıq Səhmdar Cəmiyyətinin sədri Əhməd Əhmədzadə bildirib ki, “Şəmkir çayı üzərində dəryaçanın tikintisi” kompleks layihəsinə daxil edilmiş və ötən əsrin 80-ci illərində tikilmiş Şəmkir maşın kanalının davamı olaraq, 2015-ci ildən uzunluğu 27 kilometrdən çox olan kanalın ikinci növbəsinin tikintisinə başlanılıb. Bu layihənin icrası sayəsində suvarma su mənbəyi işğal zonasında qalan Goranboy rayonunun 26 min hektardan çox torpaq sahəsini suvarma suyu ilə təmin etmək mümkün olacaq. Ötən il kanalın 8 kilometrdən çox hissəsinin tikintisi tamamlanıb və Goranboy, həmçinin Samux rayonlarında 8 min hektar sahəyə suvarma suyu çatdırılıb. Kanalın kəsişmə qurğusunun və onun qalan 19 kilometrlik hissəsinin tikintisinin tamamlanması ilə Goranboy rayonunun daha 18 min 584 hektar torpaq sahələrinə suvarma suyu çatdırılmaqla bu sahələrdə kənd təsərrüfatı məhsulları istehsalının inkişafına nail olunacaq. Hazırda kanalın 4,5 kilometrlik hissəsinin tikintisi üzrə tamamlama işləri davam etdirilir. Eyni zamanda, Şəmkir maşın kanalından Goranboy və Samux rayonlarında yeni yaradılmış aqroparka məxsus 4700 hektar torpaq sahəsinin suvarma suyu ilə təmin edilməsi üçün hazırda boru kəmərinin və hovuzun tikintisi işləri aparılır. Layihənin tam başa çatdırılması ilə Şəmkir, Samux, Göygöl və Goranboy rayonlarında 27 min hektarı yeni suvarılan torpaqlar olmaqla 94 min hektar sahənin suvarma suyu ilə təmin edilməsi mümkün olacaq.

2017-ci ildə 100 min hektar sahənin suvarma dövriyyəsinə cəlb edilməsi real hədəfdir

Son 13 ildə ölkə miqyasında yeni su anbarlarının tikilməsi, müasir kanalların çəkilməsi və bu qəbildən digər işlərin həyata keçirilməsi nəticəsində regionlarda fermerlərin suvarma suyuna olan tələbatının ödənilməsində dönüş yaranıb. Belə ki, cari ilin birinci yarısında ölkə üzrə 1 milyon 376 min hektar sahədə, o cümlədən 136 min hektar pambıq, 518 min hektar taxıl, 3 min hektara yaxın tütün, 410 min hektar yem bitkiləri, 65 min hektar bostan-tərəvəz və digər bitkilər orta hesabla 2,5 dəfə suvarılıb.

Ölkədə aqrar sektorun suvarma suyu ilə təminatının gücləndirilməsi məqsədilə yeni layihələrin reallaşdırılması nəzərdə tutulub. Prezident İlham Əliyev Nazirlər Kabinetinin 2017-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasındakı nitqində aqrar sektorda məhsuldarlığın artırılması baxımından meliorativ tədbirlərin önəminə diqqət çəkərək vurğulayıb: “İlin əvvəlində qarşıya vəzifə qoyulmuşdu ki, biz 100 min hektardan çox yeni torpaq sahələrinin suvarılmasını təşkil edək və bu istiqamətdə işlər gedir. Biz buna nail olacağıq. Biz yeni layihələr üzərində işləyirik. Elə etməliyik ki, suvarma işlərini maksimum dərəcədə yüksək səviyyədə aparaq. Çünki bu, məhsuldarlığa bilavasitə təsir göstərir”.

Ölkəmizdə yaxın perspektivdə icrası nəzərdə tutulan suvarma layihələri sırasında Yuxarı Şirvan Kanalının yenidən qurulması xüsusi yer tutur. Bu layihə 10 rayonun 125 min hektardan çox əkin sahələrinin su təminatının yaxşılaşdırılması və 106 min hektar yeni suvarılan torpaqların dövriyyəyə verilməsi ilə ümumilikdə 231 min hektar torpaq sahəsinin suvarma suyu ilə təmin edilməsi, eləcə də regionda ekoloji mühitin yaxşılaşdırılması və Hacıqabul gölündə yaranmış təhlükəli ekoloji vəziyyətin qarşısının alınması imkanları yaradacaq.

Daha bir iqimiqyaslı suvarma layihəsi Masallı rayonunda reallaşdırılır. Viləşçay Su Anbarının ikinci növbəsinin tikintisi nəticəsində Masallı rayonunda 20 min 100 hektar əkin sahəsi suvarma suyu ilə təmin ediləcək. Yeni layihəyə əsasən Viləşçay su hövzəsinin həcminin 132 milyon kubmetrə çatdırılması nəzərdə tutulub. Layihənin texniki-iqtisadi əsaslandırılmasında əkin sahələrini suvarma suyu ilə təmin etmək üçün 40 kilometr uzunluğunda suvarma kanallarının üzərindəki hidrotexniki qurğularla birlikdə, 8 ədəd nasos stansiyasının tikilməsi və digər işlərin yerinə yetirilməsi mümkün olacaq. Layihədən qonşu Cəlilabad və Neftçala rayonları da faydalanacaq. Qeyd edək ki, Viləşçay Su Anbarının ikinci növbəsinin tikintisi layihəsinə 2018-ci ildə başlanılması planlaşdırılıb. Yeni layihəyə əsasən, su bəndinin hündürlüyü daha 16 metr artırılacaq.

Hacıqabul, Şamaxı və Zərdab rayonlarının suvarma suyu ilə təminatı yaxşılaşacaq

Azərbaycanın regionlarında reallaşdırılan daha bir irimiqyaslı su layihəsi Hacıqabul, Şamaxı və Zərdab rayonlarını əhatə edir. Xəbər verildiyi kimi, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının üçüncü ilinin yekunlarına həsr olunan konfransda Prezident İlham Əliyevin əkin sahələrinin suvarma suyu ilə təminatının yaxşılaşdırılması barədə tapşırıqlarına əsasən, “Azərsu” ASC tərəfindən həyata keçirilən ilk layihənin icrası uğurla yekunlaşıb. Zərdab rayonunda 10 min hektar ərazinin suvarma təminatının yaxşılaşdırılmasını nəzərdə tutan layihənin reallaşdırılması sayəsində yeni torpaq sahələrinin əkin dövriyyəsinə cəlb edilməsinə imkan yaranıb. Layihəyə uyğun olaraq Kür çayından əkin sahələrinə suyun verilməsi məqsədilə çayın sahilində məhsuldarlığı saniyədə 3 kubmetr olan sugötürücü qurğu, nasos stansiyası, diametri 1400 mm olan 15 kilometr uzunluğunda kəmər inşa edilib. Qurğuları elektrik enerjisi ilə təmin etmək üçün 4 mvt-luq transformator və paylayıcı qurğu tikilib, Zərdab 35/10 kilovoltluq yarımstansiyasından 6 kilometr elektrik xətti çəkilib, 81 ədəd dayaq quraşdırılıb. Layihənin qısa müddətdə yekunlaşdırılması məqsədilə tikinti-quraşdırma işləri bir neçə məntəqədə paralel şəkildə aparılıb. Yeni layihənin icrası nəticəsində minlərlə hektar torpaq sahəsində müxtəlif kənd təsərrüfatı məhsulları yetişdiriləcək.

Prezident İlham Əliyevin tapşırığına əsasən, “Azərsu” ASC tərəfindən icra olunan ikinci suvarma layihəsi Hacıqabul və Şamaxı rayonlarında həyata keçirilir. Padarçöl adlanan ərazidə 10 min hektar sahənin suvarılması Hacıqabul rayonunun Talış kəndi yaxınlığındakı Kür sutəmizləyici qurğularının imkanlarından istifadə etməklə həyata keçiriləcək. Bu məqsədlə təmizləyici qurğudan Padarçöl ərazisinə 27 kilometr uzunluğunda magistral kəmər çəkiləcək. İndiyədək kəmərin 9 kilometrlik hissəsi inşa edilib.

Yeri gəlmişkən qeyd edək ki, Prezident İlham Əliyev bir qədər bundan əvvəl Hacıqabul, Şamaxı və Zərdab rayonlarında ərazilərin suvarma suyu ilə təminatı layihələrinin davam etdirilməsi ilə bağlı əlavə tədbirlər haqqında müvafiq Sərəncam imzalayıb. Sərəncamda vurğulanıb: “Regionların sosial-iqtisadi inkişafına dair Dövlət proqramlarında nəzərdə tutulmuş tədbirlərin həyata keçirilməsi nəticəsində kənd təsərrüfatı sahəsində ərzaq təhlükəsizliyinin təmin olunması üçün bitkiçilik və heyvandarlıq sahələri inkişaf etdirilmiş, ərzaq məhsulları ilə özünü təminetmə səviyyəsi daha da yaxşılaşmışdır. İstehsalın stimullaşdırılması məqsədilə dövlət büdcəsinin vəsaiti hesabına yardım verilməsi kənd təsərrüfatı istehsalı sahəsində ilbəil dinamik inkişafın əldə edilməsini təmin edən amillərdən olmuşdur. Bu tədbirlər çərçivəsində Hacıqabul və Şamaxı rayonlarında 10000 hektarlıq və Zərdab rayonunda 10000 hektarlıq ərazinin suvarma suyu ilə təminatı layihəsinin icrasına başlanılmışdır”.

Sərəncama əsasən Hacıqabul, Şamaxı və Zərdab rayonlarında ərazilərin suvarma suyu ilə təminatı üçün başlanılmış layihələrin davam etdirilməsinə dövlət dəstəyini təmin etmək məqsədilə “Azərsu” Açıq Səhmdar Cəmiyyətinə 8,0 (səkkiz) milyon manat vəsait ayrılıb.

Melioratorlar Şərur rayonunda növbəti suvarma mövsümünə ciddi hazırlıq görüblər

Naxçıvan Muxtar Respublikasının digər bölgələrində olduğu kimi, Şərur rayonunda da melioratorlar aqrar sektorda məhsuldarlığın ilbəil artmasına öz töhfələrini verirlər. Rayon Suvarma Sistemləri İdarəsinin rəisi Vaqif Həsənov bildirib ki, Ulu öndər Heydər Əliyevin Azərbaycana rəhbərliyinin birinci dövründə Şərurda 150 milyon kubmetr su tutumuna malik Arpaçay Su Anbarı tikilib. Mövsüm ərzində Şərurla yanaşı, Kəngərli və Sədərək rayonlarının əkin sahələrinin də bir qismi həmin anbardan qidalanan sağ və sol sahil kanalları, bəzi yaşayış məntəqələri isə Araz çayından nasoslar vasitəsilə su ilə təmin olunur.

Hazırda Arpaçay dəryaçasında 53,1 milyon kubmetr su var. Gölə bir saniyə ərzində 0,6 kubmetr su daxil olur, suvarma məqsədilə sağ və sol sahil kanallarına, çay yatağına saniyədə 14 kubmetr su buraxılır. İtkiyə yol verilməməsi, mövcud ehtiyatdan bütün mövsüm ərzində səmərəli istifadə olunması üçün su kanallara və çay yatağına qrafik üzrə ötürülür və buna ciddi nəzarət edilir.

Şərur rayonunda ötən ilin payızlıq taxıl əkinləri də daxil olmaqla, cari yaz mövsümündə 27 min hektara yaxın sahədə normal suvarma həyata keçirilib. Meliorasiya və suvarma qurğularının texniki normalara uyğun istismarı ilə yanaşı, bəzi yerlərdə təmir işləri də ardıcıl davam etdirilir. İdarənin balansında olan nasos stansiyalarının, subartezian quyularının fasiləsiz işinin təmin olunması, dayanan quyuların təcili təmir edilib işə salınması üçün də vaxtaşırı əsaslı tədbirlər görülür. Bu tədbirlər əlavə sahələrin əkin dövriyyəsinə daxil edilməsi ilə yanaşı, həm də torpaqların şoranlaşmasının qarşısını alır. Keçən aylarda 1 milyon 430 min kubmetr həcmində torpaq işləri görülüb, kollektor-drenaj şəbəkələri, kanal və arxlar lildən təmizlənib, Xanlıqlar, Vərməziyar və Ələkli kəndlərində 589 hektar sahənin su təminatını yaxşılaşdırmağa imkan verən suvarma boru xəttinin tikintisi başa çatdırılıb. Həmçinin rayondakı 17 min hektardan artıq əkin sahəsinə suvarma suyunun vaxtlı-vaxtında verilməsi üçün lazımi tədbirlər görülüb, su itkisi halları minimuma endirilib. 7 min 637 hektar taxıl, 760 hektar kartof, 1578 hektar tərəvəz, 474 hektar bostan bitkiləri əkinləri 5 dəfə suvarılıb.

Qarşıdan 2017-ci ilin payız suvarma mövsümü gəlir. Şərurlular 2017-ci ilin yazında etibarlı bünövrə qoyduğu bol məhsulun yığımını başa çatdırır, payız mövsümünə hazırlaşırlar. Rayon Suvarma Sistemləri İdarəsi həmin dövrdə sahələrin vaxtında suvarılması üçün indidən işlərini tədbirli görür. Bu da o deməkdir ki, payız aylarında da əkin sahələrini suvarma suyu ilə tam təmin etmək mümkün olacaq.

Ölkə ərazisində subartezian quyularının qazılması intensiv şəkildə davam etdirilir

Son illərdə ölkənin regionlarında həmçinin dövlət vəsaiti hesabına subartezian quyularının qazılması geniş vüsət alıb. Meliorasiya və Su Təsərrüfatı ASC-nin sədr müavini Rafiq Aslanovun verdiyi məlumata əsasən, ümumilikdə Prezident İlham Əliyev tərəfindən subartezian quyularının qazılması və istifadəyə verilməsi üçün 18 milyon manat vəsait ayrılıb ki, bu da ölkə rəhbərliyinin kənd təsərrüfatına nə qədər önəm və dəstək verməsinin ifadəsidir. Rafiq Aslanov bildirib ki, 2016-cı ildə Azərbaycan Respublikası Prezidentinin ehtiyat fondundan ayrılmış 1 milyon 350 min manat vəsait hesabına əkin sahələrinin və əkin üçün istifadə olunan həyətyanı torpaq sahələrinin suvarma suyu ilə təminatının yaxşılaşdırılması, əhalinin içməli suya olan tələbatının ödənilməsi üçün 900 subartezian quyusu qazılıb istifadəyə verilib. 2017-ci ilin birinci yarısında isə daha 98 subartezian quyusu qazılıb. Ölkəmizdə indiyədək istifadəyə verilən subartezian quyularından çoxlu sayda təsərrüfat subyekti, o cümlədən 1 milyon 300 min insan faydalanır. Prezident İlham Əliyevin imzaladığı müvafiq Sərəncama əsasən ölkənin 36 inzibati rayonunun daha 136 yaşayış məntəqəsində 150 subartezian quyusunun qazılması təmin ediləcək.

Mübariz ABDULLAYEV

Yeni Azərbaycan.- 2017.- 27 sentyabr.- S.7.