Qaradağ rayonunun sosial-iqtisadi inkişafı: real vəziyyət və perspektivlər

Vaxtilə respublikamızın paytaxtı Bakı şəhəri ölkəmizin hüdudlarından kənarda çoxları tərəfindən, sadəcə, “küləklər şəhəri” kimi bilinirdi. Bəzilərinin yaddaşlarında Bakı neft yataqları ilə zəngin olan ölkənin paytaxtı kimi assosiasiya doğururdu. Bu gün isə Bakı dünyanın ən məşhur şəhərləri sırasında yer alır. Qədimliyi, qədim olduğu qədər də möhtəşəm müasir tikililəri, nadir memarlıq üslubunda inşa olunan kompleks və göydələnləri ilə Bakının adı dillər əzbəridir. Prezident İlham Əliyev də vurğulayıb ki, Bakı dünyanın ən gözəl şəhərlərindən biridir: “Bakının tarixi gözəlliyi vardır. Qədim Bakının gözəlliyi vardır və bu, bizim qürur mənbəyimizdir. Eyni zamanda, gəncləşən, müasirləşən Bakı da dünya miqyasında artıq özünə yer tuta bilibdir”.

Bəli, indi dünyanın harasında olursa olsun, Bakıdan söz düşəndə insanlar mavi Xəzərin qoynunda yerləşən və gözəlliyi ilə cəlb edən ecazkar şəhərin sehrindən danışırlar. Bakıya ayaq basan hər kəs bu şəhərə heyran qalır, uzun müddət paytaxtımızın yaratdığı xoş təəssüratlardan bəhs edir. Hər il onlarla beynəlxalq idman yarışlarına və mədəniyyət festivallarına, siyasi, humanitar forumlara yüksək səviyyədə ev sahibliyi edən paytaxtımız turistlərin ən çox üz tutduqları şəhərlərdən biridir. Təkcə ötən il Bakıya gələn turistlərin sayı təxminən 3 milyon nəfərə yaxın olub. Deməli, hər ötən il Bakının şöhrəti diyardan-diyara yayılır, bu qədim şəhər, sözün həqiqi mənasında, dünyaya günəş kimi doğur. Əlbəttə ki, bunlar bir gecənin içində sehrli çubuğun hərəkəti ilə əldə olunmuş möcuzəvi dəyişim deyil. Bu, düşünülmüş və incəliklə yerinə yetirilən uğurlu siyasətin nəticəsində hər gün daha da böyüyən, daha da inkişaf edən ölkənin paytaxtının qibtə olunacaq yüksəlişidir.

95 yaşlı Qaradağ rayonu yeni inkişaf mərhələsində...

Sevindirici haldır ki, bu inkişaf, yeniləşmə təkcə paytaxtın insanların ən çox müraciət etdiyi, toplaşdığı mərkəz hissəsi ilə məhdudlaşmır. Bakının bütün rayonları müasir infrastrukturu, abad yolları, yeni mədəniyyət və idman sarayları, müasir tipli səhiyyə və təhsil müəssisələri, geniş park və xiyabanları ilə göz oxşayır. Azərbaycan Respublikası regionlarının sosial-iqtisadi inkişafına dair Dövlət proqramlarının və Bakı şəhərinin və onun qəsəbələrinin sosial-iqtisadi inkişafına dair Dövlət proqramlarının uğurlu icrası paytaxtımızın rayonlarının da dinamik inkişafını təmin edib. Qaradağ rayonunun son illərdə əldə etdiyi nailiyyətlərdə bu fakt özünü aydın şəkildə göstərir. Bu il mayın 7-də inzibati rayon kimi yaradılmasının 95-ci ildönümünü qeyd edəcək olan Qaradağ rayonu paytaxtın inzibati baxımdan ən böyük rayonu kimi Azərbaycanın mühüm sənaye mərkəzlərindən biridir. Ölkəmizin uğurlu neft strategiyasının reallaşmasında Qaradağ rayonunda yerləşən neft-qaz çıxarma və istahsal zavodları lokomotiv rolunu öz üzərlərinə götürüblər. Həmçinin rayonda fəaliyyət göstərən Heydər Əliyev adına Bakı Dərin Özüllər Zavodu, Bakı Gəmiqayırma Zavodu, müxtəlif tikinti və inşaat materiallarının istehsalı üzrə ixtisaslaşmış zavodlar Azərbaycanda Prezident İlham Əliyevin rəhbərliyi ilə reallaşdırılan iqtisadi inkişaf strategiyası nəticəsində daha genişmiqyaslı nailiyyətlərin əldə olunmasına mühüm töhfələr verir. Bu zavodların böyük əksəriyyətinin istehsal etdikləri məhsullar xarici bazarlara çıxarılmaqla ölkəmizin ixrac əməliyyatlarının genişlənməsində əsaslı paya malikdir.

“Qazanılan hər bir uğura dövlət başçısının diqqət və qayğısı sayəsində nail olunub”

Təbii ki, görülən işlər rayonun ümumi iqtisadi inkişaf göstəricilərinin yüksəlməsini təmin etməklə yanaşı, mühüm sosial mahiyyət də kəsb edir. On minlərlə Qaradağ rayon sakini bu zavodlarda daimi iş yerləri ilə təmin olunub. Eyni zamanda, rayonda genişmiqyaslı sosial infrastrukturun yaradılması, rayonun qəsəbələrində müasir təhsil və səhiyyə obyektlərinin tikintisi, yeni yolların çəkilməsi istiqamətində də əsaslı işlər görülməkdədir. Prezident İlham Əliyev də son illərdə Qaradağ royununda görülən işləri yüksək qiymətləndirərək rayonun tanınmayacaq qədər gözəlləşdiyini və abadlaşdığını vurğulayıb. Şübhə yoxdur ki, digər rayonlarımızda olduğu kimi, Qaradağda da genişmiqyaslı uğurlara dövlətin ciddi dəstəyi və böyük diqqəti sayəsində nail olunub. Qaradağ rayon İcra Hakimiyyətinin başçısı Süleyman Mikayılov da bildirib ki, məhz ölkə Prezidentinin birbaşa təşəbbüsü və himayəsi sayəsində son illər Qaradağ rayonunda bir çox mühüm obyektlərin inşası uğurla başa çatdırılıb. “Qazanılan hər bir uğura dövlət başçısının diqqət və qayğısı sayəsində nail olunub. Bunun bariz nümunəsi kimi, ötən il ərzində ölkə başçısı cənab İlham Əliyevin Qaradağ rayonuna 3 dəfə səfər etdiyini göstərmək olar. Bu səfərlər çərçivəsində Prezident cənab İlham Əliyev may ayının 18-də Heydər Əliyev adına yarımdalma qazma qurğusunun açılış mərasimində, sentyabr ayının 6-da Gəmiqayırma zavodunda “Şahdəniz-2” layihəsi çərçivəsində inşa edilən “Xankəndi” sualtı tikinti gəmisinin təqdimat mərasimində və oktyabr ayının 30-da Bakı Beynəlxalq Dəniz Ticarət Limanında keçirilmiş Bakı-Tbilisi-Qars dəmir yolunun təntənəli açılış mərasimində iştirak etmişdir. Prezident cənab İlham Əliyevin Qaradağ rayonuna səfərləri 2017-ci ilin ən mühüm və yaddaqalan hadisələrindən olmuşdur”, - deyə S.Mikayılov qeyd edib.

Yeri gəlmişkən, Qaradağ rayonunun sosial-iqtisadi inkişafı ötən ilin zəngin statistik göstəricilərində də öz əksini tapıb. Belə ki, rayon İcra Hakimiyyətindən verilən məlumatlara görə, ötən il sənaye sahəsində 2017-ci ildə 929 mln. 693 min manatlıq və ya əvvəlki ilin müvafiq dövrü ilə müqayisədə 1,7 faiz çox sənaye məhsulu istehsal edilib və xidmətlər göstərilib. Sənaye məhsulunun ümumi həcmində qeyri-dövlət sektorunun xüsusi çəkisi 41,7 faiz təşkil edib. Hesabat dövründə istehlak bazarı dinamik inkişaf etməkdə davam edib və pərakəndə ticarət şəbəkəsindən rayon əhalisinə əvvəlki ilin müvafiq dövrünə nisbətən 61,4 faiz artıq istehlak malları satılıb.

Qeyd olunduğu kimi, 2017-ci il Qaradağ rayonunun iqtisadi-sosial həyatında bir çox mühüm hadisələrlə zəngin olub. Rayon rəhbərliyi hesab edir ki, ötən ilin may ayının 30-da Qaradağ rayonunun Lökbatan qəsəbəsində qaçqın və məcburi köçkün ailələr üçün 1026 mənzilli yeni yaşayış kompleksinin təməlqoyma mərasiminin keçirilməsi xüsusilə diqqətəlayiq hadisədir. Çünki ölkəmiz üçün çox vacib olan bu məsələyə, qaçqın və məcburi köçkünlərin həyat şəraitinin yaxşılaşdırılması məqsədilə Azərbaycan Respublikasının Birinci vitse-prezidenti Mehriban xanım Əliyevanın çağırışına Qaradağ rayonunda fəaliyyət göstərən özəl sektor və biznes strukturları da qoşulublar. Azərbaycan Respublikasının Prezidenti cənab İlham Əliyevin 18 may 2017-ci il tarixində Qaradağ rayonunda SOCAR-ın “Caspian Driling” Şirkətinin dəniz təchizat və logistika bazasında Heydər Əliyev adına yarımdalma qazma qurğusunun açılış mərasimində, 6 sentyabr 2017-ci il tarixində isə Gəmiqayırma zavodunda “Şahdəniz-2” layihəsi çərçivəsində inşa edilən “Xankəndi” sualtı tikinti gəmisinin təqdimat mərasimində iştirakı isə yenə də Qaradağ rayonunun tarixinə parlaq hərflərlə yazılmış unudulmaz hadisələrdir.

Yaxın gələcəkdə Qaradağ rayonunun ölkə iqtisadiyyatına töfhələri daha da artacaq

Milli Məclisin Qaradağ rayonundan seçilmiş deputatı, Yeni Azərbaycan Partiyası Qaradağ rayon təşkilatının sədri Aydın Hüseynov qəzetimizə açıqlamasında deyib ki, son illərdə həyata keçirilən Dövlət proqramları və uğurla reallaşdırılan digər tədbirlər bu gün ölkəmizin hər bir yerində müsbət reallıqlar yaradıb. Dövlətin ciddi siyasi iradəsi və həyata keçirilən geniş investisiya proqramları nəticəsində ən ucqar bölgələrimizdə belə müasir infrastruktur yaradılıb, vətəndaşların həyat şəraiti əsaslı şəkildə yaxşılaşdırılıb. Aydın Hüseynovun sözlərinə görə, ölkəmizin dinamik inkişafı paytaxtın Qaradağ rayonunun timsalında da özünü göstərir. Belə ki, rayonda həyata keçirilən uğurlu tədbirlər nəticəsində istehsal sahələrinin dinamik və effektiv fəaliyyəti təmin olunub, sənaye potensialı əsaslı şəkildə gücləndirilib: “Rayonda ən müasir texnologiyaların tətbiq olunduğu və beynəlxalq tələblərə cavab verən rəqabətqabiliyyətli və ixracyönümlü məhsullar istehsal edən yeni müəssisə və obyektlər yaradılıb. İstehsal müəssisələrində işlə təmin olunan vətəndaşların rifahını xarakterizə edən keyfiyyət göstəriciləri əhəmiyyətli dərəcədə yaxşılaşıb. Rayonda çox geniş infrastruktur şəbəkəsi yaradılıb, yeni müasir tipli müəssisələr, xidmət obyektləri, istirahət və yaradıcılıq guşələri, parklar, səhiyyə, təhsil, idman qurğuları və s. həm rayonun inkişafına töhfələr verir, həm də vətəndaşların güzəranının daha da yaxşılaşmasında ifadə olunur”.

Millət vəkili Aydın Hüseynov rayonda həyata keçirilən investisiya layihələrinin vacibliyini vurğulayaraq bu layihələr sırasında Yeni Bakı Beynəlxalq Dəniz Ticarət Limanını xüsusi qeyd edib. Onun sözlərinə görə, rayonun və respublikamızın sosial-iqtisadi həyatında mühüm əhəmiyyətə malik Yeni Bakı Beynəlxalq Dəniz Ticarət Limanı layihəsinin işə düşməsi beynəlxalq yükdaşıma ilə bərabər, daxili yükdaşıma üçün də geniş imkanlar yaradır. Digər tərəfdən, yerli məhsulların xarici bazarlara çıxarılması alternativləri artır. Bundan əlavə, Yeni Bakı Beynəlxalq Dəniz Ticarət Limanı çox böyük layihədir və burada on minlərlə yeni iş yerinin yaradılması nəzərdə tutulur. Ələti unikal edən xüsusiyyətlərdən biri də onun Bakının Qaradağ rayonunda yerləşməsidir. Bakının hazırda əsas iqtisadi mərkəz olduğunu, istər özəl şirkətlərin əksəriyyətinin, istərsə də insan resursunun əsasən paytaxtda cəmləşdiyini nəzərə alsaq, bu özü də böyük üstünlüklər yaradır. Qeyd edilməli digər məqam da burada xüsusi iqtisadi zonanın yaradılmasıdır ki, bu da sahibkarlar üçün öz fəaliyyətlərini genişləndirmək fürsəti deməkdir. Bu isə, öz növbəsində, Qaradağ rayonunun yaxın gələcəkdə ölkə iqtisadiyyatında rolunun daha da artacağını deməyə əsas verir.

Beləliklə, sadalanan faktlar bir daha Qaradağ rayonunun sosial-iqtisadi həyatında əsaslı nailiyyətlərin əldə olunmasını sübuta yetirir. Dövlətin ciddi diqqət və qayğısı, yerlərdə işin düzgün qurulması və vətəndaşların dəstəyi, fəallığı bütün məsələlərin həllində açar rolunu oynayır. Bu, eyni zamanda, gələcəkdə daha genişmiqyaslı uğurların qazanılmasına da möhkəm bünövrə yaradıb.

Aqşin ŞAHİNOĞLU

Yeni Azərbaycan.- 2018.- 24 aprel.- S.7.