Azərbaycanın bölgələrində müasir təhsil infrastrukturunun yaradılması diqqət mərkəzində saxlanılır

Həyata keçirilən məqsədyönlü tədbirlər, o cümlədən regionlarda yeni məktəblərin istifadəyə verilməsi, maddi-texniki bazanın möhkəmləndirilməsi təhsilin keyfiyyət göstəricilərinin yaxşılaşmasına müsbət təsir göstərir

(əvvəli ötən sayımızda)

Sonra təhsil nazirinin müavini Firudin Qurbanov çıxış edib, ölkəmizdə təhsilin inkişafı istiqamətində görülən işlərdən, qazanılan uğurlardan danışıb. Nazir müavini “Enerji səmərəliliyinin təmin olunması” layihəsinin reallaşmasına görə Çexiya səfirinə təşəkkürünü bildirib.

Səfir Milan Ekert layihənin ekoloji əhəmiyyətindən söz açıb. İnsanlar və ölkələr arasında körpülərin qurulmasının heç də asan olmadığını vurğulayan səfir Çexiya ilə Azərbaycan arasında yaxşı münasibətlərin, strateji anlaşmanın olduğunu deyib. Bildirib ki, hələ qarşıda müxtəlif sahələrdə bir çox əməkdaşlıq imkanları mövcuddur.

Çexiyanın təhsil, idman və gənclər nazirinin müavini Dana Prudikova çıxışında iki ölkənin bir-birinə həmişə dəstək olduğunu söyləyib, təhsilin keyfiyyətinin vacibliyini, bunun üçün yaxşı şəraitin yaradılmasının zəruriliyini diqqətə çatdırıb, məktəbin kollektivinə uğurlar arzulayıb.

Sonra qonaqlar kompüter və sinif otaqlarını gəzib, yaradılan şəraitlə tanış olublar.

Bu yaxınlarda Ağdam rayonunun Bənövşələr kəndində yeni inşa olunan 260 şagird yerlik məktəb binası da istifadəyə verilib. Bu münasibətlə rayon ictimaiyyətinin, təhsil işçilərinin, valideynlərin, kənd sakinlərinin iştirakı ilə açılış mərasimi keçirilib. Rayon İcra Hakimiyyətinin başçısı Vaqif Həsənov mərasimdə çıxış edərək, məktəbin kollektivini və kənd sakinlərini əlamətdar hadisə münasibətilə təbrik edib, ölkəmizdə gedən sosial-iqtisadi inkişafdan, təhsil sahəsində həyata keçirilən məqsədyönlü tədbirlərdən, Prezident İlham Əliyevin və birinci xanım Mehriban Əliyevanın təhsilə göstərdiyi diqqət və qayğıdan danışıb. Şagirdlərə onlar üçün yaradılan şərait müqabilində yaxşı oxumağı, elmə, biliyə daha dərindən yiyələnməyi tövsiyə edib.

Sonra tədbir iştirakçıları məktəbdə yaradılmış şəraitlə tanış olublar. Məktəb binasında sinif otaqları, fənn kabinələri, fizika laboratoriyası, kompüter otağı, kitabxana, akt zalı yaradılıb, təhsil ocağı yeni inventar və avadanlıqla təchiz edilib.

Regionların sosial-iqtisadi inkişafına dair üçüncü Dövlət Proqramında nəzərdə tutulmuş tədbirlərə müvafiq olaraq Astara rayonunun Burzubənd kəndində isə 360 şagird yerlik yeni məktəb binası tikilir. Təhsil Nazirliyinin sifarişi ilə “Litosfer” MMC-nin inşaatçıları tərəfindən tikilən ikimərtəbəli, üç korpusdan ibarət yeni təhsil ocağının tikintisində 20-dən çox yerli işçi çalışır. Müasir arxitektura üslubunda tikilən təhsil ocağında şagirdlərin yüksək səviyyədə təhsil almaları üçün hər cür şərait olacaq.

Ərazidə 120 metr dərinliyində artezian quyusu qazılıb, 30 və 100 tonluq su anbarları inşa edilib. İşıq, istilik və su sistemləri quraşdırılacaq, məktəbin həyətində idman meydançası və istirahət guşələri yaradılacaq. Yeni məktəb binasının 2019-cu ilin sentyabr ayında istifadəyə verilməsi nəzərdə tutulub.

Sabirabadın 1176 şagird yerlik Qaratəpə kənd tam orta məktəbinin binasında əsaslı təmir işləri isə yekunlaşmaq üzrədir. 1981-ci ildə istifadəyə verilən məktəb binasında 35 il ərzində təmir işləri aparılmayıb. Bu da məktəbdə təhsilin yüksək səviyyədə təşkilində müəyyən çətinliklər yaradırdı. Bu problem nəzərə alınaraq ötən ilin sonlarında məktəb binasında təmir işlərinə başlanılıb.

Təmir zamanı məktəb binasının su, qaz, elektrik xətləri, dam örtüyü, qapı və pəncərələri dəyişdirilib, havalandırma sistemi qurulub, sinif otaqları, fənn kabinələri, idman və akt zalları, dəhliz və digər yardımçı otaqlar, demək olar ki, yenidən tikilib. Hazırda təhsil ocağında yeni avadanlıq və inventarlar quraşdırılır, ərazidə abadlıq işləri aparılır. Məktəb binası yaxın günlərdə müəllim və şagird kollektivinin istifadəsinə veriləcək.

Onu da vurğulayaq ki, respublikamızda təhsil infrastrukturunun müasirləşdirilməsi proqramı çərçivəsində yeni layihə də uğurla icra edilir. Söhbət regionlarda kontingenti az olan təhsil ocaqları üçün modul tipli məktəb binalarının quraşdırılıb istifadəyə verilməsindən gedir. Xatırladaq ki, 2017-ci ildə respublikanın 40 rayonunda təxminən beş min şagirdi əhatə edən yüz modul tipli məktəb inşa edilib. Bu il də anoloji məktəblərin tikintisi davam etdirilir. Bir müddət öncə Siyəzən rayonunun Tuğay kəndində 80 şagird yerlik yeni modul tipli məktəb binası tikilib istifadəyə verilib. Ümumi orta məktəbin yeni binasında 7 sinif və digər təyinatlı otaqlar var. Modul tipli bina yanğın xəbərdarlıq sistemi, işıq və su təchizatı ilə təmin olunub. Tikintisinə 2017-ci ilin fevral ayında başlanılan birmərtəbəli tədris ocağının ümumi sahəsi 300 kvadratmetrdir.

Respublikamızın bölgələrində təhsil infrastrukturunun müasirləşdirilməsi və təhsilin keyfiyyətinin yüksəldilməsi məqsədilə Prezident İlham Əliyevin 2018-ci il 5 aprel tarixli Sərəncamına əsasən isə hazırda Tovuz rayonunda, ümumilikdə, 332 şagird yerlik 6 modul tipli məktəb binası quraşdırılır. Tovuz rayon İcra Hakimiyyətindən bildirilib ki, modul tipli məktəb binaları əsasən rayonun dağ kəndlərində inşa olunur. Artıq bir sıra kəndlərdə quraşdırma işləri başa çatmaq üzrədir.

Ağsu rayonunun şimal dağlıq ərazisində rayon mərkəzindən 40 kilometr məsafədə yerləşən Hacman kəndində də ibtidai məktəb üçün 40 şagird yerlik yeni modul tipli tədris ocağı istifadəyə verilib. Məktəbin açılış mərasimində rayon İcra Hakimiyyəti başçısının müavini Sevil Mirzəliyeva, təhsil şöbəsinin müdiri Səftər Əlabbasov ölkəmizdə təhsilin inkişafına göstərilən dövlət qayğısından danışıblar.

Çıxışlarda respublikamızın bütün bölgələrində olduğu kimi, Ağsu rayonunda da ümumtəhsil məktəblərinin maddi-texniki bazasının möhkəmləndirilməsi ilə əlaqədar görülən işlərdən, həyata keçirilən layihələrdən söz açılıb. Diqqətə çatdırılıb ki, Göydəlləkli kəndində ümumi orta məktəb üçün 90 şagird yerlik modul tipli yeni bina da istifadəyə hazırdır. Bundan başqa, Abasxanlı kəndində tam orta, Sarvan və Sanqalan kəndlərində ümumi orta məktəblər üçün də 90 şagird yerlik modul tipli təzə binaların quraşdırılması üçün dövlət vəsaiti ayrılıb və yaxın vaxtlarda işlərə başlanılacaq.

Sonda qonaqlar yeni binada müasir inventar və avadanlıqla təchiz olunmuş sinif otaqları, fənn kabinetləri ilə tanış olublar.

Onu da qeyd edək ki, artıq Ağsu rayonunun daha bir yaşayış məntəqəsində - Göydəlləkli kəndində ümumi orta məktəb üçün 80 şagird yerlik modul tipli yeni tədris ocağı istifadəyə verilib. Məktəbin açılış mərasimində bildirilib ki, son 15 ildə təkcə Ağsuda ümumtəhsil məktəbləri və məktəbdənkənar müəssisələr üçün 28 yeni bina istifadəyə verilib.

Bu məqamda vurğulamaq yerinə düşər ki, Qax rayonunun Aşağı Malax və Fıstıqlı kəndlərində də qəzalı vəziyyətdə olan ümumi orta məktəblər üçün hər biri 40 şagird yerlik modul tipli yeni binalar quraşdırılır. Bundan əlavə, yaxın vaxtlarda Çinarlı kəndindəki ümumi orta məktəb üçün də modul tipli binanın quraşdırılmasına başlanılacaq. Rayonun Əmircan, Qapıçay, Qarabaldır və Qaradolaq kəndlərində qəzalı vəziyyətdə olan ümumi orta məktəblər üçün quraşdırılan modul tipli binalarda isə tikinti işləri artıq yekunlaşıb. Bu məktəblərin ikisi 80, ikisi isə 56 şagird yerlikdir.

Yeri gəlmişkən, bu proses Xaçmaz rayonunda da uğurla davam etdirilir. Belə ki, verilən məlumata görə, Xaçmazın Qaracəlli, Cığatay və Alıcqışlaq kəndlərində modul tipli məktəb binaları quraşdırılır. Rayonun Ərəb kəndində tikilən 40 şagird yerlik ibtidai məktəb binası isə akt zalı, 4 sinif və müəllimlər otağından ibarətdir. Məktəb müasir avadanlıqlar və mərkəzləşdirilmiş istilik sistemi ilə təmin edilib.

Xaçmazda 2018-ci ilin sonuna kimi istifadəyə verilməsi nəzərdə tutulan 4 modul tipli məktəb binasında 300 nəfərə yaxın şagird təhsil alacaq.

Neftçala rayonunda da son illər təhsil ocaqlarının maddi-texniki bazasının möhkəmləndirilməsi istiqamətində mühüm işlər görülür. Rayonun qəsəbə və kəndlərində yeni-yeni məktəb binaları tikilib istifadəyə verilir, mövcud binalar isə əsaslı təmir olunur. Hazırda Neftçala rayonunda bu istiqamətdə xeyli iş görülüb. Son illər rayonda 15 yeni məktəb binası tikilib istifadəyə verilib, 3 bina isə əsaslı təmir olunub. Təkcə ötən il rayonun ayrı-ayrı kəndlərində modul tipli 5 məktəb binası quraşdırılaraq şagirdlərin ixtiyarına verilib. Prezidentin Sərəncamı ilə bu il rayonda modul tipli daha 7 məktəb binasının quraşdırılması nəzərdə tutulub.

Rayon Təhsil Şöbəsinin müdiri Əjdər Kərimov bildirib ki, məktəb binaları rayonun Mirzəqurbanlı, Pirəppə, Qaraqaşlı, Aşağı Sura, Xoltəzəkənd, Xolqaraqaşlı və Qazaxdərə kəndlərində quraşdırılacaq. Ümumi orta məktəblər üçün nəzərdə tutulan binaların beşi 56, ikisi isə 80 şagird yerlikdir. Binalar üçün kəndlərdə münasib yerlər ayrılıb və tikinti işləri aparılır. Artıq Pirəppə və Qaraqaşlı kəndlərində 56 şagird yerlik ümumi orta məktəb üçün quraşdırılan tikililərdə inşaat işləri yekunlaşmaq üzrədir. Yaxın günlərdə məktəb binaları şagirdlərin istifadəsinə veriləcək. Qalan 5 binanın tikintisinin isə bu ilin sonuna kimi başa çatdırılması nəzərdə tutulub.

Xatırladaq ki, modul tipli məktəb binaları azməsrəfli olması, qısa müddətdə istənilən relyefdə quraşdırılması, asan daşınması, şagirdlərin sayına uyğun olaraq sinif otaqlarının rahatlıqla azaldılıb-artırılması ilə fərqlənir. Bütövlükdə isə, təhsil infrastrukturunun yenidən qurulması, müasirləşdirilməsi bu sahənin inkişafında vacib rol oynayır.

Nardar BAYRAMLI

Yeni Azərbaycan.- 2018.- 5 dekabr.- S.7.