Möhtəşəm quruculuq: Dünən, bu gün, sabah”

Yeni Azərbaycan Partiyasının təşkilatçılığı ilə bu mövzuda konfrans keçirilib

Dekabrın 24-də Bakıda Yeni Azərbaycan Partiyasının (YAP) təşkilatçılığı ilə “Möhtəşəm quruculuq: Dünən, bu gün, sabah” mövzusunda konfrans keçirilib. Konfransda dövlət və hökumət rəsmiləri, Milli Məclisin deputatları, Yeni Azərbaycan Partiyasının üzvləri, ictimaiyyət nümayəndələri iştirak ediblər.

Konfransda çıxış edən Azərbaycan Respublikası Baş nazirinin müavini, YAP Sədrinin müavini - İcra katibi Əli Əhmədov bildirib ki, ölkəmizin inkişafı Ümummilli lider Heydər Əliyevin müəyyənləşdirdiyi siyasi kursun Prezident İlham Əliyev tərəfindən uğurla davam etdirilməsi ilə bağlıdır. Onun sözlərinə görə, ötən 15 il ərzində Azərbaycanda böyük quruculuq işləri aparılıb, ölkəmizin siması əsaslı dərəcədə dəyişib: “Ötən illər ərzində insanların rifahının xeyli dərəcədə yaxşılaşması bütövlükdə Azərbaycanın güclənməsi ilə əlaqədardır. Azərbaycan o dərəcədə sürətlə inkişaf edib, yeniləşib və müasirləşıb ki, bu prosesə həsr olunan konfransların keçirilməsi bir tərəfdən zərurətə çevrilib, digər tərəfdən insanlar, o cümlədən YAP-ın üzvləri üçün böyük qürur hissi doğurur. Ümumiyyətlə, Azərbaycanın yüksəlişi Ümummilli lider Heydər Əliyevin müəyyənləşdirdiyi siyasətlə bağlıdır. Bu siyasət son 15 il ərzində ölkə Prezidenti, Yeni Azərbaycan Partiyasının Sədri İlham Əliyev tərəfindən həyata keçirilir. Məmnunluq hissi ilə qeyd etmək lazımdır ki, son 15 il Azərbaycan tarixinin qürur hissi doğuran səhifələrini təşkil edir. Bu illər ərzində Azərbaycan həyatın bütün sferalarında ciddi şəkildə yeniləşib və müasirləşib. Və ən başlıcası insanların həyatı müsbət mənada dəyişib. İnsanlarımız daha yaxşı yaşayırlar və bu amil cəmiyyətimizin birliyini daha da gücləndirib. 15 il ərzində Azərbaycanda bütün sahələr üzrə möhtəşəm və əzəmətli dəyişikliklər baş verib. Ötən 15 ilin nailiyyətləri həmçinin Azərbaycanın yeni modern əsaslarda qurulması ilə əlaqədardır. Ona görə də, bu dövrü möhtəşəm quruculuq illəri adlandırmaq olar”.

Əli Əhmədov qeyd edib ki, son 15 il ərzində Azərbaycanda böyük quruculuq işləri aparılıb, ölkəmizin siması əhəmiyyətli dərəcədə dəyişib. Onun sözlərinə görə, Bakı şəhərinin tamamilə yeniləşməsi, müasirləşmə və dünyanın ən gözəl şəhərlərindən birinə çevrilməsi ötən 15 ilin ən böyük uğurlarından biridir: “Bu amil, quruculuq işləri təkcə Bakı ilə məhdudlaşmır. Ölkəmizin bütün guşələrində möhtəşəm quruculuq işləri həyata keçirilib və bu gün də davam edir. Bu siyasət, möhtəşəm quruculuq siyasəti uğurla davam edəcək və Azərbaycanın quruculuq strategiyası daha böyük nailiyyətləri özündə ehtiva edəcək. Bu mənada hesab edirəm ki, möhtəşəm quruculuq bizim yaşadığımız illərin ən əsas keyfiyyətlərindən birini təşkil edir. Bu quruculuğun, əhəmiyyətli dəyişikliklərin müəllifi isə Prezident İlham Əliyevdir”.

YAP Sədrinin müavini qeyd edıb ki, Prezident İlham Əliyevin həyata keçirdiyi siyasətin çox vacib cəhətlərindən biri quruculuq strategiyası ilə bağlıdır: “Ümummilli liderimiz Heydər Əliyev hələ sovetlər birliyi dövründə Azərbaycanda hakimiyyətə gəldikdən sonra respublikamız keçmiş ittifaqda ön sıralara yüksəldi. Həmin dövrdə də böyük quruculuq işləri həyata keçirildi. Müstəqillik illərində isə Ulu öndərimiz Azərbaycanın inkişaf strategiyasını müəyyənləşdirdi. Bu strategiyaya uygun olaraq ölkəmizdə son 15 il ərzində həyata keçirilən quruculuq işləri Prezident İlham Əliyevin siyasətinin təntənəsidir. Bu mənada Prezident İlham Əliyev quruculuq baxımından Azərbaycan tarixinin ən böyük liderlərindən biridir, birincisidir”.

Baş nazirin müavini söyləyib ki, quruculuq məfkurəsi yaşadığımız dövrün vacib xarakteristikasını özündə ehtiva edir. Onun sözlərinə görə, bu konfrans YAP tərəfindən Prezident İlham Əliyevin fəaliyyətinə həsr olunmuş sayca 15-ci konfransdır. Konfransın ölkə Prezidenti, Yeni Azərbaycan Partiyasının Sədri İlham Əliyevin doğum gününə təsadüf etdiyini deyən Əli Əhmədov bu münasibətlə dövlət başçısını təbrik edib, Ona möhkəm cansağlığı və Azərbaycanın inkişafı yolunda daha böyük nailiyyətlər arzulayıb.

Daha sonra tədbirdə iqtisadiyyat naziri Şahin Mustafayev çıxış edib. Ş.Mustafayev bildirib ki, Azərbaycan tarixində əbədiyaşarlıq qazanmış, Vətənimiz və xalqımız qarşısında misilsiz xidmətləri ilə siyasi zirvə - Ümummilli lider səviyyəsinə yüksəlmiş dahi şəxsiyyət Heydər Əliyevin ölkəmizə rəhbərlik etdiyi bütün dövrlər birmənalı olaraq möhtəşəm quruculuq, Azərbaycanın sürətli inkişaf və hərtərəfli tərəqqi mərhələsi kimi səciyyələnir.

Nazir qeyd edib ki, Ulu öndərin uzaqgörən dünyəvi dövlət quruculuğu və milli inkişaf konsepsiyasının Prezidentimiz cənab İlham Əliyev tərəfindən uğurla və qlobal çağırışlara uyğun davam etdirilməsi nəticəsində Azərbaycanın dövlət müstəqilliyi daha da möhkəmləndi, suverenliyimiz əbədi və dönməz xarakter aldı. Prezident İlham Əliyevin sosial-iqtisadi konsepsiyası, düşünülmüş və uzaqgörən strategiyası Azərbaycanın sürətli inkişafını təmin edən ən mühüm faktorlardır. “Təsadüfi deyil ki, 2003-cü ildə Azərbaycanı qüdrətli dövlətə çevirəcəyini bəyan edən Prezident İlham Əliyevin apardığı siyasət nəticəsində ölkəmiz regionun siyasi-iqtisadi və mədəni mərkəzi, qlobal enerji və nəqliyyat layihələrinin təşəbbüskarı və fəal iştirakçısı, dünya miqyasında mühüm enerji təminatçılarından biri, mötəbər beynəlxalq tədbirlər məkanı kimi tanınmış, kosmos dövlətləri ailəsinə qoşulmuş, 2011-ci ildə 155 ölkənin dəstəyini qazanaraq BMT-nin Təhlükəsizlik Şurasının qeyri-daimi üzvü seçilmişdir. Yüksək inkişaf tempi və möhkəm dayanıqlılıq nümayiş etdirən Azərbaycanda 2004-2017-ci illərdə ÜDM real ifadədə 3,2 dəfə, o cümlədən qeyri-neft ÜDM 2,8 dəfə, sənaye istehsalı 2,6 dəfə, qeyri-neft sənayesi 2,2 dəfə, əsas kapitala yönəldilmiş vəsaitlər 3 dəfə, dövlət büdcəsinin gəlirləri 13,5 dəfə artıb. Ölkənin strateji valyuta ehtiyatları 28 dəfə artaraq 45 milyard ABŞ dollarını ötüb. Regionun, eləcə də Avropanın enerji təhlükəsizliyində mühüm rol oynayan Bakı-Tbilisi-Ceyhan və Bakı-Tbilisi-Ərzurum neft-qaz kəmərləri vasitəsilə hazırda Xəzər dənizinin enerji resursları region ölkələrinə və Avropaya nəql edilir. Bu il rəsmi açılışı həyata keçirilmiş Cənub Qaz Dəhlizi və TANAP layihələri, eləcə də tikintisi uğurla davam edən TAP layihəsi Azərbaycanın dünyada mühüm enerji təminatçısı kimi mövqeyini daha da möhkəmləndirəcəkdir”, - deyə nazir vurğulayıb.

Ş.Mustafayevin sözlərinə görə, Azərbaycanın tranzit potensialının reallaşdırılması Prezident İlham Əliyevin iqtisadi diversifikasiya siyasətində mühüm yer tutur: “Son 15 ildə irimiqyaslı nəqliyyat infrastrukturu layihələri həyata keçirilmiş, bu sahəyə böyük həcmli dövlət investisiyaları yönəldilmişdir. Bakı-Tbilisi-Qars dəmir yolu, Bakı Beynəlxalq Dəniz Limanı, müasir texnologiyalara əsaslanan Gəmiqayırma Zavodu istifadəyə verilmiş, TRASECA, Şimal-Cənub və Şərq-Qərb dəhlizlərinin inkişafı istiqamətində əhəmiyyətli işlər görülmüşdür. Avtomobil yollarının və dəmir yolu xətlərinin, xüsusilə Gürcüstan, Rusiya və İran istiqamətində ölkə ərazisindən keçən magistral yolların beynəlxalq standartlar əsasında yenidən qurulması, Bakıda və regionlarda beynəlxalq hava limanlarının tikintisi Azərbaycanın nəqliyyat infrastrukturunun inkişafında önəmli rol oynamaqla yanaşı, tranzit potensialını daha da gücləndirir.

Prezident İlham Əliyevin təşəbbüsü və prinsipial mövqeyi sayəsində tikilən, əhəmiyyətinə görə “Dəmir İpək yolu” adlandırılan Bakı-Tbilisi-Qars dəmir yolunun istifadəyə verilməsi ölkəmizin nəqliyyat-tranzit imkanlarını önəmli dərəcədə artırmışdır. Qeyd edim ki, 2018-ci ildə “Şimal-Cənub Beynəlxalq nəqliyyat dəhlizi” ilə əvvəlki illə müqayisədə 100 dəfədən çox yük daşınmışdır”.

Nazir deyib ki, qloballaşan dünyanın çağırışlarına uyğun olaraq, son illərdə ölkədə sənayeləşmə templəri yüksəlmiş, sənayenin regional strukturunun təkmilləşdirilməsi əsas prioritetlərdən birinə çevrilmiş, yüzlərlə müasir və yeni sənaye müəssisəsi, istehsal sahəsi yaradılmış, tələbatın ödənilməsində yerli məhsulların payı əhəmiyyətli dərəcədə artmış, ixracın həcmi yüksəlmiş, bu ilin yanvar-noyabr aylarında qeyri-neft məhsulları ixracında sənayenin payı 52% təşkil etmişdir. Onun sözlərinə görə, alternativ və bərpa olunan enerji sahəsində bir sıra müəssisələr fəaliyyətə başlamış, yeni perspektivli layihələr həyata keçirilməkdədir.

Nazir deyib ki, bölgələrin inkişafında Azərbaycan Respublikasının Prezidenti cənab İlham Əliyev tərəfindən təsdiq edilmiş regionların sosial-iqtisadi inkişafı ilə bağlı Dövlət proqramlarının uğurlu icrası müstəsna əhəmiyyət kəsb edir: “2004-cü ildən başlayan bu proqramların icrası şəhər və rayonların simasını köklü şəkildə dəyişmiş, regionların potensialının artmasına, infrastruktur təminatının, kommunal xidmətlərin keyfiyyətinin, biznes və investisiya mühitinin davamlı olaraq yaxşılaşmasına və əhalinin rifahının yüksəlməsinə geniş imkanlar açır. İndiyədək regionların inkişafına dair 3 Dövlət proqramı qəbul olunmuş və onlardan ikisi artıq uğurla icra edilmişdir. Dövlət proqramları çərçivəsində regionların inkişafına 70 milyard manatdan çox vəsait yönəldilmişdir. Həyata keçirilən məqsədyönlü sosial-iqtisadi siyasət nəticəsində son 15 ildə ölkəmizdə yaradılmış 2 milyona yaxın iş yerinin 75 faizi regionların payına düşür. Hazırda “Azərbaycan Respublikası regionlarının 2014-2018-ci illərdə sosial-iqtisadi inkişafı üzrə Dövlət Proqramı”nın icrası başa çatdırılır və dövlət başçısının tapşırığına əsasən, 2019-2023-cü illəri əhatə edən IV Dövlət Proqramının layihəsinin hazırlanması işləri yekunlaşmaq üzrədir. Azərbaycanda qeyri-neft sektorunun innovativ və yüksək texnologiyalara əsaslanan inkişafını təmin etmək, əhalinin istehsal sahəsində məşğulluğunu artırmaq, regionların sənaye potensialından daha səmərəli istifadə məqsədilə sənaye parkları və məhəllələri yaradılır. Artıq sənaye parklarının və məhəllələrinin 70-dən çox rezidenti tərəfindən 5 milyard manatdan çox investisiya yatırılmışdır.

Regionlarda kiçik və orta sahibkarlığın genişləndirilməsində əhəmiyyətli olan sənaye məhəllələrinin yaradılması davam etdirilir. Artıq Neftçala və Masallı sənaye məhəllələri fəaliyyət göstərir, Hacıqabul və Sabirabad sənaye məhəllələri isə gələn il sahibkarların istifadəsinə veriləcək”.

Nazirin sözlərinə görə, ölkəmizin inkişaf strategiyasında biznes və investisiya mühitinin davamlı olaraq yaxşılaşdırılması, sahibkarlığın inkişafı prioritet istiqamətlərdəndir: “Azərbaycan Respublikası Prezidentinin “Ölkəmizin inkişafı sahibkarlığın inkişafından asılıdır” strateji kursuna uyğun olaraq, bu istiqamətdə sistemli və ardıcıl tədbirlər həyata keçirilir, qanunvericilik bazası təkmilləşdirilir, inzibati prosedurlar sadələşdirilir, vergi yükü azaldılır, sahibkarlığa dövlət dəstəyinin sferası və coğrafiyası genişləndirilir.

Dövlət başçısının müasir dövrün qlobal çağırışlarının nəzərə alındığı iqtisadi islahatlar paketinə uyğun olaraq, sahibkarlıq sahəsində yoxlamalar 2021-ci ilədək dayandırılmış, lisenziyalaşdırılan fəaliyyət növlərinin sayı 59-dan 37-yə, icazələrin sayı təqribən 4 dəfə azaldılaraq 86-ya endirilmiş, lisenziyanın verilməsinə görə dövlət rüsumları 2 dəfə, regionlar üzrə 4 dəfə azaldılmış, lisenziyanın verilməsi prosedurları sadələşdirilmiş, “Lisenziyalar və icazələr” portalı yaradılmış və hazırda 24 fəaliyyət növü üzrə elektron lisenziyaların verilməsi həyata keçirilir”.

Konfransda çıxış edən Bakı Şəhər İcra Hakimiyyətinin başçısı Eldar Əzizov bildirib ki, son 15 il ərzində Bakıda çox böyük quruculuq işləri həyata keçirilib, paytaxtın siması tamamilə dəyişib, Bakı gözəl memarlıq üslubunda tikilən bir şəhərə çevrilib. İcra Hakimiyyətinin başçısı bildirib ki, Prezident İlham Əliyevin təşəbbüsü ilə həyata keçirilən layihələrdə Bakının daim böyük yeri olub: “Görülən işlər nəticəsində Bakı dünyanın ən böyük şəhərlərindən, investorlar üçün ən cəlbedici məkanlardan birinə çevrilib, son bir ildə şəhərə 12 milyard manat investisiya qoyulub. 2005-ci ildən indiyədək Bakıda sənaye istehsalı 4 dəfə artıb”.

E.Əzizov söyləyib ki, Prezident İlham Əliyevin rəhbərliyi ilə həyata keçirilən işlər nəticəsində Bakıda sahibkarlıq inkişaf edir: “Bakı keçmiş sovet məkanında 5 ulduzlu hotellərin sayına görə ilk yerlərdə qərarlaşıb. Təkcə bu il Bakını 2 milyondan artıq turist ziyarət edib və proqnozlara görə bu rəqəm artacaq”.

İcra Hakimiyyətinin başçısı deyib ki, 15 ildə Bakıda intensiv tikinti işləri aparılıb və bu gün də tikinti ilə bağlı müraciətlərin sayı artmaqdadır: “Bu, Bakının inkişafından xəbər verir. Beynəlxalq agentliklərin reytinqinə görə turistlər üçün Bakı memarlıq abidələri ilə yadda qalan 5 şəhərdən biri hesab edilir”.

O vurğulayıb ki, bu gün Bakıda salınan parklar böyük əraziləri əhatə edir, meqaparklar yaradılır: “Paytaxtımız dünyanın mədəniyyət mərkəzlərindən birinə çevrilib. Bakının tarixində heç zaman belə yüksək inkişaf olmayıb. Bütün bunların əsasında İlham Əliyev fenomeni dayanır. Ölkəmiz və paytaxtı Prezident İlham Əliyevin rəhbərliyi ilə bundan sonra da böyük nailiyyətlər əldə edəcək”.

E.Əzizovun sözlərinə görə, Bakının yeni Baş Planı hazırlanır, şəhərdə sıxlığın azaldılması üçün müvafiq tədbirlərin görülməsi, sənaye müəssisələrinin paytaxtdan kənara çıxarılması nəzərdə tutulur.

Nardar BAYRAMLI

Nurlan QƏLƏNDƏRLİ

Yeni Azərbaycan.- 2018.- 25 dekabr.- S.5.