Qarabağ problemi Azərbaycan dövlətinin və xalqının ümummili məsələsidir

Siyasi mənfəətlərini güdərək, spekulyasiya edənlər bu reallığı dərk etməlidirlər

Dağlıq Qarabağ münaqişəsinin nizamlanması və bu istiqamətdə danışıqların aparılması, ümumiyyətlə, Ermənistanın işğalçılıq siyasətinə qarşı qətiyyətli mövqenin ortaya qoyulması bilavasitə Azərbaycan dövlətinin yeritdiyi siyasətin prioritet istiqamətidir. Məhz həmin faktoru nəzərə alaraq, belə nəticəyə gəlmək olar ki, eyni zamanda ümummilli məsələ olduğuna görə, siyasi baxışlarından asılı olmayaraq, istənilən təşkilat dövlətin apardığı siyasətə yaxından dəstək olmalıdır.

Lakin təəssüflər olsun ki, Qarabağ probleminin ətrafında bəzi siyasi dairələr və onların rəhbərləri açıq-aşkar spekulyasiyalara yol verərək, şəxsi maraqları baxışından istifadə etməyə cəhdlər göstərirlər. Ümumiyyətlə, Azərbaycan dövlətinin və xalqının bir nömrəli problemi olan bu kimi həssas məsələdə sözdə müxalifətyönlü qüvvələrin ətraflarında süni ajiotajlar yaratmaq səyləri heç bir məntiqə sığmır. Buna misal kimi, hələ ötən həftə “Məhsul” stadionunda uzağı 1500 nəfərin toplaşdığı bir aksiyanı və orada edilən çıxışları göstərmək olar. Eyni zamanda, sosial şəbəkədə aksiyaya az insanın toplaşdığını etiraf edənlərin də fikirləri bu cür deməyə əsas verir ki, Ermənistanın işğalçılıq siyasətinə qarşı belə bir mitinqin təşkili sadəcə, düşmən dəyirmanına su tökməkdən başqa bir şey deyil. Daha dəqiq desək, bənzər manipulyasiyalar işğalçıların Azərbaycanın ədalətli və haqlı mövqeyinə qarşı necə deyərlər, “aqrument” qoymalarına şərait yaradır.

Siyavuş Novruzov: “Stadionda keçirilən bir mitinqlə Dağlıq Qarabağ problemi ilə bağlı münasibət formalaşdırmaq olmaz”

Başqa tərəfdən, onu da qeyd edə bilərik ki, əgər Qarabağa azadlıq şüarı ilə Azərbaycan dövləti ümumxalq mitinqi keçirmək qərarını verərsə, həmin mitinqə yüz minlərlə insanın toplaşacağını indinə proqnozlaşdırmaq olar. Çünki bu problemin bilavasitə həlli yönündə məhz Azərbaycan dövləti dayanır!

Bu arada, Yeni Azərbaycan Partiyasının İcra katibinin müavini, millət vəkili Siyavuş Novruzovun fikirləri də kifayət qədər maraqlı və məntiqlidir. Belə ki, YAP rəsmisinin bildirdiyinə görə, Dağlıq Qarabağ münaqişəsinin nizamlanması ilə bütövlükdə Azərbaycan iqtidarı, Azərbaycan xalqı məşğul olur. Belə ki, stadionda keçirilən bir mitinqlə Dağlıq Qarabağ problemi ilə bağlı münasibət formalaşdırmaq olmaz: “Bu gün Azərbaycan Prezidenti, Ali Baş Komandan İlham Əliyev Dağlıq Qarabağ münaqişəsinin həlli ilə bağlı zəruri addımları atır. Həm danışıqlarda, həm də ordunun gücləndirilməsində, yeni silahlarla təchiz olunmasında lazımi işlər görülür. Elə Bakıda keçirilən son iki hərbi parad buna daha bir nümunədir. O cümlədən qaçqın və məcburi köçkünlərin problemlərinin həlli, mənzil-məişət şəraitinin yaxşılaşdırılması, müharibə veteranlarına, şəhid ailələrinə diqqət və qayğı bilavasitə Dağlıq Qarabağ münaqişəsinə olan bir münasibətdir”.

“Son dövrlərdə bir qrup insanın Bakıda Dağlıq Qarabağ adı altında müxtəlif kütləvi aksiyalar keçirməsinin Qarabağla heç bir bağlılığı yoxdur”, deyə qeyd edən Siyavuş Novruzov digər bir mühüm amilə də diqqət çəkərək bildirib ki,

Azərbaycan Prezident İlham Əliyev Dağlıq Qarabağ münaqişəsi ilə bağlı bütün danışıqlarda bu məsələni əsas şərt kimi qoyur: “Azərbaycanın ərazi bütövlüyü əsas şərt kimi gündəmdədir. Azərbaycan cəmiyyəti də bu məsələdə Prezidenti dəstəkləyir”.

“Xalq Prezidenti seçib, Ona səlahiyyət verib ki, bu hüquq Prezidentə məxsusdur”

Söz yox ki, aparılan danışıqların nəticələri və bu istiqamətdə görülən işlərin hər biri ətrafında dövlət başçımız xalqa məlumat verir və bu reallığın əsas tərəfi də budur ki, Azərbaycan

Prezidenti yalnız öz xalqına hesabat verərək, Qarabağ ətrafında aparılan danışıqların mahiyyətini anladır: “Xalq Prezidenti seçib, Ona səlahiyyət verib ki, bu hüquq Prezidentə məxsusdur. İndi 1990-cı ilin təfəkküründə olan insanlar deyirlər mitinq keçirilməlidir ki, xarici təşkilatlar Prezidentə təzyiq edildiyini görsünlər. Belə çıxır ki, Azərbaycan Prezidenti hansısa güzəştə getməyə razıdır və ictimai təzyiqin nəticəsində güzəştlərə getmir. Bu nə düşüncədir, bu nə təfəkkürün məhsuludur? Prezident tərəfindən ən kəskin mövqe bildirib”.

Müxalifətçi fərdlərin iddialarından biri də budur ki, onlar xalq arasında çaşqınlıq, anlaşılmazlıq salmağa cəhdlər göstərərək, əslində Qarabağım azadlığı uğrunda deyil, kimlərinsə maraqlarına xidmət etmələri istiqamətində böyük səhvlərə yol verirər. Əgər onlar hər hansı bir təzyiqdən danışırlarsa, demək ki, onlar sifarişlər həyata keçirirlər. Çünki Azərbaycan dövləti artıq o qədər güclənib və qüdrətli ölkəyə çevrilib ki, ona qarşı təzyiq etmək istəyənlər belə, bu addımlarının nə qədər səhv olduğunu anlayırlar. Təkcə, son dövrlərdə Azərbaycanın beynəlxalq siyasi arenada artan nüfuzuna diqqət yetirərsək, ölkəmizin siyasi-iqtisadi və hərbi potensialının yüksəldiyini də nəzərə alarsaq, bu zaman müxalifətçilərin iddialarının nə qədər cılız olduğunu bir daha görmüş olarıq.

“Burada hansı təzyiqdən söhbət gedə bilər, Qarabağ Azərbaycanındır. Azərbaycan həm danışıqlarda, həm də ordunun gücləndirilməsində və digər məsələlərdə buna hazırlığını sübut edib”

Siyavuş Novruzov bununla bağlı bildirib ki, Azərbaycan xalqının verdiyi səlahiyyətə uyğun olaraq bu proseslər davam etdirilir: “Burada hansı təzyiqdən söhbət gedə bilər, Qarabağ Azərbaycanındır. Azərbaycan həm danışıqlarda, həm də ordunun gücləndirilməsində və digər məsələlərdə buna hazırlığını sübut edib”.

Yeri gəlmişkən, onu da xatırlatmaq yerinə düşərdi ki, bu gün özlərini “siyasi mühacir” adlandırıb, guya Azərbaycan uğrunda “mübarizə” apardıqlarını iddia edənlərin hər biri reallıqda erməni aşnalarına nökərçilik edənlər zümrəsinin təmsilçiləridirlər. Guya Qarabağ dərdinə “yandıqlarını” reklam etdirən belələrinin hər birinin yastığının altından çox yəqin ki, erməni pulları çıxır.

YAP rəsmisi də bu məsələ ətrafında çıxış edərək bildirib ki, Avropada oturub-çağırış edənlərə Azərbaycanda dəstək verilməsi düzgün deyil: “Birinci Qarabağ müharibəsində hər bir azərbaycanlı necə döyüşüb, mübarizə aparıbsa, bundan sonra da belə olacaq. Burada “mənim və sənin” məsələsi ola bilməz. Aksiyaya qoşulmayanları qınağa məruz qoymaq nəyə xidmət edir? Dağlıq Qarabağ münaqişəsi hər hansı futbol meydaçasında həll ediləcək məsələ deyil”.

Beləliklə, buradan da tam olaraq aydın görünür ki, Azərbaycan dövlətinin və xalqının ümummilli məsələsi olan Qarabağ problemi ətrafında oyunbazlıqlar edənlər bir reallığı dərk etməlidirlər ki, onların siyasi təlxəklikləri burada kimsəyə lazım deyil. Uzağı erməni lobbisi və bu lobbiyə dəstək göstərən bir sıra xarici təşkilatlardan savayı...

Rövşən RƏSULOV

Səs.- 2018.- 6 oktyabr.- S.6.