Diasporla İş üzrə Dövlət Komitəsində tatarıstanlı qonaqlarla görüş keçirilib

Azərbaycan Respublikası Diasporla İş üzrə Dövlət Komitəsində Tatarıstan Xalqlar Dostluğu Evinin direktoru, Tatarıstan Respublikası Dövlət Şurasının deputatı İrek Şaripov ilə görüş keçirilib. Komitədən verilən məlumata görə, görüşdə Tatarıstandakı Azərbaycan diaspor təşkilatlarının, eləcə də Azərbaycandakı tatar icmasının fəaliyyəti və bir sıra qarşılıqlı maraq doğuran məsələlər müzakirə olunub. Görüşdə komitə sədri Fuad Muradov qurumun fəaliyyəti barədə qonaqlara ətraflı məlumat verərək bildirib ki, Rusiya Federasiyasında yaşayan soydaşlarımızla və diaspor təşkilatları ilə birgə iş komitənin diqqət mərkəzindədir. Komitə sədri soydaşlarımızın milli kimliyini qoruyaraq yerli cəmiyyətə inteqrasiyasının qarşıda duran əsas vəzifələrdən biri olduğunu vurğulayıb.

Daha sonra görüşdə İrek Şaripov Tatarıstandakı Azərbaycan diasporunun uğurlu fəaliyyəti, icma üzvlərinin respublikanın ictimai-siyasi və mədəni həyatındakı iştirakı, o cümlədən qarşılıqlı əlaqələrin inkişafına verdiyi töhfələr haqqında geniş söhbət açıb. O qeyd edib ki, Azərbaycan diasporunun təşəbbüsü ilə görkəmli ictimai-siyasi xadim, böyük ədib Nəriman Nərimanovun adı Kazan şəhərinin küçələrindən birinə verilib və büstü qoyulub. Bundan başqa, dünya şöhrətli alim Kazan universitetinin ordinar professoru Mirzə Kazımbəyin xatirəsi əbədiləşdirilib.

Eyni zamanda, türkdilli xalqların diasporlarının əməkdaşlığı çərçivəsində Azərbaycan-Tatarıstan əlaqələrinin genişləndirilməsinin zəruriliyi vurğulanıb.

Sonda xatirə hədiyyələri təqdim olunub.

MÜŞFİQƏ

Yeni Azərbaycan.- 2018.- 24 oktyabr.- S.-7.