Ölkəmizdə pambıqçılığın inkişafı ilə əlaqədər davamlı tədbirlər həyata keçirilir

Pambığın hər tonunun alış qiymətinin 50 manat artırılması dövlət başçısının fermerlərə göstərdiyi diqqət və qayğının növbəti təzahürüdür

Ölkəmizdə aqrar sektorun inkişafı istiqamətində aparılan uğurlu siyasət öz bəhrəsini verməkdədir. Belə ki, kənd təsərrüfatında innovativ metodların, qabaqcıl təcrübənin tətbiqi, ixracyönümlü məhsul istehsalının təşviq edilməsi, azad sahibkarlığın hərtərəfli şəkildə dəstəklənməsi, fermerlərə subsidiyalar, güzəştli kreditlər verilməsi, texnika və gübrələrlə təminatın gücləndirilməsi, bölgələrdə dövlət vəsaiti hesabına müasir infrastrukturun yaradılması, həmçinin regionların sosial-iqtisadi inkişafına dair müvafiq Dövlət proqramları çərçivəsində məqsədyönlü tədbirlərin həyata keçirilməsi son nəticədə respublikamızda aqrar sektorun keyfiyyətcə yeni inkişaf mərhələsinə çıxmasını təmin edib. Respublikamızdan ənənəvi bazarlara və Körfəz ölkələrinə yüksək rəqabət qabiliyyətinə malik meyvə-tərəvəz ixracının artması, eləcə də ölkədə bir sıra istiqamətlər üzrə ərzaq məhsullarına olan tələbatın sırf daxili istehsal hesabına təmin edilməsi bunu bir daha təsdiqləyir.

Son illərdə bütün ölkə üzrə aqrar sektorun inkişafından söhbət açarkən pambıqçılıq sahəsində əldə olunan uğurları da xüsusi qeyd edə bilərik. Azərbaycanın bir sıra bölgələri üçün ənənəvi təsərrüfatçılıq sahələrindən olan pambıqçılıqda torpaq mülkiyyətçilərinin gəlir imkanları kifayət qədər böyükdür. Bu məhsulun satışı ilə bağlı hər hansı bir problem yoxdur. Dünya bazarlarında pambıq birjalarda satılır və istehsalçı ölkələrə böyük həcmlərdə valyuta qazandırır. Azərbaycan da Prezident İlham Əliyevin təşəbbüsü ilə regionlarda pambıqçılıq sahəsində ənənələri dirçəltməklə yeni iqtisadi şəraitdə ölkədən qeyri-neft məhsullarının ixracının genişləndirilməsini hədəfləyib.

Məlum olduğu kimi, artıq sentyabrın əvvəlindən bölgələrdə kütləvi surətdə pambıq yığımına başlanıb. Qeyd edək ki, pambığın alış qiymətinin artırılması fermerlərdə bu sahəyə marağı daha da artırıb. Belə ki, Azərbaycan Prezidenti İlham Əliyevin tapşırıq və tövsiyəsinə əsasən pambıq istehsalı ilə məşğul olan fermerlərin məhsul istehsalına həvəsləndirilməsi, onların maddi rifahının daha da yaxşılaşdırılması məqsədi ilə Kənd Təsərrüfatı Nazirliyinin, İqtisadiyyat Nazirliyinin məsul işçilərinin iştirakı ilə pambıq istehsalı və emalı ilə məşğul olan şirkət rəhbərləri ilə görüş keçirilib. Görüşdə cari ildə görülən işlər, pambıq yığımının gedişi, tədarükü və emalı vəziyyəti, eləcə də qarşıya qoyulan hədəflərə nail olunması üçün həyata keçirilməsi vacib olan məsələlər müzakirə edilib.

Pambıq əkən fermerlərin məhsul istehsalına, yığımına həvəsləndirilməsi və onların maddi rifahının daha da yüksəldilməsi məqsədilə pambığın növlər üzrə mövcud alış qiymətləri hər tona 50 manat olmaqla, 2018-ci ilin məhsulu üçün 1-ci növün 600-dən 650 manata, 2-ci növün 580-dən 630 manata, 3-cü növün 540-dan 590 manata, 4-cü növün 500-dən 550 manatadək artırılması barədə razılıq əldə edilib.

“Pambığın hər tonunun alış qiymətinin 50 manat artırılması nəticəsində fermerlər əlavə olaraq, ümumilikdə, 12-13 milyon manat qazanc əldə edəcəklər. Bu, dövlətimizin başçısının fermerlərə göstərdiyi diqqət və qayğının növbəti təzahürüdür”. Bunu məsələyə münasibət bildirən Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsinin müdiri Anar Hüseynov deyib. Anar Hüseynov ölkə üzrə 260 min ton məhsul yığımının nəzərdə tutulduğunu deyib. Bildirib ki, pambıq əkini daha çox Sabirabad, Saatlı, Biləsuvar, Ağcabədi, Bərdə və Beyləqan rayonlarında həyata keçirilib. Respublika üzrə pambıq əkininin 60 faizi məhz bu rayonların payına düşür.

2015-2018-ci illərdə respublikaya “Aqrolizinq” ASC-nin xətti ilə 353 ədəd pambıqyığan maşının gətirildiyini vurğulayan şöbə müdiri yaxın günlərdə daha 50 ədəd kombaynın da gətirilməsinin nəzərdə tutulduğunu deyib: “Hazırda bir neçə rayonda əllə pambıq yığımına başlanılıb. Bu ayın sonlarında isə yığım prosesinə kombaynlar da qoşulacaq. Mövcud olan 353 kombayndan 221-i artıq pambıq istehsalı və emalı ilə məşğul olan şirkətlərə lizinqə verilib. Onlardan 98-i “Aqrolizinq” ASC-nin regional servislərində xidmət göstərəcək”.

Pambığın hər tonu üçün alış qiymətinin 50 manat artırılması Biləsuvarda da pambıqçılıqla məşğul olan fermerlər arasında yüksək əhval-ruhiyyə yaradıb, onların bu sahəyə marağını daha da artırıb. Rayon Dövlət Aqrar İnkişaf Mərkəzindən bildiriblər ki, bu il Biləsuvarda 12 min hektarda pambıq əkilib. Əkinçilər bitkiyə aqrotexniki qaydada qulluq göstərdiyindən sahələrdə bol məhsul yetişib. Bir neçə gündür ki, pambıqçılar yetişdirdikləri məhsulun tədarükünə başlayıblar. Qısa müddətdə 126 ton 176 kiloqram məhsul toplanaraq tədarük məntəqələrinə göndərilib. Təcrübəli pambıqçı, birinci dərəcəli əmək ordenli Fazil Musayev uzun illərdir bu sahədə çalışır və yüksək məhsuldarlığa nail olur. O deyib: “Ötən il becərdiyim 16 hektar pambıq sahəsindən 81 ton məhsul götürərək, hər hektarın məhsuldarlığını 51 sentnerə çatdırmışam. Satdığım məhsulun müqabilində 5 min manata yaxın qazanc götürmüşəm. Bu il isə 48 hektarda əkin aparmışam. Bitkiyə nümunəvi qulluq göstərildiyindən məhsul boldur. Məhsul yığımını maşınla aparacağam. Ona görə hələlik yığıma başlamamışam. Sahədə 90-95 faiz açılış olduqdan sonra məhsul toplanacaq. Bu il hər hektardan 50-55 sentner məhsul götürməyi planlaşdırıram”.

“Məhsulun hər tonunun alış qiymətinin 50 manat artırılması digər istehsalçılar kimi məni də çox sevindirir. Dövlət tərəfindən biz pambıqçılara göstərilən hərtərəfli qayğıdan yararlanaraq, növbəti illərdə əkin sahəsini daha da genişləndirəcəyəm”, - deyə fermer bildirib.

Pambığın alış qiymətinin hər tonuna görə 50 manat artırılması fermerləri daha çox məhsul istehsal etməyə həvəsləndirib. Uzun illərdir kənd təsərrüfatı sahəsində çalışan Ağdam rayon Kolqışlaq kənd sakini İslam Qasımov KİV-ə açıqlamasında pambıqçılığın gəlirli sahə olduğunu bildirib. O deyib: “Pambıq kənd təsərrüfatının elə sahəsidir ki, həm dövlət üçün əhəmiyyətlidir, həm də fermerlər üçün xeyirlidir. Düzgün aqrotexniki qulluq göstərildikdə yaxşı gəlir götürmək mümkündür. Digər tərəfdən pambığın becərilməsi dövründə bütün xərclərin müqavilə bağlanmış şirkət tərəfindən ödənilməsi, fermerlərin texnika, toxum, gübrə və dərmanlarla təmin edilməsi çox əlverişlidir. Mən də bu imkandan istifadə edərək, ötən il 4 hektarda pambıq becərib, hər hektardan orta hesabla 47 sentner məhsul götürdüm. 5400 manat qazanc əldə etdim. Bu il də 4 hektarda pambıq becərmişik. Düzgün aqrotexniki qulluq sayəsində tarlalarda bol məhsul yetişib. Hər hektardan 45 sentnerdən yuxarı məhsul gözləyirik. Pambığın alış qiymətinin 50 manat qaldırılması mənə min manata yaxın əlavə qazanc gətirəcək”.

Pambığın alış qiymətinin artırılmasını dövlət başçısının fermerlərə göstərdiyi diqqət və qayğının növbəti təzahürü kimi qiymətləndirən İslam Qasımov növbəti ildə əkin sahəsini daha da genişləndirəcəyini və daha çox məhsul istehsal etməyə çalışacağını bildirib.

Xatırladaq ki, ölkəmizdə bu il 136 min hektarda becərilmiş pambığın yığımına başlanılıb. Tarlaların 70 faizi maşınlar vasitəsilə yığılacaq. Bütün rayonlarda pambıqyığan kombaynlar, həmçinin traktor və qoşqular hazır vəziyyətə gətirilib, ehtiyat hissələri, yuyucu və yağlayıcı maddələrlə təmin olunub. Kombaynları idarə etmək üçün mexanizatorlara təlimlər keçilərək sertifikatlar verilib. “Aqrolizinq” ASC-nin şöbə müdiri İsrafil İsmayılov qeyd edib ki, pambığı daşımaq üçün “Aqrolizinq” ASC-də kifayət qədər traktor və qoşqu hazırlanıb. Gəncə Avtomobil Zavodu tərəfindən yığılmış 400-ə yaxın traktor, həmçinin 700-ə yaxın qoşqu “Aqrolizinq” ASC-nin rayon bölmələrinin istifadəsinə verilib.

Ölkədə kənd təsərrüfatının bütün sahələrinin inkişaf etdirilməsi üçün kifayət qədər maddi-texniki baza yaradıldığını deyən İsrafil İsmayılov bildirib ki, “Aqrolizinq” ASC fəaliyyətdə olduğu 14 il ərzində ölkəyə 43 mindən çox kənd təsərrüfatı texnikası gətirilərək, lizinq yolu ilə vətəndaşlara, təşkilatlara verilib. Ötən il isə ölkəyə 12 mindən çox kənd təsərrüfatı texnikası gətirilib ki, bunun da 65 faizə qədəri pambıqçılıqda istifadə olunan texnikalardır. “Bu il dövlət büdcəsi tərəfindən ayrılmış 160 milyon manat vəsaitlə ölkəyə 6 mindən çox kənd təsərrüfatı texnikası gətirilib”, - deyə şöbə müdiri əlavə edib.

Yeri gəlmişkən, qeyd edək ki, Beyləqanda pambıq yığımı mövsümünün başlanması ilə əlaqədar bu günlərdə keçirilən müşavirədə görüləcək işlər, məhsulun vaxtında və itkisiz yığılması üçün qarşıda duran vəzifələr müzakirə olunub. Rayonun hüquq-mühafizə orqanlarının, idarə, müəssisə və təşkilat rəhbərlərinin, pambıq istehsalçılarının, fermerlərin, kənd inzibati ərazi nümayəndələri və bələdiyyə sədrlərinin iştirak etdiyi toplantıda rayonda pambıq əkinlərinin ildən-ilə genişləndirildiyi bildirilib. Qeyd olunub ki, əgər rayon ərazisində 2016-cı ildə 4035 hektarda pambıq əkilmişdisə, 2017-ci ildə bu rəqəm 8550 hektara, 2018-ci ildə isə 9560 hektara çatdırılıb. Bol məhsul əldə etmək üçün əkin sahələrində aqrotexniki becərilmə qaydalarına ardıcıl və düzgün əməl olunub, cərgələrarası becərmələr, alaq otlarına və zərərvericilərə qarşı kimyəvi mübarizə tədbirləri vaxtında aparılıb, bitkilər tələbata uyğun optimal müddətdə mineral gübrə və suvarma suyu ilə təmin edilib. Nəticədə yaxşı çıxış alınıb, barlı kollar yetişib. Məhsulun maşınla yığılması nəzərdə tutulan sahələrdə pambığın yarpaqlarının kimyəvi yolla tökdürülməsi üçün defoliasiya işləri görülüb. Artıq rayonda pambıq yığımına başlanılıb. Cari ildə tarlalardan 20 min ton pambıq yığılması proqnozlaşdırılır.

Yığıncaqda pambıqçılıq təsərrüfatlarının rəhbərləri və fermerlərin təklifləri dinlənilib, pambığın vaxtında və itkisiz yığılması, bu sahədə qarşıya çıxan çətinliklərin aradan qaldırılması, o cümlədən emal və tədarük məntəqələrinin fasiləsiz elektrik enerjisi ilə təminatının nəzarətdə saxlanılması, pambıqyığan kombaynların, daşıyıcı traktorların, habelə pambıq yığımına fəhlə aparan müxtəlif təyinatlı maşınların maneəsiz hərəkətinin təmin olunması, yanğından mühafizə sahəsində qəza hallarının baş verməməsi üçün müvafiq orqanların rəhbərlərinə göstərişlər verilib.

Kürdəmir rayonunun pambıqçıları isə qısa vaxtda tarlalardan 530 tona yaxın məhsul toplayıblar və yığılan “ağ qızıl”ın 528 tondan çoxu qəbul məntəqələrinə təhvil verilib. Rayon İcra Hakimiyyətindən bildiriblər ki, bölgədə məhsul yığımı kampaniyası sürətlə davam edir. Hazırda hər gün tarlalara 1500 nəfərədək işçi qüvvəsi çıxır. Əksər ərazilərdə, o cümlədən bol məhsul yetişdirilən Mehdili, Qocalı, Muradxan, Şilyan, Böyük Kəngərli, Qarasaqqal, Karrar kənd, Ərəbqubalı və bir sıra digər ərazi vahidlərində məhsul yığımı daha sürətlə, mütəşəkkil davam etdirilir. Bu ərazilərdə hər hektardan orta məhsuldarlıq 25 sentnerdən çox gözlənilir. Qeyd edək ki, builki mövsümdə rayonda 5030 hektarda pambıq yetişdirilib. Sahələrin yarıdan çoxu maşınlarla yığılacaq. Bu məqsədlə 12 pambıqyığan kombayndan istifadə olunacaq.

Saatlı rayonunda da pambıq yığımı uğurla davam edir. Ötən il respublikanın pambıqçılıq rayonları arasında ən çox - 25,5 min ton “ağ qızıl” toplayan Saatlı rayonunun pambıqçıları cari ildə də qələbə əzmi ilə çalışırlar. Pambıqçılar bu günədək sahələrdən 1125 tondan çox pambıq toplayaraq qəbul məntəqələrinə göndəriblər. Gün ərzində sahələrdən 203-205 ton məhsul toplanılır. Rayon Statistika İdarəsindən bildiriblər ki, bu il rayonda 4 şirkətlə - “MKT İK” MMC, “AZƏRPAMBIQ” MMC, “AQRO-AZ” MMC və SAATLI “KƏND TƏSƏRRÜFATI” MMC ilə 2645 müqavilə bağlanaraq 15 min 815 hektar sahədə pambıq əkilib. Rayonda pambıq əkini üçün əlverişli şərait olduğundan və torpaq mülkiyyətçiləri tərəfindən bitkiyə aqrotexniki qaydada qulluq göstərildiyindən tarlalarda bol məhsul yetişib. “Bakı” Kəndli-Fermer Təsərrüfatının rəhbəri Xanım Babayeva bildirib ki, ölkə rəhbərinin aqrar sektorun inkişafına verdiyi hərtərəfli dəstək və pambığın alış qiymətinin artırılaraq 60 qəpiyə çatdırılması pambıq əkini ilə məşğul olan fermerlərin bu sahəyə olan marağını xeyli artırıb. Pambıqçılığın inkişafı ilə bağlı torpaq mülkiyyətçilərinə dövlət tərəfindən edilən güzəştlər, verilən əlavə subsidiyalar öz gözəl bəhrəsini verib. İndi sahələrdə ötən ildəkindən qat-qat çox məhsul var. “Becərdiyimiz 60 hektar sahədə də məhsul boldur. Kollarda olan qozaların sayı ilə apardığım təxmini hesablamalara görə, bu mövsüm hər hektardan 30 sentnerədək məhsul götürə biləcəyik”, - deyə fermer bildirib.

Bitkidəki qozaların tam açılmaması səbəbindən hələlik məhsul yığımı əl ilə aparılır. Yaxın günlərdə pambıqyığan kombaynlar sahələrə çıxarılacaq. Bunun üçün rayonda ciddi hazırlıq işləri görülüb, maşın-mexanizmlər hazır vəziyyətə gətirilib.

Qeyd edək ki, ötən il Saatlıda 17 min 100 hektar pambıq sahəsindən 25,5 min ton pambıq yığılıb.

Biləsuvarda da pambıq yığımı kütləvi surətdə davam edir. Rayon Dövlət Aqrar İnkişaf Mərkəzindən bildiriblər ki, bu il Biləsuvarda 12 min hektar pambıq əkilib. Ötən il isə bu rəqəm 11 min hektar idi. Mütəxəssislər builki hava şəraitini həm çiyidin vegetasiyası, həm becərmə, həm də yığım üçün əlverişli hesab edirlər. Digər tərəfdən də Biləsuvarda pambıq əkini üçün əlverişli şərait olduğundan və torpaq mülkiyyətçiləri tərəfindən bitkiyə aqrotexniki qaydada qulluq göstərildiyindən bu il tarlalarda bol məhsul yetişib. Artıq bir neçə gündür ki, fermerlər məhsul yığımına başlayıblar. Gün ərzində sahələrdən 20-25 ton məhsul yığılır.

Təcrübəli fermer Fazil Musayev bildirib ki, qeyri-neft sektorunun inkişafına dövlət səviyyəsində göstərilən dəstək nəticəsində rayonda kənd təsərrüfatının digər sahələri ilə yanaşı, pambıq əkininə də maraq ildən-ilə artır. Onun dediyinə görə, cari ildə hər hektardan orta hesabla 23 sentnerdən çox məhsul yığmaq mümkün olacaq. İndiyədək rayon üzrə 77 ton 600 kiloqram pambıq yığılaraq qəbul məntəqələrinə göndərilib. Bitkidəki qozaların 30 faizinin açılması səbəbindən hələlik məhsul yığımı əl ilə aparılır. Yaxın günlərdə isə sahələrə pambıqyığan maşınlar da çıxarılacaq. Bunun üçün ciddi hazırlıq işləri görülüb. 34 ədəd pambıqyığan kombayn və 200-ə yaxın maşın-mexanizm hazır vəziyyətə gətirilib.

Qeyd edək ki, bu il biləsuvarlı pambıqçılar sahələrdən 26 min ton pambıq yığmağı qarşılarına məqsəd qoyublar.

Ucarda isə cari mövsümdə 2000 hektarda “ağ qızıl” yetişdirilib və kütləvi məhsul yığımına başlanıb. Hazırda hər gün tarlalara 350 nəfərdən çox işçi qüvvəsi çıxır. Rayonun əksər ərazilərində, xüsusilə daha çox məhsul yetişdirilən Bərgüşad, Şahlıq, Xələc və bir sıra digər ərazi vahidlərində “ağ qızıl” yığımı daha mütəşəkkil davam etdirilir. Ümumiyyətlə, hər yerdə fermerlər ağır zəhmət bahasına yetişdirilən məhsulun itkisiz toplanması üçün bütün qüvvələri səfərbərliyə alıblar. Qeyd edək ki, cari mövsümdə rayonda hər hektardan orta hesabla azı 20 sentner “ağ qızıl” istehsal olunacağı gözlənilir.

Neftçalada isə bu il 3 şirkətlə, ümumilikdə, 979 mülkiyyətçi müqavilə bağlayıb. Bağlanmış müqavilələrə əsasən rayonda 7 min hektar sahədə pambıq əkilib. Fermer və torpaq mülkiyyətçiləri nümunəvi becərmə işləri apardıqlarından sahələrdə bol məhsul yetişib. Təcrübəli pambıqçı Təyyubə İbrahimova 25 hektarda pambıq becərib və bu günlərdə məhsul yığımına başlayıb. “Məhsulumuz boldur. İndi qarşıda duran əsas vəzifə pambığı qısa müddətdə toplayaraq təhvil verməkdir. Bunun üçün bütün qüvvəmizi səfərbər etmişik. Gün ərzində 180-200 kiloqram məhsul yığırıq”, - deyə pambıqçı bildirib.

Sahələrdə bol məhsulun yetişməsi məhsul istehsalçılarını çox sevindirir, çünki pambıq əkən fermerlər bu mövsüm məhsulun hər kiloqramını 60 qəpiyə sata biləcəklər. Eyni zamanda, əlavə olaraq 10 qəpik də subsidiya ödəniləcək.

Yığılmış məhsulu qəbul etmək üçün rayonda 4 pambıq qəbul məntəqəsi fəaliyyət göstərir. Məntəqələrdə məhsul qəbulunu fasiləsiz həyata keçirmək üçün bütün zəruri hazırlıq işləri görülüb. Artıq ilk məhsul məntəqələrə daxil olmaqdadır.

Pambıq sahələrinin məhsulunun 50 faizdən çoxunun pambıqyığan kombaynlarla toplanılması nəzərdə tutulub. Bunun üçün 15 pambıqyığan maşın hazır vəziyyətə gətirilərək fermerlərin ixtiyarına verilib.

Cəbhə bölgəsində yerləşən Tərtər rayonunda da pambıqçılıqla məşğul olan fermerlər və torpaq mülkiyyətçiləri məhsul yığımını uğurla davam etdirirlər. Ötən il hektarın orta məhsuldarlığına görə respublikanın pambıqçılıq rayonları arasında ön sırada dayanan tərtərli pambıqçılar bu ili də yüksək göstəricilərlə başa vurmağı qarşıya məqsəd qoyublar. Bu il rayon ərazisində 3300 hektarda pambıq becərilib. “MKT İstehsalat Kommersiya” MMC və “Azərpambıq” MMC ilə bağlanan müqaviləyə əsasən, pambıq istehsalçıları becərmə zamanı lazımi texnika, toxum, gübrə və kimyəvi preparatlarla tam təmin olunublar. Sahələrə göstərilən düzgün aqrotexniki tədbirlər - kultivasiya, seyrəltmə, gübrələmə, suvarma işlərinin, sofkaya, mənənəyə və digər zərərvericilərə qarşı dərmanlama tədbirlərinin vaxtlı-vaxtında həyata keçirilməsi nəticəsində bu il də tarlalarda bol məhsul yetişib.

Rayonda pambıq əl əməyindən istifadə edilməklə yığılmağa başlanıb. İlk olaraq rayonun Qaraağacı kəndi ərazisində yığılan pambıq “MKT İstehsalat Kommersiya” MMC-nin Tərtər filialına təhvil verilib. “MKT İstehsalat Kommersiya” MMC-nin Tərtər filialının direktoru Feruz Hacıyev tarlalarda məhsulun ötən ildəkindən də çox olduğunu bildirib: “Bu il 649 fermerlə 1667 hektar sahədə pambıq becərilməsi üçün müqavilə bağlanıb. Becərmə işləri bütün aqrotexniki qaydalara əsasən aparılıb. Tarlaların vəziyyəti qənaətbəxşdir. Barlı kollar yetişib. Ötən il hər hektardan orta hesabla 28,9 sentner məhsul götürmüşdük. Bu il isə məhsuldarlığın 31 sentnerdən çox olacağını gözləyirik. 8 ədəd pambıqyığan kombayn, 16 ədəd traktor, 40 ədəd qoşqu, 3 ədəd yükləyici hazır vəziyyətə gətirilib. Sentyabrın 9-dan tarlalarda defolyasiya işlərinə başlanılıb. İlk günlərdə fermerlər məhsul yığımını əl əməyi vasitəsilə həyata keçirirlər. Ayın 20-dən sonra isə pambıqyığan kombaynlar da sahələrə çıxarılıb”.

Pambıq qəbulu məntəqəsinə ilk məhsulu təhvil verən Qaraağacı kənd sakini Sabir Qədirov ötən il olduğu kimi bu il də yüksək məhsuldarlığa nail olduğunu bildirib: “Keçən il hər hektardan orta hesabla 45 sentner məhsul vermişdim. Bu il də 1,3 hektarda pambıq becərib, düzgün aqrotexniki xidmət sayəsində bol məhsul yetişdirmişik. Birinci üz yığımından 3470 kiloqram pambıq yığıb məntəqəyə təhvil verdik. Pambıq yığımı mövsümünün sonunadək hər hektarın məhsuldarlığının 50 sentnerə çatacağını gözləyirik. İnanıram ki, tarlalardan 130 tondan artıq pambıq götürəcəyik”.

Qeyd edək ki, 2017-ci ildə 3123 hektarda pambıq becərən Tərtər pambıqçıları tarlalardan 8419 ton məhsul tədarük ediblər. Bu, orta məhsuldarlığa görə ötən il respublika üzrə ən yüksək göstərici olub.

Nardar BAYRAMLI

Yeni Azərbaycan.-2018.- 26 sentyabr.- S.7.