Azərbaycanlı rəssamın əsərləri Türkiyədə sərgilənir

Türkiyənin İzmir şəhərində Azərbaycan-Türkiyə birgə rəsm sərgisi açılıb. Konak bələdiyyəsi tərəfindən Türkan Saylan Mədəniyyət Mərkəzinin Sənət Qalereyasında təşkil olunan tədbirdə azərbaycanlı rəssam Gülnarə Muxtarova Pamuk və türk rəssam Ahmet Rüştü Doğanın əsərləri sərgilənib. 11-19 aprel tarixlərində keçirilən tədbirə ümumilikdə 32 rəsm əsəri təqdim olunub. Türk dünyasının qardaşlıq tablolarının da yer aldığı ekspozisiyada müxtəlif mövzulu sənət əsərlərini görmək mümkündür. Belə ki, azərbaycanlı rəssamın 17 əsərində “Xocalı soyqırımı”, “Çanaqqala döyüşü”, “Ananın duası”, “Qardaşlıq”, “Bakının təsviri”, “Azərbaycan”, türk rəssamın isə 15 əsərində sosial qeyri-bərabərlik mövzuları yer alıb.

Rəssam Gülnarə Muxtarova Pamuk tədbirin əsas məqsədinin Azərbaycanı Türkiyədə, eləcə də dünyada daha geniş tanıtmaqdan ibarət olduğunu bildirib. İki ölkə arasındakı qardaşlıq münasibətlərinin yaradıcı nəslə ilham qaynağı olduğunu vurğulayan fırça ustasının sözlərinə görə, belə tədbirlər ölkəmizlə Türkiyə arasındakı mədəni əlaqələrin daha da genişlənməsində körpü rolunu oynayır.

Qeyd edək ki, bu, azərbaycanlı rəssamın Türkiyədə keçirilən ilk sərgisi deyil. 7 il ərzində G.Muxtarovanın əsərləri müxtəlif sərgilərdə nümayiş olunub. Həmçinin azərbaycanlı rəssam bir sıra mükafatlarla təltif olunub. Onun əsərlərinin bu ilin sonunda Belçikada da sərgilənməsi planlaşdırılır.

MÜŞFİQƏ

Yeni Azərbaycan.- 2019.- 16 aprel.- S.7