Yay turizm mövsümündə Azərbaycanın ayrı-ayrı bölgələrinə yüksək turist axını müşahidə edilir

2019-cu ilin birinci yarısında Azərbaycanı ziyarət etmiş xarici qonaqların sayı ötən ilin eyni dövrü ilə müqayisədə 86 min nəfər və yaxud 6,5 faiz artıb

Son illərdə qeyri-neft iqtisadiyyatının üstün inkişafına nail olmağı hədəfləyən Azərbaycan özünün bütün bölgələr üzrə mövcud olan zəngin turizm potensialından daha səmərəli istifadə etməyə çalışır. Bu məqsədlə bütün turist marşrutları boyunca zəruri infrastruktur qurulur, turistyerləşdirmə obyektlərinin sayı artırılır, xidmətin səviyyəsinin yüksəldilməsinə hesablanan tədbirlər görülür, respublikaya gəlib-getmə qaydaları asanlaşdırılır, eyni zamanda, xarici ölkələrdə Azərbaycanın paytaxtının və bölgələrinin turizm potensialı təbliğ edilir.

Öz növbəsində respublikamızda dövlət tərəfindən turizmin inkişafına göstərilən davamlı dəstək tədbirləri müsbət nəticələr verir. Belə ki, Azərbaycana gələn turistlərin sayı ilbəil artır və bu tendensiya cari ildə də müşahidə edilməkdədir.

2019-cu ilin birinci yarısında Azərbaycana gələn xarici qonaqların sayı 1,4 milyona çatıb

2019-cu ilin birinci yarısında Azərbaycanı ziyarət etmiş xarici qonaqların sayı 1,4 milyona çatıb ki, bu da ötən ilin eyni dövründə ölkəyə gəlmiş 1,3 milyon xarici ziyarətçi ilə müqayisədə 86 min və ya 6,5 faiz çox qonaq deməkdir.

Dövlət Turizm Agentliyindən bildirilib ki, gələnlərin böyük hissəsini - 29,4 faizini Rusiya (414 min), digər böyük hissəsini - 24,3 faizini isə Gürcüstan (342 min) vətəndaşları təşkil edib. Gürcüstan üzrə artım 22,8 faiz və ya 64 min nəfər olub. Qeyd etmək lazımdır ki, bu iki ölkədən gələn qonaqların sayı respublikamıza ümumi gələnlərin 50 faizdən çox hissəsini təşkil edib.

Türkiyədən gəlmiş qonaqların sayı 3,7 faiz artaraq toplam 148 minə çatıb. Cənubi və Mərkəzi Asiya ölkələrindən gələnlərin sayında yenə də sürətli artım müşahidə olunur - artım ilin ilk yarısı üçün uyğun olaraq 37,8 faiz və 50,2 faiz olub.

Azərbaycan üçün Cənubi Asiyanın əsas turizm bazarları Hindistan (27 min; 80,2% artım) və Pakistan (19 min; 24,4% artım), Mərkəzi Asiyada isə Qazaxıstan (20 min; 15,1% artım) və Türkmənistandır (21 min; 85% artım).

Səudiyyə Ərəbistanından gələnlərin sayında isə təxminən 80 faiz artım müşahidə olunur ki, bu da 15 min nəfər artımla 34 mindən çox xarici vətəndaş deməkdir.

2019-cu ilin iyun ayında gələnlərin sayında əhəmiyyətli dərəcədə artım müşahidə olunub - bu artım 17,2 faiz təşkil edib. Bu tendensiya özünü Azərbaycan turizmi üçün xarakterik olan bütün ölkələr üzrə göstərib.

Yerli və xarici turistlər Şəkinin tarixi abidələrinə, təbiətinə böyük maraq göstərirlər

Azərbaycanın qədim mədəniyyət məskənlərindən olan Şəki bu gün həm də regionun ən önəmli turizm mərkəzi kimi tanınır. Xan Sarayı, Kiş kəndindəki qədim alban məbədi, orta əsrlərə aid karvansaraylar, tarixi-memarlıq abidələri, yerli sənətkarların əl işlərinin sərgiləndiyi “Sənətkarlar evi” turistlər üçün cəlbedici məkanlar hesab olunur.

Builki yay mövsümündə Şəkiyə gələn yerli və xarici turistlərin sayında xeyli artım müşahidə olunur. Onlar Şəkinin tarixi abidələrinə və təbiətinə böyük maraq göstərirlər. Turistlərin ən çox üz tutduqları tarixi məkanlardan biri də “Yuxarı Baş” Dövlət Tarix-Memarlıq Qoruğunun ərazisidir. Hazırda qoruğun ərazisində dövlət qeydiyyatına alınan 25 tarixi-memarlıq, arxeoloji və park-monumental abidələr mövcuddur. Bu ərazidə yerləşən və Azərbaycan memarlığının nadir incilərindən olan Xan Sarayı, V-VI əsrlərə aid Dairəvi Məbəd, xalq tətbiqi sənəti və tarix-diyarşünaslıq muzeyləri, Dövlət Rəsm Qalereyası hər zaman turistlərin diqqətini özünə cəlb edir.

Qoruğun direktoru Təranə Abdullayevanın sözlərinə görə, builki yay mövsümündə turistlərin sayında əvvəlki illərlə müqayisədə iki-üç dəfəyədək artım hiss olunur. Xüsusilə ərəb ölkələrindən, həmçinin Türkiyə, Rusiya, Çin, Koreya Respublikası, Yaponiyadan gələn turistlərin sayı əvvəlki illərlə müqayisədə xeyli artıb.

Qoruğun direktorunun bildirdiyinə görə, Şəkiyə turist axınının artmasının əsas səbəblərindən biri də onlara göstərilən xidmətlərin keyfiyyəti ilə bağlıdır. Yay mövsümündə buradakı bütün muzeylər fasiləsiz iş rejimində fəaliyyət göstərir. Qoruğun ərazisində olan sənətkarlıq emalatxanaları daim turistlərin xidmətindədir. Şəki mətbəxinin özünəməxsusluğu, rəngarəngliyi də turistləri daim özünə cəlb edir. Onlar milli yeməklərdən olan “Şəki pitisi”nə, “Şəki paxlavası”na, müxtəlif çeşiddə şirniyyat növlərinə böyük maraq göstərirlər.

Turistlərə xidmət göstərmək üçün Xan Sarayının yaxınlığında, qədim qala divarları ilə əhatələnmiş geniş yaşıllıq ərazidə asudə vaxt və istirahət guşəsi də fəaliyyət göstərir. Turistlər qədim dövrləri xatırladan fotoatelyedə milli geyimlərlə fotoşəkillər çəkdirir, samovar çayına qonaq olur, dincəlirlər. Ərazidə uşaqlar üçün müxtəlif attraksionlar da quraşdırılıb. Hər gün qoruğun ərazisində turistlər üçün müxtəlif əyləncəli proqramlar, konsertlər, sərgilər təşkil edilir.

Qoruğun ərazisində yerləşən “Sənətkarlar evi”ndə də yay aylarında xüsusi canlanma hiss olunur. Burada fəaliyyət göstərən sənətkarların dediyinə görə, yay mövsümündə işləri heç də pis getmir. Turistlər yerli sənətkarların əl işlərinə böyük maraq göstərirlər. Xarici turistlərin bildirdiyinə görə, yaşadıqları ölkələrdə belə sənətkarlıq nümunələrinə rast gəlmək mümkün deyildir.

Ənvər Məhəmməd əl-Yasin Şəkiyə turist qrupunun tərkibində Səudiyyə Ərəbistanı Krallığından gəlib. Onlar artıq Bakının görməli yerlərini gəzib, Şamaxı və İsmayıllıda olublar. Ərəb turist bildirib ki, bir neçə gündür ki, Şəkidədirlər. Qaldıqları “Marxal” hotelində istirahətçilər üçün ideal şərait yaradılıb. Şəkinin qədim tarixi-memarlıq abidələrindən olan Xan Sarayı ilə tanışlığın onlarda zəngin təəssürat yaratdığını vurğulayan turist deyib: “Eşitdik ki, yenicə tanış olduğumuz Xan Sarayı, eləcə də şəhərin tarixi mərkəzi UNESKO-nun Ümumdünya İrs Siyahısına daxil edilib. Bu xəbərə biz də çox sevindik. Bu saray, həqiqətən də, çox möhtəşəm memarlıq abidəsidir və onu ziyarət etmək bizə də qismət oldu”.

Azərbaycan xalqının çox qonaqpərvər, istiqanlı olduğunu bildirən Ənvər Məhəmməd əl-Yasin deyib: “Adət-ənənələrimiz də bir-birinə çox bənzəyir. Azərbaycanda qadınlara xüsusi hörmətlə yanaşırlar. İnsanlarınız çox xeyirxahdırlar, turistlərə hər yerdə kömək etmək istəyirlər. Milli mətbəxinizdən isə doymaq olmur. Növbəti səfərimdə bura ailəmlə birlikdə gəlməyi düşünürəm”.

Yüksək səviyyədə təmir və bərpa olunan “Yanardağ” Dövlət Tarix-Mədəniyyət və Təbiət Qoruğu buraya gələn turistlərdə böyük məmnunluq yaradır

Xəbər verildiyi kimi, 2019-cu il 12 iyun tarixində əsaslı şəkildə təmir və bərpa olunan “Yanardağ” Dövlət Tarix-Mədəniyyət və Təbiət Qoruğunun Azərbaycan Respublikasının Prezidenti İlham Əliyevin və birinci xanım Mehriban Əliyevanın iştirakı ilə açılışı olub. Yüksək səviyyədə təmir və bərpa olunan “Yanardağ” Dövlət Tarix-Mədəniyyət və Təbiət Qoruğu buraya gələn turistlərdə böyük məmnunluq yaradır.

Xatırladaq ki, 2017-ci il dekabrın 29-da Prezident İlham Əliyev “Yanardağ” Dövlət Tarix-Mədəniyyət və Təbiət Qoruğunda olmuşdu. Dövlətimizin başçısı o zaman buradakı çatışmazlıqları və qeyri-məqbul şəraitin olduğunu qeyd edərək, bunun ölkəmizin ümumi inkişaf səviyyəsinə uyğun gəlmədiyini bildirmişdi. Prezident İlham Əliyev oradaca qoruqdakı şəraitin qısa müddət ərzində müasir səviyyəyə çatdırılması barədə aidiyyəti dövlət qurumlarına ciddi tapşırıq vermişdi.

Açılış mərasimində bildirildiyi kimi, qoruq yeni konsepsiyaya uyğun olaraq bərpa edilib. Abşeron rayonunun Məmmədli kəndində yerləşən Yanardağ abidəsinin ərazisi Prezident İlham Əliyevin 2007-ci ildə imzaladığı Sərəncamla Dövlət Tarix-Mədəniyyət və Təbiət Qoruğu elan edilib. Qoruğun fəaliyyəti Nazirlər Kabinetinin 2018-ci il 7 iyun tarixli müvafiq qərarına əsasən Dövlət Turizm Agentliyi tərəfindən tənzimlənir. Dövlətimizin başçısının ötən ilin iyulunda imzaladığı Sərəncama əsasən “Yanardağ” Dövlət Tarix-Mədəniyyət və Təbiət Qoruğunun müasir standartlara uyğunlaşdırılması və ərazisində yeni turizm infrastrukturunun yaradılması məqsədilə 2018-ci il dövlət büdcəsində nəzərdə tutulmuş Prezidentin ehtiyat fondundan vəsait ayrılıb. Qoruğun bərpası Dövlət Turizm Agentliyinə həvalə olunub.

Aparılan yenidənqurma işləri çərçivəsində ümumi sahəsi 64,55 hektar olan qoruğun ərazisində 3 tematik zonadan ibarət muzey, açıq hava konsertləri üçün nəzərdə tutulan 500 nəfərlik amfiteatr, sənətkar emalatxanaları və mağazalar, yerli sənətkarlar tərəfindən keramika, şüşə, taxta və parça kimi təbii materiallardan hazırlanan suvenirlərin satışı məntəqəsi, parkinq turistlərin ixtiyarına verilib. 2007-ci ildən qoruq statusuna malik olan Yanardağda, həmçinin ərazidə tapılan, yerli əhali tərəfindən istifadə edilmiş qədim daşlar və sənətkarlıq nümunələrinin, qaval daşının nümayiş etdirildiyi açıq hava muzeyi yaradılıb. Bundan əlavə, qoruq ərazisində yerli gənc rəssamların əsərlərinin nümayiş olunduğu kafe, əyləncə zonası, uşaqlar üçün oyun meydançası fəaliyyət göstərəcək. Fiziki məhdudiyyətli şəxslərin Yanardağ alovunun ətrafına enməsi üçün xüsusi yol çəkilib. Bütövlükdə qoruq ərazisi abadlaşdırılaraq müxtəlif ağaclar əkilib.

Qoruğun tərkibində Yanardağ - əbədiyaşar alov təbii abidəsi ilə yanaşı, digər maddi-mədəni irs nümunələri və təbiət abidələri də var. Bu abidələrə “Qurd yuvası” adlanan ilkin ibtidai icma dövrünə aid mağaralar, çoxəsrlik tarixə malik və qədim sanduqələrlə zəngin iki qəbiristanlıq, müalicəvi kükürdlü su bulaqları, hələ də aktiv fəaliyyətdə olan Qırməki palçıq vulkanı, Əlidaşı piri, Kardaşı iri təbii qaya daşları, Qırməki vadisi, qədim kurqan aiddir.

(davamı növbəti sayımızda)

Mübariz ABDULLAYEV

Yeni Azərbaycan.- 2019.- 13 iyul.- S.7.