2019-cu ilin birinci rübü regionların sosial-iqtisadi inkişafı baxımından uğurlu olub

Respublikanın bölgələrində inkişaf dinamikası davamlı xarakter daşıyır

Məlum olduğu kimi, son 15 ildə Prezident İlham Əliyevin siyasi qətiyyəti və uzaqgörənliyi sayəsində milli iqtisadiyyatımızın davamlı inkişafı üçün bütün şərtlər təmin edilib. Belə məqsədyönlü və prinsipial yanaşmanın nəticəsidir ki, 2004-cü ildən bəri bütün dünya üzrə ÜDM istehsalının artımında ən yaxşı göstəricilərdən biri 3 dəfədən çox olmaqla məhz Azərbaycanda qeydə alınıb. Bu gün Azərbaycan iqtisadiyyatı heç bir kənar gücdən və yaxud kənar maliyyə mənbəyindən, kredit təşkilatlarından asılı deyil. Əksinə, özünün güclü iqtisadiyyatına əsaslanan respublikamız ölkə hüdudlarından kənarda genişmiqyaslı investisiya qoyuluşu həyata keçirir. Hazırda respublikamız Cənubi Qafqaz coğrafiyasında ən güclü iqtisadiyyata malik ölkədir. Son 15 ildə bütün dünyada öz iqtisadi potensialını Azərbaycan qədər artıran ölkələrin sayı çox azdır.

Qeyd edək ki, ölkəmiz inamlı inkişaf dinamikasını 2019-cu ilin birinci rübündə də qoruyub saxlayıb. Belə ki, aprelin 30-da Prezident İlham Əliyevin Sədrliyi ilə keçirilən Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında ölkəmizin uğurlu inkişafı ilə bağlı bütün məqamlar açıqlanıb. Nazirlər Kabinetinin iclasında deyildiyi kimi, ölkəmizin birinci rübdə büdcə daxilolmaları artıb və bununla da əlavə maliyyə resursu formalaşıb. Dövlət başçısının qeyd etdiyi kimi, bu ilin əvvəlindən ümumi daxili məhsul, sənaye istehsalı, qeyri-neft sənayesi, kənd təsərrüfatı, əhalinin gəlirləri artıb, ölkə iqtisadiyyatına 2,8 milyard dollar sərmayə qoyulub. Bu ilin birinci rübündə ümumi daxili məhsul 3 faiz artıb. Sənaye istehsalı 4,4 faiz, qeyri-neft sektorunda sənaye istehsalı 15,6 faiz, kənd təsərrüfatı 3,6 faiz, əhalinin gəlirləri isə 5,5 faiz artıb. Bütün bunlar ölkəmizin dinamik inkişafının əyani göstəriciləridir.

Ümumiyyətlə, son 15 ildə regionların sosial-iqtisadi inkişafına dair Dövlət proqramları çərçivəsində bölgələrdə böyük layihələr reallaşdırılıb. Müvafiq Dövlət proqramlarının uğurla həyata keçirilməsi nəticəsində bölgələrin siması əsaslı dərəcədə dəyişilib, bütün sahələrdə, o cümlədən aqrar sektorda mühüm inkişaf göstəriciləri əldə olunub. Aqrar sektorun inkişafı, eyni zamanda, bölgələrdə iqtisadi aktivliyin artmasına və fəal məşğul əhalinin əmək bazarına çıxış imkanlarının genişlənməsinə müsbət təsir göstərir ki, bu da dərin sosial əhəmiyyətə malikdir.

Qeyd edək ki, bu ilin birinci rübü bölgələr üçün də uğurlu olub. Bu faktı Göyçay rayonunun timsalında da söyləmək olar. Göyçayda cari ilin birinci rübünün sosial-iqtisadi inkişafının yekunları və qarşıda duran vəzifələrə həsr olunan yığıncaqda bildirilib ki, 2019-cu il daha çox sosial sahədə inqilabi islahatların reallığa çevrildiyi il kimi yaddaşlara yazılacaq. Son üç ayda Prezident İlham Əliyevin imzaladığı Sərəncam və fərmanların bir çoxu əhalinin sosial rifah halının yaxşılaşdırılmasına, aztəminatlı ailələrin qaçqın və məcburi köçkünlərin, şəhid ailələrinin və müharibə veteranlarının sosial müdafiəsinin yaxşılaşdırılmasına xidmət edir. Təkcə Göyçay rayonu üzrə sosial müavinət və Prezident təqaüdlərinin artması 6 min 518 nəfərə şamil edilib və onlara 347,9 min manat əlavə vəsait ödənilib.

Qeyd olunub ki, ilin ilk üç ayında respublikamızda, o cümlədən Göyçay rayonunda tikinti, quruculuq və abadlıq işlərinin sürətləndirilməsi, yeni istehsal, ticarət və xidmət obyektlərinin inşa edilməsi istiqamətində bir sıra tədbirlər həyata keçirilib. Rüb ərzində Göyçay rayonunda iqtisadiyyatın əsas sahələri üzrə istehsal olunan məhsul və xidmətlərin ümumi həcmi keçən ilin müvafiq dövrünə nisbətən 1,3 faiz artaraq 48,9 milyon manat olub. Bildirilib ki, rayonun sənaye müəssisələri və bu sahədə fəaliyyət göstərən fiziki şəxslər tərəfindən 8,2 milyon manatlıq sənaye məhsulu istehsal edilib ki, bu da keçən ilin birinci rübünə nisbətən 3,7 milyon manat çoxdur. Birinci rübdə aqrar sahənin inkişaf etdirilməsi istiqamətində də müəyyən tədbirlər görülüb, 1067 hektar sahədə yazlıq bitkilər əkilib. Yanvar-mart aylarında rayonda 123,5 milyon manatlıq kənd təsərrüfatı məhsulları istehsal edilib.

O da vurğulanıb ki, hesabat dövründə iqtisadi və sosial sahələrin inkişafı üçün əsas kapitala bütün maliyyə mənbələrindən 2,3 milyon manat investisiya yönəldilib, tikinti təşkilatları tərəfindən 1,8 milyon manatlıq inşaat işləri görülüb. Hesabat dövründə əhalinin həyat səviyyəsi xeyli yaxşılaşıb, pərakəndə əmtəə dövriyyəsinin həcmi 2 faiz, əhaliyə göstərilən pullu xidmətlərin həcmi isə 1,6 faiz artıb.

Rayonda həyata keçirilən tikinti-quruculuq işlərindən də ətraflı danışılıb. Diqqətə çatdırılıb ki, Azərbaycan Respublikası Prezidentinin “Göyçay rayonunun Kürd-Şəhadət-Qarabağlar-İkinci Ərəbcəbirli avtomobil yolunun tikintisi ilə bağlı tədbirlər haqqında” Sərəncamına uyğun olaraq, ümumi uzunluğu 7,5 kilometr olan yolda əsaslı təmir işlərinə başlanılıb. Heydər Əliyev Fondunun təşəbbüsü ilə Göyçay şəhərində və Qarabaqqal kəndində 40 yerlik uşaq bağçaları inşa edilir. Müskürlü kəndində 40 yerlik uşaq bağçası, tibb məntəqəsi, kitabxana, kənd inzibati ərazi dairəsi üzrə nümayəndəlik və kənd bələdiyyəsi üçün otaqları əhatə edən inzibati binalar kompleksinin tikintisi aparılır. Ölkə başçısının tapşırığına əsasən, Göyçay çayında sel və daşqın təhlükəsinin və qəza vəziyyətinin aradan qaldırılması məqsədi ilə ötən ilin avqust ayından başlanan tikinti işləri də davam etdirilir.

Bildirilib ki, rayon ərazisində məskunlaşan məcburi köçkün ailələrinin mənzil şəraitinin yaxşılaşdırılması istiqamətində tədbirlər görülür. Belə ki, kollec və peşə liseyinin yataqxanalarında məskunlaşan ailələr üçün 80 mənzilli yaşayış binasının tikintisinə başlanılıb. Binanın cari ilin iyulunda istifadəyə verilməsi nəzərdə tutulur. Məktəbdə ictimai binalarda və uyğunlaşdırılmış tikililərdə yaşayan qaçqın ailələri üçün də əlavə olaraq 2 ədəd yaşayış binasının inşa edilməsi üçün tədbirlər görülür.

Məruzə və çıxışlarda qarşıda duran vəzifələrdən də söhbət açılıb. Bildirilib ki, növbəti aylarda rayon iqtisadiyyatının daha da möhkəmləndirilməsi, aqrar sahənin inkişaf etdirilməsi istiqamətində bir sıra tədbirlər həyata keçirilməlidir. İlk növbədə rayonun sənaye potensialından, emal müəssisələrinin layihə üzrə istehsal gücündən tam istifadə edilməli, bu müəssisələrdə yeni istehsal sahələrinin yaradılması, müasir bazar tələblərinə uyğun rəqabətqabiliyyətli və ixracyönümlü məhsul istehsalı diqqət mərkəzində saxlanılmalıdır. Rayonun kənd təsərrüfatının mövcud imkanlarından daha dolğun istifadə edilməlidir. Vaxtilə 400-420 ton barama tədarük olunan Göyçayda təsərrüfatın bu gəlirli, ənənəvi sahəsi inkişaf etdirilməlidir.

Bu ilin birinci rübündə Zaqatala rayonunda isə ümumi məhsul buraxılışının həcmi ötən ilin eyni dövrü ilə müqayisədə 23,2 faiz artaraq 76,5 milyon manat olub. Məhsul buraxılışı sənayedə 49,8 faiz, kənd təsərrüfatında 8,1 faiz, nəqliyyatda 4,4 faiz, rabitədə 5,7 faiz artıb. Birinci rübdə rayonda 4 milyon 343 min manatlıq tikinti-quraşdırma işləri həyata keçirilib. Rüb ərzində 207-si daimi olmaqla, 227 yeni iş yeri açılıb. Bu barədə Zaqatala rayon İcra Hakimiyyətindən məlumat verilib. Qurumdan bildiriblər ki, Prezident İlham Əliyevin mövcud iqtisadi potensialdan daha səmərəli istifadə olunması, ixracyönümlü istehsal, emal və infrastruktur müəssisələrinin yaradılması və inkişaf etdirilməsi istiqamətində verdiyi tapşırıqların icrasını təmin etmək məqsədilə Zaqatala rayonunda da davamlı tədbirlər həyata keçirilir. Cari ildə rayonda 649 hektar sahədə tütün əkilməsi proqnozlaşdırılır. Artıq tütün şitillərinin sahələrə köçürülməsinə başlanılıb.

İxrac potensialı yüksək sahələrdən olan fındıqçılığı inkişaf etdirmək məqsədilə mövcud fındıq bağlarının sahəsinin iki dəfə artırılması istiqamətində cari ildə də tədbirlər görülür. Belə ki, yaz mövsümündə 255 hektar sahədə yeni fındıq bağları salınaraq mövcud bağların ümumi sahəsi 19 min 760 hektara çatdırılıb.

Builki mövsümdə rayonda yaş barama istehsalının ötən illə müqayisədə 12 ton artırılaraq, 60 tona çatdırılması planlaşdırılır.

Qeyd edək ki, hazırda regionlarda aqrar sahənin inkişafı istiqamətində də davamlı tədbirlər həyata keçirilir. Belə ki, bu günlərdə İsmayıllı rayonunda kənd təsərrüfatı naziri İnam Kərimovun sədrliyi ilə aqrar sahədə mövcud vəziyyət və qarşıda duran vəzifələr mövzusunda fermerlərlə müşavirə olub. Rayon İcra Hakimiyyətində keçirilən müşavirədə Kənd Təsərrüfatı Nazirliyi Aparatının nümayəndələri, rayon İcra Hakimiyyəti strukturunun məsul şəxsləri, nazirliyin tabeli qurumlarının və Dövlət Aqrar İnkişaf mərkəzlərinin nümayəndələri və bu rayonda kənd təsərrüfatının müxtəlif sahələrində çalışan fermerlər iştirak ediblər.

Müşavirədə çıxış edən nazir İnam Kərimov Prezident İlham Əliyevin yürütdüyü siyasət nəticəsində iqtisadiyyatın digər sahələrində olduğu kimi, aqrar sahədə də keyfiyyətcə yeni inkişaf mərhələsinə qədəm qoyulduğunu vurğulayıb. Nazir bildirib ki, ölkədə aqrar sahə qeyri-neft sektorunun ən aparıcı sahəsi elan edilib: “Aqrar sahənin daha da inkişafı üçün dövlət tərəfindən çox böyük dəstək tədbirləri həyata keçirilir. Taxılçılıq, toxumçuluq, heyvandarlıq, arıçılıq, şəkər çuğunduru və pambıqçılığın inkişafı üçün subsidiya verilir. O cümlədən aqrar sahədə texnika təminatı ilə bağlı dövlət tərəfindən güzəştlər tətbiq edilir. Biz fəaliyyətimizdə kəndli və fermerlərə yaxınlıq, düzgün və səmərəli idarəçilik, innovasiyaların tətbiqi prinsiplərini əsas götürürük. Bu cür görüşlərin keçirilməsində məqsəd fermerlərin qayğı və problemlərini dinləmək, təxirəsalınmaz tədbirlər görməkdir”.

Nardar BAYRAMLI

Yeni Azərbaycan.- 2019.- 11 may.- S.7.