Baş nazirin müavini, YAP Sədrinin müavini - İcra katibi Əli Əhmədov partiyanın Abşeron rayon təşkilatının gənc fəalları ilə görüşüb

Əli Əhmədov: İnanırıq ki, müasir gəncliyimiz Azərbaycanın gələcəyini daha da işıqlı və parlaq edəcək

Sentyabrın 26-da Azərbaycan Respublikası Baş nazirinin müavini, Yeni Azərbaycan Partiyası (YAP) Sədrinin müavini - İcra katibi Əli Əhmədov Xırdalan şəhərində YAP Abşeron rayon təşkilatının bir qrup gənc fəalı ilə görüşüb. Əvvəlcə Əli Əhmədov Abşeron rayonu Xırdalan şəhərinin mərkəzində Ümummilli Lider Heydər Əliyevin abidəsini ziyarət edib, önünə tər çiçək dəstələri düzüb.

Görüşdə AMEA-nın prezidenti, YAP Sədrinin müavini Akif Əlizadə, YAP İcra katibinin müavini, Milli Məclisin İctimai birliklər və dini qurumlar komitəsinin sədri Siyavuş Novruzov, Abşeron rayon İcra Hakimiyyətinin başçısı İradə Gülməmmədova və YAP Abşeron rayon təşkilatının sədri Bilman Vəliyev iştirak ediblər.

Abşeron rayonu Heydər Əliyev Mərkəzində keçirilən görüşü açan Abşeron Rayon İcra Hakimiyyətinin başçısı İradə Gülməmmədova gənclərin rayonun ictimai-siyasi həyatında, eləcə də quruculuq işlərində yaxından iştirak etdiklərini bildirib.

Tədbirdə çıxış edən Baş nazirin müavini, YAP Sədrinin müavini - İcra katibi Əli Əhmədov bildirib ki, Azərbaycan hökumətinin siyasətində gənclərə diqqət və qayğı çox vacib yerlərdən birini tutur. Bunun başlıca səbəbi ondan ibarətdir ki, biz dövlətimizin gələcəyini gənclərdə görürük. “Ümumiyyətlə, hər bir dövlət öz gələcəyini yetişdirdiyi gənclərdə görür. Gənclər nə qədər savadlı, bilikli, vətənpərvər, öz ölkəsini sevən insanlar olarsa, o ölkənin gələcəyi o qədər də parlaq olur. Bizim çox dəyanətli və vətənpərvər gəncliyimiz var. Bu gəncliyimizlə fəxr edirik. İnanırıq ki, bu müasir gəncliyimiz Azərbaycanın gələcəyini daha da işıqlı və parlaq edəcək”, - deyən Əli Əhmədov qeyd edib ki, Azərbaycan gəncliyi cəmiyyətimizin aparıcı qüvvəsini təşkil edir. Eyni zamanda, gənclər əhalinin tərkibində say baxımından da üstünlük təşkil edirlər. “Belə ki, Azərbaycan əhalisinin 45 faizi 30 yaşına qədər olan insanlardan ibarətdir. Deməli, bizim ölkəmiz gənclər ölkəsidir. Belə olan halda, hökumətin apardığı siyasətdə gənclərə diqqət və qayğı xüsusi əhəmiyyət kəsb edir. Prezidentimizin həyata keçirdiyi siyasətin mahiyyəti ondan ibarətdir ki, bütün dövlət qurumları, yerli və mərkəzi hakimiyyət orqanları Azərbaycan gəncliyinin inkişafı, tərəqqisi üçün lazım olan tədbirləri görsünlər. Biz gənclərin inkişafı dedikdə, hər şeydən əvvəl onların sağlam böyüməsini nəzərdə tuturuq. Gənclərimiz nə qədər sağlam böyüyərsə, gələcəyimiz üçün o qədər böyük bir potensialı əldə etmiş olarıq. İkinci hədəfimiz ondan ibarətdir ki, gənclərimiz yaxşı təhsil alsınlar, müasir biliklərə yiyələnsinlər, Azərbaycanın inkişaf etməsi üçün töhfələr versinlər”, - deyən natiq söyləyib ki, bu gün Azərbaycan hökumətinin əsas məqsədi gənc nəslin arzuladığı cəmiyyəti onlara təqdim etməkdir. Bu ümumi məqsədə nail olmaq üçün var gücümüzlə çalışırıq. Bunun üçün də gənc nəslin daha yaxşı təhsil alması və zəngin biliklərə yiyələnməsi tələb olunur. Yaxşı yaşamağın, cəmiyyətin layiqli vətəndaşı olmağın yeganə yolu zəngin, etibarlı, dərin biliklərə yiyələnməkdir. Baş nazirin müavini deyib: “Ölkədə gənclərin yaxşı təhsilə sahib olmaları üçün bütün imkanlar yaradılıb. Son illər Azərbaycanda təhsil sahəsində böyük islahatlar həyata keçirilir. İnanırıq ki, Azərbaycanın gələcəyi daha parlaq olacaq. Çünki bu parlaq gələcəyi yaratmağa qadir olan çox ləyaqətli gənclərimiz yetişib. Onlar gələcəkdə Ulu Öndər Heydər Əliyevin ideyalarını, eləcə də Onun layiqli davamçısı olan Prezident İlham Əliyevin həyata keçirdiyi tədbirləri layiqincə davam etdirmək potensialına malikdirlər”.

Görüşdə Əli Əhmədov müstəqil Azərbaycanın keçdiyi inkişaf yolu ilə bağlı tələbə-gənclərə geniş məlumat verib, uğurlu siyasət nəticəsində ölkəmizi daha firavan gələcək gözlədiyini diqqətə çatdırıb.

Müstəqilliyimizin ilk illərindən danışan Əli Əhmədov deyib ki, 1990-cı illərin əvvəlində Azərbaycan dərin siyasi, sosial-iqtisadi böhran keçirirdi, inflyasiyanın səviyyəsi 1600 faizə çatmışdı, ölkədə xaos, anarxiya baş alıb gedirdi, Azərbaycan məhv olmaq təhlükəsi ilə üz-üzə qalmışdı. Xalq Cəbhəsinin hakimiyyəti dövründə çox acınacaqlı vəziyyət yaranmışdı ki, insanlar sabaha ümidlərini itirmişdilər. O zaman çörək növbələri, çörək tapmaq insanların başlıca qayğısına çevrilmişdi. Digər tərəfdən isə Ermənistan tərəfindən torpaqlarımızın işğalı davam edirdi.

Belə bir şəraitdə xalqımız nicat yolunu Ulu Öndər Heydər Əliyevin hakimiyyətə qayıtmasında görürdü. Həmin dövrdə Azərbaycanın anarxiya, parçalanmaq və məhv olmaq təhlükəsi, iqtisadi tənəzzül, beynəlxalq təcrid ilə üzləşdiyini diqqətə çatdıran Əli Əhmədov 1993-cü ildə Ümummilli Lider Heydər Əliyevin xalqın təkidli tələbi ilə hakimiyyətə qayıdışından sonra ölkəmizin bu bəlalardan xilas olaraq inkişaf yoluna qədəm qoyduğunu, respublikamızda mühüm siyasi və iqtisadi islahatların həyata keçirildiyini, neft strategiyasının reallaşdırıldığını, cəbhədə atəşkəsin əldə olunduğunu, nizami ordu quruculuğu prosesinə başlandığını, cəmiyyətin inkişafı üçün fundamental əsasların yaradıldığını bildirib. Baş nazirin müavini qeyd edib ki, Ulu Öndərin işləyib hazırladığı müasir, müstəqil dövlət quruculuğu konsepsiyası müasir Azərbaycanın uğurlarının bünövrəsində dayanaraq gələcək inkişafın, misli görünməmiş uğurların əsasını qoyub. Onun sözlərinə görə, Ulu Öndər Heydər Əliyevin uzaqgörənliyi nəticəsində 1994-cü ildə imzalanmış “Əsrin müqaviləsi” isə ölkəmizin inkişafında mühüm rol oynadı. Belə ki, Ümummilli Liderimizin müəllifi olduğu neft strategiyası Azərbaycanın hərtərəfli inkişafının bünövrəsini təşkil edir.

YAP Sədrinin müavini söyləyib ki, bu gün Heydər Əliyev siyasəti Prezident İlham Əliyev tərəfindən uğurla davam etdirilir. Əli Əhmədov Prezident İlham Əliyevin siyasəti nəticəsində Azərbaycanın ötən illər ərzində böyük inkişaf yolu keçdiyini, iqtisadiyyatın artması, əhalinin sosial rifahının yüksəldilməsi, ölkəmizin beynəlxalq müstəvidə mövqeyinin gücləndirilməsi istiqamətində mühüm addımlar atıldığını söyləyib.

Əli Əhmədov bildirib ki, son illər Azərbaycan iqtisadiyyatı bir neçə dəfə artıb. Təbii ki, iqtisadiyyatın inkişafı dövlətin sosial siyasətinin daha da güclənməsinə zəmin yaradır. Əhalinin rifah halının yüksəlməsi istiqamətində atılan addımlar bunun əyani göstəricisidir. Bu ilin əvvəlindən Prezident İlham Əliyevin müvafiq Fərman və sərəncamları ilə ölkəmizdə əməkhaqlarının, təqaüdlərin, sosial müavinətlərin və digər sosial ödənişlərin əhəmiyyətli dərəcədə artırıldığını deyən Baş nazirin müavini qeyd edib ki, ölkəmizdə qayğıya ehtiyacı olan insanlara dövlətimiz lazımi diqqəti göstərir. Onun sözlərinə görə, hər bir ailə bu artımlardan faydalanır. Əli Əhmədov deyib ki, Azərbaycan dövləti gücləndikcə əhalinin rifah halının daha da yüksəldilməsi istiqamətində növbəti addımlar atılacaq. Azərbaycanın beynəlxalq miqyasda da nüfuzunun davamlı olaraq artdığını deyən Əli Əhmədov ölkəmizin dünyada və regionda baş verən proseslərdə fəal mövqe nümayiş etdirdiyini söyləyib.

Ermənistan-Azərbaycan Dağlıq Qarabağ münaqişəsinə gəlincə, Baş nazirin müavini deyib ki, Azərbaycan münaqişənin sülh yolu ilə həllinin tərəfdarıdır. Onun sözlərinə görə, işğalçı Ermənistan münaqişənin həllini uzatmağa çalışır: “Azərbaycanın güclü ordusu var və torpaqlarımızı işğaldan azad etməyə qadirdir. Beynəlxalq hüquq da bizim tərəfimizdədir. Amma dövlətimiz qan tökülməsini istəmir. Çünki müharibə insan itkisi, dağıntı, fəlakət deməkdir. Ona görə də sülh imkanları tükənməyibsə, bu imkanlardan sona qədər istifadə olunmalıdır. Əlbəttə ki, sülh danışıqları nəticə verməsə, Azərbaycan dövləti öz torpaqlarını işğaldan azad etmək haqqından istifadə edəcək”.

Azərbaycanın dünyanın ən uğurlu gənc dövlətlərindən biri olduğunu deyən Əli Əhmədovun fikrincə, bugünkü gənclik müstəqil, güclü Azərbaycanın vətəndaşı olmaqdan qürur duyur. O, gəncləri ictimai həyatda da fəal olmağa çağırıb. Çünki gənclər cəmiyyətin aparıcı qüvvəsi kimi cəmiyyət həyatında mühüm rol oynayırlar. Yeni Azərbaycan Partiyasının qapıları da gənclərimiz üçün həmişə açıqdır.

Bununla belə, Azərbaycanın inkişafını və güclənməsini istəməyən qüvvələrin olduğunu deyən YAP Sədrinin müavini həmin dairələrin müxtəlif vasitələrlə ölkəmizə qarşı kampaniya apardıqlarını qeyd edib. Xüsusilə sosial şəbəkələr vasitəsilə bu çirkin kampaniya aparılır. Onun sözlərinə görə, bu prosesdə xaricdə özünü “mühacir” adlandıranlar “fəallıq” göstərirlər. YAP Sədrinin müavini vurğulayıb ki, bu adamlar xaricdəki müəyyən dairələrin maraqlarına xidmət edirlər. Natiq deyib ki, onların gerçək siması cəmiyyətdə ifşa olunmaqdadır. Ona görə də partiyamızın üzvləri, o cümlədən gənclər bu məsələdə daha da fəal olmalıdırlar.

Çıxış edən AMEA-nın prezidenti, YAP Sədrinin müavini Akif Əlizadə Azərbaycanın gələcəyinin parlaq olduğunu bildirib. Çünki ölkəmizdə sağlam, vətənpərvər, intellektual gənc nəsil formalaşıb. O, son illər gənclərin elm sahəsinə marağının artmasını da yüksək qiymətləndirib. “Gənclik olmasa, elmi məktəblər də ola bilməz”, - deyən akademik gəncləri Prezident İlham Əliyevin ətrafında daha sıx birləşməyə çağırıb.

Görüşdə çıxış edən gənclər də ictimai-siyasi proseslərlə bağlı fikirlərini bildiriblər. Qeyd olunub ki, bu gün Azərbaycan gəncliyi Prezident İlham Əliyevin ətrafında sıx birləşib, dövlət başçısının həyata keçirdiyi siyasəti birmənalı şəkildə dəstəkləyir. Görüşdə, həmçinin gəncləri maraqlandıran suallar cavablandırılıb.

Nardar BAYRAMLI

Yeni Azərbaycan.- 2019.- 22 sentyabr.- S.3