Azərbaycanda turizmin inkişafı istiqamətində mühüm addımlar atılır

Dünya Azərbaycanlılarının Həmrəylik Günü və Yeni il bayramında ölkəmizə gələn turistlər bölgələrdə istirahət etməyə üstünlük verirlər

(əvvəli ötən sayımızda)

Qusar rayonunda yerləşən “Şahdağ” Turizm Mərkəzi bayram günlərində 10 mindən çox turist qəbul edib

Yeniliklər sırasında bu yaxınlarda istifadəyə verilən gecə klubu da var. Turistlər xizək sürmənin yorğunluğunu burada əylənməklə çıxara bilərlər. Bu, eyni zamanda, xizək sürməyən qonaqlar üçün ideal əyləncə mərkəzidir. Gecə klubu 200 nəfərlik “Zona” və VİP bölmələrdən ibarətdir. Mükəmməl akustika və işıq effektləri ilə təchiz olunan klubda həmçinin Asiya mətbəxi, DJ və böyük rəqs meydanı mövcuddur.

“Şahdağ” Turizm Mərkəzinin əsas meydanında yerləşən “Qış bazarı” yarmarkasında turistlərə xüsusi üsulla hazırlanan içkilər, şirniyyatlar və Yeni il hədiyyələri təklif olunur. On yeddi evcikdən ibarət yarmarkada həm də yerli məhsulları əldə etmək olar. Bu mövsümdən etibarən turistlər ən çox sevilən ləziz burgerləri də Şahdağda dada biləcəklər. Yeni istifadəyə verilən Burger Mərkəzinin interyeri xüsusi zövqlə tərtib edilib.

Dövlət Turizm Agentliyinin sədri Fuad Nağıyev bildirib ki, Azərbaycanda turizmin inkişafını sürətləndirmək, ölkənin daxili turizm potensialını dünya bazarına çıxarmaq, habelə xarici turistlərin diqqətini səfalı guşələrimizə cəlb etmək məqsədilə dövlət tərəfindən bir sıra mühüm işlər həyata keçirilir.

“Dövlətimizin başçısı İlham Əliyev və Birinci vitse-prezident Mehriban Əliyeva turizm sektoruna böyük diqqətlə yanaşır. Turizmin inkişafı üçün mühüm qərarlar qəbul olunub ki, bunun da nəticəsi göz qabağındadır. “Şahdağ” Turizm Mərkəzinə gələn turistlərin sayı artmaqda davam edir. Qonaqların sayının daha da çox olması üçün mərkəzdə bir sıra böyük işlər görülür, turistlərə yeni xidmətlər və əyləncələr təklif olunur. Həm yerli, həm də xarici turistlərin mərkəz haqqında fikirləri çox müsbətdir. Bu, sevindirici haldır. Bundan sonrakı mərhələdə dövlətimizin başçısının müəyyənləşdirdiyi istiqamət üzrə tapşırıqları yerinə yetirib, Azərbaycanın turizm sektorunda daha çox nailiyyətlər qazanmasını təmin edəcəyik”, - deyə Fuad Nağıyev bildirib.

Turistlərin çoxluğu nəzərə alınaraq bu il kompleksin girişində 720 yerlik yeni avtomobil parkı inşa olunub. Bundan başqa, yeni mövsümdən başlayaraq istirahət mərkəzinin daxilində xüsusi marşrut üzrə hərəkət edən avtobuslar qonaqların xidmətindədir.

Onu da qeyd edək ki, Qusar rayonunda yerləşən “Şahdağ” Turizm Mərkəzi bayram günlərində 10 mindən çox turist qəbul edib. Dünya Azərbaycanlılarının Həmrəylik Günü və Yeni il bayramı münasibətilə elan olunan qeyri-iş günlərində istirahət kompleksində dincələnlər arasında xeyli əcnəbi olsa da, qonaqların çoxu yerli turistlərdir. Bayram günlərində “Şahdağ” Turizm Mərkəzini ziyarət edən turistlərin əksəriyyəti xizək yollarından və kanatlardan istifadə edib. Təntənəli Yeni il şənlikləri, möhtəşəm atəşfəşanlıq, musiqi ziyafəti turistlərin zövqünü oxşayıb.

Bu il Yeni il bayramı günlərində Şəkiyə gələn turistlərin sayında artım müşahidə olunub

Azərbaycanın ən qədim şəhərlərindən və mədəniyyət mərkəzlərindən olan Şəki ilin bütün fəsillərində turistləri özünə cəlb edir. Bayram tətili günlərində Şəki rayonu da turistlərin ən çox ziyarət etdikləri bölgələrimizdən olub. Hər il olduğu kimi, bu il də Yeni il bayramı günlərində Şəkiyə gələn turistlərin sayında artım müşahidə olunur. Turistlərin ən çox üz tutduqları tarixi məkanlardan biri “Yuxarı Baş” Dövlət Tarix-Memarlıq Qoruğunun ərazisidir. Bu ərazidə yerləşən muzey və karvansaraylar, həmçinin XVIII əsrə aid dünya əhəmiyyətli nadir tarixi-memarlıq abidəsi Şəki xanlarının sarayı yerli və xarici turistlərin daha çox marağına səbəb olur. Qoruğun direktoru Təranə Abdullayeva turistlərə göstərilən xidmətlər barədə məlumat verib. Onun bildirdiyinə görə, tətil günlərində şəhərə turist axınını nəzərə alaraq, qoruğun ərazisindəki bütün muzeylərin, o cümlədən Şəki xanlarının sarayının qapıları səhər saatlarından axşam hava qaralanadək qonaqların üzünə açıq olur. Xarici turistlərin arasında Rusiyadan, keçmiş sovet respublikalarından, həmçinin ərəb ölkələrindən gələnlər üstünlük təşkil edirlər.

İrina Şitova rəfiqələri ilə birlikdə Azərbaycana Rusiyanın Nijni Novqorod şəhərindən qonaq gəlib. İxtisasca iqtisadçı olan rusiyalı turist Naftalan şəhərindəki müalicə sanatoriyalarının birində istirahət edir. Turist qrupu ilə birgə Şəkiyə ekskursiyaya gələn İrina deyib: “Ölkənizə üçüncü dəfədir səfər edirəm. Bu il yaşadığım Nijni Novqorod şəhərindən Azərbaycana 20 nəfərədək turist gəlib. Mən özüm Şəkidə ikinci dəfədir oluram. Bu şəhər qədimliyi və möhtəşəm tarixi abidələri ilə, mətbəxi, dadlı halvası, günəşli və qarlı havası ilə məni özünə cəlb edir. Azərbaycanlılar çox qonaqpərvər, istiqanlı və səmimidirlər. Bizi hər yerdə çox mehriban qarşılayırlar. Gələcəkdə yenə də Azərbaycana, o cümlədən Şəkiyə gəlmək niyyətindəyəm”.

Gəncədə fəaliyyət göstərən “EFES Travel” turizm şirkətinin nümayəndəsi Fərid Nəbiyev Naftalanda dincələn rusiyalı turistləri Şəkiyə ekskursiyaya gətirib. Şirkətin nümayəndəsi bildirib ki, “EFES Travel” xarici turizmlə yanaşı, ölkədaxili turların təşkili ilə də məşğul olur. Şirkətin əsas məqsədi yerli və xarici turistlərə Azərbaycanı daha yaxından tanıtmaq, təbliğ etmək və sevdirməkdir. Gəncə-Şəki-Qəbələ, Gəncə-Qax-Zaqatala-Balakən marşrutları üzrə təşkil edilən ekskursiyalar zamanı peşəkar bələdçilər tərəfindən turistlərə bu bölgənin tarixi məkanları, təbiəti, mədəniyyəti, görməli yerləri barədə ətraflı məlumat verilir. Ekskursiya iştirakçıları onlara göstərilən xidmətlərdən həmişə razılıq edirlər.

Qəçrəşin qarlı mənzərəsini izləməyə gələn israilli turistlər Azərbaycan və onun təbiəti haqqında yüksək fikirdədirlər

Son illər istirahət üçün Qəçrəş meşəsini seçənlərin arasında da əcnəbi turistlərin sayı xeyli artıb. Qeyd edək ki, Qəçrəş kəndi Quba rayon mərkəzindən təxminən 10 kilometr məsafədə yerləşir. Bu kəndin girişindəki meşə zolağı ölkəmizdə məşhurdur. Turistlər həm yay aylarında, həm də qışda Qəçrəş meşəsinin mənzərəsini seyr etməkdən zövq alırlar. Qəçrəşin qarlı mənzərəsini izləməyə gələn israilli turistlər isə Azərbaycan və onun təbiəti haqqında yüksək fikirdədirlər. Zoya Memrayev İsrailin mərkəzi şəhərlərindən biri olan Or-Akiva şəhərindən gəlib. Azərbaycanda sonuncu dəfə 40 il əvvəl olduğunu deyən qonaq bildirib: “Şəhərlər çox dəyişib, müasirləşib. Amma dəyişməyən bir şey var: insanların xoş rəftarı və mehriban münasibəti. Qubada hər tərəf ağ örpəyə bürünüb. Təmiz hava və gözəl mənzərə var. Qubadan sonra Bakıya gedəcəyik. Bu yerlər mənə çox doğmadır. Çünki özüm də əslən Dərbənd şəhərindənəm. Amma uzun illərdir İsraildə yaşayırıq”.

Oleq Pisaxov isə Azərbaycanı yaxşı tanıdığından İsraildən gələn turistlərə bələdçilik edir. İndi İsraildə yaşasa da, Qubada doğulub boya-başa çatıb. “Bura mənə çox doğma məkandır. Azərbaycana səyahət turları təşkil edirik. Hər ay Azərbaycana səfər edirik. Bu dəfə 30 nəfərlik qrupla gəlmişik. Turistlərin ən çox xoşuna gələn təbiət mənzərələridir. Bir həftəlik səfərimizdə Qubada, Şəkidə, Şamaxıda olmuşuq. Yay aylarında turlarımız on günlük olur”, - deyə O.Pisaxov bildirib.

Dora Meirov adlı israilli turist də Azərbaycana səfərindən çox məmnun qalıb: “Azərbaycan daha da gözəlləşib. Bakını, Azərbaycan dilini, yeməklərinizi çox bəyənirəm. İki gündür Qubadayıq. Qaldığımız hoteldə bizə yüksək səviyyədə xidmət göstərdilər. Qarı çox sevirəm. Bəxtimizdən Qəçrəş bu gün ağ örpəyə bürünüb. Buradan sonra Bakıya gedəcəyik. Ekskursiyamız daha dörd gün davam edəcək”.

İstirahət üçün Qəçrəş meşələrinə üz tutan turistlər əsrarəngiz qış mənzərələrini seyr etməklə yanaşı, buradakı hotel və restoranların xidmətlərindən istifadə edirlər. Yerli sakinlər tərəfindən turistlərə atla gəzinti və dadlı göy qutabı da təklif olunur.

Vurğulandığı kimi, Quba-Xınalıq turizm marşrutu üzərində ən çox istirahət mərkəzləri də məhz Qəçrəş kəndi ərazisindədir. Rayon iqtisadiyyatının inkişafında bu mərkəzlərin böyük rolu var. Qəçrəş və ətraf ərazilərdə dincəlmək üçün münasib qiymətə turizm obyekti tapmaq mümkündür.

Yerli və xarici turistlər qarlı dağlarda motorlu xizəklərlə, kanatla gəzmək və buz üstündə xizəklə sürüşmək kimi arzularını Qəbələdə gerçəkləşdiriblər

Ölkəmizin görməli və gəzməli yerlərindən olan Qəbələ rayonu da turistlərin sevimli istirahət məkanlarından biridir. Qeyd edək ki, Qəbələ rayonu coğrafi quruluşu və müasir turizm infrastrukturuna görə isti yay fəsli ilə yanaşı, soyuq qış aylarında da turistləri özünə cəlb edir. Dünya Azərbaycanlılarının Həmrəylik Günü və Yeni il münasibətilə bayram tətilində rayonun turizm məkanlarına üz tutan yerli və xarici turistlər qarlı dağlarda motorlu xizəklərlə, kanatla gəzmək və buz üstündə xizəklə sürüşmək kimi arzularını Qəbələdə gerçəkləşdiriblər. Rayonda əsl bayram ab-havası yaşanıb. Bütün hotellərdə, istirahət və əyləncə mərkəzlərində turistlərə xüsusi hazırlanmış əyləncəli şou proqramlar təqdim olunub. Qonaqların istirahətinin şən və mənalı təşkili üçün hotellərdə, “Qəbələnd” istirahət və əyləncə mərkəzində yüksək səviyyədə şərait yaradılıb, tanınmış musiqiçilərin iştirakı ilə konsertlər, müxtəlif əyləncəli tədbirlər keçirilib.

Yerli və xarici turistlər Qəbələnin zəngin tarixi, müasir şəhərsalma mədəniyyəti və ləziz mətbəxi ilə yaxından tanış olublar. Qəbələyə üz tutan yerli və xarici turistlər təkcə rayon mərkəzini gəzməklə kifayətlənməyib, dağlıq ərazilərdə yerləşən kəndlərin mənzərəli guşələrinə də səyahət ediblər. Bayram günlərində rayonda dincəlməyə üstünlük verən xarici turistlər arasında MDB, Avropa və ərəb ölkələrindən olanlar da var.

Pərviz SADAYOĞLU

Yeni Azərbaycan.- 2019.- 9 yanvar.- S.7.