Azərbaycanın dövlət başçısı növbəti dəfə mühüm beynəlxalq platformada Ermənistanın işğalçılıq siyasətini ifşa etdi

Prezident İlham Əliyev: Danışıqların mahiyyət və formatını məhv etməyə çalışan Ermənistanın baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır

Azərbaycan Ermənistanın ölkəmizə qarşı apardığı işğalçılıq siyasətini ifşa etmək, Dağlıq Qarabağ problemi ilə bağlı əsl həqiqətləri dünya birliyinin nəzərinə çatdırmaq və münaqişənin tezliklə ədalətli həllinə nail olmaq üçün bütün beynəlxalq platformalardan maksimum dərəcədə istifadə edir. Bu baxımdan, iyunun 18-də keçirilən Şərq Tərəfdaşlığı ölkələrinin videokonfrans formatında Sammiti də istisna olmayıb. Azərbaycan Respublikasının Prezidenti İlham Əliyev Sammitdəki çıxışında Ermənistanın Azərbaycan ərazilərini işğal etdiyini, həmin ərazilərdə qeyri-qanuni məskunlaşdırma siyasəti həyata keçirdiyini vurğulayıb və BMT Təhlükəsizlik Şurasının məlum qətnamələrinin hələ də Ermənistan tərəfindən icra edilmədiyini bildirib.

Ermənistan Azərbaycanın beynəlxalq səviyyədə tanınmış ərazisinin 20 faizini işğal altında saxlamaqda davam edir

Azərbaycan Dağlıq Qarabağ münaqişəsinin həllində prinsipial mövqedən çıxış edərək Ermənistanın işğalı nəticəsində pozulmuş ərazi bütövlüyünün təmin olunmasına çalışır. Respublikamız nümayiş etdirdiyi prinsipial mövqeyində ilk növbədə tarixi faktlara və beynəlxalq hüquqa əsaslanır. İşğalçı Ermənistanın Dağlıq Qarabağa iddia etməsinin heç bir tarixi əsası yoxdur. Əksinə, Dağlıq Qarabağın Azərbaycan ərazisi olduğunu təsdiqləyən çoxsaylı tarixi faktlara və sənədlərə istinad etmək mümkündür.

Eyni zamanda, beynəlxalq hüquq da Dağlıq Qarabağ münaqişəsinin həlli ilə bağlı aparılan danışıqlarda ölkəmizin mövqeyini gücləndirən fundamental amillərdən biri qismində çıxış edir. Siyasi və hüquqi baxımdan respublikamızın ədalətə əsaslanan mövqeyi mükəmməldir, Ermənistanın isə özündə separatizmi ehtiva edən mövqeyi qüsurludur. Müasir dünyada separatizm, bir dövlətin başqa bir ölkənin ərazisini zor gücünə ilhaq etməsi kəskin şəkildə pislənilir. Dünya birliyinin birmənalı mövqeyi belədir ki, bu kimi faktlar təhlükəli presedent yarada bilər. Təsadüfi deyil ki, separatçı və qondarma “DQR” heç bir xarici dövlət və beynəlxalq təşkilat tərəfindən tanınmayıb. Əksinə, indiyədək ayrı-ayrı dövlətlər, eləcə də bütün dünyada böyük nüfuza malik olan təşkilatlar məhz beynəlxalq hüquqa əsaslanaraq ölkəmizin ərazi bütövlüyünü və suverenliyini dəstəkləyən sənədlər qəbul ediblər. İşğalçılıq siyasətini dövlət siyasəti səviyyəsinə qaldıran Ermənistan tarixi faktlara və beynəlxalq hüquqa məhəl qoymur. Forpost dövlət olan Ermənistan bütün vasitələrdən istifadə etməklə substantiv danışıqlardan yayınmağa və beləliklə də, işğal məhsulu olan status-kvonu qoruyub saxlamağa çalışır. Sammitdəki çıxışında işğalçı dövlətin qeyri-konstruktiv mövqeyinə diqqət çəkən Prezident İlham Əliyev vurğulayıb: “Ermənistan Azərbaycanın beynəlxalq səviyyədə tanınmış ərazisinin 20 faizinin işğalını davam etdirir. Dağlıq Qarabağ və Azərbaycanın daha 7 rayonu 30 ilə yaxındır ki, Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilmişdir”.

Məlum olduğu kimi, BMT Təhlükəsizlik Şurasının 4 qətnaməsi Ermənistan qoşunlarının Azərbaycanın bütün işğal edilmiş ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlar tərəfindən qəbul olunmuş müvafiq sənədlərə əməl etmək əvəzinə, işğal altındakı ərazilərdə qeyri-qanuni məskunlaşma siyasəti həyata keçirir. Ermənistan rəhbərliyinin danışıqların pozulmasına yönələn səylərinə diqqət çəkən Prezident İlham Əliyev “Danışıqların mahiyyət və formatını məhv etməyə çalışan Ermənistanın baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır”, - deyə bildirib.

Azərbaycanın dövlət başçısı bu xüsusda 2018-ci ildə Brüsseldə paraflanmış Azərbaycan-Aİ Tərəfdaşlıq Prioritetləri sənədinə toxunaraq bildirib ki, sənəddə tərəflərin bir-birilərinin ərazi bütövlüyü, suverenliyi, müstəqilliyi və ölkələrin beynəlxalq sərhədlərinin toxunulmazlığının dəstəklənməsi öhdəliyi gələcək tərəfdaşlığın sütunlarından biri kimi təsbit edilib. Ermənistan və Azərbaycan arasında olan münaqişə eyni prinsiplər əsasında həll edilməlidir.

Paşinyan növbəti dəfə özünü gülünc vəziyyətə salıb

Azərbaycan Prezidenti İlham Əliyevin bundan əvvəl Ermənistanın baş naziri Nikol Paşinyanı Valday Klubunun toplantısında, Aşqabadda MDB dövlət başçılarının Sammitində, Münxen Təhlükəsizlik Konfransında necə çıxılmaz duruma saldığı hər kəsin yadındadır. Eyni hal bu dəfə Şərq Tərəfdaşlığı ölkələrinin videokonfrans formatında keçirilən Sammitində yaşanıb.

Tədbirdə Ermənistanın baş nazir N.Paşinyan Azərbaycan Prezidentinin çıxışına isterik tərzdə reaksiya verib. N.Paşinyan həm gülüş doğuran tərzdə ingilis dilində, həm də erməni dilində danışmağa başlayıb. Xüsusilə, N.Paşinyanın erməni dilində danışığı videokonfrans iştirakçılarında çaşqınlıq yaradıb və istehza ilə qarşılanıb. Bir müddət sonra tərcüməçi onun dadına çatıb. N.Paşinyan ingilis dilində “danışarkən” “Dağlıq Qarabağ münaqişəsi”, erməni dilində danışarkən isə “Artsax” ifadəsi işlədib. Bu isə bir daha onu göstərir ki, Ermənistanda hələ də münaqişənin adının nə olduğunu bilmirlər.

Sammitdə Prezident İlham Əliyevin çıxışına cavab verməyə çalışan N.Paşinyan Aşqabatda MDB dövlət başçılarının Zirvə görüşündə, Münxen Təhlükəsizlik Konfransında və Valday Klubunun toplantısında olduğu kimi, gülünc vəziyyətə düşüb. O, Avropa İnsan Haqları Məhkəməsinin R.Səfərovla bağlı işinə toxunaraq qərarın mahiyyətini saxtalaşdırıb və utanmadan iştirakçıları aldatmağa cəhd göstərib. Açıq-aşkar yalan danışmaqla N.Paşinyan özünü ifşa edib. Belə ki, onun dediklərinin əksinə olaraq, sözügedən məhkəmə Azərbaycan dövlətini baş vermiş hadisədə müqəssir bilməyib. Azərbaycan Paşinyanın iddia etdiyi kimi, guya irqçilikdə günahlandırılmayıb və dövlət məsuliyyəti müəyyənləşdirilməyib. Bu hal fərdi əsasda baş vermiş davranış kimi qiymətləndirilib.

Prezident İlham Əliyev bir daha söz alaraq faktlara əsaslanmaqla səlis və mükəmməl ingilis dilində N.Paşinyanın yalanlarını ifşa edib. Dövlətimizin başçısı bildirib: “Çıxışımda dediklərim beynəlxalq təşkilatların qətnamələrinə əsaslanan tarixi həqiqətdir. Birincisi, bu, hər kəsə bəlli olan bir faktdır ki, Ermənistan Azərbaycanın ərazisini işğal edib. İkincisi isə, Ermənistanın baş nazirinə irqçilik haqqında danışmağı məsləhət görməzdim, çünki erməni terrorçuları dünyaca məşhurdurlar. Parisin Orli hava limanında terror hadisəsi törədən Karapetyan soyadlı şəxs sonradan Ermənistana ekstradisiya edilib və Ermənistan prezidenti tərəfindən əfv olunub. Məhz buna görə belə məsələlər ətrafında müzakirə gedəndə ona sakit oturmağı tövsiyə edərdim”.

Bütövlükdə, N.Paşinyanın videokonfransda həm Azərbaycan Prezidenti, həm də bütün iştirakçılar qarşısında aciz və gülməli duruma düşməsi bir daha küçə adamının böyük siyasətdə yeri olmadığını nümayiş etdirdi. N.Paşinyan bir daha göstərdi ki, mitinqlərdə populist çıxışlar etməklə yüksək səviyyəli konfranslarda özünü aparmaq, söz alıb danışmaq, ümumiyyətlə, dövlət idarəçiliyi tamamilə ayrı-ayrı şeylərdir.

Yardım dilənən Ermənistanla qlobal səviyyədə humanitar missiya yerinə yetirən Azərbaycanın fərqi aydın göründü

Başqa bir vacib məqama diqqət yetirək. N.Paşinyan çıxışında Aİ-nin koronavirus pandemiyası ilə bağlı Ermənistana 92 milyon avro həcmində yardım ayırmasını yüksək qiymətləndirdiyini bildirib. Bununla Ermənistanın, əslində, bir daha xaricdən yardım diləndiyini nümayiş etdirib. Azərbaycanın mövqeyi isə tamam fərqli rakursdan diqqəti çəkir. Ölkəmiz qlobal pandemiya şəraitində beynəlxalq miqyasda birləşdirici missiya yerinə yetirir, çox vacib humanitar təşəbbüslərlə çıxış edir. Bunu Sammit iştirakçılarının diqqətinə çatdıran Prezident İlham Əliyev “Azərbaycan pandemiya ilə mübarizə üçün Ümumdünya Səhiyyə Təşkilatına 10 milyon ABŞ dolları həcmində könüllü maliyyə yardımı ayırmışdır. Eyni zamanda, ölkəmiz bu günə qədər 29 dövlətə humanitar yardım göstərib və bu işi davam etdirməyi planlaşdırır”, - deyə vurğulayıb.

Təkcə bu fakt Azərbaycanla Ermənistanın fərqini qabarıq şəkildə nəzərə çatdırır. Azərbaycan Aİ ilə bərabərhüquqlu əməkdaşlıq edir. Ermənistan isə bu formatda əməkdaşlığa dilənçilik imkanı kimi baxır. Yeri gəlmişkən, Paşinyanın videokonfransda maska ilə oturmasıda bir sıra suallar doğurur. Tək oturan N.Paşinyan özünü kimdən qoruyur? O, guya özünün koronavirusa yoluxmasını bildirməklə, əslində, erməni xalqını aldadıb. Məqsəd koronavirusa qarşı apardığı bərbad siyasəti malalamaq, erməni xalqının qəzəbini soyutmaqdır. N.Paşinyan həmişə olduğu kimi, bu dəfə də səmimi deyil.

Mübariz ABDULLAYEV

Yeni Azərbaycan. - 2020.-20 iyun.- S.2.