Azərbaycanda həyata keçirilən uğurlu siyasət regionların dinamik inkişafını təmin edib

Kurort şəhəri olan Naftalanda da son illər ərzində mühüm infrastruktur və sosial layihələr müvəffəqiyyətlə reallaşdırılıb

Cənubi Qafqaz regionunun lider dövləti olan Azərbaycanın əldə etdiyi nailiyyətlərin əsasında uğurla reallaşdırılan genişmiqyaslı siyasət dayanır. Məhz bu siyasətin, o cümlədən bu vaxta kimi üçünün icrası başa çatan, dördüncüsünün icrası isə davam etdirilən regionların sosial-iqtisadi inkişafına dair müvafiq Dövlət proqramları çərçivəsində həyata keçirilən işlərin nəticəsində həm ümumilikdə ölkəmizdə, həm də ayrı-ayrı regionlarda bütün sahələrdə uğurlar əldə edilib. Bu uğurlardan hazırda ölkəmizdə həm də sağlamlıq turizminin əsas məkanlarından biri kimi xarakterizə edilən Naftalana da pay düşüb. Əsasını sanatoriya - kurort infrastrukturu təşkil edən Naftalanda turizmin inkişafı istiqamətində görülən işlər və əldə edilən uğurlar barədə bir qədər sonra... Hələlik isə məlumat üçün bildirək ki, Naftalan şəhəri 1967-ci ilə kimi Goranboy və Yevlax rayonlarının tərkibində qəsəbə kimi fəaliyyət göstərib. 28 aprel 1967-ci ildə Azərbaycan Respublikası Ali Soveti Rəyasət Heyətinin 48 nömrəli Qərarı ilə Naftalana Respublika tabeli şəhər statusu verilib. Ərazisi 3572.63 hektardır. Naftalan şəhəri ilə Bakı şəhəri arasındakı məsafə 330 kilometrdir. Naftalan şəhəri 1 şəhər 2 kənddən ibarətdir.

Azərbaycan müstəqillik əldə etdikdən sonra, xüsusən də son illər respublikanın bütün şəhərləri kimi, Naftalan da öz inkişafının yeni mərhələsini yaşayır. Bu inkişafın təməlində Ulu Öndər Heydər Əliyev tərəfindən əsası qoyulan, cənab Prezident İlham Əliyevin uğurla davam etdirdiyi siyasət dayanır. Bildirildiyi kimi, müvafiq Dövlət proqramları çərçivəsində Naftalanda da genişmiqyaslı layihələr həyata keçirilib, həmçinin tikinti-quruculuq və abadlıq işləri görülüb, eyni zamanda bu istiqamətdə davamlı addımlar atılmaqdadır. Məsələn, “Azərbaycan Respublikası regionlarının 2004-2008-ci illərdə sosial-iqtisadi inkişafı Dövlət Proqramı”nın icrası ilə əlaqədar şəhərdə 25 çarpayılıq Əlillərin Bərpa Mərkəzinin, Maliyyə şöbəsinin, Dövlət Sosial Müdafiə Fondunun şəhər şöbəsinin, Su-Kanal idarəsinin, Əmək və Əhalinin Sosial Müdafiə Mərkəzinin yeni inzibati binaları tikilib və şəhər Mərkəzi Xəstəxanasında, şəhərin 1 və 2 saylı orta məktəblərində, Qaşaltı Qaraqoyunlu kənd orta məktəbində, şəhər futbol meydançasında və Heydər Əliyev parkında əsaslı təmir işləri aparılıb. Həmçinin, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”na uyğun olaraq şəhərin bütün infirastrukturlarının inkişafına diqqət artırılıb, eyni zamanda sonrakı dövrdə də bu istiqamətdə işlər davam etdirilib.

Beləliklə, Azərbaycan Respublikasının Prezidenti İlham Əliyevin tapşırıq və tövsiyələrinə uyğun olaraq kurort şəhəri Naftalanda son illər ərzində mühüm infrastruktur və sosial layihələr uğurla həyata keçirilib. Hazırda bu istiqamətdə davam etdirilən işlər nəticəsində, demək olar ki, Naftalan tamamilə yenidən qurulur. Şəhərin ayrı-ayrı küçələrində, çoxmənzilli yaşayış binalarının qarşısında, yol kənarlarında səliqə-səhman yaradılması, abadlıq və yaşıllaşdırma işləri xüsusi diqqət mərkəzində saxlanılır.

Yeri gəlmişkən, respublikamızın bəzi şəhər və rayonlarında karantin rejiminin yumşaldılmasından sonra, Naftalan şəhərinin estetik gözəlliyinin bərpası və kurort iqliminin yaxşılaşdırılması ilə əlaqədar genişmiqyaslı yaşıllaşdırma işlərinə başlanılıb. Bu barədə verilən məlumata əsasən, may ayının əvvəlində Naftalan Şəhər İcra Hakimiyyətinin başçısı Vüqar Novruzov və aparatın işçiləri tərəfindən şəhərin Bayraq Meydanında, Şirvan prospektində oleander və eldar şamı ağacları, çoxillik bəzək gülləri, ümumilikdə 1000-ə yaxın ağac, kol və güllər əkilib. Şəhər sakinlərinin, həmçinin şəhərə gələn yerli və xarici turistlərin məmnunluğunun təmin edilməsi üçün şəhər ərazisində, parklarda yaşıllaşdırma işləri mütəmadi olaraq davam etdiriləcək.

İyul ayının əvvəlində isə Naftalanda hərəkət məhdudiyyəti olanlar və uşaq arabalarının rahat hərəkətini təmin etmək üçün pandusların quraşdırılmasına başlanılıb. Belə ki, Naftalan Şəhər İcra Hakimiyyətinin təşəbbüsü və Milli Məclisin deputatı Anar Məmmədovun dəstəyi ilə şəhər ərazisində, o cümlədən Heydər Əliyev, Səməd Vurğun, Nəriman Nərimanov və Qələbə parklarında, səkilərdə fiziki imkanları məhdud və xüsusi qayğıya ehtiyacı olan insanların, yaşlıların və uşaq arabası ilə olan şəxslərin rahat hərəkəti üçün standarta uyğun 53 pandus quraşdırılıb. Bundan sonra 52-dək pandus quraşdırılacaq. Görülmüş işlər şəhərin ümumi inkişafına, vətəndaş məmnunluğuna, yerli və xarici turistlərin, eləcə də uşaq arabası ilə gəzənlərin maneəsiz gəzə bilmələrinə xidmət edir.

Ümumiyyətlə, yuxarıda sadalananlar da onu deməyə əsas verir ki, son illər kurort şəhəri Naftalanda turizmlə bərabər şəhərin bütün infrastrukturunun inkişafına diqqət artırılıb. O cümlədən həyata keçirilən tədbirlər nəticəsində vətəndaşların kommunal sahədə mövcud olan bir sıra problemləri öz həllini tapıb. Şəhərdəki 31 çoxmənzilli yaşayış binasının fasadı aqlay daşla üzlənib, işıqlandırılıb, dam örtükləri xüsusi dizaynla əsaslı təmir olunub, plastik pəncərlər quraşdırılıb, girişlərə dəmir qapılar qoyulub, girişlərin qarşısına dekorativ tamet daş döşənib. Binadaxili və şəhərdaxili bütün kommunikasiya xətləri yenilənib.

Qeyd edildiyi kimi, Naftalanda aparılan tikinti, abadlıq-quruculuq, təmir-bərpa və yenidənqurma işləri hazırda da davam etdirilir. Həmçinin aparılan abadlıq-quruculuq işləri çərçivəsində şəhərdəki çoxmənzilli yaşayış binalarının blokları da əsaslı təmir olunur. Bloklarda aparılacaq təmir işlərində, həmçinin elektrik enerjisinə qənaət üçün foto-relelərdən istifadə edilməsi nəzərdə tutulub. Şəhər İcra Hakimiyyətinin başçısı Vüqar Novruzov bloklarda təmir işləri aparılması nəzərdə tutulan digər binalara baxış keçirib, aidiyyəti üzrə tapşırıq və tövsiyələrini verib. Naftalan Şəhər İcra Hakimiyyətindən verilən məlumata əsasən, bu işlər mərhələli şəkildə şəhərin bütün binalarını əhatə edəcək.

Bu məqamda xüsusi olaraq vurğulamaq yerinə düşər ki, ölkəmizdə yeni növ koronavirus (COVİD-19) infeksiyası qeydə alınan ilk gündən bütün şəhər və rayonlarda olduğu kimi Naftalanda da əhalinin sağlamlığının və təhlükəsizliyinin qorunması, həmçinin sanitar-gigiyenik qaydalara əməl edilməsi istiqamətində müvafiq işlər görülüb. Hazırda da bu istiqamətdə işlər davam etdirilir. Bununla bağlı verilən məlumatda deyilir ki, Naftalan şəhərində COVID-19-a qarşı həyata keçirilən profilaktik dezinfeksiya tədbirləri ilə yanaşı, əhali arasında maarifləndirmə işlərinin gücləndirilməsi və sosial məsuliyyət tədbirləri də həyata keçirilir. Şəhərdə koronavirus pandemiyasına qarşı mübarizə aparmaq üçün aidiyyəti strukturların əməkdaşlarından ibarət hər birində 4 nəfər olmaqla, 5 mobil qrup fəaliyyət göstərir. Mütəmadi olaraq şəhər ərazisində, ticarət, ictimai-iaşə və xidmət obyektlərində, banklarda sosial davranış qaydalarına və sanitar-epidemioloji tələblərə əməl edilməsinə nəzarətin gücləndirilməsi məqsədilə mobil qrupların üzvləri tərəfindən müvafiq ərazi bölgüsü əsasında reydlər keçirilir, əhalinin sıx toplaşdığı ərazilərdə sakinlərlə fərdi qaydada izahetmə işləri aparılır. Reyd keçirilən bütün obyektlərdə işçi heyətinə canlı təmas zamanı tənəffüs yollarını qoruyan fərdi vasitələrdən (tibbi maska, əlcək, spirt və sair məhlullardan) istifadənin, sosial məsafənin gözlənilməsinin zəruri olduğu bildirilib. Nazirlər Kabineti yanında Operativ Qərargahın tələblərinə zidd fəaliyyət göstərən obyekt sahiblərinə xəbərdarlıq edilərək, müvafiq strukturlar tərəfindən inzibati qaydada tədbirlər görülür. Mobil qruplar tərəfindən fəaliyyətinə icazə verilmiş obyektlərdə reydlər və əhali arasında maarifləndirmə işləri gündəlik olaraq davam etdirilir.

Şəhərdə turizmin inkişafı istiqamətində görülən işlərə gəlincə, respublikamızda qeyri-neft sektorunun ən çox inkişaf edən sahələrindən olan turizm bir çox bölgələrin, xüsusən də müalicəvi nefti ilə məşhur olan Naftalan şəhərinin iqtisadiyyatının əsasını təşkil edir. Son illərdə ölkəmizdə görülmüş bütün işlər, o cümlədən beynəlxalq arenadakı mövqe, keçirilmiş beynəlxalq tədbirlər, ölkəmizdə hökm sürən sabitlik və əmin-amanlıq respublikamızda, eləcə də Naftalanda turizmin inkişafına böyük təkan verib.

Ümumiyyətlə, Naftalanın kurort şəhəri kimi keçmiş şöhrətini qaytarmağın və yeni məzmunda inkişafını təmin etməyin əsasını Prezident İlham Əliyev tərəfindən imzalanan sərəncamlar, qəbul edilən proqramlar və qarşıya qoyulan vəzifələrin icrası təşkil edir. Məhz bunların nəticəsidir ki, bu gün Naftalanda turizmin inkişafı üçün əlverişli şərait yaradılıb və Naftalan son illərdə beynəlxalq turizm mərkəzinə çevrilib. Hazırda da şəhərdə geniş abadlıq-quruculuq işləri və müasir səviyyəli sanatoriyaların tikintisi davam etdirilir.

Yeri gəlmişkən, ötən ilin dekabrında Naftalan Şəhər İcra Hakimiyyəti, Dövlət Turizm Agentliyi və Azərbaycan Turizm Bürosunun birgə təşkilatçılığı ilə Naftalan şəhərinin turizm inkişaf planı təqdim olunub. Naftalan Şəhər İcra Hakimiyyətinin başçısı Vüqar Novruzovun, Dövlət Turizm Agentliyinin sədri Fuad Nağıyevin, Azərbaycan Turizm Bürosunun sədri Floraian Sengstschimidin və məsul şəxslərin iştirak etdiyi tədbirdə Naftalanın turizm potensialı və şəhərdə fəaliyyət göstərən sağlamlıq və istirahət mərkəzləri barədə ətraflı məlumat verilib. Bildirilib ki, hazırda şəhərdə üçü 5 ulduzlu olmaqla 12 sanatoriya fəaliyyət göstərir. Eyni zamanda tikintisi başa çatdırılmış yeni Avtovağzal Otel Kompleksi, “Naftalan Hotel & Spa” və tikintisi dəvam etdirilən 3 yeni hotel-sanatoriya yaxın vaxtlarda şəhərin turizm potensialına öz töhfəsini verəcək. Naftalan turizmdən gələn gəlirlər hesabına 2016-ci ildən öz gəlirləri hesabına ödənilən 6 rayon və şəhərlərin siyahısına daxil edilib. Yeri gəlmişkən, qeyd edək ki, 2019-cu ildə Naftalana olan turist səfərləri rekord həddə çatıb - şəhərə 40 min turist gəlib. Onlardan 40 faizi dünyanın 61 ölkəsindən gələnlər olub.

(davamı növbəti sayımızda)

Nadir AZƏRİ

Yeni Azərbaycan.- 2020.- 3 sentyabr.- S.7.