“Əl Hərir” portalı iordaniyalı alimin Azərbaycandakı tolerantlığa dair məqaləsini yayıb

“Əl Hərir” informasiya portalı iordaniyalı alim Mərvan Sudanın “Azərbaycanda xristianlar və kilsə” sərlövhəli məqaləsini yayıb.

AZƏRTAC xəbər verir ki, dini mənsubiyyəti xristian olan, dini dözümlülük haqqında silsilə məqalə və kitabların müəllifi Mərvan Sudan Azərbaycandakı tolerantlığı bütün Şərq ölkələri üçün örnək adlandırıb. O yazıb: “İordaniyaya dost və qardaş ölkələr sırasında Azərbaycan həm qəlbimdə, həm də yazdığım kitablarda xüsusi yerə malikdir. Artıq 12 ildir ki, mən bu gözəl ölkədə baş verən proseslər barədə ərəb və rus dillərində xəbərləri yaxından izləyirəm. Heç vaxt şahidi olmadım ki, Azərbaycanda dini mənsubiyyətinə görə kimisə təqib etsinlər. Bunun səbəbi azərbaycanlıların başqa dinlərə və etnik qruplara dərin ehtiram ruhunda tərbiyə alması, bu keyfiyyətlərin xarakterik xüsusiyyət halına gəlməsidir. Mərhum Prezident Heydər Əliyevin əsasını qoyduğu və Prezident İlham Əliyevin davam etdirdiyi dünyaya örnək olacaq yüksək tolerantlıq və başqa dinlərə hörmət siyasəti Azərbaycanda dinindən və milliyyətindən asılı olmayaraq bütün insanların, ölkənin hər bir vətəndaşının azad və harmoniya şəraitində yaşamasına zəmin yaradıb. Məhz bunun nəticəsində Azərbaycan məğrur və ləyaqətli insanlar ölkəsidir, burada hər kəsin vicdan azadlığı, hüquqları təmin olunub”.

Bəzi insanların Azərbaycanın öz torpaqlarını işğaldan azad etmək uğrunda Ermənistana qarşı ədalətli müharibəsinin dini mahiyyət daşıdığı fikirlərinə etiraz edən müəllif yazıb ki, bu cür iddialar Azərbaycana qarşı haqsız informasiya müharibəsinin tərkib hissəsidir. Əsas məqsəd isə diqqəti BMT Təhlükəsizlik Şurasının qətnamələri və digər beynəlxalq təşkilatların qərarları ilə təsbit olunmuş ermənilərin işğalçı mahiyyətini ört-basdır etməkdir. Əksinə, bütün beynəlxalq ictimaiyyət, o cümlədən ərəb mediası Ermənistanı dini azadlıqlara və qonşu dövlətlərin ərazi bütövlüyünə hörmətlə yanaşmağa məcbur etməlidir. “Lakin bu ümumbəşəri humanitar çağırışlar Ermənistana təsir etmir və ermənilər qədim alban kilsələrini öz adlarına çıxaraq beynəlxalq aləmdə guya dini hüquqlarının pozulması barədə yanlış təsəvvür formalaşdırmağa çalışır, hay-küy salırlar”, - deyə müəllif vurğulayıb.

Yeni Azərbaycan.- 2021.- 21 aprel.- S.6