Milli Məclisin yaz sessiyası öz işinə başlayıb

Millət vəkilləri yaz sessiyasının qanunvericilik işləri planını təsdiq ediblər

Fevralın 1-də Milli Məclisin yaz sessiyası öz işinə başlayıb. Milli Məclisin Sədri Sahibə Qafarova yaz sessiyasını açıq elan etdikdən sonra Azərbaycan Respublikasının Dövlət Himni səsləndirilib.

İclasda deputatları yaz sessiyasının başlaması münasibətilə təbrik edən Milli Məclisin Sədri bildirib ki, Azərbaycan Respublikasının Prezidenti İlham Əliyevin liderliyi və müdrikliyi Azərbaycanı qələbədən qələbəyə aparır: “Xalqımız 2020-ci ili uğurla başa vurub, 2021-ci ilə böyük ruh yüksəkliyi və ümidlərlə qədəm qoyub. Bu gün biz bir daha qürurla söyləyirik ki, Ali Baş Komandanımızın rəhbərliyi ilə şanlı Ordumuz işğalçı Ermənistan silahlı qüvvələrini darmadağın edərək dövlətimizin ərazi bütövlüyünün bərpasına nail olub. Döyüş meydanında əldə edilən böyük zəfər siyasi-diplomatik müstəvidə də təsdiq edilib, uzun illər ərzində ölkəmizin inkişafına mane olan Ermənistan-Azərbaycan Dağlıq Qarabağ münaqişəsi tarixdə qalıb. Möhtərəm Prezidentimizin dediyi kimi, “Bu müharibə bütün dünyaya Azərbaycan xalqının nə qədər böyük xalq olduğunu göstərdi. ...Biz öz Vətənimizə, doğma Qarabağımıza qayıdırıq, Qarabağımızın tacı olan Şuşaya qayıdırıq və bu torpaqlarda əbədi yaşayacağıq!”.

Daha sonra Sədr qeyd edib ki, Prezidentimiz İlham Əliyevin daxili və xarici siyasətini qanunvericilik səviyyəsində dəstəkləmək üçün Milli Məclis bütün tədbirləri görüb. Milli Məclisin Sədri parlamentin indiyə qədər əldə etdiyi uğurları bu sessiyada da davam etdirəcəyinə və daha da artıracağına əminliyini ifadə edib. Spiker bildirib ki, yaz sessiyasının qanunvericilik planı hazırlanıb və bu sessiyada biz digər qanun layihələri ilə yanaşı, Konstitusiyanın və qanunların tələbinə uyğun olaraq, Nazirlər Kabinetinin hesabatını dinləyəcəyik. Bundan əlavə, 2020-ci ilin dövlət büdcəsinin icrası haqqında məsələ parlamentin gündəliyinə çıxarılacaq.

Sədr qeyd edib ki, yaz sessiyasının iclaslarında Hesablama Palatasının illik fəaliyyəti haqqında hesabat, İnsan hüquqları üzrə müvəkkilin (ombudsmanın) və bələdiyyələrin fəaliyyətinə inzibati nəzarəti həyata keçirən müvafiq qurumun illik məruzələri də Milli Məclisə təqdim ediləcək.

Çıxışının sonunda spiker onu da diqqətə çatdırıb ki, bu gündən etibarən Milli Məclisin yeni saytı yeni dizaynda istifadəçilərin ixtiyarına verilib.

Daha sonra cari məsələlərlə bağlı çıxış edən deputatlar Fazil Mustafa, Əli Məsimli, Zahid Oruc, Müşfiq Cəfərov, Siyavuş Novruzov, Aydın Mirzəzadə, Məlahət İbrahimqızı, Şahin İsmayılov, Tahir Kərimli, Elman Nəsirov və Erkin Qədirli fikirlərini bildiriblər, gündəliklə bağlı təkliflərini veriblər.

Sonra Millli Məclisin Sədri Sahibə Qafarova bildirib ki, gündəliyin 19 məsələsinin ilk 4 məsələsi qərar layihələridir. Hər sessiyanın əvvəlində bilirsiniz ki, parlamentin qanunvericilik işləri planı qəbul olunur və parlament öz fəaliyyətini həmin plan əsasında qurur. Gündəliyin ilk məsələsi Azərbaycan Respublikası Milli Məclisinin 2021-ci il yaz sessiyasının qanunvericilik işləri planı haqqındadır.

Deputatlar qanunvericilik işləri planı haqqında fikirlərini bildirdikdən sonra Azərbaycan Respublikası Milli Məclisinin 2021-ci il yaz sessiyasının qanunvericilik işləri planı səsə qoyularaq təsdiqlənib.

Sonra Milli Məclisin Daxili Nizamnaməsinin tələblərinə uyğun olaraq Milli Məclisin İntizam və Hesablayıcı komissiyaları yenidən təşkil edilib. Daha sonra iclasda Humay Əfəndiyevanın Azərbaycan Respublikası Konstitusiya Məhkəməsinin hakimi təyin edilməsi haqqında məsələyə baxılıb. Milli Məclis Sədrinin birinci müavini, Hüquq siyasəti və dövlət quruculuğu komitəsinin sədri Əli Hüseynlinin təqdimatından sonra deputatlar Razi Nurullayev, Hicran Hüseynova, Siyavuş Novruzov və Aydın Mirzəzadə namizəd barədə fikirlərini səsləndiriblər. Namizəd Humay Elçin qızı Əfəndiyevanın Konstitusiya Məhkəməsinin hakimi təyin edilməsi barədə məsələ səsə qoyularaq təsdiqlənib.

Milli Məclisin Sədri Sahibə Qafarova bildirib ki, Konstitusiya Məhkəməsi haqqında Qanunun 13-cü maddəsinə görə, Konstitusiya Məhkəməsinin hakimi vəzifəyə təyin olunduğu gün Milli Məclisin iclasında and içir.

Humay Əfəndiyeva Milli Məclisin iclasında Azərbaycan Respublikası Konstitusiya Məhkəməsi hakiminin andını səsləndirib, bu şərəfli və məsuliyyətli vəzifəyə onun namizədliyini irəli sürdüyünə görə cənab Prezident İlham Əliyevə təşəkkürünü bildirib.

Sonra iclasda Milli Məclisin İnsan hüquqları komitəsinin sədri Zahid Oruc “Azərbaycan Respublikası ilə Türkiyə Respublikası arasında media sahəsində strateji əməkdaşlıq haqqında” Anlaşma Memorandumunun təsdiq edilməsi barədə Qanun layihəsi haqqında prezentasiya ilə çıxış edib. Bildirib ki, bu sənəd iki ölkə arasında ikitərəfli əlaqələri gücləndirməklə strateji media ortaqlığının qurulmasını nəzərdə tutur. Qeyd olunub ki, Türkiyə mediasının tərkib hissəsini böyük media quruluşları təşkil edir və Türkiyə mediası qlobal medianın tərkib hissəsidir. Biz bunu praktiki olaraq 44 günlük müharibə dövründə bir daha gördük. Cənab Prezident İlham Əliyevin müsahibələrinin də dünyaya yayılması Türkiyə mediası üzərindən oldu. Ona görə də bu Memorandum mühüm əhəmiyyətə malikdir.

Parlamentin Mədəniyyət komitəsinin sədri Qənirə Paşayeva çıxışında sənədin əhəmiyyətini vurğulayıb.

Deputat Azay Quliyev Memorandumun imzalanmasını iki ölkə arasında yüksək münasibətlərin göstəricisi kimi səciyyələndirib.

“Azərbaycan və Türkiyə arasında media sahəsində strateji əməkdaşlıq haqqında” Anlaşma Memorandumunun imzalanması olduqca vacib və əlamətdar bir hadisədir. Çünki hazırkı tarixi inkişaf mərhələsində gücdən danışarkən biz həm də “yumşaq güc” kimi xarakterizə etdiyimiz informasiya gücündən danışırıq. Media isə bizim informasiya məkanımızın keyfiyyətini, trendini təyin edən vasitədir və əslində, elə həm də milli gücümüzün tərkib hissəsi kimi çıxış edir”. Bu fikirləri isə “Yeni Azərbaycan” qəzetinin baş redaktoru, Milli Məclisin Müdafiə, təhlükəsizlik və korrupsiya ilə mübarizə komitəsinin sədr müavini Hikmət Babaoğlu çıxışı zamanı deyib.

Hikmət Babaoğlu bildirib ki, şanlı Vətən müharibəsi zamanı da gördük ki, informasiya nə qədər güclü silahdır və Azərbaycan Prezidenti bu silahdan da düşmənin informasiya müharibəsinə qarşı necə məharətlə istifadə etdi: “Ona görə də qardaş Türkiyənin mediası ilə ortaq əməkdaşlıq və koordinasiya edilmiş fəaliyyət bizim qlobal informasiya məkanında gücümüzü daha da atıracaq və ortaq media platforması yaradacaqdır. İmzalanan Memorandumda bütün bu məsələlər öz əksini tapmaqla bir məsələ ayrıca vurğulanır. Sənəddə əlaqələrin və qarşılıqlı anlaşmanın təmin edilməsində medianın rolu xüsusi olaraq önə çəkilir və bunun inkişaf etdirilməsinin zəruriliyi qeyd edilir. Bu, çox mühüm məsələdir. Ona görə ki, qarşılıqlı dil, ünsiyyət anlaşması olmasa, birgə mediadan və onun səmərəli fəaliyyətindən də danışmaq olmaz. Dolayısıyla, sənəddə elə bir ortaq ünsiyyət mühitindən danışılır ki, orada anlaşma problemi yoxdur və bu, vəzifə kimi müəyyənləşdirilir. Ancaq çox təəssüf ki, bu çağırışlar bəzi media institutlarımız tərəfindən lazımi qədər diqqətə alınmır. Xüsusən son dövrlərdə Azərbaycan televiziya kanallarında efirə verilən və çox maraqla qarşılanan türk film və diziləri Azərbaycan dilinə tərcümə edilir”.

Millət vəkilinin fikrincə, bu, əslində, imzalanan Memorandumda irəli sürülən məqsədlərlə bir qədər uyğun gəlmir: “Onda belə çıxır ki, hər gün televiziya efirində ekspert, şərhçi qismində çıxış edən Türkiyəli mütəxəssislərin də fikirlərini tərcümə edib efirə verməliyik? Bu, doğru deyil. Mirzə Ələkbər Sabir hələ öz dövründə buna etiraz edərək, “türkcədən türkcəyə tərcümə də nə demək”, - deyə fikir bəyan etmişdi. Bəzi hallarda bununla da ürəyimiz soyumur, qardaş Türkiyə Cümhuriyyətinin adını Türkiyə Respublikası kimi tələffüz edirik. Bu, yolverilməzdir. Bu ölkəni quran Mustafa Kamal Atatürk onun adını Türkiyə Cümhuriyyəti qoyub. Adlar isə tərcümə edilmir. O başqa məsələdir ki, ərəb sözü olan “cəmahiriyyə” və ingilis sözü olan “republic” eyni mənanı verir. Yaxud “Zeytun dalı” əməliyyatını “Zeytun budağı”, “Barış Pınarı” əməliyyatını “Sülh bulağı” kimi yanlış tərcümələr edirik. Bunlar dil və dilçilik baxımından da təsdiq edəcəyimiz sənədin strateji məqsədləri baxımından doğru deyil. Ona görə də, fikrimcə, televiziyalarımız türk filmlərini tərcümə edərək efirə verməməlidirlər. Tam əksinə, Türkiyə televiziyaları ilə birlikdə Vətən müharibəsindən bəhs edən filmlər, dizilər çəkməlidir”.

Hikmət Babaoğlu bu sənəddə öz əksini tapan məqsədlərin bütün mediamızın fəaliyyət proqramına çevriləcəyinə ümidvar olduğunu söyləyib.

Müzakirələrdən sonra sənəd təsdiqlənib.

Sonra “Azərbaycan Respublikası Hökuməti ilə Türkiyə Respublikası Hökuməti arasında qarşılıqlı olaraq vizadan azadetmə haqqında 25 fevral 2020-ci il tarixində Bakı şəhərində imzalanmış Sazişə dəyişikliklər edilməsi haqqında Azərbaycan Respublikası Hökuməti ilə Türkiyə Respublikası Hökuməti arasında 1 saylı Protokol”un təsdiq edilməsi barədə Azərbaycan Respublikası qanununun layihəsi müzakirə olunaraq qəbul edilib.

İclasda “Məşğulluq haqqında” Qanuna dəyişiklik məsələsi birinci oxunuşda müzakirəyə çıxarılıb. Bu barədə parlamentin Əmək və sosial siyasət komitəsinin sədri Musa Quliyev məlumat verib. Dəyişikliklərə əsasən, sosial müdafiəyə xüsusi ehtiyacı olan və işə düzəlməkdə çətinlik çəkən şəxslərin dairəsinə şəhid ailələrinin üzvləri də aid edilir. Bundan sonra peşə hazırlığının, işsiz şəxslərin özünüməşğulluğunun və sosial iş yerlərinin təşkili zamanı şəhid ailələrinin üzvlərinə də digər həssas qruplarla birlikdə üstünlük veriləcək. Bununla yanaşı, dəyişikliyə əsasən, sosial müdafiəyə ehtiyacı olan qrup kimi 5 faizlik növbədənkənar işə götürülmə kvotası şəhid ailələrinin üzvlərinə də şamil ediləcək.

Son dövrlər dövlət qəbul etdiyi bir sıra qanunvericilik aktları ilə şəhid ailələri ilə bağlı təminatları həm sadələşdirir, həm də onların təminatlarını daha da artırır. Bu dəyişikliklə dövlət şəhid ailələrinin sosial təminatının daha da yaxşılaşdırılması məqsədini güdür.

Qanuna dəyişikliklər birinci oxunuşda səsverməyə qoyularaq qəbul edilib.

Daha sonra iclasda gündəlikdə olan digər məsələlər də müzakirə edilərək qəbul olunub.

Nardar BAYRAMLI

Yeni Azərbaycan.- 2021.- 2 fevral.- S.5.