Azərbaycançılıq ideologiyası və yetişməkdə olan yeni nəslin vətənpərvərlik ruhunda tərbiyəsi

Azərbaycanın Vətən müharibəsində qazandığı şanlı qələbənin məktəblərdə geniş təbliğ olunması, dərsliklərdə qəhrəmanlarımızın keçdikləri həyat yolundan, onların döyüş meydanında göstərdikləri şücaətlərdən bəhs edilməsi böyüməkdə olan nəslin milli ruhda tərbiyəsi baxımından mühüm əhəmiyyətə malikdir

Azərbaycançılıq müasir müstəqil dövlətimizin ideya əsasını təşkil edir. Bu ideologiya ölkəmizin bütün vətəndaşlarını vahid amal uğrunda birləşdirir. Heç şübhəsiz ki, azərbaycançılıq ideologiyası mütərəqqi baxışları özündə ehtiva edən bir sıra prinsipləri önə çəkir. Bunlardan biri də vətənpərvərliyin təbliği və yaxud milli ruhda tərbiyə məsələsidir. Bu konteksdən çıxış edərək vurğulayaq ki, gənc nəslin milli köklərimizə, mənəvi dəyərlərimizə, tarixdən gələn ənənələrimizə bağlılıq, Vətənə sevgi, dövlətçiliyə sədaqət ruhunda tərbiyə olunması indiki dövrdə də qarşıda duran ən ümdə vəzifələrdəndir.

Azərbaycan gəncləri onlara bəslənilən ümidləri Vətən müharibəsində layiqincə doğrultdular

Heç şübhəsiz, müstəqil Azərbaycanda uğurlu gənclər siyasəti aparılır. Bu gün tam əminliklə demək mümkündür ki, respublikamızda Ulu Öndər Heydər Əliyevin əsasını qoyduğu dövlət gənclər siyasəti keyfiyyətcə yeni mərhələyə daxil olub. Ölkəmizdə Prezident İlham Əliyevin siyasi iradəsinə uyğun olaraq gənclərə hərtərəfli qayğı göstərilir, “qara qızıl”ın insan kapitalına çevrilməsi, gənclərin keyfiyyətli təhsilə əlçatanlığının təmin olunması istiqamətində ardıcıl tədbirlər görülür. Azərbaycan gəncləri isə bu diqqət və qayğını yüksək dəyərləndirməklə yanaşı, öz məsuliyyətlərini dərindən dərk edir və Prezident İlham Əliyevin müəyyənləşdirdiyi strateji vəzifələrin uğurla həyata keçirilməsinə, respublikamızın qüdrətinin daha da artmasına öz töhfələrini verməyə çalışırlar.

Azərbaycan gəncləri üçün mühüm sınaqlardan biri də ötən il sentyabrın 27-dən noyabrın 10-dək davam edən Vətən müharibəsi oldu. Gənclər onlara bəslənilən ümidləri Vətən müharibəsində layiqincə doğrultdular. Məhz gənc əsgər və zabitlərimizin rəşadəti sayəsində Azərbaycan ərazi bütövlüyünü bərpa etdi, xalqımız otuz illik həsrətdən sonra tarixi torpaqlarımıza qovuşdu. Müharibənin əsas ağırlığı isə məhz gənclərin üzərinə düşdü. Müharibə dövründə Azərbaycan gəncləri Müzəffər Ali Baş Komandanın bütün əmrlərini yerinə yetirməyə, sərhədlərimizi qorumağa, torpaqlarımızı erməni işğalçılarından azad etməyə hazır olduqlarını bir daha nümayiş etdirdilər. Müharibənin ilk günlərindən on minlərlə gənc Səfərbərlik və Hərbi Xidmətə Çağırış üzrə Dövlət Xidmətinin ərazi şöbələrinə müraciət edərək ordu sıralarına yazılmaq istədiyini bildirdi. Müharibədə torpaqlarımızın azadlığı uğrunda düşmənə qarşı vuruşmaq hər bir Azərbaycan gəncinin həyat amalına çevrilmişdi. Gənclərimiz döyüş meydanında göstərdikləri şücaətləri ilə Prezident, Ali Baş Komandan İlham Əliyevin etimadını layiqincə doğrultmağa, üzərlərinə düşən missiyanı yerinə yetirməyə qadir olduqlarını təsdiqlədilər.

Vətən müharibəsində Ordumuzun qəhrəmanlıq salnaməsi dərsliklərə salınır

Əlbəttə gənc əsgər və zabitlərimizin Vətən müharibəsində göstərdikləri qəhrəmanlıqların yüksək səviyyədə təbliğ olunması müstəsna əhəmiyyətə malikdir. Bu, böyüməkdə olan nəslin vətənpərvərlik ruhunda formalaşması üçün çox vacibdir. Yeni dərsliklərin yazılması, bu dərsliklərdə qəhrəmanlarımızın keçdikləri həyat yolundan, onların döyüş meydanında göstərdikləri şücaətlərdən bəhs edilməsi mühüm önəm daşıyır. Yeri gəlmişkən, Azərbaycan Respublikasının təhsil naziri Emin Əmrullayev mətbuata açıqlamasında Vətən müharibəsinin ayrı-ayrı məqamlarının incəliklə araşdırılacağını və tədrisin məzmununda əks etdiriləcəyini vurğulayıb.

Təhsil Nazirliyinin təsdiqlədiyi Fəaliyyət Planına əsasən Ordumuzun şanlı qələbəsi 9 istiqamətdə təbliğ olunacaq

Yeri gəlmişkən, bu günlərdə Təhsil Nazirliyinin “Azərbaycan xalqının tarixi qələbəsinin tədrisdə əks etdirilməsi haqqında” 2020-2021-ci tədris ili üçün Fəaliyyət Planı təsdiqlənib. Bəhs olunan planın təsdiqlənməsində məqsəd dövlətimizin qazandığı nailiyyətləri təşviq etməkdən, Azərbaycan Ordusunun şanlı qələbəsi barədə maarifləndirici tədbirlər görməkdən ibarətdir. Nazirlikdən qəzetimizə bildirilib ki, Fəaliyyət Planı 9 əsas istiqaməti əhatə edir. Sənəddə Azərbaycan Respublikasının Prezidenti, Müzəffər Ali Baş Komandan İlham Əliyevin Vətən müharibəsində Azərbaycanı şanlı qələbəyə aparan daxili və xarici siyasəti, Azərbaycan Ordusunun dünya hərb tarixində açdığı yeni səhifə ilə bağlı ətraflı məlumatların bütün fənlərin məzmununa uyğun şəkildə inteqrasiyasının təmin olunması nəzərdə tutulub. Fəaliyyət Planında Qarabağ və işğaldan azad olmuş bölgələrin (yaşayış məntəqələrinin) tarixi və coğrafiyası, flora və faunası, mədəni abidələri, dini ibadətgahları, adət-ənənələri, şifahi xalq yaradıcılığı, tanınmış şəxsiyyətləri və s. barədə məlumatların dərslərə inteqrasiyası, müxtəlif layihə və tədbirlərin təşkili, vətəndaşlıq mövqeyinin formalaşmasında mənəvi və fiziki sağlamlıq amilinin əhəmiyyətinin təbliği əsas yer alır.

Bəhs olunan Fəaliyyət Planına əsasən, Vətən müharibəsi şəhidlərinin anım günləri keçiriləcək, onların həyat və mübarizə yolunu əks etdirən videobülletenlər hazırlanacaq. Bundan əlavə, “Dərs vaxtı” layihəsi çərçivəsində Vətən müharibəsinə, Azərbaycan Ordusunun şanlı qələbəsinə həsr edilən dərslər, videoçarxlar hazırlanması və telekanallarda yayımlanması nəzərdə tutulur.

“Qələbə dərsləri” adı altında müxtəlif siniflər və müxtəlif fənlər üzrə mövzular hazırlanıb

Məsələ ilə bağlı qəzetimizə açıqlama verən Nazirliyin Ümumi təhsildə məzmun, tədris və qiymətləndirmə şöbəsinin müdiri Vəfa Yaqublu bildirib ki, Azərbaycan Ordusunun döyüş meydanında yazdığı qəhrəmanlıq tarixini gələcək nəsillərin daha rahat öyrənmələri üçün dərsliklərə dəyişikliklər edilir. Artıq bununla bağlı işlərə başlanıb: “Tarixi qələbəmiz təhsilin məzmununda öz yerini tutmaqdadır. Bu proses mütəmadi davam etdiriləcəkdir. Dərsliklərin yazılması, çap edilməsi xeyli vaxt, əmək, maliyyə tələb edən prosesdir. Bu gün bütün dərslikləri birdən-birə dəyişdirmək, təkmilləşdirmək mümkün deyil. Lakin bizim kağız dərsliklərlə yanaşı, elektron dərsliklərimiz də vardır ki, kiçik və operativ düzəlişləri həmin versiyalarda etmək mümkündür. Artıq bu istiqamətdə işlərə başlanılıb. Vətən müharibəsində qələbəmiz elə bir mühüm hadisədir ki, mütləq hər bir sinif otağında - bu gün virtual sinifdə olsa da, öyrənilməli, müzakirə obyektinə çevrilməli və inkişaf stimulu olmalıdır. İnkişaf stimulu haqqında xüsusi danışmaq lazımdır. Bu qələbə bizi sevindirməklə yanaşı, çiyinlərimizə məsuliyyət də qoyub. Bu məsuliyyət əzəli torpaqlarımızı qoruyub saxlamaq qeyrəti, düşmənin xaraba qoyduğu əraziləri rahat yaşayıb işləmək üçün qurmaq əzmi deməkdir”.

Dəyişikliklərlə bağlı məlumatlar artıq məktəblərə çatdırılıb. Vəfa Yaqublunun sözlərinə görə, müəllimlərə tapşırıq verilib ki, bəhs olunan mövzulardan virtual dərslərdə istifadə etsinlər: “Ötən müddət ərzində dərslik müəlliflərimiz, nəşriyyatlarımız “Qələbə dərsləri” adı altında müxtəlif siniflər və müxtəlif fənlər üzrə mövzular hazırlayıblar. Bunlar xüsusi dərs mövzularıdır və həmin dərs mövzuları Təhsil İnstitutunun elektron səhifəsində yerləşdirilib. Həmçinin bu barədə məlumatlar məktəblərə çatdırılıb. Teledərslərdə də qələbəyə həsr olunan süjetlər hazırlanıb. Tapşırıq verilib ki, müəllimlər öz virtual dərslərində həmin mövzulardan istifadə etsinlər”, - deyə Vəfa Yaqublu bildirib.

Azərbaycançılıq və vətənpərvərlik kimi dəyərlər nə qədər geniş təbliğ olunarsa, dövlətimiz də bir o qədər güclü və yenilməz olar

Milli Məclisin deputatı Məlahət İbrahimqızı isə qəzetimizə açıqlamasında məsələnin böyük aktuallıq daşıdığını diqqətə çatdırıb. Millət vəkili Azərbaycanın möhtəşəm tarixi qələbəsinin geniş təbliğ olunmasının mühüm əhəmiyyətə malik olduğunu, bu amilin yeni nəslin vətənpərvərlik ruhunda tərbiyəsi baxımından xüsusi önəm daşıdığını vurğulayıb. Məlahət İbrahimqızı deyib: “Elə xalqlar var ki, onların tarixində qəhrəmanlıq səhifələri çox azdır və yaxud heç yoxdur. İşğalçı Ermənistanın tarixi də buna misaldır. Bu ölkənin tarixi ixtilaflar, xəyanətlər üzərində qurulub. Üç onillik ərzində davam edən Dağlıq Qarabağ münaqişəsi deyilənlərə bir nümunədir. Erməni hərbi birləşmələri Azərbaycan Ordusuna qarşı açıq döyüşlərdə heç vaxt qələbə çalmayıb. Aciz durumda olan ermənilər məğlubiyyətlərinin əvəzini yaşayış məntəqələrini, dinc sakinləri atəşə tutmaqla çıxmağa çalışıblar. Azərbaycan Ordusu isə düşmənə qarşı döyüşləri həmişə mərdliklə aparıb. 44 günlük Vətən müharibəsində qazandığımız möhtəşəm qələbə Azərbaycan Ordusunun gücünü - qüdrətini, xalqımızın mübarizliyini və milli birliyini göstərən bariz nümunədir”, - deyə Milli Məclisin deputatı vurğulayıb.

Məlahət İbrahimqızı bildirib ki, böyüməkdə olan nəslə vətənpərvərlik ruhunun aşılanması məsələsinə, xüsusilə tədris müəssisələrində diqqət yetirilməsi böyük əhəmiyyətə malikdir. Milli Məclisin deputatının sözlərinə görə, azərbaycançılıq ideologiyası ilə vətənpərvərlik anlayışı bir-biri ilə sıx vəhdət təşkil edir: “Bu dəyərlərin hər ikisini orta məktəblərdə, institutlarda daim təbliğ etməliyik. Heç şübhəsiz, azərbaycançılıq və vətənpərvərlik kimi dəyərlər nə qədər geniş təbliğ olunarsa, dövlətimiz də bir o qədər güclü və yenilməz olar”.

Müşfiqə BAYRAMLI

Yeni Azərbaycan.- 2021.- 11 fevral.- S.7.