Heydər Əliyev Fondunun dəstəyi ilə hazırlanan www.khojalytoday.com akademik resurs bazasının təqdimatı olub

Fevralın 26-da Bakı Kitab Mərkəzində “Xocalıya ədalət!” beynəlxalq maarifləndirmə kampaniyası çərçivəsində Heydər Əliyev Fondunun dəstəyi ilə hazırlanan www.khojalytoday.com akademik resurs bazası təqdim edilib.

AZƏRTAC xəbər verir ki, əvvəlcə faciə qurbanlarının xatirəsi bir dəqiqəlik sükutla yad edilib.

Bakı Kitab Mərkəzinin direktoru Günel Anarqızı bildirib ki, Xocalı soyqırımı özlüyündə daha qlobal və bəşəri hadisədir: “Şanlı Azərbaycan Ordusu və xalqı Ali Baş Komandan İlham Əliyevin başçılığı ilə 44 gün davam edən Vətən müharibəsi dövründə Qarabağ münaqişəsini həll edərək tarixə qovuşdursa da, Xocalıya ədalət savaşı hələ də davam edir. Düşünürük ki, bu proses ədalət öz yerini tapana və Xocalı cinayətkarları hüquqi cəzalarının alana qədər davam etdirilməli, Xocalıda mülki əhaliyə qarşı törədilmiş cinayətə hüquqi qiymət verilməli, cinayətkarlar məsuliyyətə cəlb olunmalı, bəşəriyyət tərəfindən lənətlənən cinayətlər sırasına Xocalı soyqırımı da əlavə edilməli və gələcək nəsillərə çatdırılmalıdır”.

Bu istiqamətdə erməni vandalizminin bariz nümunəsi olan Xocalı soyqırımının dünya ictimaiyyətinə və gələcək nəsillərə çatdırılması üçün Heydər Əliyev Fondunun dəstəyi ilə dövlət sənədlərinə, beynəlxalq və yerli müəlliflərə, soyqırımı dövründə beynəlxalq mediada yer alan xəbərlərə, Xocalı qurbanlarının şahidlərinin ifadələrinə və nəhayət, soyqırımında rol oynayan erməni vandallarının öz çıxış və etiraflarına istinad edərək “Khojaly Today” akademik resurs bazasının yaradılmasının təqdirəlayiq hadisə adlandıran G.Anarqızı deyib: “Qloballaşan dünyada əsas istinad edilən mənbələrin internet məlumat bazalarının olduğunu nəzərə alaraq “Khojaly Today” akademik resurs bazasının yaradılmasının, bu günə qədər Xocalı soyqırımı ilə bağlı faktların, fotoların, videoların, məqalə və kitabların orada yerləşdirilməsi, dünyanın bütün kitabxanalarında və kitab evlərində akademik mənbə kimi təqdim edilməsi və qeydiyyatdan keçirilməsi Xocalıya ədalət savaşının hüquqi qiymət alması istiqamətində mühüm rol oynayacağına və beynəlxalq ictimaiyyətin Xocalı soyqırımı istiqamətində hər hansı resurs arayışı fonunda önəmli yer tutacağına inanırıq”.

Sonra Berlin Humboldt Universitetin doktorantı, saytın qurucu komandasının koordinatoru Şamxal Əbilov www.khojalytoday.com akademik resurs bazası haqqında məlumat verib. Bildirib ki, Xocalı soyqırımı barədə həqiqətlərin dünyaya çatdırılması məqsədilə yaradılan resurs bazasında Xocalı faciəsinə aid rəsmi sənədlər, beynəlxalq və yerli müəlliflərin akademik yazıları, bu barədə beynəlxalq mediada yayımlanan materiallar, soyqırımı şahidlərinin ifadələri toplanıb. Elektron baza tədqiqatçılar, tələbələr və Xocalı haqqında məlumat əldə etmək istəyən müxtəlif şəxslər üçün ümumiləşdirilmiş mənbə rolunu oynayır.

“Xocalı xarici mediada” bölümündə soyqırımın baş verdiyi dövrdə xarici jurnalistlər tərəfindən qələmə alınan və dünyanın bir çox aparıcı media səhifələrində nəşr edilən xəbərlər yer alıb.

“Resurs” bölməsində videoçarxlar və sənədli filmlərlə yanaşı, Xocalı soyqırımını əhatə edən, beynəlxalq və yerli müəlliflər tərəfindən qələmə alınan akademik kitablar, elmi məqalələr, xarici fotoqraflar tərəfindən lentə alınmış və ermənilərin Xocalıda törətdikləri vəhşilikləri özündə əks etdirən fotolar, hadisəyə dair şahid ifadələri, soyqırımı pisləyən və qarşısının alınmasına yönələn konvensiya və müqavilələr yer alır.

Qeyd edib ki, bu günədək bir çox ölkələr Xocalı soyqırımının ermənilər tərəfindən törədildiyini bəyan edən qətnamələr qəbul edib, bir sıra ölkələrdə Xocalı soyqırımı qurbanlarının xatirəsini əbədiləşdirən abidələr qoyulub. www.khojalytoday.com resurs bazasının “Beynəlxalq dəstək” bölməsində məhz buna yer verilib.

“Resurs” bazası, həmçinin Dağlıq Qarabağ münaqişəsinin tarixi, hüquqi və siyasi tərəfləri ilə, ermənilərin 30 ilə yaxın müddətdə işğal dövründə həmin ərazilərdə mədəni irsimizə və təbii sərvətlərimizə qarşı apardıqları vandalizm siyasətinə dair materiallarla tanış olmağa imkan yaradır.

Yeni Azərbaycan.- 2021.-27 fevral.- S.9.