“Pandemiyaya kütləvi immunitet formalaşdıqda qalib gələ bilərik”

Hazırda dünyanın bir çox ölkəsində yeni növ koronavirus (COVID-19) infeksiyasına yoluxma hallarında artan temp müşahidə edilir. Mütəxəssislərin qənaətinə görə, insanlar məsələyə kifayət qədər ciddi yanaşmalı və vaksinasiyada fəal iştirak etməlidirlər.

Məsələ ilə bağlı açıqlama verən həkim-infeksionist Aydan Baxşıyeva bildirib ki, pandemiyaya kütləvi immunitet formalaşdıqda qalib gələ bilərik. O vaksinasiyanın əhəmiyyətindən bəhs edərək deyib ki, peyvəndləmə bir məqsədə - anticisimlərin yaranmasına xidmət edir. Əsas funksiyası virusu neytrallaşdırmaqdır. Əgər anticisim varsa, virusu neytrallaşdıracaq.

“Sosial məsafəni saxlamaq, gündəlik gigiyenik qaydalarına riayət etmək olduqca vacibdir, eyni zamanda, infeksiyaya qarşı əsas mübarizə üsulu, ondan qorunmağın ən etibarlı yolu peyvənd olunmaqdır. Bir sözlə, xəstəliyin fəsadları ilə üzləşməmək üçün profilaktik olaraq vaksinasiya aparılması tövsiyə edilir”, - deyə mütəxəssis vurğulayıb.

Onun sözlərinə görə, gigiyena qaydalarına mütləq əməl edilməlidir: “İlk növbədə, əllərin gigiyenası gözlənilməlidir. İctimai nəqliyyatdan istifadə etdikdə, bank, ofis və digər müəssisələrə gedib gələndə qapı və dəstəklərə toxunulduğuna görə xüsusilə əllərin gigiyenasına ciddi şəkildə əməl olunmalıdır. Əllər ilıq su altında sabunlanmalı, gün ərzində ən çox istifadə edilən telefon, açar və digər əşyaların səthləri vaxtaşırı dezinfeksiya olunmalıdır”.

MÜŞFiQƏ

Yeni Azərbaycan.- 2021.- 11 sentyabr.- S.6.