Xaricdə yaşayan soydaşlarımız ana Vətənə yüksək bağlılıq nümayiş etdirirlər

Son vaxtlarda azərbaycanlılar dünyanın bir sıra iri şəhərlərində genişmiqyaslı aksiyalar, layihələr həyata keçirərək ölkəmizlə bağlı həqiqətlərin beynəlxalq ictimaiyyətin diqqətinə çatdırılmasına öz töhfələrini verirlər

Xalqımızın Ümummilli Lideri Heydər Əliyevin əsasını qoyduğu və sonrakı mərhələdə Prezident İlham Əliyevin rəhbərliyi ilə aparılan məqsədyönlü siyasət sayəsində daha da zənginləşdirilən azərbaycançılıq ideologiyası milli və dini mənsubiyyətindən asılı olmayaraq, ölkənin bütün vətəndaşlarını ümumi amallar uğrunda birləşdirib. Deyə bilərik ki, ötən dövrdə azərbaycançılıq ideologiyasının yüksək səviyyədə təbliğ olunması, bu məqsədlə davamlı tədbirlərin həyata keçirilməsi sayəsində ölkəmizdə nümunəvi ab-hava yaranıb. Bu gün davamlı sabitlik, vətəndaş həmrəyliyi, insanların ümummilli məsələlərə həssaslıqla yanaşmaları Azərbaycanın mənzərəsini səciyyələndirən cəhətlərdir.

Bu konteksdə diqqəti çəkən digər bir mühüm məqam isə müxtəlif səbəblərdən respublikamızdan kənarda yaşayan soydaşlarımızın ana Vətənə yüksək bağlılıq nümayiş etdirmələridir. Biz azərbaycançılıq ideologiyası ətrafında sıx birləşən soydaşlarımızın son vaxtlarda dünyanın bir sıra iri şəhərlərində genişmiqyaslı aksiyalar, layihələr həyata keçirdiklərinin şahidi oluruq. Bu qəbildən olan tədbirlərə, adətən, yerli vətəndaş cəmiyyətlərinin fəalları, siyasi və mədəni çevrələrin təmsilçiləri də qatılırlar. Həmçinin soydaşlarımızın xarici ölkələrdə keçirdikləri aksiyalar müxtəlif dillərdə işıq üzü görən kütləvi informasiya vasitələrində geniş şəkildə işıqlandırılır. Beləliklə də, həmvətənlərimiz ölkəmizin həqiqətlərini beynəlxalq ictimaiyyətin diqqətinə çatdırılmasına öz töhfələrini verirlər. Məhz onların aktiv fəaliyyətinin nəticəsidir ki, tarixi faktlara, ədalətə, humanizm prinsiplərinə əsaslanan Azərbaycan həqiqətləri getdikcə daha böyük auditoriyalarda rəğbət qazanmaqdadır.

Azərbaycan Silahlı Qüvvələrinin ötən il sentyabrın 27-dən noyabrın 10-dək davam edən Vətən müharibəsində qazandığı şanlı qələbə xalqımızın qürur mənbəyi olaraq tarixdə əbədi qalacaq. Bu qələbə sayəsində üç onillik ərzində davam edən Dağlıq Qarabağ münaqişəsi tarixə qovuşdu, ölkəmizin ərazi bütövlüyü tam təmin olundu. Bu qələbənin təmin olunmasını şərtləndirən amillər sırasında xalqımızın birliyi müstəsna rol oynadı. Vətən müharibəsinin başladığı ilk günlərdən ölkəmizdə fəaliyyət göstərən əksər siyasi partiyaların təmsilçiləri yüksək həmrəylik nümunəsi sərgiləyərək Prezident, Ali Baş Komandan İlham Əliyevə birmənalı dəstəklərini bildirdilər.

Eyni zamanda, xaricdə yaşayan soydaşlarımızın Vətən müharibəsi günlərində nümayiş etdirdikləri həmrəylik hər cür xoş sözə layiqdir. Həmin günlərdə erməni diasporunun təsir dairəsinin kifayət qədər güclü olduğu ölkələrin iri şəhərlərində Dağlıq Qarabağ münaqişəsi ilə bağlı əsl həqiqətlərin səsləndirildiyi çoxsaylı mitinqlərin, küçə yürüşlərinin keçirilməsinin asan olmadığını təsəvvür etmək çətin deyil. Bir sıra hallarda erməni lobbisinin təsir dairəsində olan yerli hakimiyyət və güc strukturları belə tədbirlərin qarşısını almağa böyük səy göstərirdilər. Lakin diaspor təşkilatlarımız güclü həmrəylik göstərərək planlaşdırdıqları tədbirlərin baş tutmasına nail olurdular. Soydaşlarımızın keçirdikləri belə tədbirlərin coğrafiyası da kifayət qədər geniş idi. Qardaş Türkiyə, Gürcüstan, Rusiya Federasiyası, Fransa, Almaniya, ABŞ və digər çoxsaylı ölkələr bu siyahıda yer alır. Ümumiyyətlə, Azərbaycanlıların Koordinasiya Şuralarında birləşən diaspor təşkilatları Dağlıq Qarabağ münaqişəsi ilə bağlı ölkəmizin haqlı mövqeyini qətiyyətlə müdafiə edib və erməni təxribatlarına bütün səviyyələrdə layiqli cavab veriblər. Ötən ilin yayında baş verən Tovuz hadisələri zamanı, eləcə də Vətən müharibəsi başlayan gündən etibarən dünya azərbaycanlıları ayağa qalxaraq respublikamıza dəstək məqsədilə ümumilikdə 182 aksiya, yürüş-mitinq keçiriliblər. Bundan başqa, soydaşlarımız tərəfindən müxtəlif beynəlxalq təşkilatlara, səlahiyyətli şəxslərə minlərlə bəyanat ünvanlanıb, dünyanın demək olar ki, hər yerində 26 dildə məlumatlar yayılıb.

44 günlük Vətən müharibəsi günlərində xaricdə yaşayan soydaşlarımız yalnız aksiyalar keçirməklə, informasiya təbliğatı aparmaqla kifayətlənməyiblər. Onlar, həmçinin Silahlı Qüvvələrimizə, şəhid ailələrinə və qazilərimizə maddi dəstək göstərilməsində yüksək fəallıq nümayiş etdiriblər. Məsələn, müharibə günlərində Amerikanın və Avropanın müxtəlif ölkələrində fəaliyyət göstərən Azərbaycan diaspor təşkilatları tərəfindən ordumuza, şəhid ailələrinə və qazilərimizə 332.640 manat, 188.416 ABŞ dolları və 118.782 avro məbləğində maddi dəstək göstərilib. Könüllü şəkildə yığılan vəsaitlər Azərbaycan Diasporuna Dəstək Fondu və Silahlı Qüvvələrə Yardım Fondu vasitəsilə, eləcə də birbaşa olaraq çatdırılıb. Bundan başqa, soydaşlarımızın təşəbbüsü ilə əsgərlərimiz üçün isti geyimlər, ərzaq bağlamaları, tibbi avadanlıqlar da göndərilib. Kanadada yaşayan bir qrup soydaşımız isə 101 şəhid ailəsini himayəyə götürüb. Belə misalların sayı kifayət qədər çoxdur.

Xaricdə yaşayan azərbaycanlılar tərəfindən ana Vətənə dəstək, milli mədəniyyətimizin təbliği ilə bağlı aksiyalar müharibə başa çatdıqdan sonra da davam etdirilir. Məsələn, ABŞ-ın Men ştatında Azərbaycanın Vətən müharibəsindəki tarixi qələbəsini əks etdirən layihə gerçəkləşdirilib. Layihə Men ştatında Azərbaycan icmasının rəhbəri Tərlan Əhmədovun təşəbbüsü ilə keçirilib. Diasporla İş üzrə Dövlət Komitəsinin dəstəyi ilə baş tutan və bir həftə davam edən aksiya zamanı üzərində Azərbaycanın tarixi abidələrini, dövlət atributlarını, zəngin mədəniyyət nümunələrini, Bakı şəhərinin gözəlliklərini və Qarabağ həqiqətlərini əks etdirən rəqəmsal plakatların olduğu xüsusi avtomobil ştatın müxtəlif şəhərlərində dolaşaraq sakinlərin diqqətini ölkəmizə cəlb edib. Elektron lövhədəki müxtəlif şəkillərin fonunda “Azərbaycanda inanc müxtəlifliyinə qayğı ilə yanaşılır”, “Azərbaycanda gözəllik, mədəniyyət, tarix və ənənələr yanaşıdır”, “Qəlbini Azərbaycana sevgi və barışla zəngin et” çağırışları, eləcə də “Xarı bülbül” çiçəyinin təsviri və “Qarabağ Azərbaycandır!” şüarı əks olunub.

Digər belə bir tədbir Norveçin paytaxtı Osloda baş tutub. Belə ki, Norveçdə fəaliyyət göstərən “CAN” Azərbaycan-Norveç diaspor təşkilatının təşəbbüsü və Diasporla İş üzrə Dövlət Komitəsinin dəstəyi ilə paytaxt Oslonun mərkəzi küçələrində Qarabağ həqiqətlərindən bəhs edən 200 reklam lövhəsi (bilbord) quraşdırılıb. Layihə yerli ictimaiyyətin diqqətini Qarabağ həqiqətlərinə və 44 günlük Vətən müharibəsində Azərbaycanın şanlı qələbəsinə cəlb etmək məqsədilə gerçəkləşdirilib. Layihə çərçivəsində yerli vətəndaş cəmiyyətinə noyabrın 10-da imzalanan üçtərəfli Bəyanatın şərtlərinə riayət olunmasına birgə səylər göstərilməsi, Azərbaycan ərazilərində humanitar aksiyaların həyata keçirilməsinin mümkün olması ilə bağlı çağırışlar səsləndirilib. Layihənin müəllifləri, həmçinin dünya ictimaiyyətini Ermənistanın azərbaycanlılara qarşı törətdiyi hərbi cinayətlərə diqqət yetirməyə çağırıblar. Bilbordlarda yerləşdirilən fotoşəkillər arasında məşhur fotoqraf Reza Deqqatinin birinci və ikinci Qarabağ savaşı zamanı çəkdiyi fotolardan da istifadə olunub.

Böyük Britaniyadakı azərbaycanlı icmasının təşəbbüsü ilə London şəhərində xalqımızın zəngin mədəniyyətini və ənənələrini vəsf edən layihənin gerçəkləşdirilməsi də təqdirəlayiq haldır. Layihə çərçivəsində London metrosunun 20 stansiyasında quraşdırılmış 6 lövhədə Azərbaycanın bugünkü reallıqlarını, o cümlədən milli mədəniyyətimizin müxtəlifliyini və rəngarəngliyini əks etdirən fotoşəkillər bir-birini əvəzləyib. Sərnişinlər tərəfindən olduqca maraqla qarşılanan layihənin icrasına ötən il dekabrın 20-dən başlanılıb. Layihə cari il yanvar ayının əvvəlində başa çatıb.

Azərbaycan dövləti xaricdəki diaspor təşkilatlarının ana Vətən naminə fəaliyyətlərini hər zaman yüksək dəyərləndirir. Diasporla İş üzrə Dövlət Komitəsi Dünya Azərbaycanlılarının Həmrəyliyi Günü münasibətilə diaspor təşkilatlarının üzvlərini - bütövlükdə 30 ölkədə yaşayan 92 nəfər diaspor fəalını “Diaspor fəaliyyətində xidmətə görə” medalı ilə təltif edib. Xaricdə yaşayan soydaşlarımız yüksək dövlət təltifinə diasporun ana Vətənlə əlaqələrinin möhkəmləndirilməsində, beynəlxalq aləmdə respublikamızla bağlı obyektiv informasiyaların yayılmasında, eləcə də Azərbaycan dilinin və mədəniyyətinin xarici ölkələrdə təbliğində, respublikamızın beynəlxalq aləmdə ikitərəfli və çoxtərəfli əlaqələrinin genişlənməsində göstərdikləri xidmətlərə görə layiq görülüblər. Yeri gəlmişkən, “Diaspor fəaliyyətində xidmətə görə” medalı ilə təltif edilən soydaşlarımız bunu yüksək minnətdarlıq hissi ilə qarşılayıblar. Onlar bundan sonra da hər zaman ana Vətənin yanında olacaqlarını, dövlətimizin dünyada daha yaxşı təbliği və beynəlxalq aləmdə milli maraqlarımızın qorunması üçün əllərindən gələni əsirgəməyəcəklərini bildirirlər.

Yuxarıda deyilənlərdən bir daha aydın olur ki, azərbaycançılıq ideologiyası gənc müstəqil dövlətimizin milli gücünü artıran fundamental amillərdən biri qismində çıxış edir. Bu gün dünyada erməni lobbi təşkilatlarına bağlı olan müxtəlif anti-Azərbaycan dairələr mövcuddur. Ölkəmizin uğurları həmin dairələri bərk narahat edir. Biz Vətən müharibəsi dövründə ayrı-ayrı ölkələrdən respublikamıza edilən təzyiqlərin timsalında bunu əyani şəkildə gördük. Onlar açıq-aşkar dirəniş göstərirdilər ki, Azərbaycan ərazi bütövlüyünü təmin etməsin, haqq mübarizəsini dayandırsın. Şübhəsiz ki, belə təzyiqlər gələcəkdə də gözləniləndir. Buna görə də biz Ulu Öndərimizin əvəzolunmaz mirasına - azərbaycançılıq ideologiyasına istinad etməklə milli həmrəyliyimizi, vətəndaşlıq mövqeyimizi daha da gücləndirməliyik. Bizim sarsılmaz birliyimiz ana Vətənimiz Azərbaycanın gələcək uğurlarını, qələbələrini, zirvələrə yüksəlməsini təmin edəcək.

Mübariz ABDULLAYEV

Yeni Azərbaycan.- 27 yanvar.- S.8.