Latviya Dağlıq Qarabağ münaqişəsinin həllində Azərbaycanın mövqeyini daim dəstəkləyir

Xarici işlər naziri Elmar Məmmədyarov dünən Azərbaycanda rəsmi səfərdə olan latviyalı həmkarı Maris Riekstinşlə görüşüb. Nazirliyin mətbuat xidmətindən bildiriblər ki, görüşdə Azərbaycan ilə Latviya arasında siyasi əlaqələrin yüksək səviyyədə olduğunu bildirən M.Riekstinş iqtisadi sahədə əlaqələrin daha da genişləndirilməsi üçün böyük imkanların mövcud olduğunu vurğulayıb. Nazir bu məqsədlə aprelin 17-də Bakıda keçiriləcək biznes foruma Latviyanın informasiya texnologiyaları, ərzaq istehsalı, tikinti, nəqliyyat və biznesin digər sektorlarından 50-dək iş adamının qatılacağını söyləyib.

Avropa İttifaqının “Şərq tərəfdaşlığı” layihəsinin Avropa məkanına inteqrasiya prosesinin vacib məsələlərindən biri olduğunu vurğulayan latviyalı nazir bu proqramda iştiraka dəvət olunan ölkələrin öz təşəbbüsü və maraqlarından asılı olaraq müxtəlif sahələrdə həm regional, həm də ikitərəfli əməkdaşlıq üçün imkanlardan istifadə edə biləcəyini bildirib.

Nazir E.Məmmədyarov ölkələrimiz arasında mövcud əməkdaşlığın səviyyəsini yüksək qiymətləndirib, bütün sahələrdə əlaqələrin daha da genişləndirilməsinin vacibliyini vurğulayıb.

Latviyalı həmkarının Azərbaycana səfərinin əhəmiyyətini qeyd edən E.Məmmədyarov ölkələrimiz arasında həm ikitərəfli səviyyədə, həm də Avropa İttifaqı çərçivəsində əməkdaşlığın dərinləşdirilməsi üçün geniş imkanların olduğunu deyib.

Ermənistan-Azərbaycan, Dağlıq Qarabağ münaqişəsinin nizamlanması prosesi barədə qonağa məlumat verən E.Məmmədyarov Latviyanın Azərbaycanın ərazi bütövlüyünü daim dəstəklədiyini yüksək qiymətləndirib.

Nazir M.Riekstinş hər bir dövlət üçün ərazi bütövlüyünün müstəsna əhəmiyyət kəsb etdiyini bildirərək, Latviyanın bu məsələdə Azərbaycanın mövqeyini dəstəklədiyini vurğulayıb.

Bundan əlavə, görüşdə Azərbaycan ilə Latviya xarici işlər nazirlikləri arasında diplomatlar üçün təcrübə mübadiləsi imkanları, parlamentlərarası əlaqələrin intensivləşdirilməsi və maraq doğuran digər məsələlər müzakirə olunub.

Görüşdən sonra birgə mətbuat konfransı keçirən nazirlər müzakirə olunan məsələlər haqqında məlumat veriblər. Nazir E.Məmmədyarov bildirib ki, görüşdə siyasi, iqtisadi, humanitar və digər sahələrdə əməkdaşlığın inkişafı ilə bağlı məsələlər müzakirə edilib. Bundan əlavə, BMT və digər beynəlxalq qurumlar çərçivəsində əməkdaşlığın genişləndirilməsi barədə də fikir mübadiləsi aparılıb. E.Məmmədyarov deyib ki, görüşdə Dağlıq Qarabağ münaqişəsinin həllinə də toxunulub, məsələnin yalnız Azərbaycanın ərazi bütövlüyü, sərhədlərinin toxunulmazlığı prinsipi çərçivəsində həllinin mümkünlüyü vurğulanıb. Söhbət zamanı Latviya Prezidenti Valdis Zatlersin cari ilin yayında Azərbaycana planlaşdırılan səfəri ilə bağlı məsələlər də müzakirə olunub. Nazir M.Riekstinş Latviya üçün Azərbaycan ilə əməkdaşlığın əhəmiyyətini xüsusi vurğulayaraq bildirib ki, səfərinin əsas məqsədi iki ölkə arasında dialoqun davam etdirilməsi və möhkəmləndirilməsidir. Görüşdə Avropa İttifaqının “Şərq tərəfdaşlığı” proqramına dair fikir mübadiləsi aparılıb və Latviya bu layihəni dəstəkləyir. M.Riekstinş bu gün Bakıda Azərbaycan-Latviya biznes forumunun keçiriləcəyini xatırladıb, ölkəsinin Azərbaycanda informasiya texnologiyaları, nəqliyyat, maliyyə-bank sektoru sahələrinə maraq göstərdiyini bildirib.

Yeni Azərbaycan.- 2009.- 17 aprel.- S.4.