Azərbaycan musiqisi Polşanın Koşalin şəhərində səsləndi

Azərbaycanın tanınmış musiqiçiləri - xalq artisti, “Şöhrət” ordenli tarzən Ramiz Quliyev və beynəlxalq müsabiqələr laureatı, dirijor Əyyub Quliyev Koşalin Dövlət Filarmonik orkestri ilə birgə Polşanın Koşalin şəhərində Stanislav Monyuşka adına Dövlət Filarmoniyasında konsert veriblər.

Konsertdə Əyyub Quliyevin dirijorluğu ilə Koşalin Filarmonik orkestri tərəfindən dahi alman bəstəkarları R.Vaqner və L.Bethovenin simfonik əsərləri, eyni zamanda Ramiz Quliyevin ifasında görkəmli Azərbaycan bəstəkarları Hacı Xanməmmədov və Həsən Rzayevin tar və simfonik orkestr üçün yazılmış əsərləri səsləndirilib.

Böyük marağa səbəb olan bu ifadan sonra azərbaycanlı tarzən dinləyicilərin xahişi ilə yenidən səhnəyə qayıdıb və Polşa musiqisinin ən parlaq nümunələrindən olan M.Oginskinin “Polonezi” əsərini ifa edib. Konsertdən sonra Koşalin Filarmoniyasının rəhbərliyi Azərbaycan musiqiçilərinə yeni konsert layihəsi ilə bağlı müraciət edib.

Xatırladaq ki, aprelin 24-də Polşanın Çestokova şəhərinin Dövlət Filarmoniyasında dahi alman bəstəkarı F.Mendelsonun anadan olmasının 200 illiyinə həsr olunmuş təntənəli konsert keçiriləcəkdir. Mendelsonun əsərlərindən ibarət konsert proqramını idarə etmək həmyerlimiz, gənc dirijor Əyyub Quliyevə həvalə olunub. Bu mötəbər tədbirdə Ə.Quliyevin dirijorluğu ilə Çestokova Filarmonik orkestri dahi bəstəkarın simfoniyaları və skripka ilə konsertini təqdim edəcək. Konsertin solisti məşhur skripkaçı Darling Dayl (İngiltərə) olacaq.

Yeni Azərbaycan.- 2009.- 21 aprel.- S.8.