Yeni Azərbaycan təşviqat qrupu Lerik rayonunda görüşlər keçirib

Dünən “Yeni Azərbaycan” təşviqat qrupu Lerik rayonunun  on iki kəndini əhatə edən Cəngəmiran, Vizəzəmin, Piran kənd seçki məntəqələrində görüşlər keçirib. Görüşləri giriş sözü ilə açan  “Yeni Azərbaycan” təşviqat qrupunun Lerik rayon şöbəsinin sədri Elxan Qəmbərov Konstitusiyaya təklif edilən əlavə və dəyişikliklərin referenduma çıxarılmasının əhəmiyyətindən danışıb: “Təklif edilən əlavə və dəyişikliklər Milli Məclisin müzakirəsinə verilə və orada qəbul olunmuş qərarla həyata keçirilə bilərdi. Amma bu təkliflərin ümümxalq səsverməsinə çıxarılması Azərbaycanda həqiqi demokratiyanın və seçki hüququnun qorunmasının təzahürüdür”.
Təşviqat qruplarının xalq arasında apardığı təbliğatın əhəmiyyətindən də söhbət açan E.Qəmbərov bunun referendumqabağı maarifləndirmə üçün önəm daşıdığını da vurğulayıb: “Əhalinin müəyyən təbəqəsini, məsələn, təqaüdçünü bir neçə maddə,  sosial vəziyyəti aşağı olan ailəni başqa bir maddə maraqlandırır. Amma bütünlükdə Azərbaycan xalqını, Lerik rayon əhalisini bir məsələ maraqlandırır. Niyə seçici olaraq onun bir şəxsi iki dəfə deyil, bir neçə dəfə seçmək hüququ yoxdur?”

Elxan Qəmbərov bir neçə  ay bundan əvvəl prezident seçkiləri zamanı əhalini narahat edən bu suallarla qarşılaşdığını xatırladıb və seçici huququ olan şəxsləri ümümxalq səsverməsində aktiv iştirak etməyə çağırıb.

Milli Məclisin Sosial Siyasət daimi komissiyasının sədri, “Yeni Azərbaycan” təşviqat qrupunun səlahiyyətli nümayəndəsi Hadı Rəcəbli Konstitusiyaya təklif olunan əlavə və dəyişikliklərin mahiyyəti barədə sakinlərə ətraflı məlumat verib. Səlahiyyətli nümayəndə, həmin dəyişikliklərin respublikamızın ictimai-siyasi, sosial-iqtisadi həyatında hansı mühüm irəliləyişlərə səbəb olacağını söyləyib.  O, bildirib ki,  xalqımız referendumun keçirilməsinin hansı zərurətdən yarandığını gözəl başa düşür və öz iradəsi, arzu və istəklərinin reallaşacağı günü səbirsizliklə gözləyir: “Bütün Lerik əhalisi ümumxalq səverməsinə çıxarılacaq maddələrin sosial sifariş olduğunu, layiqli həyat səviyyəsinin dövlət tərəfindən təmin olunmasının Əsas Qanunumuzda əksini tapacağını, insan hüquq və azadlıqlarının daha da genişlənəcəyini gözəl başa düşür”...

... Xalqın bu dəyişiklikləri dəstəkləməsinin siyasi-iqtisadi səbəbləri haqqında danışan millət vəkili Hadi Rəcəbli ölkəmizdə sabitliyin möhkəmlənməsi, iqtisadi islahatların davamlı olması, demokratik dəyərlərin daha da geniş xarakter alması istəyi ilə yanaşı, daha bir arzunun gerçəkləşməsi üçün insanların səy göstərdiyini də bildirib: “Lerik sakinləri də daxıl olmaqla,  bütün Azərbaycan xalqı özünün yeganə siyasi lideri kimi Ümummilli lider Heydər Əliyevin siyasi kursunun layiqli davamçısı cənab İlham Əliyevi görürlər. Biz bunun prezident seçkiləri zamanı da şahidi olduq.  Mənə sual verirdilər ki, niyə  biz öz rəhbərimizi üçüncü, dördüncü dəfə prezident seçə bilmərik? Konstitusiyaya təklif edilən dəyişikliklər həm də Azərbaycan xalqına öz müqəddəratını istədiyi kimi həll etmək imkanı verir. Bu imkanı xalqın əlindən kimsə ala bilməz”.

Konstitusiya təklif olunan dəyişikliklərin qəbul edilməsi Azərbaycanın mütərəqqi inkişafına, beynəlxalq aləmdə insan haqlarının daha etibarlı müdafiəsinə, respublikamızın nüfuz və mövqelərinin daha da möhkəmlənməsinə zəmin yaratmış olacağını deyən Hadı Rəcəbli tədbirin sonunda sakinləri maraqlandıran suallara ətraflı cavablar verib.

KƏBUTƏR

Yeni Azərbaycan.-2009.- 6 mart.- S.9.