Tovuzlular Konstitusiya islahatlarını dəstəkləyir

“Yeni Azərbaycan” təşviqat qrupu martın 18-də keçiriləcək referendumla bağlı Tovuz rayonunda bir sıra tədbirlər keçirib

“Yeni Azərbaycan” təşviqat qrupu martın 18-də keçiriləcək referendumla bağlı Tovuz rayonunda bir sıra tədbirlər keçirib.

Tədbiri giriş sözü ilə açan “Yeni Azərbaycan” təşviqat qrupunun Tovuz rayon şöbəsinin sədri Bəhruzər Rüstəmov Konstitusiyaya əlavə və dəyişikliklərlə bağlı məlumat verərək bildirib ki, Konstitusiya islahatları dövlətçiliyimizin möhkəmlənməsinə, iqtisadi inkişafın yüksəlişinə və sosial rifahımızın yaxşılaşmasına xidmət edir: “Ona görə də, Konstitusiya islahatlarının həyata keçirilməsi vacibdir. Bu qanunların təkmilləşdirilməsi məhz onların yaxşı vəziyyəti, layiqli həyat şəraiti üçün nəzərdə tutulub”.

Çıxış edən “Yeni Azərbaycan” təşviqat qrupunun vəkili Nizami Cəfərov Konstitusiyanın bütün maddələrinin vətəndaşların hüquq və azadlıqlarının etibarlı təmin edilməsi, onların layiqli sosial həyat səviyyəsinin möhkəmlənməsi, iqtisadiyyatımızın inkişafı nəticəsində sosial proqramların həyata keçirilməsi üçün dərin əsaslar yaratdığını xatırladıb. Dövlətin gələcəyimiz olan uşaqların qayğısına qalmasından danışan təşviqat qrupunun vəkili cəmiyyətimizin özəyi olan uşaqların sosial müdafiəsinin gücləndirilməsinin əhəmiyyətinə də toxunub. Bundan başqa, vətəndaşların ləyaqətini alçaldan məqamlarla bağlı bir sıra məlumatların yayılmasını məhdudlaşdıran 18-ci maddə haqqında məlumat verən natiq ümumilikdə, Konstitusiyanın mütərəqqi dəyişikliklərini təqdir edib.

“Yeni Azərbaycan” təşviqat qrupunun vəkili, xalq şairi Zəlimxan Yaqub ölkəmizdə siyasi və iqtisadi proqramların uğurlarından danışıb, Konstitusiya islahatlarının qəbulu nəticəsində bu siyasətin məntiqi inkişafının davamlı xarakter alacağını söyləyib: “Azərbaycan yeni inkişaf mərhələsindədir, düşünülmüş siyasət, sosial proqramlar insanların layiqli həyat səviyyəsinin təmin olunmasına söykənir. Ölkəmiz sürətlə inkişaf edir, həyata keçirilən layihələr nəticəsində maliyyə imkanlarımız artır, vətəndaşların sosial təminatları güclənir”.

Sonda natiqlər tovuzlu seçiciləri 18 martda seçki məntəqələrinə gələrək Referendum Aktına səs verməyə çağırıb.

Görüş iştirakçıları isə Azərbaycanın sürətli inkişafının davamlı olması naminə Konstitusiyaya təklif olunan əlavə və dəyişikliklərin lehinə səs verəcəklərini birdiriblər.

Ramil VƏLİBƏYOV

Yeni Azərbaycan.- 2009.-7 mart.- S.5.