YAP: 17 İL HEYDƏR ƏLİYEV YOLU İLƏ
Yeni
Azərbaycan Partiyasının yaranması Heydər Əliyevin
siyasi uzaqgörənliyinin ifadəsidir
Azərbaycanın ictimai-siyasi həyatında
çoxşaxəli fəaliyyəti
ilə xüsusi yer tutan Yeni
Azərbaycan Partiyası
(YAP) 17-ci ildönümünü qeyd edir.
Ulu öndər Heydər
Əliyev demokratik, hüquqi dövlət, vətəndaş həmrəyliyi
cəmiyyəti quruculuğunda siyasi partiyanın rolunu rəhbərə
xas olan uzaqgörənliklə qiymətləndirərək,
siyasi hakimiyyətdə olmadığı dövrdə 1992-ci
il noyabrın 21-də Yeni Azərbaycan Partiyasını
yaratdı. Azərbaycan xalqının təkidli tələbi
ilə ikinci dəfə ölkənin siyasi hakimiyyətinə
gələn Heydər Əliyev 1993-cü ildə Sədri
olduğu Yeni Azərbaycan Partiyasını iqtidara gətirdi.
Yeni Azərbaycan Partiyasının yarandığı, təşəkkül
tapdığı, inkişaf etdiyi, siyasi qüvvə kimi
formalaşdığı, ümumxalq partiyasına
çevrildiyi 1992-2003-cü illər bilavasitə Ümummilli
lider Heydər Əliyevin adı ilə bağlıdır. Ulu
öndərin siyasi təcrübəsi, uzaqgörənliyi və
iradəsi nəticəsində respublikamızda siyasi
böhrana, vətəndaş müharibəsi təhlükəsinə,
separatçılıq meyillərinə, dövlət
çevrilişi cəhdlərinə, terror aktlarına son
qoyuldu, vətəndaş həmrəyliyi təmin edildi,
ölkə daxilində ictimai-siyasi sabitlik bərqərar
edildi.
YAP-ın iqtidar partiyasına çevrilməsində təkamül
prosesi
Demokratik dövlətlərdə
gedən ictimai-siyasi proseslərdə siyasi partiyalar amili
xüsusi əhəmiyyət kəsb edir. Ölkəmizdə
siyasi partiyaların mövcudluğu çox da böyük
tarixə malik deyil. Siyasi partiya sistemi və siyasi partiyalar ancaq
ölkəmiz dövlət müstəqilliyini bərpa etdiyi ərəfədə
yaranmağa başlamışdır.
Dünya təcrübəsində
siyasi partiyalar dövlətin idarə olunmasında tutduğu
mövqeyinə, təmsil olunmasına görə iqtidar,
müxalifət partiyası kimi fərqləndirilir. Bu prizmadan
yanaşanda, Yeni Azərbaycan Partiyası yarandığı
dövrdə iqtidarda təmsil olunmurdu, müxalifət statusu
daşıyırdı. Partiyaların iqtidar partiyası
olması tarixi bir prosesdir. Yeni Azərbaycan Partiyası ilk fəaliyyətə
müxalifət partiyası kimi başlasa da, Azərbaycanın
qarşısında duran çətin problemlərin həllində,
ictimai-siyasi sabitliyin qorunmasında çox fəal iştirak
etmiş və Ulu öndər Heydər Əliyevin xidmətləri
nəticəsində iqtidar partiyasına çevrilmişdir.
Məhz Yeni Azərbaycan
Partiyasının iqtidar partiyasına çevrilməsi təkamül
prosesi nəticəsində baş vermişdir.
YAP cəmiyyətdə
öz sosial dayaqlarını artıra-artıra, insanlara verilən
vədi doğrultmaq keyfiyyətlərini nümayiş etdirə-etdirə,
cəmiyyəti narahat edən problemlərin həllinin ən səmərəli
yolunu müəyyənləşdirməklə cəmiyyətdə
partiyaya inamın formalaşdırılması prosesini
uğurla apara bildi və partiya tarixində təkamülün
təzahürü və inkişafın mahiyyəti
özünü YAP-ın keçdiyi 17 ildə göstərdi.
YAP-ın ən
güclü siyasi qüvvəyə çevrilməsinin təməl
prinsipləri və dayaqları
Yeni Azərbaycan Partiyasının
ötən 17 illik fəaliyyəti dövründə yüksək
templə böyüyərək respublikada ən güclü
siyasi qüvvə kimi mövqe tutmasının təməl
prinsipləri aşağıdakılardır:
1) Partiyanın Heydər
Əliyev kimi dahi, uzaqgörən, böyük siyasi təcrübəyə,
dünyanı idarə etmək qabiliyyətinə və fenomen
keyfiyyətlərə malik siyasi liderinin olması;
2) Partiyanın Azərbaycan
Respublikasının Konstitusiyası və qanunvericiliyi çərçivəsində,
özünün Pizamnaməsi və Proqramı əsasında
- Azərbaycanda hüquqi dövlət, sivil vətəndaş
cəmiyyəti, sabit və sosialyönümlü iqtisadiyyat,
azərbaycançılığı ehtiva edən milli birlik
yaratmaq məqsədinə xidmət etməsi;
3) Azərbaycanın
dövlət müstəqilliyinin möhkəmləndirilməsi
və müasir beynəlxalq münasibətlər sistemində
layiqli yer tutması, demokratik, hüquqi, dünyəvi dövlət
qurulması, sabit və sosialyönümlü iqtisadiyyatın
yaradılması, ictimai həmrəylik və demokratik vətəndaş
cəmiyyətini formalaşdırması və insanları
müstəqil dövlətçilik ətrafında birləşdirməsi;
4) Partiyamızın
ictimai-siyasi təşkilatlarla qarşılıqlı hörmət
və əməkdaşlığa söykənən siyasi,
sivil, mədəni dialoq qurmağa hazır olması və
xarici ölkələrin mütərəqqi partiyaları və
ictimai təşkilatları ilə hərtərəfli əlaqələrin
qurulması və beynəlxalq əməkdaşlıq
uğrunda çıxış etməsi;
YAP-ın cəmiyyətimizdə
möhkəm sosial bazaya malik olmasını və nüfuzlu
ümumxalq partiyaya çevrilməsini şərtləndirən
əsaslar aşağıdakılardır:
- Partiyanın fəaliyyətinin
demokratik prinsiplərə əsaslanması;
- Partiyanın ərazi
prinsipinə əsasən seçkili orqanlarının fəaliyyət
göstərməsi və respublikanın bütün inzibati
vahidlərində təmsil olunmaqla geniş struktura və
resurslara malik olması;
- Partiyanın
öz-özünü maliyyələşdirməsi, maliyyədə
şəffaflığın olması və bütün
strukturlarda üzvləri qarşısında
vaxtaşırı maliyyə hesabatları verməsi.
Yeni Azərbaycan
Partiyası ölkəmizin dünya birliyinin bərabərhüquqlu
üzvünə, müstəqil, demokratik dövlətə
çevrilməsində qarşıya qoyduğu vəzifələrin
həllinə nail olmaq məqsədi ilə öz fəaliyyətində
müstəqil dövlətçilik, qanunçuluq, azərbaycançılıq,
vətənçilik, varislik, yaradıcı təkamül,
konstruktiv əməkdaşlıq, vətəndaş həmrəyliyi
kimi ideoloji prinsiplərə əsaslanır.
Partiyamızın təşkilatlanmasında və
inkişaf etməsində qurultayların rolu
Partiyamızın təşkilatlanmasında
və inkişaf etməsində tarixi əhəmiyyət
daşıyan strukturlardan biri partiya qurultaylarıdır.
Partiyanın ötən müddətdə təsis
konfransından sonra 4 qurultayı keçirilib. Bu
qurultayların hər biri partiya həyatının ən
mühüm hadisələri kimi tarixə düşüb.
Qurultaylararası
dövrdə partiyanın fəaliyyətinə rəhbərlik
edən rəhbər orqan kimi partiyanın Siyasi
Şurasının və Siyasi Şuranın iclasları
arasındakı dövrdə partiyanın operativ fəaliyyətini
həyata keçirən rəhbər orqan kimi İdarə Heyətinin
partiya tarixinin müxtəlif mərhələlərindəki
fəaliyyəti, zəruri qərarların
çıxarılması və icrası istiqamətindəki
prinsipial mövqe nümayiş etdirməsi xüsusi qeyd edilməlidir.
Yeni Azərbaycan
Partiyası təsis konfransından 7 il sonra, 1999-cu il 20-21
dekabrda özünün ilk ali orqanı - I Qurultayını
keçirdi. O vaxt qurultayın uzun fasilədən sonra
keçirilməsində səbəb axtaranlar da
tapıldı. Aydındır ki, hər bir məsələyə
Ulu öndərimiz özünün müdrik münasibətini
bildirdiyi kimi, bu suallara da layiqli cavabını vermişdi. Tarixə
nəzər salıb, onun mahiyyətini üstündən
neçə il keçdikdən sonra qiymətləndirmək
baxımından nələri qeyd etmək olar: Birinci növbədə,
Partiyamızın sədri, Ulu öndər Heydər Əliyev
dövlətin, Vətənin, xalqın taleyini, onun
ağırlığını öz çiyinlərinə
götürdüyü üçün, ölkəmizin
düçar olduğu böhranlı vəziyyətdən
çıxarılması, ölkədə siyasi sabitliyin bərqərar
edilməsi, mənfur erməni təcavüzünün
dayandırılması, dövlət quruculuğu, qanunvericilik
bazasının möhkəmləndirilməsi, beynəlxalq aləmdə
bərabərhüquqlu ikitərəfli əməkdaşlıq
münasibətlərinin qurulması, ölkədə
bütün sahələrdə islahatların
başlanması, iqtisadiyyatının dirçəldilməsi,
əhalinin rifahının yüksəldilməsi, hər sahədə
dayanıqlı inkişafın əldə edilməsi kimi
qlobal problemlərin həllinə bir dövlət
başçısı kimi önəm verdi. Və məhz Heydər
Əliyev dühasının böyüklüyü, zəngin
siyasi təcrübəsi bu qlobal problemlərin həllini
mümkün etdi və ölkəmizin XXI əsrdə möhkəm
təməl üzərində inkişafına zəmin
yaratdı.
I Qurultay Partiyanın təsis
konfransında müəyyənləşdirdiyi yaxın
dövr üçün vəzifələrini layiqincə
yerinə yetirdiyini, cəmiyyətdə rolunun
artdığını bəyan etdi və partiyanın
perspektiv üçün Nizamnamə və Proqramını qəbul
etdi.
Partiyamızın
inkişafında müstəsna əhəmiyyət
daşıyan partiyadaxili yeni strukturlar yarandı. İlham Əliyevin
partiya Sədrinin müavini seçilməsi partiyanın gəncləşməsi
prosesinin başlanğıcını qoydu və partiyaya gənc
üzvlərin axınını yaratdı.
YAP-ın
formalaşmasında, təşəkkül tapmasında, təşkilatlanmasında,
ümumiyyətlə, partiyanın inkişafında xüsusi
yeri olan İcra Katibliyinin yaranması, onun strukturlarının
formalaşması partiyamızın həyatına dinamizm,
inkişaf gətirdi.
Partiya üzvünün
siyasi mənsubluğunu əks etdirən üzvlük vəsiqəsinin
təsdiq edilməsi partiyadaxili intizamın möhkəmlənməsində,
onlarda vəzifələrinə məsuliyyətlə
yanaşmaq keyfiyyətinin formalaşdırılmasında əvəzsiz
təsiri oldu.
Partiyamızın
böyüməsi, inkişaf etməsi və sosial bazası
genişlənərək ümumxalq partiyasına çevrilməsi
onun II Qurultayından (20 noyabr, 2001-ci il) sonra geniş vüsət
aldı. Qurultay partiya tarixində öz vəzifəsini yerinə
yetirərək partiya sədrinin birinci müavini strukturunu təsis
etdi və bu vəzifəyə artıq Azərbaycan
Respublikası Dövlət Neft Şirkətinin birinci
vitse-prezidenti, Milli Olimpiya Komitəsinin sədri, Milli Məclisin
deputatı, Partiya sədrinin müavini kimi vəzifələrdə
ləyaqətlə işləmiş, daha yüksək keyfiyyətləri
ilə fərqlənən cənab İlham Əliyevi
seçdi.
Respublikada 2003-cü il
prezident seçkiləri öncəsi Ümummilli liderimiz Azərbaycan
xalqına tarixi müraciətini edərək, Özü qədər
inandığı, sona çatdıra bilmədiyi işləri
etibar etdiyi İlham Əliyevin namizədliyini dəstəkləməyi
tövsiyə etdi.
Tariximizə
demokratiyanın təntənəsi kimi daxil olmuş 15 oktyabr
2003-cü il prezident seçkilərində İlham Əliyevin
Prezident seçilməsi partiyamızın seçicilər
arasında nüfuzunun yüksək olmasının təzahürü
oldu.
Partiyamızın
Ümummilli liderimizdən sonrakı dövrü cənab
Prezidentimiz İlham Əliyevin fəaliyyəti ilə
bağlıdır. Partiyamızın 2005-ci il martın 26-da
keçirilmiş III Qurultayı partiya tarixinə yeniləşmə,
gəncləşmə, siyasi mətinlik keyfiyyətlərinin
formalaşdığı hadisə kimi düşdü. III
Qurultay Ulu öndərimizin siyasi kursunun layiqli
davamçısı, cənab Prezidentimiz İlham Əliyevi
Partiyamızın Sədri seçdi və bununla da partiya
tarixində yeni dövrün başlanğıcı qoyuldu.
Ulu öndər Heydər
Əliyevdən sonra partiyaya rəhbərlik etməyin
böyük şərəf olduğunu qeyd edən Azərbaycan
Prezidenti, YAP Sədri cənab İlham Əliyevin
vurğuladığı kimi: “Bizim partiyamızı fərqləndirən
cəhət odur ki, bizim siyasətimiz konkret işlərdən
ibarətdir. Biz heç vaxt populist vədlər vermirik,
reallığı əks etdirməyən şüarlarla
çıxış etmirik. Sadəcə olaraq, biz
ardıcıl, məqsədyönlü şəkildə
öz işimizi görürük. Azərbaycanın möhkəmlənməsi,
iqtisadi potensialının güclənməsi, dünyadakı
mövqeyinin möhkəmlənməsi üçün əlimizdən
gələni edirik”.
Partiyanın 2008-ci ilin 2
avqustda keçirilən IV Qurultayı partiya tarixinə
demokratikləşmə, demokratik dəyərlərin möhkəmləndirilməsi
yolunda sivil siyasi mübarizənin təkmilləşdirilməsi
və nümunəsi kimi düşdü. Partiya qurultayı
ilk dəfə olaraq respublikada prezident seçkiləri öncəsi
özünün prezidentliyə namizədini irəli
sürdü. Bu, nəinki YAP-ın, eyni zamanda, Azərbaycan
xalqının yekdil seçimi idi.
YAP Azərbaycanda demokratik cəmiyyət quruculuğuna
xidmət edən partiyadır
Demokratiyanın ölkədə
mövcudluğu və səviyyəsi məsələsinə
Ümummilli liderimiz münasibətini belə bildirmişdir:
“Demokratiya daim inkişafda, daim hərəkətdə olan
prosesdir. Bu, bir mərhələdən o birisinə qədər
təkmilləşmə yolu ilə getməlidir. Bu təkmilləşmə
təkamül yolu ilə olmalıdır”.
Ulu öndərin böyük
siyasi təcrübəyə və məntiqə əsaslanan
bu qənaəti demokratiya yolu ilə inkişaf edən dövlətlərin
təcrübəsindən və rəhbərin müdrikliyindən
qaynaqlanır.
Təsadüfi deyil ki,
Azərbaycanda müstəqil dövlət quruculuğu prosesində
Ulu öndər Heydər Əliyevin xidmətlərini və
partiyamızın fəaliyyətini Azərbaycan Prezidenti, Yeni
Azərbaycan Partiyasının Sədri, cənab İlham Əliyev
yüksək qiymətləndirərək demişdir:
“Xalqın tələbi ilə Heydər Əliyevin Azərbaycanda
hakimiyyətə qayıtması nəticəsində ölkəmiz
yeni dövrə qədəm qoymuş, quruculuq-abadlıq
işləri başlamışdır. 1990-cı illərin əvvəllərində
keçmiş rəhbərlik tərəfindən törədilmiş
cinayətlərin aradan qaldırılması üçün
böyük işlər görülmüşdür və
şübhəsiz ki, partiyamızın bu işlərdə
böyük rolu olmuşdur. Çünki 1993-cü ili biz hamımız
yaxşı xatırlayırıq. Xaos, anarxiya, hərc-mərclik,
iqtisadi, siyasi böhran - bütün bunlar Azərbaycanın gələcəyini
şübhə altında qoyurdu, Azərbaycanın müstəqil
ölkə kimi yaşamasını şübhə altında
qoyurdu. Heydər Əliyevin qətiyyəti, Azərbaycan
xalqının Onun ətrafında birləşməsi və
Yeni Azərbaycan Partiyasının fəaliyyəti ölkəmizi
o çətin, ağır vəziyyətdən
çıxartdı. Azərbaycanın qarşısında
duran bütün çətin vəzifələrin həlli
işində bizim partiyamız çox fəal iştirak
etmişdir. Bu, bir daha onu göstərir ki, Yeni Azərbaycan
Partiyası Azərbaycan dövlətçiliyini möhkəmləndirən
və Azərbaycan dövlətçiliyini ən uca tutan
partiyadır”.
2008-ci il prezident seçkiləri ölkəmizin
tarixinə demokratiyanın təntənəsi, demokratik, şəffaf,
azad seçki kimi düşdü
Ölkəmizin ictimai-siyasi
həyatında ən mühüm hadisə kimi yaddaşlara həkk
olan 15 oktyabr 2008-ci il prezident seçkiləri ölkəmizin
tarixinə demokratiyanın təntənəsi, demokratik, şəffaf,
azad seçki kimi düşdü. Eyni zamanda,
partiyamızın çoxşaxəli fəaliyyətinin səmərəsinin
ən əsas göstəricisi və sivil, ədalətli
seçki prosesi kimi yadda qaldı. 15 oktyabr seçkiləri
göstərdi ki, ölkəmiz artıq seçki təcrübəsinin
təkmilləşdirilməsi istiqamətində lazım olan
bütün mərhələləri uğurla keçib.
İstənilən seçkinin şəffaf və ədalətli
keçirilməsi üçün əsas hesab edilən
üç mühüm amilin - mükəmməl hüquqi
bazanın, xalqın iradəsinin və dövlətin qətiyyətinin
mövcudluğu, əldə edilən bugünkü nəticələr,
demokratik dəyərlərin ölkəmizdə uca
tutulduğunu göstərir.
Xalqın böyük
inam və etimadı nəticəsində ikinci dəfə Azərbaycan
Respublikasının Prezidenti seçilmiş cənab İlham
Əliyev oktyabrın 24-də Prezident kimi and içərkən
ölkə vətəndaşlarının bu seçimini daha
yüksək şəkildə xarakterizə edərək
demişdir: “Mən ümid edirəm ki, bu seçkilər və
seçki kampaniyası Azərbaycanda yeni siyasi mədəniyyətin
möhkəmlənməsində öz rolunu oynayacaq, yeni ənənələri
Azərbaycana gətirəcək və bundan sonra Azərbaycanda
siyasi mübarizə yalnız sivil yolla aparılacaq”.
Həqiqətən, əldə
edilən mütərəqqi seçki ənənəsi
2009-cu il 18 martda keçirilən ümumxalq səsverməsi -
referendumda özünü bir daha təsdiqlədi. Referendum
ölkəmizin demokratik dəyərlərə sadiq
qaldığını, sivil seçki keçirməyə
qadir olduğunu göstərdi.
Qarşıdan bələdiyyə
seçkiləri gəlir. Ölkəmizdə indiyə kimi
keçirilən prezident, parlament və bələdiyyə
seçkilərində Yeni Azərbaycan Partiyası zəngin
seçki təcrübəsi əldə edib, demokratik, şəffaf,
azad seçkilərdə təşkilatçılıq
nümunəsi göstərib və işlənmiş yeni
seçki texnologiyalarının tətbiqi ilə qələbə
əldə etmək təcrübəsi toplayıb. YAP bu
seçkilərə də çox ciddi hazırlaşır,
Seçki Məcəlləsinin tələbləri əsasında
seçki prosedurlarını yerinə yetirir. Partiya indi
seçkinin daha məsuliyyətli mərhələlərindən
biri olan təbliğat kampaniyasına hazırlıq ərəfəsindədir.
Böyük əminlik hissi ilə demək olar ki, partiyamız
bu kampaniyanı da uğurla başa vuracaq və 23 dekabr 2009-cu
il bələdiyyə seçkilərində də qələbə
əldə edəcək.
İlham Əliyev QURUCU, YARADICI Prezidentdir
Azərbaycan tarixinə
Heydər Əliyev müstəqilliyin banisi, onu qoruyub möhkəmləndirən
şəxsiyyət kimi düşüb. Azərbaycan Prezidenti
İlham Əliyev isə QURUCU, YARADICI PREZİDENT kimi tarixə
düşdü.
Prezidentimizin yorulmaz fəaliyyəti
nəticəsində ölkədə sosial sahədə
görülən işlərin miqyası ildən-ilə
genişlənir. 2003-cü ildən başlayaraq ölkəmizdə
sosial-iqtisadi inkişafın yüksəldilməsinə
yönəlmiş kompleks Dövlət proqramlarının
ardıcıl, mərhələlərlə həyata
keçirilməsi və bu tədbirlərin 2009-2013-cü illər
üçün qəbul edilmiş Proqramda davam etdirilməsi
nəticəsində ölkəmizdə yoxsulluğun səviyyəsinin
daha da aşağı olması hədəfə
alınıb. Azərbaycan Prezidentinin iqtisadi inkişafın
bundan sonra da daha yüksək templə davam etdiriləcəyi
haqqında güclü məntiqə və iqtisadi təhlilə
əsaslanan fikirləri onu göstərir ki, cənab İlham Əliyevin
daxili siyasətində xalqımızın rifah halının
yüksəldilməsi, yoxsulluğun ən minimum həddə
çatdırılması əsas cəhətlərdəndir.
Bu, hər bir Azərbaycan vətəndaşında ölkə
başçısına inam yaradır. Xalqımız
inanır ki, həqiqətən ölkəmiz cənab
İlham Əliyevin məqsədyönlü siyasəti nəticəsində
qüdrətlənəcək və güclü bir ölkəyə
çevriləcək.
Onu da vurğulamaq yerinə
düşər ki, partiyamız 17 illik fəaliyyətində
cəmiyyətdə baş verən ictimai-siyasi proseslərdə
fəal iştirak edib və xalqımızın
maraqlarından çıxış edib. Öz
sıralarında 500 minədək üzvü birləşdirən
Yeni Azərbaycan Partiyası nəinki ölkə daxilində,
eyni zamanda, beynəlxalq aləmdə ən nüfuzlu siyasi
partiya kimi tanınır və fəaliyyət göstərir.
Partiyamızın beynəlxalq əlaqələrinin möhkəmlənməsi
və genişlənməsi demokratik dəyərlərə
önəm verən bir siyasi partiya olduğuna bariz nümunədir.
Ulu öndər Heydər
Əliyevin təşəbbüsü ilə YAP-da Qadınlar
Şurasının və Gənclər Birliyinin fəaliyyət
göstərməsi bu günün reallıqlarıdır və
dahi rəhbərin uzaqgörənliyinin təzahürüdür.
Sıralarında 190 mindən çox gənci birləşdirən
partiyamızın fəaliyyətində gənclərimizin vətənpərvərlik
və milli-mənəvi ruhda tərbiyə olunması
xüsusi yer tutur.
Gəncə şəhər təşkilatı
partiyanın öncül dəstələrindən biridir
Yeni Azərbaycan
Partiyası 1992-ci ilin noyabrından sonra qısa müddət ərzində
Ümummilli lider Heydər Əliyevin rəhbərliyi ilə
sıralarını daha da genişləndirdi,
böyüdü və inkişaf etdi. Respublikanın şəhər
və rayonlarında pariyanın struktur bölmələri - ərazi
prinsipinə əsaslanan təşkilatları təsis edildi.
Dövrün təzyiqlərinə və qadağalarına
baxmayaraq, nəhayət, 1993-cü il 23 iyulda partiyamızın
dahi Heydər Əliyevin ideyalarına sadiq olan bir qrup təəssübkeşinin
iştirakı ilə Gəncə şəhər təşkilatının
təsis konfransı keçirildi.
Təşkilatımız
2009-cu ildə partiya üzvlərinin sayı 23343 nəfər
olmaqla, 267 ərazi ilk partiya təşkilatını
özündə birləşdirir. YAP Gəncə şəhər
təşkilatı öz fəaliyyətini partiyanın Proqram
və Nizamnaməsinin tələbləri əsasında qurur,
partiya qurultaylarının, İdarə Heyəti və Siyasi
Şurasının qərarlarında, partiya Sədrinin nitqlərində
qarşıya qoyulan vəzifələrin, İcra Katibliyinin
müvafiq təlimat və tövsiyələrinin yerinə
yetirilməsinə bütün üzvləri səfərbər
edir. Təşkilatımız ideoloji təbliğat işinin
səviyyəsinin yüksəldilməsində mütərəqqi
üsul və vasitələrdən səmərəli istifadə
edir. Heydər Əliyev Universitetinin səyyar
seminarlarının, elmi-praktik konfransların, dəyirmi
masaların, “Gənclər üçün açıq
qapı” tədbirlərinin keçirilməsi ənənəyə
çevrilib.
Xalqımız kimi, biz gəncəlilər,
bütün YAP üzvləri bəyan edirik ki, xoşbəxt gələcəyimizin
və qələbələrimizin təminatçısı
olan Prezidentimiz cənab İlham Əliyevlə daim birlikdəyik!
Ulu öndərimiz Heydər
Əliyev həmişə azərbaycanlı olmağı ilə
fəxr edirdi. Hər birimizin böyük, qüdrətli Azərbaycan
dövlətinin başçısı, partiyamızın Sədri,
İlham Əliyev kimi Vətən oğlu ilə fəxr etməyə
mənəvi haqqımız vardır.
İsrafil İSMAYILOV,
YAP Gəncə şəhər
Təşkilatının sədri, professor
Yeni Azərbaycan.- 2009.- 21 noyabr.- S.8.