Şamaxı yeniləşir, gözəlləşir, abadlaşır

Azərbaycan Prezidenti İlham Əliyev Şamaxı rayonunda səfərdə olub

Dünən Azərbaycan Respublikasının Prezidenti İlham Əliyev Şamaxı rayonuna gəlib. AzərTAc-ın məlumatına görə, Prezident İlham Əliyev rayon mərkəzində Heydər Əliyev parkında Ulu öndərin abidəsini ziyarət edərək gül dəstəsi qoyub. Prezident İlham Əliyev Şamaxıda Heydər Əliyev parkında aparılmış yenidənqurma işləri ilə tanış olub.

Məlumat verilib ki,  ərazisi əvvəllər 0,4 hektar olan parkın ətrafındakı yararsız tikililərin sökülməsi hesabına onun sahəsi 4,5 hektara çatdırılıb, Ulu öndərin abidəsi bu istirahət mərkəzinin ərazisinə köçürülüb, yaşıllaşdırma işlərinə xüsusi diqqət yetirilib. Parkda 5 fəvvarə, 270 yerlik yay konsert meydançası, kafe, uşaq əyləncə mərkəzi, istirahət köşkləri yaradılıb.

Dünən Şamaxıda Heydər Əliyev mərkəzi açılıb. Mərasimdə Prezident İlham Əliyev iştirak edib. Dövlətimizin başçısı mərkəzin açılışını bildirən lenti kəsib və bina ilə yaxından tanış olub. Məlumat verilib ki, Heydər Əliyev parkının ərazisində yerləşən mərkəzin 2007-ci il mayın 10-da başlanılmış tikintisi 2008-ci ilin sentyabrında başa çatdırılıb. Üçmərtəbəli binanın ümumi sahəsi 1200 kvadratmetrdir. Mərkəzdə multimedia, xalq yaradıcılığı, rəsm dərnəkləri, elektron kitabxana, kompyuter mərkəzi və digər bölmələr yerləşir. Konfrans zalında Ulu öndərin keçən əsrin 70-80-ci illərindəki fəaliyyətini və Onun Şamaxı rayonuna səfərlərini əks etdirən fotoguşə var. 45 nəfərlik kino zalında Ümummilli liderin Azərbaycanın müstəqillik illərindəki fəaliyyətini əks etdirən fotoşəkillər və filmlər nümayiş etdirilir. Açıq zalın bir hissəsində  Ulu öndərin fəaliyyətinin Moskva və Naxçıvan dövrlərini əks etdirən fotoşəkillər asılıb, digər hissədə isə “Heydər Əliyev dünyanın gözü ilə” guşəsi yaradılıb. Burada Ümummilli liderin həyat və fəaliyyətini əks etdirən sənədlər də nümayiş etdirilir. Mərkəzdə Ulu öndər Heydər Əliyevin siyasi irsinin öyrənilməsi və təbliği üçün hər cür şərait yaradılıb. Mərkəzlə tanışlıqdan sonra Prezident İlham Əliyev xatirə kitabına ürək sözlərini yazıb.

Prezident İlham Əliyev Şamaxıda Müalicə-Diaqnostika Mərkəzinin açılışında iştirak edib. Mərkəzin kollektivi və rayon ictimaiyyətinin nümayəndələri dövlətimizin başçısını hərarətlə qarşılayıb.

Prezident İlham Əliyev kollektivi və ictimaiyyətin nümayəndələrini mərkəzin açılışı münasibətilə təbrik edərək deyib: “Belə gözəl diaqnostika mərkəzinin açılışı münasibətilə sizi ürəkdən təbrik edirəm. Sizi, eyni zamanda, Qurban bayramı münasibətilə təbrik edirəm. Sizə cansağlığı, xoşbəxtlik arzulayıram. Bu gün doğrudan da çox gözəl bir gündür. Bu gün səhər Bakı-Şamaxı yolunun açılışında iştirak etdim. Çox gözəl, keyfiyyətli yoldur. Bakı ilə Şamaxı arasında məsafə onsuz da o qədər də böyük deyildir. Ancaq indi yeni yolla bu məsafəni qət etmək daha da asan olacaqdır. Rahat yoldur, keyfiyyətli yoldur. Şamaxı üçün çox vacib olan Müalicə-Diaqnostika Mərkəzinin açılışında bərabər iştirak edirik.  Bu da çox gözəl hadisədir. Bu, ən müasir standartlara cavab verən tibbi mərkəzdir. Həm müayinədən keçmək, həm müalicə almaq, həm həkim məsləhətinə ehtiyacı olan insanların burada müalicəsi - bütün bunlar artıq reallıqdır, Azərbaycan reallıqlarıdır. Ən müasir avadanlıq quraşdırılıb, ən gözəl imkanlar vardır. Arzu edirəm ki, hər bir vətəndaş, rayonun hər bir sakini ildə bir dəfə gəlib burada müayinədən keçsin. Nəzərə alsaq ki, burada tibbi xidmət pulsuzdur, hər bir adam, hər bir vətəndaş ildə bir dəfə həkim məsləhətinə qulaq asmalıdır. Əgər hər hansı bir xəstəlik varsa, bu gözəl imkanlardan istifadə edib xəstəliyi aradan götürməlidir. Bu Müalicə-Diaqnostika Mərkəzinin tikintisi, eyni zamanda, Azərbaycanın artan imkanlarını göstərir. Bilirsiniz ki, indi Bakıda və bölgələrdə ən müasir tibbi mərkəzlər yaradılır, təmir olunur, avadanlıqla təchiz edilir. İndi elə bir bölgə yoxdur ki, orada müasir tibbi mərkəz olmasın. İlk növbədə bütün bölgələrdə, ondan sonrakı mərhələdə bütün rayon mərkəzlərində gözəl tibbi mərkəzlər yaradılır. Şamaxının gələcək uğurlu inkişafı üçün belə tibbi mərkəzin mövcudluğu çox vacibdir. Şamaxı Azərbaycanın gözəl bölgələrindən, rayonlarından biridir. Rayonun çox böyük potensialı vardır. İndi Bakı-Şamaxı yolunun istifadəyə verilməsindən, belə gözəl obyektlərin tikilməsindən sonra əlbəttə ki, Şamaxıya gələnlərin sayı daha da artacaqdır. Biz hamımız gərək rayonun turizm imkanlarından səmərəli istifadə edək. Burada gözəl təbii şərait vardır. Bir müddət bundan əvvəl Olimpiya Kompleksinin açılışında iştirak etdik, bu gün Müalicə-Diaqnostika Mərkəzi istifadəyə verilir. Şamaxı rəsədxanası artıq təmir edilir. Prezidentin Ehtiyat Fondundan böyük məbləğdə vəsait ayrılıbdır, həm elmi məqsədlər, həm də turizm məqsədləri üçün biz hamımız rəsədxanadan səmərəli istifadə edəcəyik. Mən bu gün gedib tikinti ilə, təmir işləri ilə tanış olacağam.

Bu gün, eyni zamanda, biz yeni sənaye sahələrinin istifadəyə verilməsini qeyd edirik. Şamaxıda artıq müasir sənaye müəssisələri yaradılıb. O müəssisələr ki, hazır məhsul istehsal edir, məişət avadanlığı istehsal olunur. Əvvəllər biz bunu heç təsəvvür edə bilməzdik ki, Azərbaycanda müasir avadanlıq, məişət avadanlığı istehsal olunacaqdır. Ancaq bu gün bu reallıqdır. Təkcə Bakıda deyil, Azərbaycanın müxtəlif bölgələrində, xüsusilə Şamaxıda”.

Yeni Müalicə-Diaqnostika Mərkəzinin həkimi Nəzakət Abdurrazaqova Şamaxı ictimaiyyətinin ən xoş arzularını dövlətimizin başçısına çatdırıb.

Sonra dövlətimizin başçısı səhiyyə ocağının açılışını bildirən lenti kəsib və mərkəzlə yaxından tanış olub. Təməli 2007-ci il martın 1-də Prezident İlham Əliyev tərəfindən qoyulmuş və sahəsi 1,5 hektar olan mərkəzin inşaat işləri bu ilin oktyabrında başa çatdırılıb. Tikintinin ümumi sahəsi 7 min kvadratmetr, o cümlədən əsas korpusun sahəsi 5800 kvadratmetrdir. Üçmərtəbəli binada qəbul, inzibati, funksional diaqnostika, dializ, stasionar, əməliyyat, reanimasiya, kompyuter tomoqrafiya və rentgen şöbələri fəaliyyət göstərir. Birinci mərtəbədə 60, ikinci mərtəbədə 51, üçüncü mərtəbədə 30 otaq yerləşir. Burada quraşdırılan avadanlıq xaricdən gətirilib.

Binanın foyesində Ümummilli lider Heydər Əliyevin və Prezident İlham Əliyevin səhiyyənin inkişafına diqqət və qayğısını əks etdirən fotoguşələr yaradılıb. Mərkəzin həyətində 5 min kvadratmetr ərazidə yaşıllıq salınıb, su anbarı, qazanxana tikilib və  yardımçı elektrik stansiyası quraşdırılıb.

Prezident İlham Əliyev Yeni Azərbaycan Partiyası Şamaxı rayon təşkilatının inzibati binasının açılışında iştirak edib. Dövlətimizin başçısı açılışı bildirən lenti kəsib və bina ilə yaxından tanış olub.

Məlumat verilib ki, bu il mayın 10-da başlanmış tikinti işləri sentyabrda başa çatdırılıb. Binada Yeni Azərbaycan Partiyasının qurucusu Heydər Əliyevin barelyefi qoyulub. İkimərtəbəli binanın sahəsi 516 kvadratmetrdir. Bina lazımi avadanlıqla təchiz edilib. Birinci mərtəbədə 7 iş otağı,  ikinci mərtəbədə qəbul və təşkilat sədrinin iş otaqları, müşavirə zalı yerləşir. Burada partiya üzvlərinin fəaliyyəti üçün hər cür şərait yaradılıb.

Prezident İlham Əliyev Şamaxıda Heydər Əliyev Fondu tərəfindən bərpası nəzərdə tutulan Cümə məscidi ilə tanış olub. Məscidin yenidən qurulması layihəsi ilə tanış olan dövlətimizin başçısına məlumat verilib ki, Cənubi Qafqazda ikinci qədim dini mərkəz olan Cümə məscidi 743-cü ildə tikilib. 1859-cu ildə baş vermiş dəhşətli zəlzələ nəticəsində dağılan məscid sonradan bərpa edilib. 1902-ci il zəlzələsində də Cümə məscidinə ciddi ziyan dəyib. Bu zəlzələdən sonra məscid Şamaxıdan olan Azərbaycanın ilk ali təhsilli memarı Zivər bəy Əhmədbəyovun və polşalı mühəndis İosif Ploşkonun layihəsi əsasında yenidən bərpa edilib.

Cümə məscidi, həmçinin 1918-ci ildə erməni daşnaklarının Şamaxıda törətdikləri qırğının şahididir. O vaxt daşnaklar 1800 nəfər yerli sakini - uşaqları, qadınları, qocaları zorla bu məscidə dolduraraq diri-diri yandırıblar. Yanğının izləri məscidin divarlarında bu gün də durur. Məsciddə keçən əsrin 70-80-ci illərində də təmir işləri aparılıb. Həmin dövrdə məscidin həyətində qazıntı zamanı mədrəsə, hücrə və qəbirlər aşkar edilib. Sovet dövründə cüzi təmir işləri aparılmasına baxmayaraq, Azərbaycanda ən qədim ibadət yeri sayılan Şamaxı Cümə məscidi bərbad vəziyyətdədir. Hazırda Heydər Əliyev Fondunun “Tolerantlığın ünvanı: Azərbaycan” layihəsi çərçivəsində bu Allah evinin yenidən qurulması nəzərdə tutulub. Ümumi sahəsi 0,80 hektar olan məscidin ibadət yeri 1316 kvadratmetrdir. Prezident İlham Əliyev məscidin binası ilə tanış olub.

Prezident İlham Əliyev Şamaxıya səfəri çərçivəsində Seyid Əzim Şirvani adına Tarix-Diyarşünaslıq Muzeyində yaradılan şəraitlə də tanış olub.

Məlumat verilib ki, əsası 1945-ci ildə qoyulmuş muzeyin  yenidən qurulmasına 2008-ci ilin avqustunda başlanılıb və cari ilin sentyabrında başa çatdırılıb. İkimərtəbəli muzeyin ümumi sahəsi 1097 kvadratmetr, ekspozisiya zalının sahəsi isə 325 kvadratmetrdir. Burada yaradılmış 7 bölmədə Şamaxının qədim və müasir dövrlərinə aid 1061 eksponat nümayiş etdirilir. Ümumiyyətlə, Tarix-Diyarşünaslıq Muzeyində 8392 əsas, 600 yardımçı eksponat var. Muzeydə XVIII əsrdə alman səyyahları tərəfindən çəkilən şəkillər əsasında hazırlanmış Şamaxı şəhərinin maketi, rayonun fauna və florasını əks etdirən təbiət  guşəsi yaradılıb. Burada erməni vəhşilikləri barədə toplanan istintaq materiallarına xüsusi yer ayrılıb. Prezident İlham Əliyev ermənilərin törətdikləri qırğınları təsdiq edən materiallarla tanış olub. Mədəniyyət ocağının həyətində Şamaxının  tanınmış 12 şəxsiyyətinin büstü qoyulub.

Prezident İlham Əliyev Şamaxıda “Azərelektronika” məişət cihazları istehsalı zavodunun açılışında iştirak edib. Müəssisənin kollektivi dövlətimizin başçısını hərarətlə qarşılayıb. Prezident İlham Əliyev düyməni basaraq müəssisəni işə salıb, istehsal prosesini izləyib.

Məlumat verilib ki, 13 hektar sahəni əhatə edən zavodun inşasına 2005-ci ildə başlanılıb, tikinti işləri 2008-ci ilin mayında başa çatdırılmışdır. İstehsal sahəsi 20 min kvadratmetr olan zavodda kondisioner sexi fəaliyyət göstərir. Burada ilkin mərhələdə 250 nəfər işlə təmin olunub. Zavodun istehsal gücü ildə 600 min kondisionerdir. Gələcəkdə müəssisədə soyuducu, tozsoran və digər məişət avadanlığı sexlərinin yaradılması nəzərdə tutulur. Həmin sahələr istifadəyə verildikdən sonra zavodda 1000 nəfər işlə təmin olunacaq. Burada Türkiyədən, Malayziyadan, İrandan gətirilən xammaldan, habelə yerli materiallardan istifadə olunacaq. Bundan  əlavə,  zavodda boya, polifon, plastik kütlə əridən sexlər, 250 tonluq 6 hidravlik pres də quraşdırılıb.

Prezident İlham Əliyev müəssisədə istehsal olunmuş məhsullara baxıb, zavodun inzibati binası ilə tanış olub.

Prezident İlham Əliyev Şamaxıdakı şahmat məktəbində olub. Məktəbin fəaliyyəti ilə tanış olan dövlətimizin başçısına məlumat verilib ki, 1986-cı ildə tikilmiş məktəbdə ötən müddətdə təmir və bərpa işləri aparılmayıb. Məktəbin yenidən qurulmasına Heydər Əliyev Fondunun təşəbbüsü və dəstəyi ilə bu ilin mayında başlanıb. Artıq əsaslı bərpa işləri başa çatdırılıb. İkimərtəbəli binanın ümumi sahəsi 2116 kvadratmetrdir. Burada 7 şahmat otağı, yarış zalı və digər yardımşı otaqlar vardır. Şahmat məktəbi yenidənqurmadan sonra müasir inventar və avadanlıqla, kompyuter dəstləri ilə təchiz olunub.

Prezident İlham Əliyev Şamaxı mədəniyyət sarayında aparılmış yenidənqurma işləri ilə tanış olub. Sarayın foyesində Ulu öndər Heydər Əliyevin və Prezident İlham Əliyevin mədəniyyətimizin qorunması və inkişafı istiqamətində gördükləri işləri əks etdirən fotoguşə yaradılıb.

Məlumat verilib ki, 1974-cü ildə inşa edilmiş mədəniyyət sarayının əsaslı təmirinə 2007-ci ilin ikinci rübündə başlanılıb. Yüksək səviyyədə aparılmış təmir işləri 2008-ci ilin mayında başa çatdırılıb. Sarayda müasir işıqlandırma sistemi quraşdırılıb, 300 nəfərlik zal mebel və digər avadanlıqla təchiz olunub. Prezident İlham Əliyev sarayda uşaqların ifasını dinləyib.

Prezident İlham Əliyev Şamaxı Astrofizika Rəsədxanasında aparılmış yenidənqurma işləri ilə tanış olub. Məlumat verilib ki, Azərbaycan Milli Elmlər Akademiyasının Nəsirəddin Tusi adına Şamaxı Astrofizika Rəsədxanası 1959-cu ildə Azərbaycanın tanınmış alimləri Həsən Əliyevin və Yusif Məmmədəliyevin təşəbbüsü ilə yaradılıb. Dəniz səviyyəsindən 1500 metr hündürlükdə yerləşən rəsədxana çətin müşahidə edilən cənub səmasının öyrənilməsində üstünlüklərə malikdir.

Rəsədxanada inzibati bina, 6 teleskop, 40 mənzilli beşmərtəbəli bir, ikimərtəbəli beş yaşayış binası, 4 kottec və mehmanxana var. Uzun illər təmir olunmadığından rəsədxanada tikililər yararsız vəziyyətə düşüb. Azərbaycan Prezidenti İlham Əliyevin 2008-ci il 5 sentyabr tarixli Sərəncamı ilə Şamaxı Astrofizika Rəsədxanasının maddi-texniki bazasının gücləndirilməsi və burada əsaslı təmir-tikinti işlərinin aparılması üçün Prezidentin Ehtiyat Fondundan 5 milyon manat, 2009-cu il 21 iyul tarixli Sərəncamı ilə 3 milyon manat vəsait ayrılıb. Hazırda burada işlər sürətlə davam etdirilir. Rəsədxananın planı ilə tanış olan dövlətimizin başçısı yenidənqurma və təmir işlərinin vaxtında və keyfiyyətlə başa çatdırılması ilə bağlı tapşırıq və tövsiyələrini verib.

Yeni Azərbaycan.- 2009.- 27 noyabr.- S.2.