M.Ə. Rəsulzadənin istintaq materialları
Azərbaycanın
görkəmli dövlət xadimi, ilk demokratik Azərbaycan
dövlətinin banisi M.Ə. Rəsulzadə öz siyasi fəaliyyəti
dövründə həm də söz və mətbuat
azadlığı uğrunda mübarizə aparıb. Daim təqiblərə
məruz qalan M.Ə. Rəsulzadə çar Rusiyası
dövründə mətbuat üzərində senzuraya
qarşı da ciddi etirazını bildirib.
M.Ə. Rəsulzadənin söz və mətbuat
uğrunda mübarizəsi ayrıca və geniş bir
mövzudur. İlk məqaləsini 1903-cü ilin mayında
“Şərqi-Rus” qəzetində nəşr etdirdikdən sonrakı
dövrlərdə o, azad sözün, azad fikrin müdafiəçisi
olaraq mücadilə aparıb. O, eyni zamanda yazılarında mətbuat
azadlığını yüksək dəyərləndirib, mənalı
fikirlər səsləndirib. O, bu dəyərli fikirlərini hələ
1910-cu il avqustun 23-dən Tehranda nəşr etdiyi “İrani -
Nov” qəzetindəki “Mətbuat azadlığı” məqaləsində
əks etdirib. Həmin məqalədəki fikirlər mətbuat
və söz azadlığının mahiyyətinin öyrənilməsi
baxımından bu gün də
əhəmiyyətlidir.
1915-ci ilin mayında M.Ə.Rəsulzadənin
redaktorluğu ilə nəşr edilən “Yeni İqbal” qəzetində
gedən bir məlumatın qəzet səhifəsindən
çıxarılması onun ciddi narazılığına səbəb
olur.
Həbsinin
əsas səbəbi nə idi?
1853 saylı istintaq işinin
ittihamları
Azərbaycan Respublikası Milli Arxiv İdarəsinin
Tarix Arxivinə məxsus olan 398 saylı qovluğunda ciddi sənədlər
tapmaq mümkündür. Bu sənədlər M.Ə.Rəsulzadənin
istintaq materialları ilə bağlıdır. Məlum olur
ki, M.Ə.Rəsulzadə Bakı şəhər rəisinin
1915-ci ilin mayın 19-da qəbul etdiyi qərarına uyğun həbs
olunub. Qərarda onun həbsinin 23-cü maddəyə əsasən
hərbi vəziyyət elan edilmiş yerlərdə ictimai
qaydaları pozduğu bildirilir. Bu ittiham əsas
götürülərək M.Ə.Rəsulzadə Bakı həbsxanasına
salınır. Qeyd etdiyimiz kimi, M.Ə.Rəsulzadə “Yeni
İqbal” qəzetində bir yazının hərbi senzura tərəfindən
çıxarıldığına
etirazını sərt ifadə etdiyinə görə həbs
olunur.
Hərbi
- senzor Ledoxovskinin izahat - ittihamı
Bakı şəhər rəisi Martınov istintaqa
verdiyi yazılı məlumatda qeyd edilir ki, Hərbi senzor Ledoxovskinin ifadəsinə əsasən
M.Ə.Rəsulzadə 1915-ci il mayın 11-də axşam
saatlarında Bakı şəhər poçt - teleqraf idarəsinin
binasına daxil olub, burada yerləşən hərbi
senzuranın otağında senzor İmamverdibəyova sərt
şəkildə etirazını bildirib. M.Ə.Rəsulzadə
“Yeni İqbal” qəzetində çap edilən, Bakı
Quberniyası Xalq Peşə məktəbinin direktoruna aid olan
bir məlumatı səhifədən
çıxdığına görə digər senzorların
- İ.A.Məlikov və V.K.Freydin yanında İmamverdibəyovun
üstünə qışqırıb.
İttihamda bildirlir ki, elə həmin axşam saat
20:00-da M.Ə. Rəsulzadə qraf
Ledoxovskinin mənzilinə gedib, yazının qəzetdən
çıxarılmasını ona da bildirib. Qraf Ledoxovski məhz
onun tapşırığı ilə yazının
çıxarıldığını dedikdə, M.Ə.Rəsulzadə
onunla yüksək səslə və acıqlı
danışıb. Bundan sonra Ledoxovski Bakı şəhər
rəisindən onun cəzalandırılmasını tələb
edib.
M.Ə.Rəsulzadə
üzr istəməyib
Qraf Ledoxovskinin təqdimatından
sonra M.Ə.Rəsulzadə Bakı şəhər rəisi
Martınovun idarəsinə çağırılıb.
Şəhər rəisi ona gedib Ledoxovskidən üzr istəməsini
təklif edib və bildirib ki, əgər o, bu addımı atarsa,
vəziyyətdən çıxış yolu tapılar.Lakin
M.Ə.Rəsulzadə Martınovun bu təklifini qəbul etməyib,
kəskin şəkildə ona etirazını bildirərək,
özünün haqlı olduğunu qeyd edib. Məhz bundan
sonra şəhər rəisi Martınov M.Ə.Rəsulzadənin
üzr üstəmədiyini görüb onun həbs edilməsi haqqında
göstəriş verib.
İstintaq
protokollarından məlumatlar
Qeyd edək ki, M.Ə.Rəsulzadənin həbsi ilə
bağlı tərtib edilən protokolda maraqlı məlumatlar
var. Əslində bu məlumatlar onun siyasi fəaliyyətinin
öyrənilib araşdırılması baxımından
olduqca faydalıdır. Bu məlumatlarda onun cəmiyyət
üçün “zərərli” olması xüsusi
vurğulanır. Qeyd edilir ki, o, Əhməd bəy
Ağaoğlunun “zərərli” istiqaməti ilə seçilən
“İrşad” qəzetinin əsas əməkdaşı olub.
Eyni zamanda o, “Hümmət” Partiyasının fəalı kimi
də vaxtı ilə iki dəfə axtarışa verilib,
lakin İranda gizləndiyindən həbsi mümkün
olmayıb. Tehranda isə o, “İrani - Nov” (“Yeni İran”) qəzetini
nəşr edib və bu qəzetdə Rusiya hökumətinə
qarşı narazılıq yaratmağa
çalışıb. Bu fəaliyyətinə əsasən
Tehrandakı Rusiya səfirinin tələbi ilə İrandan
çıxarılıb, gizli olaraq “Gənc Türklər”in
tapşırığı ilə Bakıya gəlib, buradan isə
Türkiyəyə gedib. Türkiyədə o, Rusiya əleyhinə
“Tanin” qəzetində çalışıb. 1913-cü ildə
Rusiyada Romanovlar sülaləsinin hakimiyyətdə
olmasının 300 illiyi ilə bağlı ümumi
bağışlama olur. Bu bağışlamadan sonra M.Ə.Rəsulzadə
Bakıya qayıdır, “İqbal” qəzetində
çalışır.
M.Ə.Rəsulzadənin həbsi ilə bağlı
hazırlanmış istintaq protokolunun sonunda qeyd edilir ki, o, məhdud
vəsaitə malikdir. Lakin müsəlmanlar arasında
böyük nüfuzu var və o, “Müsəlman Xeyriyyə Cəmiyyəti”nin
katibidir.
Həbsxanada
axtarış aparılıb
1915-ci il iyunun 6-da M.Ə.Rəsulzadə həbsxanada
saxlanılarkən Bakı şəhər Xüsusi Jandarm
Korpusunun Rotmistri Lixovskinin rəhbərliyi ilə və tərcüməçilər Rzabəyovun, Məlikyeqanovun
iştirakı ilə onun yazılarına baxış
keçirilir. Müəyyən edilir ki, bu yazılar şəxsi
xarakterdədir və heç bir gizlilik daşımır.
M.Ə.Rəsulzadə ilə bağlı araşdırmalar
aparıb əsaslı faktlar əldə edə bilməyən
hökumət orqanları onun həbsdə
saxlanılmasının heç bir hüquqi əsas
daşımadığı qənaətinə gəlirlər.
Həbsxanadan
azad edilir
1915-ci ilin 25 iyulunda Xüsusi İdarə rəisinin
yazılı məlumatında (N2712) M.Ə Rəsulzadənin
həbsdən azad olunması bildirilir. Həmin il iyulun 25-də
Bakı şəhər rəisi polkovnik Martınov Bakı həbsxanası
rəisinə 3788 saylı məxfi məlumatında M.Ə.Rəsulzadənin
başqa cinayətləri olmaması halında azadlığa
buraxılmasına göstəriş verir.
Beləliklə, M.Ə.Rəsulzadə söz və mətbuat
azadlığını müdafiəsinə görə iki
aydan çox həbsxanada qalır. Öz xalqının istər
siyasi, istərsə də mətbu və söz
azadlığı uğrunda yorulmadan mübarizə aparan, təqiblərlə
dolu ömür yaşayan M.Ə.Rəsulzadə beş il sonra
1920-ci ilin avqustunda yenidən həbs edilir, Bakı həbsxanasına
salınır. Bu dəfə isə o, söz və mətbuat
azadlığına görə yox, Azərbaycan
İstiqlalı uğrunda apardığı mübarizəyə
görə həbs olunur.
Nəsiman
YAQUBLU
Yeni
Müsavat.- 2014.- 20 fevral.- S.6.