"Qadın paltarı geyinməkdə

bir problem görmürəm"

O, qısa müddətdə məşhurlaşıb. Çəkdiyi videolar cəmiyyətdə baş verən hadisələri, müxtəlif peşə sahiblərinin davranışlarını güzgü kimi özündə əks etdirir. Elə özü də Şekspirin məşhur "Aktyor dövrünün güzgüsüdür" ifadəsini özünə şüar seçib. Söhbət aktyor Taleh Yüzbəyovdan gedir. Əslində aktyor uzun müddət teatrda çalışıb, reklamlarda çəkilib, filmlərdə rol alıb. Amma onu ilk olaraq "Ceyhun" videosu ilə tanıdıq. Sonradan isə digər çəkdiyi və çəkildiyi videolar Yüzbəyovu daha da məşhurlaşdırdı.

Hər kəs ondan danışır, videolarını paylaşır və təriflər yağdırırdı. Bu proses indi də davam edir. Bunun sirri nədir? İnsanların videolarda özünü görməsi, yoxsa xüsusi bir yenilik?

Milli.Az musavat.com-a istinadən T.Yüzbəyovla müsahibəni təqdim edir:

- Reklamlara çəkilmisiniz, "Oğlan Evi" filmində rolunuz var idi və s. Bir dəfə özünüz çəkildiyiniz videoları paylaşmışdınız. Amma sizi çəkdiyin qısa videolardan tanıdılar. Bunun səbəbi nədir?

- Məncə, reklamlarda üzlər çox yadda qalmır. 10-na yaxın reklama çəkilmişəm və ancaq dostların yadında qalmışam. Reklam anidir, bir neçə saniyə görünürsən. Bəlkə də yadda qalmamağa səbəb budur. "Oğlan evi"ndə də rol almışam. Rolum ikinci dərəcəli idi. Diqqət edən də, etməyən də olmuşdu. Videolar çəkəndən sonra üzüm tanındı. Yaddaşlarda qalmağa başladım.

- Video çəkmək ideyası nə vaxt və necə yarandı?

- 14 fevralla bağlı videonu marağa çəkmişdim, sonra internetdə yayıldı, diqqət çəkdi. Davamlı video çəkmək məqsədim yox idi. Həmin dövrdə video çəkənlər çox deyildi. Video çəkib "Youtube" kanalına yerləşdirdim. Oradan saytlarda yayıldı və insanların diqqətini çəkdi. İkinci videoma olan maraq da gözənilməz oldu. İki minlik səhifə 1 həftəyə 6000 oldu. Ondan sonra məndə video çəkməyə maraq yarandı. Çünki insanların marağı və bəyənmələri mənə stimul verdi. Daha sonra çəkdiyim videolar gah uğurlu, gah da uğursuz oldu. Belə-belə öz yolumu tapdım. Daha hansısa məsələ məni narahat edəndə status yazmıram, video çəkirəm.

- Bu rəğbət, izləyici, məşhurluq həyatınızda nəyisə dəyişdimi?

- Böyük dəyişiklik olmadı. Əsas o oldu ki, məşhurluq qazandım. 2009-cu ildə universiteti qurtarmışam, o vaxtdan bu sahədəyəm. Aktyor kimi fəaliyyət göstərmişəm, reklamlara çəkilmişəm, amma tanınmamışam. Videolardan sonra insanların mənə marağı atdı. Mənim məqsədim vine çəkmək deyil. Mənə maraqlı gələn, narahat edən məsələləri ekranlaşdırıram.

- Videolar sizə qazanc necə gətirdimi?

- Deməzdim ki, çox qazanc əldə etmişəm. İşbirliyi təklifləri gəlir. Artıq insanlar üçün maraqlı simayam, onlar məni öz işlərində görmək istəyirlər. Vaxtım yoxdur ki, iş təkliflərini dəyərləndirim.

- Videolar üçün ideyalar necə yaranır?

- İki cür olur. Biri var ani gələn ideya, biri də var, oturub düşündüklərim. Məsələn, qazın qiyməti qalxır. Bu səni narahat edir, düşünüb video çəkirsən. Bir də var, hansısa hadisə və ya ani yadına düşən olay yeni ideyanın yaranmasına səbəb olur. Jurnalist ideyası əsəbdən yaranmışdı. Mən çalışıram videolarımda qərəz olmasın, məsələyə obyektiv yanaşım. Jurnalist videosunda isə subyektiv idim. Çünki məsələ birbaşa mənə toxunmuşdu. Çox əsəbi idim. Düşünün ki, mənə bir xanım yazır ki, "Siz reklamlara neçəyə çəkilirsiniz?" Mən normalda bununla bağlı inboxda cavab vermirəm. Niyəsə cavab verdim. Sonra baxdım ki, gedib bundan xəbər yazıb. Mənə demədən, icazə almadan. Sualı nə üçün verdiyini demədən. Dindar videolara görə elə bilirlər ki, ateistəm. Əslində elə deyil. Mən sadəcə bu işin içindəyəm, gördüyümü çəkirəm. Çalışıram üçüncü tərəf olum, məsələyə kənardan baxım.

- Videolara görə tənqid olunursunuz, sizə zəng edib irad bildirirlər?

- O şəraiti yaratmamışam ki, kimsə zəng edib irad bildirsin. Bəzən isə mesaj qutuma yazırlar. Hər insan başqa sahə insanına gülməyi sevir. Pul videolarını isə hamı bəyənir. Kimsə videolara görə məni öldürəsi deyil ki... "Jurnalist" videosundan sonra mənə media mənsubları statuslar həsr etmişdi. Videoda əsl sözü səhv getmişdi. Onu tənqid etmişdilər. "Dindar" videom da çox tənqid olundu, insanlar yanlış anlamışdı. Mənə dedilər ki, dini ələ salırsan. Deyirəm ki, din sənin üçün nədir? Dindən anlayışı olmayan şəxslər deyir ki, dinə sataşmısan. Din Allahdır, peyğəmbərdir, Qurandır. Deyirlər başqalarına gücün çatmır, dinə dil uzadırsınız. Mən elə mövzuda videolar çəkmişəm ki, hər kəs onu çəkə bilməz. Pampersin qiyməti qalxırsa, bu birbaşa mənim cibimə təsir edir. Niyə bu haqda çəkməyim? Mən müxalif deyiləm. Heç kim deyə bilməz ki, hansısa müxalifətçi qrupda olmuşam. Müxalifət də, iqtidar da mənim üçün eynidir. Mən vətəndaşam.

- İzləyicilər bir müddət video keyfiyyətinə yox, çəkilən mövzuya fikir verirlər. Sonra isə artıq tamaşaçılar daha keyfiyyətli iş istəyir. Telefonla çəkilən videolar tənqid edilir. Sizin üçün durum necədir?

- Studiyam olsa da, telefonla çəkməyə davam edəcəyəm. Məncə o səmimiyyət telefonla çəkəndə alınır. Düzdür, elə videolar var ki, onun üçün peşəkar çəkiliş lazımdır. O ayrı məsələdir. Məncə, peşəkar çəkilmiş video önə getmir. Sosial şəbəkələr üçün ən yaxşısı videonu telefonla çəkməkdir. Telefonla çəkilən videolar daha yaxşıdır. Nə vaxtsa film çəkmək istəsəm, kamera ilə çəkəcəyəm.

- Bəzi aktyorlar, vinerlər deyir ki, qadın paltarı geyinmərəm, yaylıq bağlamaram. Bu onlar üçün tabudur. Sizin üçün tabu nəsə varmı?

- Qadın paltarı geyinməkdə bir problem görmürəm. Özünə aktyor deyirsənsə, rolun tələb edirsə, geyinməlisən. Yaşar Nuridən, Rafael Dadaşovdan yaxşı aktyor olmayacağıq ki. Dünyanın məşhur aktyorları qadın obrazı canlandırıblar. Məncə, bu düşüncələr mental dəyərlərdən yaranır. Məqsədin özünü arvad kimi göstərmək deyilsə, qadın paltarı geyinməkdə problem yoxdur. Mənim üçün müəyyən çərçivələr var. Amma onlar haqda düşünməmişəm. Gərək həmin situasiyaya düşüm və o anda qərar verim ki, bu mənim üçün tabudur, ya yox. Yəqin həssas mövzular... Onlarla bağlı çəkəndə ehtiyatlı davranacağam.

- Mental dəyərlərdən söz düşmüşkən, neçə gündür ki, metroda iki gəncin səmimi olması müzakirə olunur. Jurnalistin onlara təpinməsi, onların öpüşməsi və ya buna cəhd etməsi məsələsi müzakirə edildi. İnsanlar iki hissəyə bölündü. Sizin buna münasibətiniz necədir?

- Mənə görə insan metroda öpüşməz. Bu mənim baxışımdır. Öpüşmək intim şeydir, insanların içində öpüşmək yaxşı deyil. Əgər insanın məqsədi öpüşməkdirsə, haradasa öpüşəcək. Biz də öpüşmüşük, amma metronun içində öpüşməmişik. Bunun böyük tərbiyəsizlik olduğunu düşünmürəm, amma ictimai yerdə yaşlı var, uşaq var, xanımlar var. Mən bunun tərəfdarı deyiləm.

Mən aqressiyanın tərəfdarı deyiləm. Mən olsaydım, durub yerimi dəyişərdim. Yekə kişinin durub qışqırmağı, yerə təpik vurması doğru deyil. O gəncin hələ sənə gücü çatmır, qızın yanında da utandı. Amma böyüyəcək və gücü çatan hala gələcək. O zaman özündən böyüyə hörmət etməyəcək. Gənclərlə böyük kimi davranmaq, məsləhət vermək lazımdır. Küçədə mini ətəkli qız görəndə baxa da bilərəm, baxmaya da bilərəm. Bu mənim seçimimdir. Amma mən ona deyə bilmərəm ki, geyinmə. Qadağalar hər zaman maraq yaradıb. Bu gün öpüşməyi qadağan edirsən, flaşmob keçirirlər. Yaxşı dəyərlərimizi qoruyaq, amma elə qoruyaq ki, heç kim inciməsin.

Məhəmməd Türkmən

Yeni Müsavat.- 2017.- 3 aprel.- S.12.