Fuad Əlişovla Aysel

Əlizadənin layihəsi - Film kimi...

Tanınan yazar Aysel Əlizadə təqdimata hazırlaşır. Mayın 29-da Park İnn otelin “Füzuli” zalında onun “Çərçivə” şeirinə çəkilmiş eyni adlı qısa filmin təqdimatı və “Qadın Peyğəmbər” kitabının imza günü keçiriləcək. Filmin rejissoru Fuad Əlişovdu.

Aysel Əlizadə və Fuad Əlişov “Yeni Müsavat”ın qonağı olublar, müsahibə veriblər. Həmin müsahibəni təqdim edirik.

Aysel Əlizadə:

- Bu, mənim şeirimə çəkilən ilk klipdir. Hətta dostlardan biri bu videonun klip kimi təqdim edilməsinin əleyhinə oldu. Dedi ki, bu, sənin yaradıcılığın haqqında qısa filmdir. Çünki klipdə bir neçə Aysel Əlizadə var: şair, aktrisa, ifaçı və qiraətçi. Əslində çoxdan şeirə klip, film çəkdirmək ənənəsini başlatmaq arzum vardı. İllər əvvəl belə bir klip olub, xalq artisti Əminə Yusifqızının çəkildiyi klip var idi. Amma bu klip bir qədər fərqlidir, burada şair özü öz mətnini səsləndirir və onu canlandırır.

- Buna qədər də sizin ifanızı artıq eşitmişik.

- Bəli, “Ad günü” mahnısını oxumuşdum və bu günə qədər o mahnını məndən istəyən dinləyicilər var (gülümsəyir). Hətta olur ki, hansısa çox ciddi bir siyasi yazımın altından belə bir şərh yazırlar: “Sizin “Ad günü” mahnınız var idi, onu xahiş edirəm paylaşın”.

- Klip üçün niyə məhz “Çərçivə” şeirini seçdiz?

- Şeiri Fuad bəy seçdi.

Fuad Əlişov (F.Ə.):

- Seçdim deyəndə ki, mən Aysel xanımdan bir neçə yeni şeir göndərməyi xahiş etdim. Onların içindən ən çox “Çərçivə”ni bəyəndim. Əslində Aysel başqasını istəyirdi...

“Bu, şeirimə çəkilən ilk klipdir”

Aysel Əlizadə (A.Ə.):

- Hə, doğrudur.

F.Ə:

- Sonra başqaları da deyəndə ki, bu şeir daha yaxşıdır, onun üzərində qərarlaşdıq.

- Fuad bəy, bu, şairlə olan ilk işinizdir?

F.Ə:

- Ümumiyyətlə həm Aysel xanımla, həm də şairlə olan ilk işimdir.

Xalidə Gəray:

- Nədənsə son vaxtlarda sizin yeni kliplərinizi görə bilmirik.

F.Ə:

- Əvvəllər bizim çalışdığımız janra maraq çox idi. Elə təsəvvür yaranırdı ki, biz də müğənnilərlə birgə gündəmdəyik. Bu janra maraq azalıb deyə klipmeykerlər artıq əvvəlki kimi gündəmdə deyil. Ola bilsin ki, yeni kliplər çəkilir, amma onların ətrafında əvvəlki kimi söhbətlər və qalmaqallar olmur.

A.Ə:

- Belə başa düşürəm ki, müğənnilər gündəmdən düşməyə başlayıb.

X.Gəray:

- Kliplər, yoxsa müğənnilər gündəmdən düşüb?

F.Ə:

- Bu, Aysel xanımın fikridir (gülümsəyir).

A.Ə:

- Mən belə düşünürəm. İndi izləyici, tamaşaçı daha çox ciddi mövzulara, sosial problemlərə, mənəvi məsələlərə maraqlıdı.

F.Ə:

- Uzun sözün qısası, mən daha çox kadr arxasında qaldığımdan belə bir fikir yaranıb.

X.Gəray:

- Bu günə qədər çəkdiyiniz kliplərlə bu yeni klip arasında hansı fərqliliyi görə biləcəyik?

F.Ə:

- Əsas fərqlilik odur ki, mahnıya çəkilən klip deyil və mən burda illərlə tanıdığım insanın daxili aləmini göstərməyə çalışmışam.

X.G:

- Aysel xanım, “Çərçivə” sevgi şeiridi. Maraqlıdır, ünvanlıdır?

A.Ə:

- Xeyr. İlk dəfədi ünvansız sevgi şeiri yazmışam. Bu şeir bir gecəyə yaranıb və mən həmən, redaktə etmədən facebook səhifəmdə paylaşmışam. Dərhal da çox böyük rezonans doğurdu, xeyli paylaşıldı, bəyənildi.

X.G:

- Şeir nə zaman yazılıb?

A.Ə.

- Bu ilin yanvar ayında.

F.Ə:

- Aysel bu şeirini bir gecəyə yazıb. Adətən belə olmur. Yaradıcı insan olduğum üçün bilirəm ki, maraqlı bir əsər yaratmaq insana asan başa gəlmir. Xüsusi ruh halında olursan. Şeir kimə ünvanlanıb, niyə bir gecəyə yazılıb dərinliyinə varmadım, düzü. Klipdə yaradıcı prosesi və bir mətnin necə yarana biləcəyini göstərməyə çalışdım. Əslində mənə də elə gəldi ki, şeir kiməsə ünvanlanıb. Amma Aysel xanım bunu açıqlamadı.

By- Məhəmməd Türkmən (5 of 45).jpg (128 KB)

A.Ə:

- Bu şeir bir situasiyanı, bir ruhu ifadə edir. Şeirin yazılması barədə sirri açım. Gənc bir dostum var. O, bir qıza vurulmuşdu. Yox cavabı aldı. Onu hiss edib yazmışam. Görünür, zamanla təkcə yazıda deyil, şeirdə də müəllif peşəkarlığından istifadə edib mətn yarada bilir. Bu artıq təkcə ruhani vəziyyət deyil, həm də peşəkar vəziyyətdir.

X.G:

- Bir qədər öncə qeyd etdiz ki, klipdə mahnı da səsləndirmisiz. Bu hansı mahnıdır?

A.Ə:

- Sezen Aksunun “Onursuz olmasın aşk” mahnısı.

F.Ə:

- Aysel xanımın əslində çox gözəl musiqi duyumu var. Bəlkə də bu onun əvvəllər həm də müğənni olmasından irəli gəlir. Bu mahnını bir neçə mahnının içərisindən seçib.

X.G:

- Belə anladım ki, klipin süjet xətti, ideyası Fuad bəyə məxsusdur.

A.Ə:

- Fuada təklif etdim ki, klipdə başqa mənzərələr də olsun. Razılaşmadı. “Şeirdə ancaq sən olmalısan” dedi.

F.Ə:

- (gülümsəyir) Yaxşı ki, qulaq asmamışam.

X.G:

- Aysel xanım, artıq sizin bir çox bacarıqlarınızla tanışıq. Maraqlıdır, bu şeirinizə musiqi bəstələməyi düşünmüsüzmü? Bəstəkarlıq bacarığınız da varmı?

A.Ə:

- Xeyr. Pianinoda ifa edərkən hansısa melodiya yığılıb, amma bəstəkar kimi musiqi yazmağı düşünməmişəm.

By- Məhəmməd Türkmən (14 of 45).jpg (95 KB)

X.G:

- Musiqi təhsiliniz var?

A.Ə:

- Yoxdur, amma evimizdə hər zaman pianino olub və anam gözəl ifalar edir. Özüm isə uşaq ikən musiqi məktəbinin fortepiano sinfində təhsil almışam. Lakin davam etdirmədim.

F.Ə:

- (təəccüblənir) Görürsüz, Aysel xanımın bu bacarığından xəbərsiz olmuşam, yoxsa klipdə əlavə kadr da olardı.

X.G:

- Bəs şeirlərinizə musiqi bəstələnib?

A.Ə:

- Musiqi və poeziya mənim yaradıcılığımda çox harmonikdir. Aygün Səmədzadə “Ad günü” şeirimə mahnı bəstələyib. Həmçinin mərhum Nərmin Məmmədova ilə birgə işləmişik. Özümü nəğməkar şair hesab etmirəm.

X.G:

- Aysel xanımla uzun müddətdir ki, dostsuz. Bu klipi ona hədiyyə etmisiz, yoxsa?

A.Ə:

- Bəli, hədiyyə edib.

F.Ə:

- Sözün düzü, neçə illdir görüşə bilmirdik. Görüşdük, söhbətləşdik, Aysel xanım yaradıcılığından, kitablarından danışdı. Təklif etdim ki, yaradıcılığını video formatında təqdim edək. Klip ideyası burdan yarandı.

A.Ə:

- Ümumiyyətlə bu klip Fuad bəyin ilk operator işi idi.

F.Ə:

- (gülümsəyir) Bunu demək istəmirdim, amma... Görənlər operator işini də tərifləyir.

X.G:

- İlk dəfə idi ki, dostunuza klipi hədiyyə edirsiz?

F.Ə:

- Yox, mən ildə yalan olmasın, 2-3 üç işimi hədiyyə edirəm.

By- Məhəmməd Türkmən (27 of 45).jpg (105 KB)

X.G:

- Məsələn, kimlərə?

A.Ə:

- Çox-çox istədiyi adamlara hədiyyə edir.

X.G:

- Fuad bəy, film, komediya və ya serial çəkməyi düşünürsüzmü?

F.Ə:

- Film çəkmək planım var. Tamaşaçılarda da kliplərdən daha çox filmlərə maraq var. Filmdə hər janrdan bir az olacaq. Sırf komediya mənim üçün o qədər də maraqlı deyil.

X.G:

- Bəs hazırda hansı işlə məşğulsuz?

F.Ə:

- Əsasən reklam işləri görürəm. Bu da mətbuata açıqlanmır. İşlərim internet resuslarında, TV efirində yayımlanır. Lakin tamaşaçılara maraqlı deyil təqdim olunan reklam çarxının arxasında kimlər var.

X.G:

- Klip sifarişləri az olduğu üçün, yoxsa daha gəlirli sahə olduğu üçün reklamı seçmisiz?

F.Ə:

- Zamanla belə alındı.

By- Məhəmməd Türkmən (30 of 45).jpg (117 KB)

X.G:

- Klip sifarişləri varmı?

F.Ə:

- Demək olar ki, yoxdur, çox az. İldə 1-2 klip olur. Bununla dolanmaq olmur. Aysel xanımla işimiz mənim üçün yeni janr idi. Şeirə klip çəkmək maraqlı idi. Çünki şeirdə fikirlər daha dərin olur.

“Aysel xanımla iş birliyimiz yaradıcılığımda yenilik idi”

X.G:

- Klipdən razı qaldız?

F.Ə:

- Bacardığımı etdim.

A.Ə:

- Prosesdən necə?

F.Ə:

- Prosesdən heç də. Ayselin bacarığı, istedadı çoxşaxəlidi. Aktyorluğu, mahnı ifa etməyi gözəldi, buna görə də mən əziyyət çəkmədim. Həm də Aysel xanım çox fotogenikdir.

A.Ə:

- (gülümsəyir) Mənim bəlkə də ən böyük qazancım fotogenik olmağımdır.

F.Ə:

- (zarafatla) Bəs onda niyə məni incidirdin? Klipi göstərəndə özünü bəyənmirdi.

A.Ə:

- Kənardan nə qədər rahat, ədalı görünsəm də, əslində özümə çox tənqidi yanaşıram.

X.G:

- Niyə çərçivə?..

A.Ə:

- Bu, çox dərin məsələdir. Əslində şeirin ilk adı “Yalqızlıq” idi. Amma sonra dəyişərək “Çərçivə” qoydum. Orada bir misra var, “Mən səni bir rəsm çərçivəni sevən kimi sevirəm”. Əslində bu bir tamamlanmadır. Rəsm çərçivəsiz də rəsmdir, mahiyyəti itmir, amma çərçivə ilə o tamamlanır və daha effektli, çəkici, dəyərli görünür. Çərçivə isə rəsmsiz sadəcə boş kənarlardı.

F.Ə:

- Təxminən mən də bu cür düşünmüşdüm. Aysel xanım dedi ki, kimsə qızdan imtina cavabı alıb və bunu qələmə alıb. Həmin gənc sanki özünü sındırmamaq üçün deyir ki, mən özümü tamamlamaq üçün səni axtarırdım, olsa nə yaxşı, olmasa eybi yox.

A.Ə:

- Bir tərəfdən də başqa mənası var. İnsan həyatındakı çərçivə ifadə olunur.

X.G:

- Sizcə, insan həyatında çərçivə olmalıdırmı?

A.Ə.:

- Olmalıdır, amma bu çərçivəni insan özü müəyyənləşdirməlidir. Kənardan, başqalarının hazırladığı deyil, öz seçdiyin, həyatda nəticə olaraq gəlib çıxdığın çərçivə...

X.G:

- Aysel xanım, bəs sizə ünvanlanan şeir olub?

A.Ə:

- (gülümsəyir) çox olub. Şeir ünvanlayanlar arasında tanınmış da, gizli şairlər də olub. Bu yaxınlarda da çox yaxşı bir şeir ünvanlanmışdı.

X.G:

- Necə xəbər tutursuz ki, o şeirlər sizə həsr olunub?

A.Ə:

- Birbaşa deyirlər ki, sizə yazmışıq (gülümsəyir).

X.G:

- Bəyəndiyiniz, dostluq etdiyiniz şairələr varmı?

A.Ə:

- Əlbəttə var. Rəbiqə Nazimqızı ilə yaxın dostuq. Onu həm dost, həm şairə kimi çox bəyənirəm. Sevinc Elsevəri bəyənirəm. Ümumiyyətlə Azərbaycanda yaxşı şair xanımlar çoxdur. Qadın şairlər mənə kişi şairlərdən səmimi görünürlər.

X.G:

- Hazırda şairlərin, yazarların maddi durumu, vəziyyəti necədir?

A.Ə:

- Yaxşi deyil. Şair kimi işləyib yaşamaq olmur. Hərdən haray salan yazarlar qınanılır ki, niyə səs-küy salır, gileylənir, işləyib qazansın. Amma yazar hansısa saytda ona aid olmayan materialları işləmək və yaxud hansısa şirkətdə öz sahəsindən kənar işlə səhərdən axşamadək çalışmaq istəmir. O, yaradıcıdı, ruh adamıdır. İstəyir ki, kitabları çap olunsun, gəlir əldə edib yaşasın. Çünki işi budu.

F.Ə:

- Ümumiyyətlə, bizim yazarların kitabları satılır?

By- Məhəmməd Türkmən (43 of 45).jpg (103 KB)

A.Ə:

- Əgər bu işlə cəmiyyət olaraq şəbəkə şəklində məşğul olsaq, əlbəttə ki, satılar. Oxucu yoxdur iddiası ilə razılaşmıram. Çünki Azərbaycan oxucusu istədiyi məlumatları saytlardan, köşə yazılarından alır. Oxucu var, onu kitab oxucusuna çevirmək üçün müəyyən işlər görülməlidir.

X.G:

- Son sualım olacaq, bu klipdən gözləntiniz nədir?

F.Ə:

- Başlanğıcda gözləntim yox idi. Sadəcə şeir janrını yeni bir formatda təqdim eləmək istədik. Ola bilər ki, bu klip oxucuları kitab mağazalarına, kitabxanalara cəlb etmək üçün təkan olsun.

A.Ə:

- Klipə nə dərəcədə maraq olacağını indidən deyə bilmərəm. Çox istərdim ki, müasir poeziyaya böyük maraq yaransın.

Sonda dostlarıma, oxucularıma, həmkarlarıma demək istəyirəm ki, mayın 29-dakı tədbirə giriş sərbəstdir. İstənilən adam gəlib iştirak edə bilər. Gözləyəcəm...

Xalidə Gəray

Yeni Müsavat.- 2017.- 27 may.- S.4.