“Musiqi insanlara eyni nəfəsi verən fövqəladə bir sənət sahəsidir”

Türkiyənin dövlət sənətçisi, tanınmış pianoçu, Polşanın Dövlət Mükafatına layiq görülmüş Gülsin Onay Naxçıvandakı Heydər Əliyev Sarayında “Nə yaxşı ki doğuldun, Şopen” adlı solo konsert proqramı ilə çıxış etdi. Türkiyənin Naxçıvandakı Baş Konsulluğu, Naxçıvan Mədəniyyət və Turizm Nazirliyi tərəfindən təşkil edilmiş konsertdə onun ifa etdiyi əsərlər dəfələrlə alqışlarla qarşılandı.

Türkiyənin dövlət sənətçisi, tanınmış pianoçu, Polşanın Dövlət Mükafatına layiq görülmüş Gülsin Onay Naxçıvandakı Heydər Əliyev Sarayında “Nə yaxşı ki doğuldun, Şopen” adlı solo konsert proqramı ilə çıxış etdi. Türkiyənin Naxçıvandakı Baş Konsulluğu, Naxçıvan Mədəniyyət və Turizm Nazirliyi tərəfindən təşkil edilmiş konsertdə onun ifa etdiyi əsərlər dəfələrlə alqışlarla qarşılandı. Bu konsertdə Naxçıvan Muxtar Respublikası Ali Məclisinin Sədri Vasif Talıbov da iştirak edib.

Türkiyənin dövlət sənətçisi, tanınmış pianoçu Gülsin Onay Naxçıvan Muxtar Respublikasında səfərdədir. Srağagün o, Naxçıvandakı Heydər Əliyev Sarayında “Nə yaxşı ki, doğuldun, Şopen” adlı solo konsert proqramı ilə çıxış etdi. Türkiyənin Naxçıvandakı Baş Konsulluğunun, Naxçıvan Mədəniyyət və Turizm Nazirliyi tərəfindən təşkil edilmiş konsertdə onun ifa etdiyi əsərlər dəfələrlə alqışlarla qarşılandı. Solo konsertdən sonra bu ünlü sənətçi ilə həmsöhbət olmaq bizə də nəsib oldu. Naxçıvanla bağlı təəssüratlarını bizimlə bölüşən Gülsin Onay ilk dəfə bu qədim diyara gəldiyini dedi. Əlavə etdi ki, Naxçıvan öz gözəlliyi ilə onu heyran edib. Bu qədim diyarın sənətsevərləri ilə görüşməkdən, onların qarşısında çıxış etməkdən məmnun olduğunu dilə gətirən sənətçi burada xoşbəxt anlar yaşadığını söylədi.

Bu sənət aləminə gəlişi ilə bağlı ünvanladığımız sualı cavablandıran Gülsin Onay pianonu universal bir musiqi aləti olduğunu bildirdi: “Bütün dillər əslində musiqinin içində birləşir, musiqi bütün duyğuları özündə ehtiva edir. Musiqi bütün insanlara eyni nəfəsi verən fövqəladə bir sənət sahəsidir. Bu mənada bu sənəti yaşadanlar xoşbəxtdirlər”. Belə bir peşəni kiçik yaşımdan heç yorulmadan sevərək davam etdirdiyini qeyd edən sənətçi daha sonra dedi: “Öz ifalarımla insanları musiqi dünyasına aparmaqla çox əhəmiyyətli missiyanı yerinə yetirirəm”.

Hamının musiqi ilə maraqlanmasını arzulayan Gülsin Onayı piano çalanların sayının ildən-ilə artması sevindirir. O, xüsusən də Naxçıvanda qaldığı müddətdə naxçıvanlıların pianonu sevdiklərini və az qala hər bir naxçıvanlının evində bu musiqi alətinin olmasını öyrənəndə burada daha uzun müddət yaşamağın və pianosevərlərə konsert verməyin ayrı bir xoşbəxtlik olduğunu dedi. O, Şopenin doğum günü ilə bağlı “Yaxşı ki doğuldun, Şopen” proqramı ilə dünyanın bir çox ölkələrində çıxış edəcəyini qeyd etdi: “Aprelin 16-da isə Bakıda konsert verəcəyəm”. Daha sonra “Zaman”la bağlı sualımızı cavablandıran sənətçi bu qəzetin oxucusu olduğunu bildirdi: “Bu qəzet öz üslubu və insanı məlumat sahibi edən yazıları ilə digər mətbuat orqanlarından seçilir”.

Məlumat üçün bildirək ki, İstanbulda musiqiçi ailəsində anadan olan Gülsin Onay piano təhsilinə üç yaş yarımda başlayıb. O, ilk konsertini TRT İstambul Radiosunda verib. Ankaradakı xüsusi qabiliyyətli uşaqlar üçün məktəbdə təhsil aldığı vaxtda - 12 yaşında ikən Fransaya göndərilib. Paris Konservatoriyasını 16 yaşında, “Premier-Jacques Piano” (Piano birincilik mükafatı) mükafatını alaraq bitirib. Sənətçi, “Marguerite Long-Jacques Thibaud” (Paris) və “Ferrucio Busoni” (Bolzano) də daxil olmaqla beynəlxalq yarışmalarda qazandığı mükafatlarla musiqi karyerasına başlayıb. Gülsin Onayın beynəlxalq musiqi karyerası Venesueladan Çinə qədər olan ərazidə, dünyanın 5 qitəsinin 59 ölkəsini əhatə edir. Bununla yanaşı o, dünyanın tanınmış konsert salonlarında öncül orkestrlərin solisti kimi çıxış edib.

1987-ci ildə Türkiyə Dövlət Sənətçisi ünvanını alan G.Onay hər il Türkiyədə 20-dən çox konsert verir. 2004-cü ildən Gümüşlük Klassik Musiqi Festivalının Sənət Müşavirliyini yerinə yetirir. 1988-ci ildə Boğaziçi, 2007-ci ildə isə Hacettepe Universitetinin fəxri doktoru adına layiq görülüb. 2003-cü ildə UNİCEF Türkiyə Milli Komitəsi tərəfindən “Xoşməramlı səfir” seçilib. Sənətçi 2007-ci ildə Şopen musiqisinin təbliğatçısı kimi Polşanın dövlət mükafatına layiq görülüb.

Zaman.-2010.- 15-16 aprel.- S.8.