Naxçıvanda Zərifə Əliyevanın 90 illik yubileyi qeyd olunub

Naxçıvan şəhərindəki Heydər Əliyev Muzeyində görkəmli oftalmoloq-alim, akademik Zərifə xanım Əliyevanın 90 illik yubileyi qeyd olunub.

Naxçıvan Muxtar Respublikası Ali Məclisinin Sədri Vasif Talıbov yubiley tədbirində çıxış edərək deyib: “Akademik Zərifə xanım Əliyevanın alim, həkim, pedaqoq və insan kimi yaşadığı mənalı ömrü, keçdiyi şərəfli həyat yolu nəsillərə mənəviyyat məktəbidir”. Daha sonra o bildirib: “Zərifə xanımın oftalmologiya ixtisasını seçməsinin bir neçə səbəbi var. Onlardan birincisi, bu xeyirxah insanın həyatının fəlsəfəsindən - insanlara işıq, nur bəxş etmək missiyasından irəli gəlirdisə, ikincisi, həmin dövrdə Azərbaycanda oftalmologiyanın az inkişaf etməsindən qaynaqlanırdı. Nəhayət, ən ciddi səbəblərdən biri də İkinci Dünya müharibəsindən sonra keçmiş SSRİ-də, o cümlədən Azərbaycanda traxoma göz xəstəliyinin geniş yayılması idi. O zaman Azərbaycanda “Traxoma ilə mübarizə haqqında” qərar qəbul edilsə də, nəticə görünmürdü. Çünki bu xəstəliyə qarşı təsirli müalicə üsulları yox idi. Oftalmoloq həkimlər çatışmırdı. Belə bir şəraitdə kəskin gedişə malik xəstəlik kimi traxomaya qarşı mübarizə təkcə oftalmologiya elmi üçün yox, bütövlükdə dünya, o cümlədən Azərbaycan səhiyyəsi üçün də həyati əhəmiyyətə malik idi. Sənədlərdən məlum olur ki, ötən əsrin ortalarında dünyada 40 milyona yaxın insanı traxoma tutmuş, onlardan 8 milyonu kor olmuşdu. Azərbaycanda da xəstəlik ocaqları genişlənir, ən çox uşaq müəssisələrini, məktəbləri əhatə edirdi. 1948-ci ildə Naxçıvan Muxtar Respublikasında 7 min nəfər traxomaya yoluxmuşdu. Onlardan 2 mindən çoxu uşaqlar idi. Yaşlıları, o cümlədən uşaqları görmə qabiliyyətinin itirilməsi kimi əzablı xəstəlik gözləyirdi. Belə bir acınacaqlı vəziyyət tək Naxçıvan Muxtar Respublikasında yox, bütün Azərbaycanda ciddi həyəcan siqnalının çalınmasına əsas yaratmışdı”. Ali Məclisin Sədri qeyd edib ki, ali təhsilini başa vuran gənc Zərifə xanım 1949-cu ildə Naxçıvanda traxomaya qarşı mübarizəyə həsr edilmiş səyyar seminarlarda iştirak edib, bu sahədə əldə etdiyi elmi və praktik nailiyyətlərin tətbiqinə nail olub. Ali Məclisin Sədri Hippokratın “Gözəl davranış haqqında” əsərində yazdığı “İnsana sevgi olan yerdə sənətə də məhəbbət vardır” fikrini xatırladaraq, qeyd edib ki, akademik Zərifə xanım Əliyeva həkim kimi təkcə Hippokratın andına yox, həm də onun qoyduğu əxlaqi dəyərlərə sadiq qalıb, bu təlimi yeni bir elmi istiqamət səviyyəsində davam etdirib.

“Zərifə xanım əsl ana, vəfalı ömür-gün yoldaşı, ailəsinə qəlbdən bağlı olan insan idi. Ailə əsrlər boyu Azərbaycanda böyük mənəvi dayaq rolunu oynayıb. Dəyanətli şəxsiyyət və dərin zəka sahibi olan Zərifə xanım ümummilli lider Heydər Əliyevin ömür-gün yoldaşı kimi bu çətin, lakin şərəfli missiyanı da layiqincə yerinə yetirən, ulu öndərə etibarlı mənəvi dayaq olan Şəxsiyyət və Ana idi. Bir-birini heyrətamiz şəkildə tamamlayan bu iki parlaq şəxsiyyətin ailə həyatı müasir Azərbaycan cəmiyyəti üçün bir nümunə, milli dəyərlərimizə sədaqətin nadir örnəyidir”, - deyən Ali Məclisin Sədri qeyd edib ki, akademik Zərifə xanım Əliyeva Azərbaycana Heydər Əliyev siyasi kursunun layiqli davamçısı, dünya siyasətində öz nüfuzu və yeri olan İlham Əliyev kimi milli lider bəxş edən Ana kimi də unudulmazdır.

Sonra tədbirdə akademik Zərifə xanım Əliyevaya həsr olunmuş şeirlər söylənilib, Naxçıvan Dövlət Televiziyasının hazırladığı “Zirvələrə yüksələn zərif insan ömrü” televiziya filmi göstərilib.

Tədbir iştirakçıları görkəmli oftalmoloq-alim Zərifə xanım Əliyevaya həsr olunmuş sərgiyə də baxıblar. Yubiley tədbirinin sonunda Cəlil Məmmədquluzadə adına Naxçıvan Dövlət Musiqili Dram Teatrında görkəmli şair-dramaturq İslam Səfərlinin “Göz həkimi” pyesi əsasında hazırlanmış tamaşa göstərilib.

Atik, Mazlum.

Zaman.- 2013.- 17 aprel.- S. 6.