NDU-da “Zəncirlənmiş Prometey”in premyerası keçirilib

Naxçıvan Dövlət Universitetində (NDU) universitetin Tələbə Teatr Studiyasının səhnələşdirdiyi qədim yunan dramaturqu Esxilin “Zəncirlənmiş Prometey” faciəsinin premyerası olub.

Premyeradan öncə universitetin rektoru, akademik İsa Həbibbəyli çıxış edərək Azərbaycanın qədim və zəngin teatr tarixindən, müasir ənənələrindən danışıb. Bildirib ki, Azərbaycan Respublikasının Prezidenti İlham Əliyevin “Azərbaycanda peşəkar milli teatrın yaradılmasının 140 illiyinin qeyd olunması”, “Azərbaycan Respublikasında “Milli Teatr Günü”nün təsis edilməsi” haqqında 1 mart 2013-cü il tarixli sərəncamları milli mədəniyyətin, teatr sənətinin inkişafına göstərilən diqqət və qayğının bariz ifadəsidir. Universitetin on beş yaşlı Tələbə Teatr Studiyasının fəaliyyəti boyu qazandığı sənət uğurlarından danışan rektor, Azərbaycan məktəb teatrı tarixində ilk dəfə səhnələşdirilən tamaşanın ideya-bədii xüsusiyyətlərindən söz açıb.

Qeyd edək ki, qədim yunan mifologiyası əsasında yazılmış bu əsər Tələbə Teatr Studiyasının yaradıcısı, mənəvi hamisi olan universitetin rektoru, akademik İsa Həbibbəylinin ideyası və elmi məsləhətçilyi ilə səhnəyə vəsiqə qazanıb. Bu əsər Tələbə Teatr Studiyasının rəhbəri, İncəsənət fakültəsinin Teatr və mədəniyyətşünaslıq kafedrasının müdiri, Azərbaycan Respublikasının Əməkdar mədəniyyət işçisi Gülxarə Əhmədova və kafedranın aktyorluq sənəti ixtisası üzrə müəllimi Tofiq Seyidovun yozumunda müəyyən ixtisarlarla müasir milli təfəkkürün işığında uğurlu səhnə təcəssümünü tapıb. Tamaşadakı dekorasiya, butaforiya işi, qədim yunan mədəniyyətini əks etdirən eskiz və geyimlər, işıq effektləri əsərin qayəsini tarixilik zəminində, eyni zamanda müasirlik kontekstində, yeni düşüncənin işığında tamaşaçıya çatdırmağa uğurla xidmət edir. Musiqi tərtibatçıları Tofiq Seyidov və Elnur Rzayevin seçdiyi, Prometeyə həsr olunmuş qədim yunan musiqiləri uğurlu səhnə tərtibatını tamamlayaraq səhnədə mifik aura yaradır. Səhnə-zal arasında əlaqə də bunu qüvvətləndirən rejissor uğurudur. Naxçıvan MR Bəstəkarlar Təşkilatının sədri, Naxçıvan Muxtar Respublikasının Əməkdar incəsənət xadimi, kafedranın baş müəllimi Şəmsəddin Qasımovun skripka və xor üçün yazdığı musiqilər, səhnədə ilk dəfə A kapella xordan istifadə teatrın tarixində mühüm yenilikdir.

Tamaşanın ən böyük uğuru antik ədəbiyyat nümunəsi olan, gərgin və mürəkkəb psixoloji situasiyalarla zəngin, düşüncə, təfəkkür, ideyalar mübarizəsi olan mənzum bir dramda qeyri-professional aktyorların öz obrazları üzərində professionalcasına işləmələridir. Tamaşada baş rolu - Prometey obrazını İncəsənət fakültəsinin Teatr və mədəniyyətşünaslıq kafedrasının müəllimi Elnur Rzayev, Od Allahı dəmirçi Hefesti Tofiq Seyidov, Okeanidlərin böyüyünü Azərbaycan Respublikasının Əməkdar mədəniyyət işçisi Gülxarə Əhmədova, Çay Allahı İnaxın qızı İonu Aktyorluq ixtisası üzrə II kurs tələbəsi Çinarə Feyzullayeva, Ulu Qüvvət obrazını Pedaqoji fakültənin Bədən tərbiyəsi və idman ixtisasının II kurs tələbəsi Xatın Ağayeva, Hermest rolunu Tarix-filologiya fakültəsinin Azərbaycan ədəbiyyatı ixtisası üzrə III kurs tələbəsi Cavid Kazımbəyli uğurla ifa ediblər.

Tamaşadan sonra keçirilən müzakirədə sənət məbədi Naxçıvanda antik sənət incisinin səhnəyə qoyulması Azərbaycan mədəniyyət tarixində, Naxçıvan Dövlət Universitetinin incəsənət tarixində mühüm hadisə, Azərbaycanda peşəkar milli teatrın yaradılmasının 140 illiyinə qiymətli töhfə kimi dəyərləndirildi.

MAZLUM ATIK

Zaman.-2013.-20 aprel.-S.6.