RUSİYADA MӘTBUAT

Rusiyada hürriyәti-mәtbuat qatıq eymәsinin ağzı kimi getdikcә daralır.

Qәzet yazıçıları daha bilmirlәr ki, nә yazsınlar, yәni nә tövr yazsınlar ki, nә qәzetlәri bağlansın, nә iştraf versinlәr, nә dә ki gedib qazamatda yatsılar.

Bu binәvalar gündüz axşama kimi qәlәm әllәrindә, qabaqlarında bir parça kağız gözlәrini bir nöqtәyә zillәyib, başlarına gәlәn fikirlәri әvvәlcә özlәri öz senzorları әlinә verib, bir-bir keçirirlәr vә bunların hamısını xilafi-senzur bilib, nihadi-qәlbdәn dәrin bir ah çәkmәkdәn başqa heç bir çarә görmürlәr!

Yazıq mühәrrirlәr. Bu bәdbәxt müsәlman mühәrrirlәri ki, bir deyil, iki, üç, dörd, beş senzorlar qabağında pasovat elәmәyә mәcburdular!

Binәva mühәrrir qәlәmi әlә götürüb deyir: "Qoy siyasi bir mәsәlәdәn yazım". Bir qәdәr yazır ... sonra yazdığını oxuyub, öz-özünü mәzәmәt elәyir ki, nә qayırdığındır, rәhmәtliyin oğlu, arvad-uşağından әl çәkmәmisәn, ha!

Götürüb cırır, deyir nә elәmәk, qoy alәmi-islam dövlәtlәrindәn yazım. Yazır, bir dә görür ki, xeyr, sultan, İran padşahını, hamısını bir-biri ilә qatışdırıbdır ki, sәn ölәsәn, köhnәpәrәst müsәlmanlar oxusalar elә çığırarlar ki, onun sәsini Peterburqda da, İstambulda da vә hәlә desәn Tehranda da eşidәrlәr....

Görür ki, bu mәqalә dә baş tutmadı, götürür atır kәnara Deyir canım qoy, öz mәişәtimizdәncә yazım.... Yazır: "İdareyi-ruhaniyyәlәrimizin pozğunluğu...."

Dayanır. Görür ki, mәtlәbin dalısı çox xatalıdır. Bir ah çәkib yazır:

"Arvad mәsәlәsi" vә haman saat üstündәn bir qәlәm çәkib yazır: "Qoçubazlıq". Vә tez onun da üstündәn bir qәlәm çәkib yazır: "Murdar hәrәkәtlәrimiz." Vә tez onun da üstündәn bir qәlәm cızıb dayanır vә görür ki, daha öldürsәn dә başına özgә fikir girmir. Mühәrrir qәlәmi yerә qoyur vә kağızları da zibil sәbәtinә töküb, durur ayağa vә bir-iki dәfә ora-bura gәzişib deyir:

-- Bir dәli şeytan deyir, get, sövdagәr ol!