RӘFİQİMDӘN MӘKTUB

Peşiman olub bir allah bәndәsi ilә rәfiq olmuşam. Hәr dәfә, görürsәn, mәnә bir kağız yazıb, bir qulluq buyurur.

İndi dә yazır ki, "Әzizim Filankәs, tәvәqqә elәyirәm ki, bu göndәrdiklәrim kağızları aparıb, tezliklә poçta salasan, yoxsa vaxtı keçir, ancaq tәvәqqә elәyirәm ki, açıb oxumayasan, çünki içindә mәxfi sözlәr yazılıbdır".

Sözün doğrusu, bu sözlәr mәnә çox bәrk dәydi. Dedim indi ki, belәdir mәn mәn deyilәm sәnin kağızlarının hamısını oxumasam. O saat kağızların başını açıb gördüm nә?

Peterburqda Dövlәt dumasının müsәlman üzvlәrinә:

Getdin, gördün dum,

Nә elәyirsәn "şurum-burum"?

Otur yerindә ağzını bәrk-bәrk yum.

Bakıda müsәlman qoçularına:

Getdin, gördün parta-part

Nә elәyirsәn qaradavoy, saldat?

Piştovunu çıxart, sәn dә bir yandan at.

Qafqazda bir neçә mollaya oxşayanlara:

Getdin, gördün müsәlmanlar bir-birini qırır,

Nә eliyrsәn soruşub: kim kimi vurur?

Get yekinәn bozbaşın, gör necә keyfin durur!

Dünyada bütün müsәlman dövlәtlilәrinә:

Getdin, gördun Zәngәzurda ac,

Nә elәyirsәn axtarıb әlac?

Ciblәrini tutub, dabanına tüpür, qaç.

* * * * *

İstambulda Sultan hәzrәtlәrinә:

Getdin, gördün rәiyyәt

Nә elәyirsәn әdalәt vә hurriyyәt?

Yapış boğazından, ver әziyyәt.

* * * * *

İranda xanlara vә bәzi İran konsullarına:

Getdin, gördün hambal,

Nә elәyirsәn sorğu-sual?

Tez ol, başına bir qapaz sal.

* * * * *

Qafqazda bәzi müsәlman "başbilәnlәrinә": Getdin, gördün camaat, Nә elәyirsәn onlara itaәt? Bacar, cibin kәs o saat.

* * * * *

"İşto-mişto" bilәn müsәlmanlara:

Getdin, gördün müsәlman,

Nә elәyirsәn din, mәzhәb vә iman?

Bir danos yaz ki: "etot çelovek yaman".

"Evli-eşikli" müsәlman cavanlarına:

Getdin, gördün barışnә

Nә elәyirsәn, arvad, uşaq, yeznә?

....(Heyf ki, burasını oxuya bilmәdim, heç nә!)

Vәssәlam!

* * * * *

İndi biz bu kağızları açıb oxuduq vә rәfiqimin dә mәxfi işlәrini duyduq, aya, nә tövr elәyәk ki, bu kağızlar gedib öz yerlәrinә çatsın vә podloq işimizin başı tutulmasın??