BAKI DӘRYASI

Nә gözәlsәn, ey Bakı dәryası! Vә necә xoşbәxtsәn, ey Bakı dәryası! Ey Bakı dәryası, ey dәryaların seçilmişi! Ey göllәrin padşahı! Nә göl kimi gölsәn, ey Bakı dәryası, çünki yer üzündә sәnin kimi böyük göl yoxdu! Nә dәrya kimi dәryasan, ey Bakı dәryası, çünki çәkilib şir kimi durmusan kәnarda vә heç bir özgә dәryalara qarışmırsan, heç kәs ilә işin yoxdur! Nә gözәlsәn, ey Bakı dәryası!

Nә qәşәngsәn , ey Bakı dәryası! Heç bir vaxt olmayıb ki, sәn yadıma düşәsәn vә mәnim ürәyim qana dönmәyә! Hәmişә sәni yadıma salanda, ürәyim tab elәmir, hövsәlәm daralır, övqatım tәlx olur vә dәli-divanә kimi düşürәm yola vә Tiflisdәn bir baş gәlirәm sәnin tamaşana.

Nә sәfalısan, ey Bakı dәryası! Ey bivәfa Bakı dәryası, mәn gәlirәm sәnin ziyarәtinә, amma mәn bircә tikә sәndә etina görmürәm: lodkaların bir yana üzür, paraxodların bir yana çapır, lәpәlәrin bir yana çırpır, amma mәndәn heç xәbәrin olmur! Xәbәrin olmur ki, Mәcnun kimi gәlib durmuşam astananda vә sәnә tamaşa edirәm. Ey bivәfa Bakı dәryası, heç xәbәrin olmur ki, gәlib durmuşam "Qubernat" bağında vә İran qәriblәri kimi boynumu burub mat vә heyran gözümü sәnә dikib zövq vә şövq ilә tamaşa edirәm!

Ey Bakı dәryası, dәryaların padşahı Bakı dәryası, mәn dururam "Qubernat" bağında sәnә tamaşa elәyirәm. Amma mәndәn savayı da "Daş körpü"nün üstündә çox adam durur. Bunların çoxu әlli-altmış yaşında qırmızısaqqal vә ağsaqqal kәrbәlayı vә hacılardır.

Ey dәryaların seçilmişi Bakı dәryası, mәn dә "Qubernat" bağından tamaşa edirәm vә hәmin hacı-mәşәdilәr dә "Daş körpü"dәn tamaşa edirlәr.

Nә gözәlsәn, ey Bakı dәryası! Mәn dә tamaşa edirәm, hәmin mәşәdi vә hacılar da tamaşa edirlәr.

Amma tәk mәnәm sәnә aşiq, ey Bakı dәryası, tәk mәn sәnә tamaşa edirәm, sәnә tamaşa edәn tәk mәn oluram.

Ey gözәl Bakı dәryası, elә xәyal elәmә ki, hәmin hacı vә mәşәdilәr dә sәnә tamaşa elәyirlәr! Xeyr, xeyr, xeyr, elә xәyal elәmә. Tәk bircә mәnәm pәrvanә kimi sәnin başına dolanan!

Xeyr, xeyr, hacı vә mәşәdilәr sәnә tamaşa elәmirlәr. Tәk bircә mәnәm sәnә tamaşa edәn, ey sәfalı Bakı dәryası.

Pәs nәyә tamaşa edirlәr hacılar, kәrbәlayılar vә mәşәdilәr?

Dәryanın kәnarında urus balaları çimir!...

Nә sәfalısan, ey Bakı dәryası, nә gözәlsәn ey dәryaların padşahı!...

Dәli.

"Molla Nәsrәddin", 29 iyul, 1907, №28.