20 dekabr 2011-ci il tarixində Milli Kitabxanada görkəmli jurnalist, ustad redaktor və pedaqoq Nəsrulla İmanquliyevin anadan olmasının 100 illiyinə həsr olunmuş sərgi və “Kütləvi informasiya vasitələrində obyektivlik və operativlik, forma və məzmun vəhdəti prinsiplərinin təmin edilməsinin “Bakı” - “Baku” təcrübəsi” mövzusunda elmi konfrans keçirilmişdir.

14 dekabr 2011-ci il tarixində Milli Kitabxanada Azərbaycan Respublikasının Mədəniyyət və Turizm Nazirliyi, TÜRKSOY təşkilatı və Azərbaycan Milli Kitabxanası birgə görkəmli kitabxanaşünas alim, professor Abuzər Xələfovun 80 illik yubileyinə həsr olunmuş beynəlxalq elmi konfrans keçirilmişdir.

2011-ci il TÜRKSOY təşkilatı tərəfindən Tatarıstanın görkəmli şairi Abdulla Tuqay ili elan olunmuşdur. Bu məqsədlə Azərbaycan Respublikasının Mədəniyyət və Turizm Nazirliyi, TÜRKSOY təşkilatı və Azərbaycan Milli Kitabxanası birgə 13 dekabr 2011-ci il tarixində Abdulla Tuqayın 125 illiyinə həsr olunmuş beynəlxalq elmi konfrans keçirmişdir.

12 dekabr 2011-ci il tarixində ulu öndər, ümummilli lider Heydər Əliyevin xatirəsinə həsr olunmuş “Heydər Əliyev. Yaddaşlarda yaşayan lider” adlı sərginin açılış mərasimi olmuşdur.

Milli Kitabxananın direktor müavini Gülbəniz Səfərəliyeva 23-25 noyabr 2011-ci il tarixində Başqırdıstanın paytaxtı Ufa şəhərində keçirilən Əhməd Zəki Validi adına Başqırdıstan Milli Kitabxanasının yaranmasının 175 illik yubiley tədbirində və tədbir çərçivəsində keçirilən “Milli Kitabxanaların mədəni-sosioloji məkanda yeri və rolu” adlı regionlararası elmi-praktik konfransda iştirak etmişdir.

24 noyabr 2011-ci il tarixində Azərbaycan Dövlət Akademik Milli Dram Teatrının foyesində görkəmli Xalq yazıçısı Mirzə İbrahimovun 100 illik yubileyinə həsr olunmuş “Mirzə İbrahimov - 100” adlı geniş kitab sərgisi təşkil olunmuşdur.

Sərgidə Azərbaycan Milli Kitabxanasının fondunda mühafizə olunan 200-ə yaxın Azərbaycan, rus və ingilis dillərində kitablar nümayiş olunmuşdur.

Milli Kitabxananın direktor müavini Mələk xanım Hacıyeva 15-17 noyabr 2011-ci il tarixində Almatı şəhərində Qazaxıstan Respublikasının müstəqilliyinin 20 illik və Qazaxıstan Milli Kitabxanasının 80 illik yubiley tədbirlərində iştirak etmişdir.

16 noyabr 2011-ci il tarixində Milli Kitabxanada Milli Dirçəliş gününə həsr olunmuş kitab sərgisi açılmışdır. Bir həftə davam edəcək sərgidə Azərbaycan, rus və ingilis dillərində 100-ə yaxın ədəbiyyat nümayiş olunur.

M.F.Axundov adına Azərbaycan Milli Kitabxanasında 13 noyabr 2011-ci il tarixində Azərbaycanda Mərakeş Krallığının Mədəniyyət Günləri çərçivəsində Mərakeş Krallığının Mədəniyyət naziri cənab Binsalim Himmişin “Mədəniyyət və bəşəri inkişafa ümidlər” mövzusunda mühazirəsi keçirilmişdir.